ಅಮೆರಿಕದಲ್ಲೂ ಎಸ್​​ಐಆರ್​​: ಟ್ರಂಪ್​ಗೆ ಇಷ್ಟವಾದ ಭಾರತೀಯ ಚುನಾವಣೆ ವ್ಯವಸ್ಥೆ!

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಧ್ಯಂತರ ಚುನಾವಣೆಗೂ ಮುನ್ನ ಮತದಾನದ ನಿಯಮಗಳನ್ನು ಕಠಿಣಗೊಳಿಸಲು ಹಾಗೂ ಭಾರತದ ಎಸ್​ಐಆರ್ ಮಾದರಿಯ ಪ್ರಕ್ರಿಯೆಯನ್ನು ಜಾರಿಗೆ ತರಲು ಸಿದ್ಧತೆ ನಡೆಸಿದ್ದಾರೆ. ಮತದಾನದ ಸಮಯದಲ್ಲಿ ಫೋಟೋ ಐಡಿ ಕಡ್ಡಾಯವಾಗಿರಬೇಕು ಎಂದು ಹೇಳಿರುವ ಟ್ರಂಪ್, ಅಮೆರಿಕನ್ ಸಂಸತ್ತು ‘ಸೇವ್ ಅಮೆರಿಕ ಮಸೂದೆ’ಯನ್ನು ಅಂಗೀಕರಿಸಬೇಕು ಎಂದು ಆಗ್ರಹಿಸಿದ್ದಾರೆ. ಟ್ರಂಪ್ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಭಾರತದ ವಿದೇಶಾಂಗ ಸಚಿವಾಲಯದ ವಕ್ತಾರ ರಣಧೀರ್ ಜೈಸ್ವಾಲ್, ಭಾರತದ ಚುನಾವಣಾ ವ್ಯವಸ್ಥೆಯ ವಿಶ್ವಾಸಾರ್ಹತೆ ಜಗತ್ತಿನಾದ್ಯಂತ ಸಾಬೀತಾಗಿದೆ ಎಂದು ಹೇಳಿದ್ದಾರೆ. ಭಾರತದ ಚುನಾವಣೆ ವ್ಯವಸ್ಥೆಯನ್ನು ಟ್ರಂಪ್ ಮೆಚ್ಚಿಕೊಂಡಿದ್ದೇಕೆ? ಅಮೆರಿಕದಲ್ಲೂ ಮತದಾರರ ಪಟ್ಟಿಯ ಶುದ್ಧೀಕರಣ ನಡೆಯಲಿದೆಯೇ? ಈ ಕುರಿತಾದ ವಿವರ ಇಲ್ಲಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ‘ಸೇವ್ ಅಮೆರಿಕ ಆಕ್ಟ್’ ಮಸೂದೆಯನ್ನು ಬೆಂಬಲಿಸುವಂತೆ ನೀಡಿದ ಹೇಳಿಕೆಯ ವೇಳೆ ಭಾರತದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಮತ್ತು ಭಾರತದ ಚುನಾವಣಾ ವ್ಯವಸ್ಥೆಯನ್ನು ಉಲ್ಲೇಖಿಸಿದ್ದಾರೆ. ‘ಸೇವ್ ಅಮೆರಿಕ ಆಕ್ಟ್’ ಮಸೂದೆಯು ಮತದಾರರ ನೋಂದಣಿಗೆ ಪೌರತ್ವದ ಪುರಾವೆ, ಮತದಾನಕ್ಕೆ ಫೋಟೋ ಗುರುತಿನ ಚೀಟಿ ಮತ್ತು ಫೆಡರಲ್ ಚುನಾವಣೆಗಳಲ್ಲಿ ಅಂಚೆ ಮತಪತ್ರಗಳಿಗೆ ಕಟ್ಟುನಿಟ್ಟಾದ ನಿಯಮಗಳನ್ನು ಜಾರಿಗೆ ತರುವ ಉದ್ದೇಶವನ್ನು ಹೊಂದಿದೆ. ಇದು ಜ್ಞಾನೇಶ್ ಕುಮಾರ್ ನೇತೃತ್ವದ ಭಾರತೀಯ ಚುನಾವಣಾ ಆಯೋಗ (ಇಸಿಐ) ನಡೆಸುತ್ತಿರುವ ರಾಷ್ಟ್ರವ್ಯಾಪಿ ಮತದಾರರ ಪಟ್ಟಿಯ ‘ವಿಶೇಷ ತೀವ್ರ ಪರಿಷ್ಕರಣೆ’ (ಎಸ್​ಐಆರ್) ಅಂತೆಯೇ ಇದೆ.

ಟ್ರೂತ್ ಸೋಷಿಯಲ್ ಪೋಸ್ಟ್​ನಲ್ಲಿ ಟ್ರಂಪ್, ‘ಮಾನ್ಯವಾದ ಫೋಟೋ ಗುರುತಿನ ಚೀಟಿ ಇಲ್ಲದೆ ಅಮೆರಿಕ ಹೇಗೆ ಚುನಾವಣೆಗಳನ್ನು ನಡೆಸುತ್ತದೆ?’ ಎಂದು ಭಾರತದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ತಮ್ಮ ಆಡಳಿತವನ್ನು ಕೇಳಿದ್ದಾರೆ ಎಂದು ತಿಳಿಸಿದರು. ನಂತರ ಟ್ರಂಪ್, ಭಾರತದ 64.6 ಕೋಟಿ (646 ಮಿಲಿಯನ್) ಮತದಾರರು ಮತಹಕ್ಕು ಚಲಾಯಿಸಿದ ಚುನಾವಣೆಯನ್ನು ಶ್ಲಾಘಿಸಿ, ನಾವು ‘ದಿ ಸೇವ್ ಅಮೆರಿಕ ಆಕ್ಟ್’ ಅನ್ನು ಈಗಲೇ ಅಂಗೀಕರಿಸಬೇಕಾಗಿದೆ ಎಂದು ಬರೆದುಕೊಂಡಿದ್ದಾರೆ.

ಜ್ಞಾನೇಶ್ ಕುಮಾರ್ ಅವರು ನವದೆಹಲಿಯಲ್ಲಿ ಭಾರತದಲ್ಲಿನ ಅಮೆರಿಕ ರಾಯಭಾರಿ ಸರ್ಜಿಯೋ ಗೋರ್ ಅವರನ್ನು ಭೇಟಿಯಾದ ಕೆಲವೇ ದಿನಗಳಲ್ಲಿ ಈ ಪೋಸ್ಟ್ ಬಂದಿರುವುದು ಗಮನಾರ್ಹ. ‘ಅಧ್ಯಕ್ಷ ಟ್ರಂಪ್ ಮಾತು ಸಂಪೂರ್ಣ ಸರಿ. ಅಮೆರಿಕ ಸಂಸತ್ತು ಈ ಕಾಯ್ದೆಯನ್ನು ಅಂಗೀಕರಿಸಬೇಕು’ ಎಂದು ಸರ್ಜಿಯೋ ಗೋರ್ ಬರೆದಿದ್ದಾರೆ. ಒಟ್ಟಾರೆ, ಶ್ವೇತಭವನವು ಚುನಾವಣೆಗಳನ್ನು ಸುರಕ್ಷಿತ, ಪಾರದರ್ಶಕ ಗೊಳಿಸುವ ತನ್ನ ಪ್ರಯತ್ನದಲ್ಲಿ ಭಾರತವನ್ನು ಸ್ಪಷ್ಟವಾಗಿ ಒಂದು ಉದಾಹರಣೆಯಾಗಿ ಮುಂದಿಟ್ಟಿದೆ. ಭಾರತೀಯ ಚುನಾವಣಾ ಆಯೋಗದ ಪ್ರಕಾರ, 2024ರ ಲೋಕಸಭಾ ಚುನಾವಣೆಯಲ್ಲಿ ನೋಂದಾಯಿತ 97.98 ಕೋಟಿ ಮತದಾರರಲ್ಲಿ 64.64 ಕೋಟಿ ಭಾರತೀಯರು ಮತ ಚಲಾಯಿಸಿದ್ದಾರೆ.

ಭಾರತದಲ್ಲಿರುವಂತೆ ಅಮೆರಿಕದಲ್ಲಿ ಕೇಂದ್ರೀಯ ಚುನಾವಣಾ ಆಯೋಗವಿಲ್ಲ. ಅಲ್ಲಿನ ರಾಜ್ಯ ಮತ್ತು ಸ್ಥಳೀಯ ಆಡಳಿತಗಳು ಚುನಾವಣೆಗಳನ್ನು ನಡೆಸುತ್ತವೆ ಹಾಗೂ ವೋಟರ್ ಐಡಿ ನಿಯಮಗಳು ಪ್ರತಿ ರಾಜ್ಯಕ್ಕೂ ಭಿನ್ನವಾಗಿವೆ. ಹೊಸ ನಿಯಮ ಜಾರಿಯಾದರೆ ಮತದಾನದ ನೋಂದಣಿಗೆ ಪಾಸ್​ಪೋರ್ಟ್, ಜನನ ಪ್ರಮಾಣಪತ್ರ ಅಥವಾ ಪೌರತ್ವದ ಪುರಾವೆ ನೀಡಬೇಕಾಗುತ್ತದೆ; ಮತದಾನದ ವೇಳೆ ಫೋಟೋ ಐಡಿ ಕಡ್ಡಾಯವಾಗುತ್ತದೆ. ಫೆಡರಲ್ ಮತದಾರರ ನೋಂದಣಿ ಫಾರ್ಮ್​ಗಳಲ್ಲಿ ಪೌರತ್ವದ ದಾಖಲಾತಿ ಪುರಾವೆ ಮತ್ತು ಚುನಾವಣಾ ಆಡಳಿತದಲ್ಲಿ ಇತರ ಬದಲಾವಣೆಗಳನ್ನು ತರುವ ಕಾರ್ಯಕಾರಿ ಆದೇಶಕ್ಕೆ ಟ್ರಂಪ್ 2025ರ ಮಾರ್ಚ್​ನಲ್ಲಿ ಸಹಿ ಹಾಕಿದ್ದರು.

ಅಮೆರಿಕದಲ್ಲಿ 2024ರಲ್ಲಿ 21.1 ಕೋಟಿ ಸಕ್ರಿಯ ನೋಂದಾಯಿತ ಮತದಾರರಿದ್ದರು. ಅಮೆರಿಕದ ಸಂಶೋಧನಾ ಸಂಸ್ಥೆ ಬಿಪಿಸಿ ಪ್ರಕಾರ, ಶೇ.12ರಷ್ಟು ಮತದಾರರ ಬಳಿ (ಪ್ರತಿ 8ನೇ ವ್ಯಕ್ತಿ) ಪೌರತ್ವ ಸಾಬೀತು ಪಡಿಸುವ ಅಗತ್ಯ ದಾಖಲೆಗಳು ಲಭ್ಯವಿಲ್ಲ. ಇದರಿಂದ ಮಹಿಳೆಯರು, ವಲಸಿಗರು ಮತ್ತು ತೃತೀಯಲಿಂಗಿಗಳು ಹೆಚ್ಚು ಪ್ರಭಾವಕ್ಕೊಳಗಾಗಲಿದ್ದಾರೆ.

ಒತ್ತಡ ಹೇರುತ್ತಿದ್ದಾರೆ?

ಅಮೆರಿಕದಲ್ಲಿ 2026ರ ನವೆಂಬರ್​ನಲ್ಲಿ ಮಧ್ಯಂತರ ಚುನಾವಣೆ ನಡೆಯಲಿದೆ. ಟ್ರಂಪ್ ಅವರ ಅನುಮೋದನೆ ರೇಟಿಂಗ್ (Approval Rating) ಶೇ.33ರಷ್ಟಿದ್ದು, ಶೇ.64ರಷ್ಟು ಜನರು ಅವರ ಕಾರ್ಯವೈಖರಿಗೆ ಅತೃಪ್ತಿ ವ್ಯಕ್ತಪಡಿಸಿದ್ದಾರೆ. ವೋಟರ್ ಐಡಿ ನಿಯಮವು ರಿಪಬ್ಲಿಕನ್ ಬೆಂಬಲಿಗರಿಗೆ ಪ್ರಮುಖ ಚುನಾವಣಾ ವಿಷಯವಾಗಿದೆ.

ಹೌದು, ಭಾರತದಲ್ಲಿನ ಮತದಾರರ ಪಟ್ಟಿಯ ಸಮಗ್ರ ಪರಿಷ್ಕರಣೆ ಪ್ರಕ್ರಿಯೆ ಮತ್ತು ಟ್ರಂಪ್ ತರಲು ಬಯಸುತ್ತಿರುವ ಕಾನೂನಿನ ನಡುವೆ ಸಾಮ್ಯತೆಗಳಿವೆ. ಅಮೆರಿಕದ ಚುನಾವಣಾ ವ್ಯವಸ್ಥೆಯು ಭಾರತಕ್ಕಿಂತ ಬಹಳ ಭಿನ್ನವಾಗಿದೆ ಮತ್ತು ಸೇವ್ ಅಮೆರಿಕ ಆಕ್ಟ್ ಮಸೂದೆಯ ಆಶಯಗಳು ಬಹುತೇಕ ‘ಎಸ್​ಐಆರ್’ನಂತೆಯೇ ಇವೆ. ಪೌರತ್ವ, ಮತದಾರರ ಅರ್ಹತೆ, ಪಾರದರ್ಶಕ ಮತದಾರರ ಪಟ್ಟಿ, ಗುರುತಿಸುವಿಕೆ ಮತ್ತು ಮತದಾನಕ್ಕೆ ಯಾರಿಗೆ ಅವಕಾಶ ನೀಡಬೇಕು ಎಂಬ ಕಳವಳಗಳು ಇಲ್ಲಿ ಸಮಾನವಾಗಿ ಕಂಡುಬರುವ ವಿಷಯಗಳಾಗಿವೆ.

ಭಾರತದ ಎಸ್​ಐಆರ್ ಮೂಲಭೂತವಾಗಿ ಮತದಾರರ ಪಟ್ಟಿಯನ್ನು ಪರಿಷ್ಕರಿಸುವ ಪ್ರಕ್ರಿಯೆಯಾಗಿದೆ. ಅರ್ಹ ನಾಗರಿಕರನ್ನು ಸೇರಿಸುವುದನ್ನು ಖಚಿತಪಡಿಸಿ ಕೊಳ್ಳುವುದು ಮತ್ತು ಮೃತಪಟ್ಟವರು, ಸ್ಥಳಾಂತರಗೊಂಡವರು, ನಕಲಿ ಮತ್ತು ಇತರ ಅನರ್ಹ ಮತದಾರರನ್ನು (ಪೌರರಲ್ಲದವರೂ ಸೇರಿದಂತೆ) ಪಟ್ಟಿಯಿಂದ ತೆಗೆದುಹಾಕುವುದು ಇದರ ಮುಖ್ಯ ಉದ್ದೇಶವಾಗಿದೆ. ‘ಸೇವ್ ಅಮೆರಿಕ’ ಮಸೂದೆ ಈ ವಿಷಯವನ್ನು ವಿಭಿನ್ನವಾಗಿ ನಿಭಾಯಿಸಿದರೂ, ಭಾರತದಂತೆಯೇ ಪೌರತ್ವವು ಇದರ ಕೇಂದ್ರಬಿಂದುವಾಗಿದೆ. ಇದು ಫೆಡರಲ್ ಚುನಾವಣೆಗಳಿಗೆ ನೋಂದಾಯಿಸುವ ಮೊದಲು ವ್ಯಕ್ತಿಯು ಅಮೆರಿಕದ ಪ್ರಜೆ ಎಂಬುದಕ್ಕೆ ದಾಖಲಾತಿ ಪುರಾವೆಯನ್ನು ಕಡ್ಡಾಯಗೊಳಿಸಲು ಬಯಸುತ್ತದೆ ಮತ್ತು ಮತದಾರರ ಪಟ್ಟಿಯಲ್ಲಿರುವ ಅಮೆರಿಕನ್ನರಲ್ಲದವರನ್ನು ಗುರುತಿಸುವ ಕಾರ್ಯವಿಧಾನಗಳನ್ನು ಸೂಚಿಸುತ್ತದೆ. ಆದ್ದರಿಂದ ಸಾಮಾನ್ಯ ಉದ್ದೇಶವು ಒಂದೇ ಆಗಿದೆ. ಎರಡೂ ವ್ಯವಸ್ಥೆಗಳು ಮತದಾರರ ಪಟ್ಟಿಯು ಅರ್ಹತಾ ಮಾನದಂಡಗಳು ಮತ್ತು ಪೌರತ್ವದ ಕಟ್ಟುನಿಟ್ಟಾದ ಪರಿಶೀಲನೆಯನ್ನು ಆಧರಿಸಿರಬೇಕು ಎಂದು ಒತ್ತಿಹೇಳುತ್ತವೆ.

ಕೆಳಮನೆಯಾದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ 2026ರ ಫೆಬ್ರವರಿಯಲ್ಲಿ ‘ಸೇವ್ ಅಮೆರಿಕ’ ಮಸೂದೆಯನ್ನು ಅನುಮೋದಿಸಿದೆ. ಮೇಲ್ಮನೆಯಾದ ಸೆನೆಟ್​ನಲ್ಲಿ ರಿಪಬ್ಲಿಕನ್ನರು 53 ಸ್ಥಾನಗಳನ್ನು ಹೊಂದಿದ್ದು, ಸಾಮಾನ್ಯವಾಗಿ ಮಸೂದೆಗೆ 60 ಮತಗಳು ಬೇಕಾಗುತ್ತವೆ. ಮಸೂದೆ ಅಲ್ಲಿ ಅಡಚಣೆ ಎದುರಿಸಿದರೆ, ಟ್ರಂಪ್ ಸೆನೆಟ್ ನಿಯಮಗಳನ್ನು ಬದಲಾಯಿಸಲು ಒತ್ತಡ ಹೇರಬಹುದು, ರಾಜ್ಯಗಳಿಗೆ ಆರ್ಥಿಕ ಪೋ›ತ್ಸಾಹ ನೀಡಬಹುದು ಅಥವಾ ಎಕ್ಸಿಕ್ಯೂಟಿವ್ ಆರ್ಡರ್ ಮೊರೆ ಹೋಗಬಹುದು. ಆದರೆ ಅಮೆರಿಕ ಸಂಸತ್ತಿನ ಅನುಮೋದನೆಯಿಲ್ಲದೆ ದೇಶಾದ್ಯಂತ ಏಕರೂಪದ ವೋಟರ್ ಐಡಿ ಕಾನೂನನ್ನು ಜಾರಿಗೆ ತರುವುದು ಕಷ್ಟಕರವಾಗಿದೆ.

‘ಸೇವ್ ಅಮೆರಿಕ’ ಮಸೂದೆಯ ಪರವಾಗಿ ಶ್ವೇತಭವನವು ಭಾರತ ಮತ್ತು ಬ್ರೆಜಿಲ್​ನ ಚುನಾವಣಾ ವ್ಯವಸ್ಥೆಗಳನ್ನು ಸ್ಪಷ್ಟವಾಗಿ ಬಳಸಿಕೊಂಡು, ಅಮೆರಿಕದ ನಿಯಮಗಳು ಅತಿಯಾದ ಸಡಿಲಿಕೆಯಿಂದ ಕೂಡಿವೆ ಎಂದು ವಾದಿಸುತ್ತಿದೆ. ಭಾರತ ಮತ್ತು ಬ್ರೆಜಿಲ್ ಮತದಾರರ ಗುರುತಿನ ಚೀಟಿಯನ್ನು ಬಯೋಮೆಟ್ರಿಕ್ ಡೇಟಾಬೇಸ್​ಗೆ ಜೋಡಿಸುತ್ತವೆ ಎಂದು ಹೇಳುವ ಮೂಲಕ ಯುಎಸ್​ನಲ್ಲಿರುವ ಪೌರತ್ವ ಸ್ವಯಂ-ದೃಢೀಕರಣಕ್ಕೆ ಇದನ್ನು ಹೋಲಿಸಿದೆ. ಸೇವ್ ಅಮೆರಿಕ ಮಸೂದೆಯು ಫೆಡರಲ್ ಮತದಾರರ ನೋಂದಣಿಗೆ ಪೌರತ್ವದ ದಾಖಲಾತಿ ಪುರಾವೆಯನ್ನು ಕಡ್ಡಾಯಗೊಳಿಸುತ್ತದೆ ಮತ್ತು ಮತದಾರರ ಗುರುತಿಗೆ ಕಠಿಣವಾದ ನಿಯಮಗಳನ್ನು ವಿಧಿಸುತ್ತದೆ.

ಮುಖ್ಯವಾಗಿ, ಅಂಚೆ ಮತದಾನದ ಮೇಲೆ ಕಠಿಣ ನಿರ್ಬಂಧಗಳನ್ನು ಹೇರುವುದು ಟ್ರಂಪ್ ಯೋಜನೆಯಾಗಿದೆ. ಅಮೆರಿಕ ಜನಗಣತಿ ಬ್ಯೂರೋ ಪ್ರಕಾರ, 2024 ರ ಅಧ್ಯಕ್ಷೀಯ ಚುನಾವಣೆಯಲ್ಲಿ 29% ಮತದಾರರು ಅಂಚೆ ಮತದಾನದ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿದ್ದರು. ಭಾರತದ ಅಂಕಿಅಂಶಗಳೊಂದಿಗೆ ಹೋಲಿಸಿದರೆ, ಭಾರತೀಯ ಚುನಾವಣಾ ಆಯೋಗದ ಪ್ರಕಾರ ಚಲಾವಣೆಯಾದ ಒಟ್ಟು ಮತಗಳಲ್ಲಿ 0.66% ಮಾತ್ರ ಅಂಚೆ ಮತಪತ್ರಗಳಾಗಿದ್ದವು. ಚುನಾವಣಾ ವಂಚನೆಯನ್ನು ತಡೆಗಟ್ಟಲು ಮತ್ತು ಅಮೆರಿಕದ ಪ್ರಜೆಗಳಲ್ಲದವರು ಯುಎಸ್ ಚುನಾವಣೆಗಳ ಮೇಲೆ ಪ್ರಭಾವ ಬೀರುವುದನ್ನು ನಿಲ್ಲಿಸಲು ಈ ಕ್ರಮಗಳು ಅಗತ್ಯ ಎಂಬುದು ಟ್ರಂಪ್ ವಾದವಾಗಿದೆ.

ಟ್ರಂಪ್ ಹೇಳಿಕೆಗೆ ಸಂಬಂಧಿಸಿದಂತೆ ಕಾಂಗ್ರೆಸ್ ನಾಯಕ ಪವನ್ ಖೇರಾ ವ್ಯಂಗ್ಯವಾಡಿದ್ದಾರೆ. ‘ಡಿಯರ್ ಡೊನಾಲ್ಡ್ ಟ್ರಂಪ್, ಜ್ಞಾನೇಶ್ ಕುಮಾರ್ ಅವರನ್ನು ಅಮೆರಿಕಕ್ಕೆ ಕರೆದುಕೊಂಡು ಹೋಗಿ, ಅಲ್ಲೇ ಇರಿಸಿಕೊಳ್ಳಿ. ನಾವು ಮುಂದಿನ ಲಭ್ಯವಿರುವ ವಿಮಾನದಲ್ಲೇ ಇವಿಎಂ ಯಂತ್ರಗಳನ್ನೂ ಕಳುಹಿಸಿಕೊಡುತ್ತೇವೆ’ ಎಂದು ‘ಎಕ್ಸ್​ನಲ್ಲಿ ಬರೆದುಕೊಂಡಿದ್ದಾರೆ.