ಇಸ್ಲಾಮಾಬಾದ್ ಶಾಂತಿ ಮಾತುಕತೆಗೆ ಹಿನ್ನಡೆ: ಅಮೆರಿಕ ನಿಯೋಗದ ಭೇಟಿಗೆ ಇರಾನ್ ನಕಾರ! ಹೊರ್ಮುಜ್ ಸುತ್ತ ಹೆಚ್ಚಿದ ಆತಂಕ! US -Iran Talks

ಪಾಕಿಸ್ತಾನದ ಪ್ರಮುಖ ಮಾಧ್ಯಮ ಸಂಸ್ಥೆ 'ARY ನ್ಯೂಸ್' ಅಧ್ಯಕ್ಷ ಕಮ್ರಾನ್ ಖಾನ್ ಅವರು ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ, ಇರಾನ್ ಮಾತುಕತೆಗೆ ಕುಳಿತುಕೊಳ್ಳಲು ಕಠಿಣವಾದ ಮುನ್ಸೂಚನೆಯನ್ನು ನೀಡಿದೆ.

ಪ್ರಮುಖ ಬೇಡಿಕೆ: ಇರಾನಿನ ಬಂದರುಗಳ ಮೇಲೆ ಅಮೆರಿಕ ವಿಧಿಸಿರುವ ನೌಕಾ ದಿಗ್ಬಂಧನವನ್ನು, ವಿಶೇಷವಾಗಿ ಕಾರ್ಯತಂತ್ರದ ದೃಷ್ಟಿಯಿಂದ ನಿರ್ಣಾಯಕವಾಗಿರುವ 'ಹೊರ್ಮುಜ್ ಜಲಸಂಧಿ' ಬಳಿಯ ದಿಗ್ಬಂಧನವನ್ನು ಮೊದಲು ತೆರವುಗೊಳಿಸಬೇಕು ಎಂದು ಇರಾನ್‌ ಪಟ್ಟು ಹಿಡಿದಿದೆ.

ಈ ಮಾತುಕತೆಗಾಗಿ ಅಮೆರಿಕದ ಕಡೆಯಿಂದ ಅಮೆರಿಕದ ವಿಶೇಷ ಪ್ರತಿನಿಧಿ ಸ್ಟೀವ್ ವಿಟ್ಕಾಫ್ ಮತ್ತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಳಿಯ ಹಾಗೂ ಹಿರಿಯ ಸಲಹೆಗಾರ ಜಾರೆಡ್ ಕುಶ್ನರ್ ನೇತೃತ್ವದ ತಂಡ ಸಿದ್ಧವಾಗಿತ್ತು. ಇತ್ತ ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಗ್ಚಿ ಅವರು ಶುಕ್ರವಾರವೇ ಇಸ್ಲಾಮಾಬಾದ್‌ಗೆ ಆಗಮಿಸಿದ್ದು, ಜಾಗತಿಕ ಮಟ್ಟದಲ್ಲಿ ದೊಡ್ಡ ಮಟ್ಟದ ನಿರೀಕ್ಷೆ ಮೂಡಿಸಿತ್ತು. ಆದರೆ ಇರಾನ್‌ನ ಇತ್ತೀಚಿನ ನಡೆಯು ಈ ನಿರೀಕ್ಷೆಗಳಿಗೆ ತಣ್ಣೀರೆರಚಿದೆ.

ಶಾಂತಿ ಮಾತುಕತೆಯ ಹಿನ್ನೆಲೆಯಲ್ಲಿ ಪಾಕಿಸ್ತಾನದ ರಾಜಧಾನಿ ಇಸ್ಲಾಮಾಬಾದ್ ಅನ್ನು ಸಂಪೂರ್ಣವಾಗಿ ಸೀಲ್ ಮಾಡಲಾಗಿದೆ.

ರೆಡ್ ಝೋನ್ ದಿಗ್ಬಂಧನ: ನಗರದ ಪ್ರಮುಖ ರಸ್ತೆಗಳನ್ನು ಮುಚ್ಚಲಾಗಿದ್ದು, ಹೈ-ಸೆಕ್ಯೂರಿಟಿ 'ರೆಡ್ ಝೋನ್' ಸುತ್ತಲೂ ಭದ್ರತಾ ಪಡೆಗಳು ಹದ್ದಿನ ಕಣ್ಣಿಟ್ಟಿವೆ.

ಹಿಂದಿನ ಸುತ್ತಿನ ವೈಫಲ್ಯ: ಈ ಮೊದಲು ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಮತ್ತು ಇರಾನ್ ಸಂಸತ್ತಿನ ಸ್ಪೀಕರ್ ಎಂಬಿ ಗಾಲಿಬಾಫ್ ನಡುವೆ ನಡೆದ 21 ಗಂಟೆಗಳ ಸುದೀರ್ಘ ಚರ್ಚೆಯು ಯಾವುದೇ ಫಲ ನೀಡದೆ ಅಂತ್ಯಗೊಂಡಿತ್ತು. ಹೀಗಾಗಿ ಈ ಎರಡನೇ ಸುತ್ತಿನ ಮೇಲೆ ಇಡೀ ವಿಶ್ವದ ಕಣ್ಣಿತ್ತು.

ಹೊರ್ಮುಜ್ ಜಲಸಂಧಿಯು ಜಾಗತಿಕ ತೈಲ ಪೂರೈಕೆಯ ಜೀವನಾಡಿಯಾಗಿದೆ. ಅಮೆರಿಕ ಇಲ್ಲಿ ತನ್ನ ಹಿಡಿತ ಸಾಧಿಸಲು ಯತ್ನಿಸುತ್ತಿದ್ದರೆ, ಇರಾನ್ ಇದನ್ನು ತನ್ನ ಅಸ್ತ್ರವನ್ನಾಗಿ ಬಳಸುತ್ತಿದೆ. ಅಮೆರಿಕ ಒಂದು ವೇಳೆ ದಿಗ್ಬಂಧನ ತೆರವುಗೊಳಿಸಲು ಒಪ್ಪದಿದ್ದರೆ, ಪಶ್ಚಿಮ ಏಷ್ಯಾದಲ್ಲಿ ಸಂಘರ್ಷ ಮತ್ತಷ್ಟು ಉಲ್ಬಣಗೊಳ್ಳುವ ಭೀತಿ ಎದುರಾಗಿದೆ. ಇಸ್ಲಾಮಾಬಾದ್‌ನಲ್ಲಿ ಈಗ ಬೀಡುಬಿಟ್ಟಿರುವ ರಾಜತಾಂತ್ರಿಕರು ಇರಾನ್ ಅನ್ನು ಮನವೊಲಿಸಲು ಹರಸಾಹಸ ಪಡುತ್ತಿದ್ದಾರೆ,(ಏಜೆನ್ಸೀಸ್).