ಗಂಟೆಗೆ 13 ಕಿ.ಮೀ ಓಡುವ ಅಪರೂಪದ ಸ್ಪೈಡರ್​ ಇದು! ಜೇಡಗಳ ರನ್ನಿಂಗ್​ ಕಿಂಗ್​ಗೆ 'ಉಸೈನ್​ ಬೋಲ್ಟ್​' ಪಟ್ಟ

Running Spider: ಗೋಡೆಗಳ ಮೇಲೆ ಅಥವಾ ಮೂಲೆಯಲ್ಲಿ ದೊಡ್ಡದಾಗಿ ಕಟ್ಟುವ ಬಲೆ ಕಟ್ಟುವ ಜೇಡಗಳನ್ನು ಬಹುತೇಕರು ನೋಡಿಯೇ ನೋಡಿರುತ್ತಾರೆ. ಆದರೆ, ಮನುಷ್ಯರಂತೆ ಓಡುವ ಜೇಡವನ್ನು ಎಲ್ಲಾದರೂ ಕಂಡಿದ್ದೀರಾ? ಅದರಲ್ಲೂ ಗಂಟೆಗೆ 13 ಕಿ.ಮೀ. ವೇಗದಲ್ಲಿ ಓಡಬಲ್ಲ ಜೇಡದ ಬಗ್ಗೆ ನೋಡುವುದಿರಲಿ ಕನಿಷ್ಠ ಪಕ್ಷ ಕೇಳಿದ್ದೀರಾ? ಇಲ್ಲ ಎಂದಾದರೆ, ಈ ಸುದ್ದಿ ಖಂಡಿತ ನಿಮ್ಮ ಹುಬ್ಬೇರಿಸುವುದಂತು ಖಚಿತ.

'ಬ್ರೌನ್ ಹಂಟ್ಸ್‌ಮ್ಯಾನ್' (Heteropoda jugulans) ಜಗತ್ತಿನ ಅತ್ಯಂತ ವೇಗದ ಜೇಡ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಮತ್ತು ಈ ಹಿಂದೆ ದಾಖಲಾಗಿದ್ದ ರೆಕಾರ್ಡ್​ ಅನ್ನು ಮುರಿದು, ತನ್ನದೇ ಹೊಸ ದಾಖಲೆಯನ್ನು ಸೃಷ್ಟಿಸಿದೆ. ಈ ಜೇಡವು ಸೆಕೆಂಡ್​ಗೆ 3.59 ಮೀಟರ್ (ಅಂದರೆ ಸುಮಾರು 12 ಅಡಿ) ದೂರ ಕ್ರಮಿಸುತ್ತದೆ. ಅಲ್ಲಿಗೆ, ಗಂಟೆಗೆ 13 ಕಿ.ಮೀ ವೇಗದಲ್ಲಿ ಸಾಗುತ್ತದೆ ಎಂಬುದು ಬಲು ರೋಚಕ ಸಂಗತಿ.

ಈ ಜೇಡ ಹಿಂದೆ ಗಂಟೆಗೆ 6 ಕಿ.ಮೀ ವೇಗದಲ್ಲಿ ಸಾಗಿದ್ದ ಮೊರೊಕ್ಕೊದ 'ಫ್ಲಿಕ್-ಫ್ಲಾಕ್' (Moroccan flic-flac) ಜೇಡದ ಸಾರ್ವಕಾಲಿಕ ದಾಖಲೆಯನ್ನು ಮುರಿದಿದೆ. ಜರ್ಮನಿ ಮತ್ತು ಬ್ರಿಟನ್ ವಿಜ್ಞಾನಿಗಳು ಜಗತ್ತಿನಾದ್ಯಂತ (ಲಂಡನ್, ಗ್ರೇಫ್ಸ್‌ವಾಲ್ಡ್, ಉತ್ತರ ಅಮೆರಿಕ, ದಕ್ಷಿಣ ಯುರೋಪ್ ಮತ್ತು ಆಸ್ಟ್ರೇಲಿಯಾ) ಸಂಗ್ರಹಿಸಿದ 250ಕ್ಕೂ ಹೆಚ್ಚು ತಳಿಯ ಜೇಡಗಳ ಚಲನೆಯನ್ನು ಅಧ್ಯಯನ ಮಾಡಿದ ಬಳಿಕವೇ ಈ ತೀರ್ಮಾನಕ್ಕೆ ಬಂದಿದ್ದಾರೆ.

ಮಾನವನ ಅಂಗೈ ಅಗಲದಷ್ಟಿರುವ ಈ ಬ್ರೌನ್​ ಹಂಟ್ಸ್‌ಮ್ಯಾನ್ ಜೇಡಗಳು ವಿಷಕಾರಿಯಾಗಿದ್ದರೂ, ಇವು ಸಾಧಾರಣವಾಗಿ ಜನರಿಗೆ ಕಚ್ಚುವುದಿಲ್ಲ ಹಾಗೂ ಮನೆಗಳಲ್ಲಿ ಹೆಚ್ಚಾಗಿ ಕಾಣಸಿಗುತ್ತವೆ. ಇವುಗಳ ಮಧ್ಯಮ ಗಾತ್ರ ಹಾಗೂ ಉದ್ದನೆಯ ಕಾಲುಗಳು ಓಡಲು ಅತ್ಯಂತ ಸಹಾಯಕಾರಿ ಆಗಿವೆ.

ಕ್ವೀನ್ಸ್‌ಲ್ಯಾಂಡ್‌ನ ಯೂನಿವರ್ಸಿಟಿ ಆಫ್ ದಿ ಸನ್‌ಶೈನ್ ಕೋಸ್ಟ್‌ನ ವಿಕಸನೀಯ ಜೈವಿಕ ಯಾಂತ್ರಿಕ ತಜ್ಞ (Evolutionary Biomechanist) ಡಾ. ಕ್ರಿಸ್ಟೋಫರ್ ಕ್ಲೆಮೆಂಟ್ ಪ್ರಕಾರ, ಜೇಡಗಳು ಸಸ್ತನಿಗಳಂತೆ ಕೇವಲ ಸ್ನಾಯುಗಳ ಬಲದಿಂದ ಓಡುವುದಿಲ್ಲ. ಕಾಲುಗಳನ್ನು ಹಿಂತೆಗೆದುಕೊಳ್ಳಲು ಸ್ನಾಯುಗಳನ್ನು ಬಳಸಿದರೆ,  ಕಾಲನ್ನು ವೇಗವಾಗಿ ಚಾಚಲು ಅಥವಾ ಮುಂದಿಡಲು ತಮ್ಮ ದೇಹದ ಹೈಡ್ರಾಲಿಕ್ ಒತ್ತಡವನ್ನು ಬಳಸುತ್ತವೆ. ಈ ವಿಶಿಷ್ಟ ಕಾರ್ಯವಿಧಾನವೇ ಅವುಗಳಿಗೆ ಕ್ಷಣಾರ್ಧದಲ್ಲಿ ಭಾರಿ ವೇಗವನ್ನು ತಲುಪಲು ಕಾರಣ.

ವಿಜ್ಞಾನಿಗಳ ಪ್ರಕಾರ, ಜಗತ್ತಿನಲ್ಲಿ ತಿಳಿದಿರುವ ಸುಮಾರು 53,000 ಜೇಡ ತಳಿಗಳಲ್ಲಿ ಕೇವಲ ಸಣ್ಣ ಭಾಗವನ್ನು ಮಾತ್ರ ಅಧ್ಯಯನ ಮಾಡಲಾಗಿದೆ. ಹೀಗಾಗಿ, ಭವಿಷ್ಯದಲ್ಲಿ ಇದಕ್ಕಿಂತಲೂ ವೇಗವಾಗಿ ಓಡುವ ಜೇಡಗಳು ಪತ್ತೆಯಾಗುವ ಸಾಧ್ಯತೆಯಿದೆ ಎಂದು ತಿಳಿಸಿದ್ದಾರೆ. ಅಲ್ಲಿಗೆ, ಇದೇ ಗಂಟೆಗೆ 13 ಕಿ.ಮೀ ಓಡುತ್ತದೆ ಎಂದರೆ, ಸಂಶೋಧನೆಯಲ್ಲಿ ಇನ್ನೂ ಹೆಚ್ಚಿನ ಪ್ರಬೇಧಗಳು ಸಿಕ್ಕಿ, ಅವುಗಳಲ್ಲಿ ಯಾವುದಾದರೂ ಇದನ್ನೂ ಮೀರಿಸುವ ಮಟ್ಟ ತಲುಪಿದರೆ ಯಾವುದೇ ಆಶ್ಚರ್ಯವಿಲ್ಲ ಎನ್ನಬಹುದು,(ಏಜೆನ್ಸೀಸ್).