ಪಾಕ್​ ಮೇಲೆ ತಾಲಿಬಾನ್ ಪಡೆಗಳ ದಿಢೀರ್ ವೈಮಾನಿಕ ದಾಳಿ: ಉಲ್ಟಾ ಹೊಡೆದ ಮೊಂಡಾಟ; ಡುರಾಂಡ್ ಲೈನ್ ಗಡಿಯಲ್ಲಿ ಯುದ್ಧದ ಭೀತಿ! Afghanistan Air strikes Pakistan

ಅಫ್ಘಾನಿಸ್ತಾನದಲ್ಲಿ ಅಧಿಕಾರ ನಡೆಸುತ್ತಿರುವ ಇಸ್ಲಾಮಿಕ್ ಎಮಿರೇಟ್ಸ್ ವಾಯುಪಡೆಯು ಪಾಕ್​ನ ಬಲೂಚಿಸ್ತಾನ ಮತ್ತು ಖೈಬರ್ ಪಖ್ತುನ್ಖ್ವಾ ಪ್ರಾಂತ್ಯಗಳನ್ನು ಗುರಿಯಾಗಿಸಿಕೊಂಡು ಈ ದಾಳಿ ನಡೆಸಿದೆ. ಪಾಕಿಸ್ತಾನದ ಗಡಿಯೊಳಗಿರುವ ಕಿಲ್ಲಾ ಅಬ್ದುಲ್ಲಾ ಜಿಲ್ಲೆಯ ಗುಲಿಸ್ತಾನ್ ಪ್ರದೇಶ, ಚಾಗೈ ಜಿಲ್ಲೆಯ ಶಕರ್ ಅಬ್ ಜಂಗಲ್ ಗರ್ದಿ ಮತ್ತು ಖೈಬರ್ ಪಖ್ತುನ್ಖ್ವಾದ ಓರಕ್ಜೈ ಪ್ರದೇಶಗಳಲ್ಲಿರುವ ಉಗ್ರರ ನೆಲೆಗಳ ಮೇಲೆ ನಿಖರ ದಾಳಿ ನಡೆಸಿ ಧ್ವಂಸಗೊಳಿಸಲಾಗಿದೆ ಎಂದು ಕಾಬುಲ್ ತಿಳಿಸಿದೆ.

ವಾಸ್ತವವಾಗಿ, ಪಾಕಿಸ್ತಾನದ ಸೇನೆಯು ಇತ್ತೀಚೆಗೆ ಅಫ್ಘಾನಿಸ್ತಾನದ ಗಡಿಯೊಳಗಿನ ನಾಗರಿಕ ವಸಾಹತುಗಳ ಮೇಲೆ ವೈಮಾನಿಕ ದಾಳಿ ನಡೆಸಿತ್ತು. ಈ ದಾಳಿಯಲ್ಲಿ ಇಸ್ಲಾಮಾಬಾದ್ ಉಗ್ರರ ಮೂಲಸೌಕರ್ಯಗಳನ್ನು ಧ್ವಂಸಗೊಳಿಸಿರುವುದಾಗಿ ಹೇಳಿಕೊಂಡಿತ್ತಾದರೂ, ಅಫ್ಘಾನ್ ಸರ್ಕಾರ ಮಾತ್ರ ಪಾಕ್ ದಾಳಿಗೆ ಮಹಿಳೆಯರು ಮತ್ತು ಮಕ್ಕಳು ಸೇರಿದಂತೆ ಹಲವಾರು ಅಮಾಯಕ ನಾಗರಿಕರು ಬಲಿಯಾಗಿದ್ದಾರೆ ಎಂದು ಗಂಭೀರ ಆರೋಪ ಮಾಡಿತ್ತು. ಇದರ ಬೆನ್ನಲ್ಲೇ ಈಗ ತಾಲಿಬಾನ್ ಪಡೆಗಳು ಪಾಕಿಸ್ತಾನದ ಗಡಿಯೊಳಗೆ ನುಗ್ಗಿ ಪ್ರತೀಕಾರ ತೀರಿಸಿಕೊಂಡಿವೆ.

ವಿವಾದಿತ ಡುರಾಂಡ್ ಲೈನ್ ಗಡಿಯಲ್ಲಿ ಇಕ್ಕೆಲಗಳೂ ಪರಸ್ಪರ ಆರೋಪ-ಪ್ರತ್ಯಾರೋಪಗಳಲ್ಲಿ ತೊಡಗಿವೆ. ಪಾಕಿಸ್ತಾನದಲ್ಲಿ ನಿರಂತರವಾಗಿ ಸ್ಫೋಟ ನಡೆಸುತ್ತಿರುವ 'ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ್ (TTP) ಉಗ್ರರಿಗೆ ಅಫ್ಘಾನಿಸ್ತಾನ ಆಶ್ರಯ ನೀಡಿದೆ ಎಂದು ಪಾಕಿಸ್ತಾನ ದೂರುತ್ತಿದ್ದರೆ, ಅಫ್ಘಾನ್ ಸರ್ಕಾರ ಇದನ್ನು ಸಾರಾಸಗಟಾಗಿ ತಿರಸ್ಕರಿಸಿದೆ.

ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಇತ್ತೀಚೆಗೆ ಆತಂಕಕಾರಿ ಹೇಳಿಕೆಯೊಂದನ್ನು ನೀಡಿದ್ದು, ತಾಲಿಬಾನ್ ಆಡಳಿತದೊಂದಿಗೆ ಗಡಿ ಸಮಸ್ಯೆ ಬಗೆಹರಿಸಲು ನಡೆಸಿದ ಎಲ್ಲಾ ರಾಜತಾಂತ್ರಿಕ ಮಾತುಕತೆಗಳು ಸಂಪೂರ್ಣವಾಗಿ ವಿಫಲವಾಗಿವೆ ಎಂದು ಘೋಷಿಸಿದ್ದಾರೆ. ಕಾಬೂಲ್ ಸರ್ಕಾರವು ಭಾರತ ವಿರೋಧಿ ಮತ್ತು ಪಾಕ್ ವಿರೋಧಿ ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳಲು ಹಿಂಜರಿಯುತ್ತಿರುವುದೇ ಈ ಬಿಕ್ಕಟ್ಟಿಗೆ ಕಾರಣ ಎಂದು ಇಸ್ಲಾಮಾಬಾದ್ ಅಸಮಾಧಾನ ವ್ಯಕ್ತಪಡಿಸಿದೆ.

ಗಡಿಯಲ್ಲಿ ಉಂಟಾಗಿರುವ ತೀವ್ರ ಉದ್ವಿಗ್ನತೆಯಿಂದಾಗಿ ಉಭಯ ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧಗಳು ಮಾತ್ರವಲ್ಲದೆ ಆರ್ಥಿಕ ವಹಿವಾಟುಗಳೂ ಸಂಪೂರ್ಣವಾಗಿ ಹಳಿತಪ್ಪಿವೆ. ಒಂದು ಕಾಲದಲ್ಲಿ ಈ ಪ್ರಾಂತ್ಯದ ಪ್ರಮುಖ ವಾಣಿಜ್ಯ ಹೆದ್ದಾರಿಯಾಗಿದ್ದ ಗಡಿ ರಸ್ತೆಗಳನ್ನು ಪದೇಪದೆ ಮುಚ್ಚಲಾಗುತ್ತಿದೆ. ಭದ್ರತಾ ನಿರ್ಬಂಧಗಳು ಮತ್ತು ಸರಣಿ ಸೇನಾ ಘರ್ಷಣೆಗಳಿಂದಾಗಿ ಗಡಿ ದಾಟುವ ಟ್ರಕ್‌ಗಳ ಓಡಾಟ ನಿಂತುಹೋಗಿದ್ದು, ಸ್ಥಳೀಯ ಉದ್ಯಮಿಗಳು, ಸಾರಿಗೆ ಚಾಲಕರು ಮತ್ತು ಗಡಿ ಭಾಗದ ಮಾರುಕಟ್ಟೆಗಳು ತೀವ್ರ ನಷ್ಟ ಅನುಭವಿಸುತ್ತಿವೆ.

ರಾಜತಾಂತ್ರಿಕ ಹಾದಿಗಳು ಬಹುತೇಕ ಮುಚ್ಚಿಹೋಗಿರುವುದರಿಂದ ಈ ಪ್ರಾದೇಶಿಕ ಸಂಘರ್ಷವು ಮತ್ತಷ್ಟು ಅಪಾಯಕಾರಿ ಹಂತಕ್ಕೆ ತಲುಪುವ ಸಾಧ್ಯತೆಯಿದೆ ಎಂದು ಜಾಗತಿಕ ರಾಜಕೀಯ ವಿಶ್ಲೇಷಕರು ಆತಂಕ ವ್ಯಕ್ತಪಡಿಸಿದ್ದಾರೆ. ಸದ್ಯಕ್ಕೆ ಕಾಬೂಲ್ ಆಗಲಿ ಅಥವಾ ಇಸ್ಲಾಮಾಬಾದ್ ಆಗಲಿ ಶಾಂತಿ ಕಾಪಾಡುವ ಯಾವುದೇ ಲಕ್ಷಣಗಳನ್ನು ತೋರಿಸುತ್ತಿಲ್ಲ. ಇದು ಇಡೀ ದಕ್ಷಿಣ ಏಷ್ಯಾದ ಭದ್ರತೆಗೆ ಹೊಸದೊಂದು ತಲೆನೋವಾಗಿ ಪರಿಣಮಿಸಿದೆ,(ಏಜೆನ್ಸೀಸ್​).