ಸ್ಟಾರ್‌ಲಿಂಕ್ ಸ್ಯಾಟಲೈಟ್ ಫೇಲ್ಯೂರ್: ಆರ್ಟೆಮಿಸ್ ಚಂದ್ರಯಾನ ಸುರಕ್ಷಿತ ಎಂದ ಸ್ಪೇಸ್‌ಎಕ್ಸ್! ಜಗತ್ತಿನ ಕಣ್ಣು ಈಗ ಬಾಹ್ಯಾಕಾಶದತ್ತ | Starlink Dark

ಕಳೆದ ಭಾನುವಾರ ಸ್ಟಾರ್‌ಲಿಂಕ್‌ನ ಉಪಗ್ರಹ ಸಂಖ್ಯೆ 34343 ಬಾಹ್ಯಾಕಾಶದಲ್ಲಿ ಇದ್ದಕ್ಕಿದ್ದಂತೆ ಸಂಪರ್ಕ ಕಳೆದುಕೊಂಡು 'ಡಾರ್ಕ್ ಆಗಿದೆ. ಇದು ಉಡಾವಣೆಗೆ ಸಜ್ಜಾಗಿರುವ ಆರ್ಟೆಮಿಸ್ II ನೌಕೆಗೆ ಅಥವಾ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ (ISS) ಡಿಕ್ಕಿ ಹೊಡೆಯಬಹುದೇ ಅಥವಾ ಬಾಹ್ಯಾಕಾಶ ಕಸವಾಗಿ ಮಾರ್ಪಟ್ಟು ಅಪಾಯ ತಂದೊಡ್ಡಬಹುದೇ ಎಂಬ ಆತಂಕ ಸೃಷ್ಟಿಯಾಗಿತ್ತು.

ಸೋಮವಾರ ರಾತ್ರಿ ಸ್ಪೇಸ್‌ಎಕ್ಸ್ ಈ ಬಗ್ಗೆ ಅಧಿಕೃತ ಪ್ರಕಟಣೆ ಹೊರಡಿಸಿದ್ದು, ಬಾಹ್ಯಾಕಾಶ ಪ್ರಿಯರು ನಿಟ್ಟುಸಿರು ಬಿಡುವಂತೆ ಮಾಡಿದೆ.

ಆರ್ಟೆಮಿಸ್ ಸುರಕ್ಷಿತ: ಏಪ್ರಿಲ್ 1ರಂದು ನಿಗದಿಯಾಗಿರುವ ನಾಸಾದ ಆರ್ಟೆಮಿಸ್ II ಮಿಷನ್‌ಗೆ ಈ ಉಪಗ್ರಹದಿಂದ ಯಾವುದೇ ಅಪಾಯವಿಲ್ಲ ಎಂದು ಕಂಪನಿ ಖಚಿತಪಡಿಸಿದೆ.

ISS ಭದ್ರತೆ: ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ ಅಥವಾ ಅಲ್ಲಿರುವ ಗಗನಯಾತ್ರಿಗಳಿಗೆ ಇದರಿಂದ ಯಾವುದೇ ತೊಂದರೆಯಾಗುವುದಿಲ್ಲ ಎಂದು ಇತ್ತೀಚಿನ ವಿಶ್ಲೇಷಣೆಗಳು ಸಾಬೀತುಪಡಿಸಿವೆ.

ನಿರಂತರ ನಿಗಾ: ಪ್ರಸ್ತುತ ಸ್ಪೇಸ್‌ಎಕ್ಸ್ ಮತ್ತು ಅಮೆರಿಕದ ಬಾಹ್ಯಾಕಾಶ ಪಡೆ ಜಂಟಿಯಾಗಿ ಈ ನಾಪತ್ತೆಯಾದ ಉಪಗ್ರಹದ ಮೇಲೆ ನಿಗಾ ಇಟ್ಟಿವೆ.

ಈ ತಾಂತ್ರಿಕ ದೋಷವು ಅತ್ಯಂತ ಸೂಕ್ಷ್ಮ ಸಮಯದಲ್ಲಿ ಸಂಭವಿಸಿದೆ. ಒಂದೆಡೆ ನಾಸಾ ಚಂದ್ರನಿಗೆ ಮಾನವರನ್ನು ಕಳುಹಿಸಲು ಸಜ್ಜಾಗಿದ್ದರೆ, ಇನ್ನೊಂದೆಡೆ ಸ್ಪೇಸ್‌ಎಕ್ಸ್ ಕಂಪನಿಯು ಷೇರು ಮಾರುಕಟ್ಟೆಗೆ ಪ್ರವೇಶಿಸಲು ಸಜ್ಜಾಗುತ್ತಿದೆ. ಸುಮಾರು $1.75 ಟ್ರಿಲಿಯನ್ ಮೌಲ್ಯದ ಐಪಿಒ ಮೂಲಕ ಜಗತ್ತಿನ ಅತಿ ದೊಡ್ಡ ಸಾರ್ವಜನಿಕ ಕಂಪನಿಯಾಗುವ ಹಾದಿಯಲ್ಲಿರುವ ಎಲೋನ್ ಮಾಸ್ಕ್‌ಗೆ ಈ ಸಣ್ಣ ದೋಷವೂ ದೊಡ್ಡ ಸವಾಲಾಗಿ ಪರಿಣಮಿಸಿದೆ.

ಸೋಮವಾರ ಬೆಳಿಗ್ಗೆ ಉಡಾವಣೆಯಾದ 'ಫಾಲ್ಕನ್ 9 ಟ್ರಾನ್ಸ್ಪೋರ್ಟರ್-16' ಮಿಷನ್‌ ಮೇಲೆ ಈ ಉಪಗ್ರಹದ ಸ್ಥಗಿತ ಯಾವುದೇ ಪರಿಣಾಮ ಬೀರಲಿಲ್ಲ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಈ ಮಿಷನ್ ಯಶಸ್ವಿಯಾಗಿ ತನ್ನ ಪೇಲೋಡ್‌ಗಳನ್ನು ನಿಗದಿತ ಕಕ್ಷೆಗೆ ತಲುಪಿಸಿದೆ.

ಆರ್ಟೆಮಿಸ್ II ವಿಶೇಷತೆ: ಇದು ಚಂದ್ರನ ಕಕ್ಷೆಗೆ ಮಾನವರನ್ನು ಹೊತ್ತೊಯ್ಯುವ ದಶಕಗಳ ನಂತರದ ಮೊದಲ ಮಿಷನ್ ಆಗಿದೆ. ಈ ಮಿಷನ್ ಯಶಸ್ವಿಯಾದರೆ, ಮುಂದಿನ ದಿನಗಳಲ್ಲಿ ಮಾನವರು ಚಂದ್ರನ ಮೇಲೆ ನೆಲೆ ನಿಲ್ಲುವ ಹಾದಿ ಸುಗಮವಾಗಲಿದೆ,(ಏಜೆನ್ಸೀಸ್).