ಕ್ರಿಕೆಟ್‌ ಜಗತ್ತಿಗೆ ಸ್ಟೋಕ್ಸ್ ಶಾಕ್: ಕಿವೀಸ್​ ವಿರುದ್ಧದ ಟೆಸ್ಟ್‌ ಪಂದ್ಯದ ನಡುವೆಯೇ ನಿವೃತ್ತಿ ಘೋಷಿಸಿದ ಇಂಗ್ಲೆಂಡ್ ನಾಯಕ! Ben Stokes Retires

ವಿಶ್ವಕಪ್ ವಿಜೇತ ನಾಯಕ, ಆ್ಯಶಸ್ ಸರಣಿಯ ಹೀರೊ ಮತ್ತು ಇಂಗ್ಲೆಂಡ್ ಟೆಸ್ಟ್ ಕ್ರಿಕೆಟ್‌ನಲ್ಲಿ ಆಕ್ರಮಣಕಾರಿ ಬ್ಯಾಜ್‌ಬಾಲ್ ಕ್ರಾಂತಿ ಸೃಷ್ಟಿಸಿದ್ದ 35 ವರ್ಷದ ಬೆನ್ ಸ್ಟೋಕ್ಸ್, ತಮ್ಮ 15 ವರ್ಷಗಳ ಅದ್ಭುತ ಕ್ರಿಕೆಟ್ ಪಯಣಕ್ಕೆ ಈ ಮೂಲಕ ತೆರೆ ಎಳೆದಿದ್ದಾರೆ.

ಭಾನುವಾರ ನಾಲ್ಕನೇ ದಿನದಾಟ ಆರಂಭವಾಗುವ ಮುನ್ನವೇ ಬೆನ್ ಸ್ಟೋಕ್ಸ್ ತಮ್ಮ ನಿರ್ಧಾರವನ್ನು ಡ್ರೆಸ್ಸಿಂಗ್ ರೂಂನಲ್ಲಿ ಸಹ ಆಟಗಾರರಿಗೆ ತಿಳಿಸಿದ್ದರು. ನಾಯಕನಾಗಿ ಹಾಗೂ ಇಂಗ್ಲೆಂಡ್ ತಂಡದ ಪ್ರತಿನಿಧಿಯಾಗಿ ನನಗೆ ಇವೇ ಕೊನೆಯ ಎರಡು ದಿನಗಳು ಎಂದು ಸ್ಟೋಕ್ಸ್ ಭಾವುಕರಾಗಿ ನುಡಿದಾಗ ಸಹ ಆಟಗಾರರು ಆಶ್ಚರ್ಯಚಕಿತರಾದರು. ಇದಾದ ಕೆಲವೇ ಗಂಟೆಗಳಲ್ಲಿ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ECB) ಈ ಸುದ್ದಿಯನ್ನು ಅಧಿಕೃತವಾಗಿ ಖಚಿತಪಡಿಸಿತು.

ನಿವೃತ್ತಿ ಕುರಿತು ಮಾತನಾಡಿದ ಇಸಿಬಿ (ECB) ಅಧ್ಯಕ್ಷ ರಿಚರ್ಡ್ ಥಾಂಪ್ಸನ್, ಬೆನ್ ಸ್ಟೋಕ್ಸ್ ಇಂಗ್ಲೆಂಡ್ ಕಂಡ ಸಾರ್ವಕಾಲಿಕ ಶ್ರೇಷ್ಠ ಕ್ರಿಕೆಟಿಗರಲ್ಲಿ ಒಬ್ಬರಾಗಿ ಮೈದಾನದಿಂದ ಹೊರನಡೆಯುತ್ತಿದ್ದಾರೆ. ಒತ್ತಡದ ಪರಿಸ್ಥಿತಿಯಲ್ಲಿ ಅವರು ನೀಡಿದ ಅಸಾಧಾರಣ ಪ್ರದರ್ಶನಗಳು ಮತ್ತು ಅವರ ಹೋರಾಟದ ಗುಣ ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ಮನಸ್ಸಿನಲ್ಲಿ ಶಾಶ್ವತವಾಗಿ ಉಳಿಯಲಿದೆ ಎಂದು ಶ್ಲಾಘಿಸಿದ್ದಾರೆ.

2011ರಲ್ಲಿ ಶ್ವೇತವರ್ಣದ ಕ್ರಿಕೆಟ್ ಮೂಲಕ ಜರ್ನಿ ಆರಂಭಿಸಿದ್ದ ಸ್ಟೋಕ್ಸ್, 2013ರ ಆ್ಯಶಸ್ ಸರಣಿಯಲ್ಲಿ ಟೆಸ್ಟ್‌ಗೆ ಪದಾರ್ಪಣೆ ಮಾಡಿದ್ದರು. ಇತ್ತೀಚೆಗಷ್ಟೇ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ 7000 ರನ್ ಹಾಗೂ 250 ವಿಕೆಟ್ ಪಡೆದ ವಿಶ್ವದ ಎರಡನೇ ಆಟಗಾರ ಎಂಬ ಐತಿಹಾಸಿಕ ಮೈಲಿಗಲ್ಲನ್ನು ಅವರು ತಲುಪಿದ್ದರು. ಇಂಜುರಿ ಸಮಸ್ಯೆಗಳ ನಡುವೆಯೂ ಅವರು ತಂಡಕ್ಕೆ ನೀಡಿದ ಕೊಡುಗೆ ಅಪಾರವಾಗಿದೆ.

ಇಂಗ್ಲೆಂಡ್ ಕ್ರಿಕೆಟ್ ಇತಿಹಾಸವನ್ನು ತಿರುವಿ ಹಾಕಿದ ಹಲವು ಸ್ಮರಣೀಯ ಕ್ಷಣಗಳಿಗೆ ಸ್ಟೋಕ್ಸ್ ಅವರೇ ಶಿಲ್ಪಿಯಾಗಿದ್ದಾರೆ.

2019ರ ಏಕದಿನ ವಿಶ್ವಕಪ್ ಫೈನಲ್: ನ್ಯೂಜಿಲೆಂಡ್ ವಿರುದ್ಧದ ಮಹಾಫೈನಲ್‌ನಲ್ಲಿ ಅಜೇಯ 84 ರನ್ ಚಚ್ಚಿ ಪಂದ್ಯವನ್ನು ಸೂಪರ್ ಓವರ್‌ಗೆ ಕೊಂಡೊಯ್ದು, ಇಂಗ್ಲೆಂಡ್‌ಗೆ ಚೊಚ್ಚಲ ವಿಶ್ವಕಪ್ ತಂದುಕೊಟ್ಟಿದ್ದರು.

2019ರ ಹೆಡಿಂಗ್ಲೆ ಆ್ಯಶಸ್ ಟೆಸ್ಟ್: ಆಸ್ಟ್ರೇಲಿಯಾ ವಿರುದ್ಧ ಕೇವಲ 1 ವಿಕೆಟ್ ಬಾಕಿ ಇದ್ದಾಗ ಸಿಡಿಲಬ್ಬರದ ಅಜೇಯ 135 ರನ್ ಸಿಡಿಸಿ ಇತಿಹಾಸದ ಸಾರ್ವಕಾಲಿಕ ಶ್ರೇಷ್ಠ ಟೆಸ್ಟ್ ಗೆಲುವು ದಾಖಲಿಸಿದ್ದರು.

2022ರ ಟಿ20 ವಿಶ್ವಕಪ್: ಪಾಕಿಸ್ತಾನ ವಿರುದ್ಧದ ಫೈನಲ್‌ನಲ್ಲಿ ಜವಾಬ್ದಾರಿಯುತ ಆಟವಾಡಿ ಇಂಗ್ಲೆಂಡ್‌ಗೆ ಟಿ20 ವಿಶ್ವಕಪ್ ಕಿರೀಟ ಮುಡಿಸಿದ್ದರು.

2022ರಲ್ಲಿ ಜೋ ರೂಟ್ ಅವರಿಂದ ಟೆಸ್ಟ್ ನಾಯಕತ್ವ ವಹಿಸಿಕೊಂಡ ಸ್ಟೋಕ್ಸ್, ಕೋಚ್ ಬ್ರೆಂಡನ್ ಮೆಕಲಮ್ ಜೊತೆಗೂಡಿ ಟೆಸ್ಟ್ ಕ್ರಿಕೆಟ್‌ಗೆ ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಯ 'ಬ್ಯಾಜ್‌ಬಾಲ್' ಎಂಬ ಹೊಸ ರೂಪ ನೀಡಿದ್ದರು. ಈ ಪಂದ್ಯದ ನಂತರ ಇಂಗ್ಲೆಂಡ್ ಕ್ರಿಕೆಟ್‌ನ ಸುವರ್ಣ ಯುಗವೊಂದು ಕೊನೆಗೊಳ್ಳಲಿದೆ,(ಏಜೆನ್ಸೀಸ್).