ವಿದೇಶ

ಚಳಿಗಾಲದಲ್ಲಿ ಅಪ್ಪಿತಪ್ಪಿ ಇಲ್ಲಿಗೆ ಹೋದ್ರೆ ವಾಪಸ್​ ಬರೋದು ಹೆಣವಾಗಿ: ವಿಶ್ವದ 5 ಡೇಂಜರಸ್​ ಪ್ರದೇಶಗಳು! Dangerous Winter Regions

ವಿಶ್ವದ 5 ಚಳಿಗಾಲದ ಡೇಂಜರಸ್​ ಪ್ರದೇಶಗಳು
ವಿಶ್ವದ 5 ಚಳಿಗಾಲದ ಡೇಂಜರಸ್​ ಪ್ರದೇಶಗಳು
Published on: 

ಪ್ರಮುಖ ಮುಖ್ಯಾಂಶಗಳು

  • ಚಳಿಗಾಲದಲ್ಲಿ ಮನೆಯಿಂದ ಹೊರಗಡೆ ಬರಲು ಯಾರೊಬ್ಬರು ಇಚ್ಛಿಸುವುದಿಲ್ಲ
  • ಬ್ಲಾಂಕೆಟ್​ ಹೊದ್ದುಕೊಂಡು ಬೆಚ್ಚಗೆ ಮಲಗಿಬಿಡಬೇಕೆಂದು ಬಯಸುತ್ತಾರೆ
  • ಕೊರೆಯುವ ಚಳಿಯಲ್ಲಿ ಪ್ರಯಾಣ ಮಾಡುವುದು ಕೂಡ ಸುಲಭದ ಮಾತಲ್ಲ
  • ಚಳಿಗಾಲದಲ್ಲಿ ಯಾವುದೇ ಕಾರಣಕ್ಕೂ ಅತಿ ಚಳಿ ವಾತಾವರಣ ಇರುವ ಪ್ರದೇಶಕ್ಕೆ ಹೋಗಲೇಬಾರದು
Dangerous Winter Regions : ಚಳಿಗಾಲದಲ್ಲಿ ಮನೆಯಿಂದ ಹೊರಗಡೆ ಬರಲು ಯಾರೊಬ್ಬರು ಇಚ್ಛಿಸುವುದಿಲ್ಲ. ಬ್ಲಾಂಕೆಟ್​ ಹೊದ್ದುಕೊಂಡು ಬೆಚ್ಚಗೆ ಮಲಗಿಬಿಡಬೇಕೆಂದು ಬಯಸುತ್ತಾರೆ. ಕೊರೆಯುವ ಚಳಿಯಲ್ಲಿ ಪ್ರಯಾಣ ಮಾಡುವುದು ಕೂಡ ಸುಲಭದ ಮಾತಲ್ಲ. ಶೀತ ಗಾಳಿ ಏನಾದರೂ ಮೈಸೋಕಿದರೆ ಪ್ರಾಣವೇ ಹೋದ ರೀತಿ ಫೀಲ್​ ಆಗುತ್ತದೆ. ಅದರಲ್ಲೂ ಅತಿಯಾದ ಥಂಡಿ ವಾತಾವರಣ ಇರುವ ಪ್ರದೇಶಕ್ಕೆ ಹೋದರೆ ಆ ಮರಗಟ್ಟುವ ಚಳಿಯಲ್ಲಿ ಹೃದಯ ಬಡಿತವೇ ನಿಂತು ಹೋಯಿತೇನೋ ಅನಿಸುತ್ತದೆ. 
ಚಳಿಗಾಲದಲ್ಲಿ ಯಾವುದೇ ಕಾರಣಕ್ಕೂ ಅತಿ ಚಳಿ ವಾತಾವರಣ ಇರುವ ಪ್ರದೇಶಕ್ಕೆ ಹೋಗಲೇಬಾರದು. ಅದರಲ್ಲೂ ವಿಶ್ವದ ಈ ಐದು ಪ್ರದೇಶಗಳಿಗಂತೂ ಹೋಗಬಾರದು. ಹೋದರೆ, ಅದು ಯಮ ಲೋಕಕ್ಕೆ ಟಿಕೆಟ್​ ತೆಗೆದುಕೊಂಡಂತೆ. ಏಕೆಂದರೆ, ಅಲ್ಲಿನ ಮರಗಟ್ಟುವ ಚಳಿ ಪ್ರಾಣವನ್ನೇ ನಿಲ್ಲಿಸಿಬಿಡುತ್ತದೆ. ಹಾಗಾದರೆ, ಚಳಿಗಾಲದಲ್ಲಿ ಅತ್ಯಂತ ಅಪಾಯಕಾರಿ ಮತ್ತು ಪ್ರಾಣಾಂತಿಕ ಎನಿಸಿಕೊಂಡಿರುವ ವಿಶ್ವದ 5 ಪ್ರಮುಖ ಪ್ರದೇಶಗಳ ಬಗ್ಗೆ ನಾವೀಗ ತಿಳಿದುಕೊಳ್ಳೋಣ. 

1. ಓಮಿಯಾಕಾನ್, ರಷ್ಯಾ (Oymyakon, Russia)

ಇದು ವಿಶ್ವದ ಅತ್ಯಂತ ತಂಪಾದ ಜನವಸತಿ ಪ್ರದೇಶವಾಗಿದೆ. ಇಲ್ಲಿ ಚಳಿಗಾಲದಲ್ಲಿ ತಾಪಮಾನವು -60°C ಗಿಂತಲೂ ಕೆಳಕ್ಕೆ ಇಳಿಯುತ್ತದೆ. ಇಲ್ಲಿ ಗಾಳಿಯಲ್ಲಿ ತೇವಾಂಶ ಕಡಿಮೆ ಇರುವುದರಿಂದ, ಉಸಿರಾಡುವಾಗ ಶ್ವಾಸಕೋಶದ ಒಳಗೆ ಐಸ್ ಹರಳುಗಳು ಉಂಟಾಗುವ ಅಪಾಯವಿರುತ್ತದೆ. ವಿಪರೀತ ಚಳಿಯಿಂದಾಗಿ ಕಾರಿನ ಇಂಜಿನ್‌ಗಳು ಮತ್ತು ನೀರಿನ ಪೈಪ್‌ಗಳು ಕ್ಷಣಾರ್ಧದಲ್ಲಿ ಹೆಪ್ಪುಗಟ್ಟುತ್ತವೆ.

2. ವೋಸ್ಟಾಕ್ ಸ್ಟೇಷನ್, ಅಂಟಾರ್ಕ್ಟಿಕಾ (Vostok Station, Antarctica)

ಇದು ಭೂಮಿಯ ಮೇಲಿನ ಅತಿ ಕಡಿಮೆ ತಾಪಮಾನ ದಾಖಲಾಗಿರುವ ಸ್ಥಳ. ಇಲ್ಲಿ ತಾಪಮಾನವು ಸುಮಾರು -89.2°C ವರೆಗೂ ತಲುಪುತ್ತದೆ. ಇಲ್ಲಿ ಮನುಷ್ಯರು ಸಾಮಾನ್ಯ ಸ್ಥಿತಿಯಲ್ಲಿ ಬದುಕಲು ಅಸಾಧ್ಯ. ವಿಪರೀತ ಗಾಳಿ ಮತ್ತು ಶೂನ್ಯ ತೇವಾಂಶದಿಂದಾಗಿ ಚರ್ಮವು ಸೆಕೆಂಡುಗಳಲ್ಲಿ ಸುಟ್ಟಂತಾಗುತ್ತದೆ. ಈ ಪ್ರದೇಶ ಕೇವಲ ವಿಜ್ಞಾನಿಗಳ ಸಂಶೋಧನೆಗೆ ಮಾತ್ರ ಸೀಮಿತವಾಗಿದೆ.

3. ಮೌಂಟ್ ವಾಷಿಂಗ್ಟನ್, ಅಮೆರಿಕ (Mount Washington, USA)

ಇದನ್ನು 'ವಿಶ್ವದ ಅತ್ಯಂತ ಕೆಟ್ಟ ಹವಾಮಾನ' ಹೊಂದಿರುವ ಸ್ಥಳ ಎಂದು ಕರೆಯಲಾಗುತ್ತದೆ. ಇಲ್ಲಿ ಚಳಿಗಾಲದಲ್ಲಿ ಗಾಳಿಯ ವೇಗ ಗಂಟೆಗೆ 372 ಕಿ.ಮೀ. ಗಿಂತಲೂ ಹೆಚ್ಚಿರುತ್ತದೆ. ಇಲ್ಲಿನ ವಿಪರೀತ ಗಾಳಿ ಮತ್ತು ಹಿಮಪಾತವು ಮನುಷ್ಯರನ್ನು ಎತ್ತಿ ಎಸೆಯುವಷ್ಟು ಶಕ್ತಿಯುತವಾಗಿರುತ್ತದೆ. ಇಲ್ಲಿನ ಚಳಿಗಿಂತಲೂ ಪ್ರಚಂಡ ವೇಗದ ಗಾಳಿಯೇ ಹೆಚ್ಚು ಅಪಾಯಕಾರಿ. ಗಾಳಿಗೆ ಸಿಲುಕಿದರೆ ಪ್ರಾಣವೇ ಹೋಗುತ್ತದೆ.

4. ಯಾಕುಟ್ಸ್ಕ್, ರಷ್ಯಾ (Yakutsk, Russia)

ಇದು ವಿಶ್ವದ ಅತ್ಯಂತ ತಂಪಾದ ನಗರವಾಗಿದೆ. ಇಲ್ಲಿ ಸುಮಾರು 3 ಲಕ್ಷಕ್ಕೂ ಹೆಚ್ಚು ಜನ ವಾಸಿಸುತ್ತಿದ್ದರು ಕೂಡ ಚಳಿಗಾಲದಲ್ಲಿ ಜೀವನ ಅತ್ಯಂತ ಕಠಿಣವಾಗಿರುತ್ತದೆ. ತಾಪಮಾನವು -50°C ಗೆ ಇಳಿದಾಗ ಕಣ್ಣಿನ ರೆಪ್ಪೆಗಳು ಕೂಡ ಹೆಪ್ಪುಗಟ್ಟುತ್ತವೆ. ಇಲ್ಲಿ ಜನರು ತಮ್ಮ ವಾಹನಗಳನ್ನು ಚಳಿಗಾಲದ ಪೂರ್ತಿ ಆಫ್ ಮಾಡದೆ ಚಾಲನೆಯಲ್ಲಿಯೇ ಇಟ್ಟಿರುತ್ತಾರೆ. ಏಕೆಂದರೆ, ಒಮ್ಮೆ ಇಂಜಿನ್ ಆಫ್ ಮಾಡಿದರೆ ಮತ್ತೆ ಸ್ಟಾರ್ಟ್ ಮಾಡುವುದು ಅಸಾಧ್ಯ.

5. ಡೆನಾಲಿ ಪರ್ವತ, ಅಲಾಸ್ಕಾ (Mount Denali, Alaska)

ಉತ್ತರ ಅಮೆರಿಕಾದ ಅತಿ ಎತ್ತರದ ಶಿಖರವಾದ ಡೆನಾಲಿ, ಚಳಿಗಾಲದಲ್ಲಿ ಸಾವಿನ ಮನೆಯಾಗಿ ಬದಲಾಗುತ್ತದೆ. ಇಲ್ಲಿನ ತಾಪಮಾನ ಮತ್ತು ಗಾಳಿಯ ಒತ್ತಡವು ಮನುಷ್ಯರ ದೇಹದ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ. ಇಲ್ಲಿ ವರ್ಷಪೂರ್ತಿ ಹಿಮಪಾತ ಸಂಭವಿಸುವ ಅಪಾಯವಿರುತ್ತದೆ. ಇದು ಚಳಿಗಾಲದಲ್ಲಿ ಮತ್ತಷ್ಟು ಭಯಾನಕವಾಗಿರುತ್ತದೆ.
ಅಂದಹಾಗೆ, ಈ ಮೇಲಿನ ಐದೂ ಸ್ಥಳಗಳಲ್ಲಿ ಚಳಿಗಾಲದ ಸಮಯದಲ್ಲಿ ಹವಾಮಾನವು ಎಷ್ಟೊಂದು ಕಠಿಣವಾಗಿರುತ್ತದೆ ಎಂದರೆ, ಒಂದು ಸಣ್ಣ ತಪ್ಪು ಕೂಡ ಕ್ಷಣಾರ್ಧದಲ್ಲಿ ಜೀವಕ್ಕೆ ಸಂಚಕಾರ ತರಬಲ್ಲದು.
Winter
Kannada News
Vijayavani News
Winter Season
dangerous winter regions
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net