ಸ್ಟೋನ್ ಏಜ್' ವರ್ಸಸ್ 'ಡ್ರೋನ್ ಏಜ್': ಇರಾನ್‌ನ ಸಣ್ಣ ಕ್ಷಿಪಣಿಗಳು ಅಮೆರಿಕದ ಕೋಟಿ ಕೋಟಿ ಬೆಲೆಯ ಜೆಟ್‌ಗಳನ್ನು ಧ್ವಂಸ ಮಾಡಿದ್ದೇಗೆ..? US Aircraft Loss

ಕಳೆದ ಶುಕ್ರವಾರ ಅಮೆರಿಕದ ಪಾಲಿಗೆ ಅತ್ಯಂತ ದುಬಾರಿಯಾಗಿ ಪರಿಣಮಿಸಿತು. ಇರಾನ್ ಗಡಿಯೊಳಗೆ ಕಾರ್ಯಾಚರಣೆ ನಡೆಸುತ್ತಿದ್ದ ಅಮೆರಿಕದ ಅತ್ಯಾಧುನಿಕ F-15E ಸ್ಟ್ರೈಕ್ ಈಗಲ್ ಫೈಟರ್ ಜೆಟ್ ಅನ್ನು ಹೊಡೆದುರುಳಿಸಲಾಗಿದೆ. ಇರಾನ್ ಭೂಪ್ರದೇಶದಲ್ಲಿ ಅಮೆರಿಕದ ಯುದ್ಧ ವಿಮಾನವೊಂದು ಪತನಗೊಂಡ ಮೊದಲ ಘಟನೆ ಇದಾಗಿದೆ.

ರಕ್ಷಣಾ ಕಾರ್ಯಾಚರಣೆ: ವಿಮಾನದಲ್ಲಿದ್ದ ಒಬ್ಬ ಪೈಲಟ್ ಅನ್ನು ರಕ್ಷಿಸಲಾಗಿದೆ, ಆದರೆ ಎರಡನೇ ಸಿಬ್ಬಂದಿಯ ಸ್ಥಿತಿ ಇನ್ನೂ ತಿಳಿದುಬಂದಿಲ್ಲ.

A-10 ವಾರ್ಥೋಗ್ ಪತನ: ಇದೇ ಸಮಯದಲ್ಲಿ, ಹೋರ್ಮುಜ್ ಜಲಸಂಧಿಯ ಬಳಿ ಅಮೆರಿಕದ ಮತ್ತೊಂದು ಘಾತಕ ವಿಮಾನ A-10 ವಾರ್ಥೋಗ್ ಪತನಗೊಂಡಿದೆ. ಇದರ ಪೈಲಟ್ ಅನ್ನು ಯಶಸ್ವಿಯಾಗಿ ರಕ್ಷಿಸಲಾಗಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ.

ಯುದ್ಧದ ಆರಂಭದಿಂದಲೂ ಅಮೆರಿಕದ ವಾಯುಪಡೆ ಅನುಭವಿಸಿದ ಪ್ರಮುಖ ನಷ್ಟಗಳು ಹೀಗಿವೆ.

ಮಾರ್ಚ್ 2: ಕುವೈತ್ ಮೇಲೆ ಮೂರು F-15 ವಿಮಾನಗಳು 'ಫ್ರೆಂಡ್ಲಿ ಫೈರ್' (ತಪ್ಪಾಗಿ ತಮ್ಮದೇ ಪಡೆಯಿಂದ ನಡೆದ ದಾಳಿ) ನಿಂದ ಪತನಗೊಂಡವು.

ಮಾರ್ಚ್ 12: ಇರಾಕ್‌ನಲ್ಲಿ ನಡೆದ 'ಆಪರೇಷನ್ ಎಪಿಕ್ ಫ್ಯೂರಿ' ವೇಳೆ KC-135 ಟ್ಯಾಂಕರ್ ವಿಮಾನ ಅಪಘಾತಕ್ಕೀಡಾಗಿ 6 ಸಿಬ್ಬಂದಿ ಸಾವನ್ನಪ್ಪಿದರು.

ಮಾರ್ಚ್ 27: ಸೌದಿ ಅರೇಬಿಯಾದ ಪ್ರಿನ್ಸ್ ಸುಲ್ತಾನ್ ವಾಯುನೆಲೆಯ ಮೇಲೆ ಇರಾನ್ ನಡೆಸಿದ ದಾಳಿಯಲ್ಲಿ ಅಮೆರಿಕದ E-3 ಸೆಂಟ್ರಿ ವಿಮಾನ ಧ್ವಂಸವಾಯಿತು.

F-35 ತುರ್ತು ಇಳಿಯುವಿಕೆ: ಅಮೆರಿಕದ ಅತ್ಯಂತ ದುಬಾರಿ ಮತ್ತು ಸುಧಾರಿತ F-35 ವಿಮಾನ ಕೂಡ ಇರಾನ್ ದಾಳಿಗೆ ತುತ್ತಾಗಿ ತುರ್ತು ಇಳಿಯುವಿಕೆ ನಡೆಸಬೇಕಾಯಿತು.

ಅಮೆರಿಕದ ವಾಯುಪಡೆಗೆ ಇಷ್ಟೆಲ್ಲಾ ನಷ್ಟಗಳಾಗುತ್ತಿದ್ದರೂ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಾತ್ರ ತಮ್ಮ ಆಕ್ರಮಣಕಾರಿ ನಿಲುವನ್ನು ಬದಲಿಸಿಲ್ಲ. ಇನ್ನೊಂದು ಎರಡು-ಮೂರು ವಾರಗಳಲ್ಲಿ ನಾವು ಇರಾನ್ ಅನ್ನು ಶಿಲಾಯುಗಕ್ಕೆ ಕಳುಹಿಸುತ್ತೇವೆ, ಅವರು ಇರಬೇಕಾದ ಜಾಗ ಅದೇ ಎಂದು ಟ್ರಂಪ್ ಘೋಷಿಸಿದ್ದಾರೆ. ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಕೂಡ ಇದೇ ಮಾತನ್ನು ಪುನರುಚ್ಚರಿಸಿದ್ದಾರೆ.

ಅಮೆರಿಕವು ಇರಾನ್‌ನ ಆಕಾಶದಲ್ಲಿ ತನ್ನದೇ ಸಂಪೂರ್ಣ ನಿಯಂತ್ರಣವಿದೆ ಎಂದು ಹೇಳಿಕೊಳ್ಳುತ್ತಿದೆಯಾದರೂ, ಇತ್ತೀಚಿನ ಘಟನೆಗಳು ಬೇರೆಯೇ ಕಥೆ ಹೇಳುತ್ತಿವೆ. ಇರಾನ್ ಬಳಿ ಇರುವ ಕ್ಷಿಪಣಿಗಳು ಮತ್ತು ಡ್ರೋನ್‌ಗಳು ಅಮೆರಿಕದ ಅತ್ಯಾಧುನಿಕ ರೇಡಾರ್ ವ್ಯವಸ್ಥೆಗಳನ್ನು ಭೇದಿಸಿ ವಿಮಾನಗಳನ್ನು ಗುರಿಯಾಗಿಸುತ್ತಿವೆ. ಶುಕ್ರವಾರ ಪತನಗೊಂಡ ಪೈಲಟ್‌ಗಳನ್ನು ರಕ್ಷಿಸಲು ಹೋದ UH-60 ಬ್ಲ್ಯಾಕ್ ಹಾಕ್ ಹೆಲಿಕಾಪ್ಟರ್ ಮೇಲೂ ಇರಾನ್ ಪಡೆಗಳು ದಾಳಿ ನಡೆಸಿದ್ದು, ಅದು ಹೇಗೋ ಪ್ರಾಣಾಪಾಯದಿಂದ ಪಾರಾಗಿ ಬಂದಿದೆ.

ಪ್ರಸ್ತುತ ಯುದ್ಧದಲ್ಲಿ ಅಮೆರಿಕದ ನಷ್ಟವು ಕಳೆದ ಯುದ್ಧಗಳಿಗೆ ಹೋಲಿಸಿದರೆ ಸ್ವಲ್ಪ ಕಡಿಮೆಯಿದೆ. 1991ರ ಗಲ್ಫ್ ಯುದ್ಧದಲ್ಲಿ ಅಮೆರಿಕ 43 ದಿನಗಳಲ್ಲಿ 42 ವಿಮಾನಗಳನ್ನು ಕಳೆದುಕೊಂಡಿತ್ತು. ಆದರೆ, ಇಂದಿನ ತಂತ್ರಜ್ಞಾನದ ಯುಗದಲ್ಲಿ ಇರಾನ್‌ನಂತಹ ದೇಶದ ಎದುರು ಈ ಮಟ್ಟದ ನಷ್ಟ ಅನುಭವಿಸುತ್ತಿರುವುದು ಅಮೆರಿಕದ ಸೇನಾ ತಂತ್ರಜ್ಞರಿಗೆ ಆತಂಕ ತಂದಿದೆ.

ಅಮೆರಿಕವು ಈಗ ಇರಾಕ್ ಮತ್ತು ಸಿರಿಯಾದಲ್ಲಿ ವಿಶೇಷ 'ಹುಡುಕಾಟ ಮತ್ತು ರಕ್ಷಣಾ ಪಡೆಗಳನ್ನು ನಿಯೋಜಿಸಿದೆ. ಆದರೆ ಇರಾನ್‌ನ ವಾಯುಪ್ರದೇಶವು ಅತ್ಯಂತ ಅಪಾಯಕಾರಿಯಾಗಿರುವುದರಿಂದ ಈ ಕಾರ್ಯಾಚರಣೆಗಳು ತೀವ್ರ ಸವಾಲಿನಿಂದ ಕೂಡಿದೆ. ಟ್ರಂಪ್ ಅವರ ಎಚ್ಚರಿಕೆಯಂತೆ ಇರಾನ್ ಶರಣಾಗುತ್ತದೆಯೇ ಅಥವಾ ಅಮೆರಿಕದ ವಾಯುಪಡೆಗೆ ಇನ್ನು ಎಷ್ಟು ಬೆಲೆ ತೆರಬೇಕಾಗುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ,(ಏಜೆನ್ಸೀಸ್).