ಸೌದಿ ಬಸ್​ ದುರಂತ: ಒಂದೇ​​ ಕುಟುಂಬದ 18 ಮಂದಿ ದುರ್ಮರಣ! ಮೆಕ್ಕಾದಲ್ಲೇ ಅಂತ್ಯಕ್ರಿಯೆಗೆ ಮನವಿ

ನವದೆಹಲಿ: ಸೌದಿ ಅರೇಬಿಯಾದಲ್ಲಿ ಸೋಮವಾರ (ನ.17) ಮುಂಜಾನೆ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ 45 ಜನರು ದುರ್ಮರಣ ಹೊಂದಿದರು. ಈ ಅಪಘಾತದಲ್ಲಿ ಹೈದರಾಬಾದ್ ಮೂಲದ ಒಂದೇ ಕುಟುಂಬದ 18 ಮಂದಿ ದುರಂತ ಅಂತ್ಯ ಕಂಡಿರುವುದು ನಿಜಕ್ಕೂ ದುಃಖಕರ ಸಂಗತಿ.

ಈ ಬಗ್ಗೆ ಮಾಹಿತಿ ಹಂಚಿಕೊಂಡ ತೆಲಂಗಾಣ ಹಜ್ ಸಮಿತಿ, ನಿವೃತ್ತ ರೈಲ್ವೆ ಉದ್ಯೋಗಿ ನಜೀರುದ್ದೀನ್ ಅವರ ಇಡೀ ಕುಟುಂಬ ಸಾವನ್ನಪ್ಪಿದೆ. ಭೀಕರ ಅಪಘಾತದಲ್ಲಿ ಹೈದರಾಬಾದ್‌ನ ವಿದ್ಯಾನಗರದ ನಿವಾಸಿ ನಜೀರುದ್ದೀನ್ ಅವರ ಕುಟುಂಬದ 18 ಸದಸ್ಯರು ತೀರ್ಥಯಾತ್ರೆಗೆ ಮೆಕ್ಕಾಗೆ ತೆರಳಿದ್ದರು. ಈ ವೇಳೆ ದುರಂತ ಸಂಭವಿಸಿದೆ ಎಂದು ತಿಳಿಸಲಾಗಿದೆ. 18 ಜನರ ಅಂತ್ಯಕ್ರಿಯೆಯನ್ನು ಮೆಕ್ಕಾದ ಮದೀನಾದಲ್ಲಿ ನಡೆಸುವಂತೆ ಅಲ್ಲಿನ ಸರ್ಕಾರವನ್ನು ಕೋರಲಾಗಿದೆ.

ನಜೀರುದ್ದೀನ್ ಅವರ ಕುಟುಂಬ ಮೆಕ್ಕಾಗೆ ತೆರಳಿತ್ತು. ಅವರು ಮುಂದಿನ ವಾರ ಹೈದರಾಬಾದ್‌ಗೆ ಬರಬೇಕಿತ್ತು. ಈ ಮಧ್ಯೆ ಎಲ್ಲರೂ ಸಾವನ್ನಪ್ಪಿರುವುದು ನಮಗೆ ಅತೀವ ನೋವುಂಟು ತಂದಿದೆ. ಬಸ್ ಅಪಘಾತದಲ್ಲಿ ನಾವು 18 ಕುಟುಂಬ ಸದಸ್ಯರನ್ನು ಕಳೆದುಕೊಂಡಿದ್ದೇವೆ. ನಜೀರುದ್ದೀನ್ ನಿವೃತ್ತ ರೈಲ್ವೆ ಉದ್ಯೋಗಿ ಆಗಿದ್ದರು. ಅವರ ಮಗ ಇತ್ತೀಚೆಗಷ್ಟೇ ಅಮೆರಿಕದಿಂದ ಮರಳಿದ್ದರು. ನಜೀರುದ್ದೀನ್ ಅವರ ಪತ್ನಿ, ಇಬ್ಬರು ಪುತ್ರರು, ಸೊಸೆ ಮತ್ತು ಆರು ಮಕ್ಕಳು, ಒಟ್ಟು 18 ಜನರು ಸಾವಿಗೀಡಾಗಿದ್ದಾರೆ ಎಂದು ಕುಟುಂಬಸ್ಥರು ತಿಳಿಸಿದ್ದಾರೆ,(ಏಜೆನ್ಸೀಸ್).