'ಭಾರತ ನನ್ನ ತಾಯಿಯ ಜೀವವನ್ನು ಉಳಿಸಿತು' ಶೇಖ್ ಹಸೀನಾ ಮಗ ಸಜೀಬ್ ವಾಝೇದ್ ಜಾಯ್..Sheikh Hasina

1971ರ ಯುದ್ಧ ಅಪರಾಧಗಳ ತನಿಖೆ ಮತ್ತು ವಿಚಾರಣೆ ನಡೆಸಲು ಶೇಖ್​ ಹಸೀನಾ 2009ರಲ್ಲಿ ಅಪರಾಧ ನ್ಯಾಯ ಮಂಡಳಿ(ಐಸಿಟಿ)ಯನ್ನು ಮರು ರಚಿಸಿದರು. ಸಂಸತ್ತಿನಲ್ಲಿ ಅಂಗೀಕರಿಸಲ್ಪಟ್ಟ ಈ ಕಾನೂನಿನ ಅನ್ವಯ ಯಾವುದೇ ರಾಜಕೀಯ ನಾಯಕ, ಸಚಿವ ಅಥವಾ ಮಾಜಿ ಪ್ರಧಾನಿಯನ್ನು ಬಂಧಿಸಿ, ವಿಚಾರಣೆಗೆ ಒಳಪಡಿಸಿ, ಶಿಕ್ಷೆ ನೀಡಬಹುದು. ಹಸೀನಾ ರಚಿಸಿದ ಐಸಿಟಿಯೇ ಈಗ ಅವರಿಗೆ ಮರಣದಂಡನೆ ಶಿಕ್ಷೆ  ಘೋಷಿಸಿದೆ. 2024ರ ಜುಲೈನಿಂದ ಆಗಸ್ಟ್​ವರೆಗೆ ನಡೆದ ವಿದ್ಯಾರ್ಥಿಗಳ ಪ್ರತಿಭಟನೆ ಸಂಬಂಧ ಹಸೀನಾ ಮಾನವೀಯತೆ ವಿರುದ್ಧ ಅಪರಾಧ ಎಸಗಿದ್ದಾರೆ ಎಂದು ತೀರ್ಪಿನಲ್ಲಿ ಹೇಳಲಾಗಿದೆ. ಈ ತೀರ್ಪು ವಂಚನೆಯಿಂದ ಕೂಡಿದೆ ಎಂದು ಹಸೀನಾ ಆರೋಪಿಸಿದ್ದಾರೆ.

ಸಂದರ್ಶನದಲ್ಲಿ ಸಜೀಬ್ ವಾಝೇದ್ ಜಾಯ್, "ಭಾರತವು ನನ್ನ ತಾಯಿಯ ಜೀವವನ್ನು ಉಳಿಸಿತು. ಅವರು ಆಗಸ್ಟ್ 2024 ರಲ್ಲಿ ಬಾಂಗ್ಲಾದೇಶವನ್ನು ತೊರೆಯದಿದ್ದರೆ, ಉಗ್ರಗಾಮಿಗಳು ಅವರನ್ನು ಕೊಲ್ಲುತ್ತಿದ್ದರು. ನನ್ನ ತಾಯಿಗೆ ಆಶ್ರಯ ನೀಡಿದ್ದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿಯವರಿಗೆ ನನ್ನ ಹೃದಯದಿಂದ ಧನ್ಯವಾದ ಹೇಳುತ್ತೇನೆ.  ನ್ಯಾಯಾಲಯದ ವಿಚಾರಣೆಯಲ್ಲಿ ಯಾವುದೇ ಕಾನೂನು ಪ್ರಕ್ರಿಯೆಯನ್ನು ಅನುಸರಿಸಲಾಗಿಲ್ಲ ಎಂದು ಹೇಳಿದರು.

"ವಿಚಾರಣೆಗೆ ಮುನ್ನವೇ 17 ನ್ಯಾಯಾಧೀಶರನ್ನು ತೆಗೆದುಹಾಕಲಾಯಿತು. ಸಂಸತ್ತಿನ ಅನುಮೋದನೆಯಿಲ್ಲದೆ ಕಾನೂನುಗಳನ್ನು ಬದಲಾಯಿಸಲಾಯಿತು. ನನ್ನ ತಾಯಿಯ ವಕೀಲರನ್ನು ನ್ಯಾಯಾಲಯಕ್ಕೆ ಬರಲು ಸಹ ಅನುಮತಿಸಲಿಲ್ಲ. ಯಾವುದೇ ಕಾನೂನು ಪ್ರಕ್ರಿಯೆ ಇಲ್ಲದಿದ್ದಾಗ ಯಾವುದೇ ದೇಶವು ಹಸ್ತಾಂತರಿಸುವುದಿಲ್ಲ. ಭಾರತ ಈ ಬೇಡಿಕೆಯನ್ನು ಎಂದಿಗೂ ಸ್ವೀಕರಿಸುವುದಿಲ್ಲ ಎಂದು ಅವರು ವಿಶ್ವಾಸ ಹೊಂದಿದ್ದಾರೆ.

ತಮ್ಮ ಸರ್ಕಾರ ಆರಂಭಿಕ ವಿದ್ಯಾರ್ಥಿ ಚಳವಳಿಯನ್ನು ತಪ್ಪಾಗಿ ನಿರ್ವಹಿಸಿದೆ, ಆದರೆ ನಂತರ ನಡೆದದ್ದು ಸ್ವಯಂಪ್ರೇರಿತ ಸಾರ್ವಜನಿಕ ಚಳವಳಿಯಲ್ಲ, ಬದಲಾಗಿ ಯೋಜಿತ ರಾಜಕೀಯ ದಂಗೆ. ಪ್ರತಿಭಟನಾಕಾರರ ನಡುವೆ ನುಸುಳಿದ ಉಗ್ರಗಾಮಿಗಳಿಗೆ ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐ ಶಸ್ತ್ರಾಸ್ತ್ರಗಳನ್ನು ಒದಗಿಸಿದೆ ಎಂದು ಅವರು ಆರೋಪಿಸಿದರು.

ಪಾಕಿಸ್ತಾನದ ಭಾಗಿಯಾಗಿರುವ ಬಗ್ಗೆ ವೀಡಿಯೊ ಪುರಾವೆಗಳನ್ನು ಉಲ್ಲೇಖಿಸಿ ಜಾಯ್, "ಈ ಶಸ್ತ್ರಾಸ್ತ್ರಗಳನ್ನು ಉಪಖಂಡದ ಬೇರೆಡೆಯಿಂದ ಪೂರೈಸಲು ಸಾಧ್ಯವಿಲ್ಲ; ಏಕೈಕ ಮೂಲ ಐಎಸ್‌ಐ. ಹಸೀನಾ ಸರ್ಕಾರದ ಅವಧಿಯಲ್ಲಿ ಶಿಕ್ಷೆಗೊಳಗಾದ ಸಾವಿರಾರು ಭಯೋತ್ಪಾದಕರನ್ನು ಮುಹಮ್ಮದ್ ಯೂನಸ್ ಮಧ್ಯಂತರ ಸರ್ಕಾರ ಬಿಡುಗಡೆ ಮಾಡಿದೆ ಎಂದು ಜಾಯ್ ಎಚ್ಚರಿಸಿದ್ದಾರೆ. 

ಪದಚ್ಯುತ ಪ್ರಧಾನಿ ಬಾಂಗ್ಲಾದೇಶದಲ್ಲಿ ತಮ್ಮ 15 ವರ್ಷಗಳ ಅಧಿಕಾರಾವಧಿಗೆ ಸಂಬಂಧಿಸಿದಂತೆ ಹಲವಾರು ಆರೋಪಗಳನ್ನು ಎದುರಿಸುತ್ತಿದ್ದಾರೆ.