ಸೂರ್ಯನ ಮೇಲೆ ಬಿದ್ದ ಮನುಷ್ಯ!? ಇಡೀ ಜಗತ್ತಿನಲ್ಲಿ ಅಸ್ತಿತ್ವದಲ್ಲಿರುವ ಒಂದೇ ಒಂದು ಮಹಾ ದೃಶ್ಯ...The Fall Of Icarus

The Fall Of Icarus ​: ಕಳೆದ ಕೆಲವು ದಿನಗಳಿಂದ ಸಾಮಾಜಿಕ ಜಾಲತಾಣದಲ್ಲಿ ಒಂದು ಫೋಟೋ ಸಿಕ್ಕಾಪಟ್ಟೆ ವೈರಲ್​ ಆಗುತ್ತಿದೆ. ಆ ಫೋಟೋ ನೋಡಿದವರು ಒಂದು ಕ್ಷಣ ತಮ್ಮ ಕಣ್ಣುಗಳನ್ನು ತಾವೇ ನಂಬುತ್ತಿಲ್ಲ. ಅಂಥದ್ದೇನಿದೆ ಆ ಫೋಟೋದಲ್ಲಿ ಎಂದು ನೀವು ಪ್ರಶ್ನೆ ಮಾಡಬಹುದು. ಏನಿದೆ ಅಂದರೆ, ಫೋಟೋಗ್ರಾಫರ್​ ಒಬ್ಬರ ಕೈಚಳಕ ಆ ಫೋಟೋದಲ್ಲಿ ಅಡಗಿದೆ. ಕ್ಯಾಮೆರಾ ಕಣ್ಣಲ್ಲಿ ಏನೆಲ್ಲ ಅದ್ಭುತಗಳನ್ನು ಸೃಷ್ಟಿ ಮಾಡಬಹುದು ಅನ್ನೋದಕ್ಕೆ ವೈರಲ್​ ಫೋಟೋ ತಾಜಾ ಸಾಕ್ಷಿಯಾಗಿದೆ. 

ಹೌದು, ವೈರಲ್​ ಫೋಟೋದಲ್ಲಿ ಮನುಷ್ಯನೊಬ್ಬ ಸೌರ ಮಂಡಲದ ಅಧಿಪತಿ ಸೂರ್ಯನ ಮೇಲೆ ಬೀಳುತ್ತಿರುವಂತೆ ಭಾಸವಾಗುತ್ತದೆ. ಸೂರ್ಯ ಉರಿಯುವ ಬೆಂಕಿ ಚೆಂಡು ಅನ್ನೋದು ಎಲ್ಲರಿಗೂ ಗೊತ್ತಿದೆ. ಅಲ್ಲದೆ, ನಮ್ಮ ಭೂಮಿಯಿಂದ ಸೂರ್ಯ ಬರೋಬ್ಬರಿ 149.59 ಮಿಲಿಯನ್​ ಕಿ.ಮೀ ದೂರದಲ್ಲಿದ್ದಾನೆ. ಹೀಗಿರುವಾಗ ಅಷ್ಟೊಂದು ಸ್ಪಷ್ಟವಾಗಿ ಫೋಟೋ ಸೆರೆ ಹಿಡಿಯಲು ಹೇಗೆ ಸಾಧ್ಯವಾಯಿತು ಅಂತ ವೈರಲ್​ ಫೋಟೋ ನೋಡಿದವರು ಪ್ರಶ್ನೆ ಮಾಡುತ್ತಿದ್ದಾರೆ.

ವಿವರಗಳಿಗೆ ಹೋಗುವುದಾದರೆ, ಈ ಅದ್ಭುತ ಫೋಟೋವನ್ನು ಆಂಡ್ರಿವ್​ ಮೆಕಾರ್ಥಿ ಎಂಬ ಫೋಟೋಗ್ರಾಫರ್​ ಕ್ಲಿಕ್ಕಿಸಿದ್ದಾರೆ. ಇವರು ಅಮೆರಿಕದ ಅರಿಝೋನಾ ಮೂಲದವರು. ನವೆಂಬರ್​ 8ರ ಶನಿವಾರದಂದು ಈ ಫೋಟೋವನ್ನು ಕ್ಲಿಕ್ಕಿಸಲಾಗಿದೆ. ಸಂಗೀತಗಾರ ಮತ್ತು ಸ್ಕೈ ಡೈವರ್ ಗೇಬ್ರಿಯಲ್​ ಬ್ರೌನ್​ ಎಂಬುವರು ಸಣ್ಣ ಪ್ರೊಪೆಲ್ಲರ್​ ಸಾಮರ್ಥ್ಯದ ವಿಮಾನದಿಂದ ಸುಮಾರು 3500 ಅಡಿ ಅಥವಾ 1070 ಮೀಟರ್​ ಎತ್ತರದಿಂದ ಜಿಗಿಯುವಾಗ ಅದೇ ಸಮಯದಲ್ಲಿ ಸುಮಾರು 8000  ಅಡಿ ಅಥವಾ 2440 ಮೀಟರ್ ಅಂತರದಿಂದ ಮೆಕಾರ್ಥಿ ಅವರು ಈ ಫೋಟೋವನ್ನು ಕ್ಲಿಕ್ಕಿಸಿದ್ದಾರೆ. ಗೇಬ್ರಿಯಲ್​ ಅವರು ಸೂರ್ಯ ಮುಂದೆ ಹಾದು ಹೋಗುವ ಸಮಯಕ್ಕೆ ಸರಿಯಾಗಿ ಈ ಅದ್ಭುತ ಫೋಟೋವನ್ನು ಕ್ಲಿಕ್ಕಿಸಲಾಗಿದೆ. 

ಫೋಟೋಗಳನ್ನು ತಮ್ಮ ಎಕ್ಸ್​ ಖಾತೆಯಲ್ಲಿ ಹಂಚಿಕೊಂಡಿರುವ ಮೆಕಾರ್ಥಿ, "ದಿ ಫಾಲ್ ಆಫ್ ಇಕಾರಸ್​" ಎಂದು ಕರೆಯಲ್ಪಡುವ ಈ ಫೋಟೋಗೆ ಸಾಕಷ್ಟು ಪ್ಲಾನಿಂಗ್​ ಅಗತ್ಯವಿತ್ತು. ನನಗೆ ತಿಳಿದಿರುವತೆ ಈ ಫೋಟೋ ಅಸ್ತಿತ್ವದಲ್ಲಿ ಇರುವ ಮೊದಲ ಫೋಟೋ ಎಂದು ಬರೆದುಕೊಂಡಿದ್ದಾರೆ. ಅಂದಹಾಗೆ, ಮೆಕಾರ್ಥಿ ಅವರು ತಮ್ಮ ಟ್ವೀಟ್​ನಲ್ಲಿ ಇಕಾರಸ್​ ಎಂಬ ಪದವನ್ನು ಬಳಸಿದ್ದಾರೆ. ಅದು ಓರ್ವ ವ್ಯಕ್ತಿಯ ಹೆಸರು. ಗ್ರೀಕ್ ಪುರಾಣಗಳಲ್ಲಿ ಬರುವ ಡೇಡಾಲಸ್‌ನ ಮಗನಾದ ಇಕಾರಸ್​ನ ಹೆಸರು. ಸೂರ್ಯನ ಹತ್ತಿರ ಹಾರಾಡಬಾರದು ಎಂಬ ತನ್ನ ತಂದೆಯ ಎಚ್ಚರಿಕೆಯನ್ನು ನಿರ್ಲಕ್ಷಿಸಿ, ಮೇಣ ಮತ್ತು ಗರಿಗಳ ರೆಕ್ಕೆಗಳೊಂದಿಗೆ ಹಾರುತ್ತಾ ಸಾವಿಗೆ ಹಾರಿದ ಪ್ರಸಿದ್ಧ ವ್ಯಕ್ತಿಯೇ ಈ ಇಕಾರಸ್​ ಎಂದು ಹೇಳಲಾಗಿದೆ. 

ಇದಕ್ಕಾಗಿಯೇ ನಾವು ನಿಜವಾದ ಮಾನವ ನಿರ್ಮಿತ ಕಲೆಯನ್ನು ಬೆಂಬಲಿಸುತ್ತಲೇ ಇರಬೇಕು. ಈ ಫೋಟೋ ತುಂಬಾ ಸುಂದರವಾಗಿದೆ ಎಂದು ನೆಟ್ಟಿಗರೊಬ್ಬರು ಕಾಮೆಂಟ್​ ಮಾಡಿದರೆ, ಮತ್ತೊಬ್ಬರು, ಇದು ಸಂಪೂರ್ಣವಾಗಿ ಅದ್ಭುತವಾಗಿದೆ. ಇದಕ್ಕಾಗಿ ತುಂಬಾ ಶ್ರಮ ಪಡಲಾಗಿದೆ. ನಿಮಗೆ ಅಭಿನಂದನೆಗಳು ಎಂದಿದ್ದಾರೆ. ‘

ಅಂದಹಾಗೆ, ಮೆಕಾರ್ಥಿ ಅವರು ಸೂರ್ಯನ ಅದ್ಭುತ ಚಿತ್ರಗಳನ್ನು ಸೆರೆಹಿಡಿದು ವೈರಲ್ ಆಗುತ್ತಿರುವುದು ಇದೇ ಮೊದಲೇನಲ್ಲ. ಈ ವರ್ಷದ ಆರಂಭದಲ್ಲಿ, ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ಐಎಸ್‌ಎಸ್) ಸೂರ್ಯನ ಮುಂದೆ ಹಾದುಹೋಗುವುದನ್ನು ಸೆರೆಹಿಡಿದಿದ್ದರು. ಆಗಲೂ ಫೋಟೋ ವೈರಲ್​ ಆಗಿತ್ತು. ಐಎಸ್ಎಸ್ ಭೂಮಿಯಿಂದ ಸುಮಾರು 400 ಕಿಲೋಮೀಟರ್ ಎತ್ತರದಲ್ಲಿ ಪರಿಭ್ರಮಿಸುತ್ತದೆ, (ಏಜೆನ್ಸೀಸ್​).