ಮೈದಾನದಲ್ಲಿ ‘ಕೈ’ ಕೊಡದ ಸೂರ್ಯ; ಹಸ್ತಲಾಘವ ನಿರಾಕರಿಸಿ ಪಾಕ್​ಗೆ ಶಾಕ್ ಕೊಟ್ಟ ಟೀಂ ಇಂಡಿಯಾ ನಾಯಕ | INDvsPAK

ಈ ಹಸ್ತಲಾಘವ ನಿರಾಕರಣೆಯ ವಿವಾದವು ನಿನ್ನೆಯದ್ದಲ್ಲ. 2025ರ ಏಷ್ಯಾ ಕಪ್‌ ವೇಳೆಯೇ ಭಾರತ ತಂಡವು ಪಾಕಿಸ್ತಾನಿ ಆಟಗಾರರೊಂದಿಗೆ ಸಂವಹನ ಅಥವಾ ಹಸ್ತಲಾಘವ ನಡೆಸದಿರಲು ನಿರ್ಧರಿಸಿತ್ತು. ಇದಕ್ಕೆ ಪ್ರಮುಖ ಕಾರಣ ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ನಡೆದ ಭೀಕರ ಭಯೋತ್ಪಾದಕ ದಾಳಿಯಾಗಿತ್ತು.

ಈ ಬಗ್ಗೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸೂರ್ಯಕುಮಾರ್ ಯಾದವ್, ನಮ್ಮ ಸೈನಿಕರ ರಕ್ತ ಸಾಕ್ಷಿಯಾದಾಗ ಮೈದಾನದಲ್ಲಿ ನಾವು ಸೌಜನ್ಯ ತೋರಲು ಸಾಧ್ಯವಿಲ್ಲ. ತಂಡದ ನಿಲುವು ಈ ಹಿಂದಿನಂತೆಯೇ ಮುಂದುವರಿಯಲಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಪಂದ್ಯಕ್ಕೂ ಮುನ್ನವೇ ಹಸ್ತಲಾಘವದ ಕುರಿತು ಕೇಳಲಾದ ಪ್ರಶ್ನೆಗೆ ಸೂರ್ಯಕುಮಾರ್ ಕುತೂಹಲಕಾರಿ ಉತ್ತರ ನೀಡಿದ್ದರು. ನೀವು ಮುಂದಿನ 24 ಗಂಟೆಗಳಲ್ಲಿ ಏನು ನಡೆಯಲಿದೆ ಎಂಬುದನ್ನು ನೋಡಿ. ಚೆನ್ನಾಗಿ ಊಟ ಮಾಡಿ, ನೆಮ್ಮದಿಯಾಗಿ ನಿದ್ದೆ ಮಾಡಿ, ನಾಳೆ ಎಲ್ಲವೂ ತಿಳಿಯಲಿದೆ ಎಂದು ತುಂಟತನದ ನಗು ಬೀರಿದ್ದರು. ಅದರಂತೆಯೇ ಮೈದಾನದಲ್ಲಿ ಪಾಕ್ ನಾಯಕನಿಗೆ ಕೈ ಕೊಡದೆ ತಮ್ಮ ನಿರ್ಧಾರವನ್ನು ಜಗತ್ತಿಗೆ ಸಾರಿದ್ದಾರೆ.

ಭಾರತ ತಂಡದ ಈ ನಡೆಯನ್ನು ಮಾಜಿ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್ ಕಟುವಾಗಿ ಟೀಕಿಸಿದ್ದಾರೆ. ಈ ಕುರಿತು X ನಲ್ಲಿ ಪೋಸ್ಟ್ ಮಾಡಿರುವ ಸಂಜಯ್​, ಭಾರತದ ನಡೆಯನ್ನು ಬಾಲಿಶ ಎಂದು ಕರೆದಿದ್ದಾರೆ.

ಭಾರತ ಆರಂಭಿಸಿರುವ ಈ ಹಸ್ತಲಾಘವ ಇಲ್ಲ ಎಂಬ ಪದ್ಧತಿ ಅತ್ಯಂತ ಬಾಲಿಶವಾದುದು. ನಮ್ಮಂತಹ ಶ್ರೇಷ್ಠ ದೇಶಕ್ಕೆ ಇದು ಶೋಭೆ ತರುವುದಿಲ್ಲ. ಆಟದ ಸ್ಪಿರಿಟ್‌ನಲ್ಲಿ ಆಡುವುದಾದರೆ ಸರಿಯಾಗಿ ಆಡಿ, ಇಲ್ಲದಿದ್ದರೆ ಪಾಕಿಸ್ತಾನದ ವಿರುದ್ಧ ಪಂದ್ಯಗಳನ್ನೇ ಆಡುವುದನ್ನು ನಿಲ್ಲಿಸಿ ಎಂದು ಮಂಜ್ರೇಕರ್ ಕಿಡಿಕಾರಿದ್ದಾರೆ.

ಮಂಜ್ರೇಕರ್ ಅವರ ಈ ಹೇಳಿಕೆಯು ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧದ ಚರ್ಚೆಗೆ ಗ್ರಾಸವಾಗಿದೆ. ಒಂದು ವರ್ಗದ ಜನರು ಕ್ರೀಡೆ ಮತ್ತು ರಾಜಕೀಯವನ್ನು ಬೆರೆಸಬಾರದು ಎನ್ನುತ್ತಿದ್ದರೆ, ಬಹುತೇಕ ಅಭಿಮಾನಿಗಳು ಸೂರ್ಯಕುಮಾರ್ ಅವರ ದೇಶಪ್ರೇಮದ ನಿಲುವನ್ನು ಬೆಂಬಲಿಸುತ್ತಿದ್ದಾರೆ,(ಏಜೆನ್ಸೀಸ್​).