ಸೌಜನ್ಯವೇ ಮುಳುವಾಯ್ತಾ..? ಹಗ್ಗ ಕೊಟ್ಟು ಕೈ ಕಟ್ಟಿಸಿಕೊಂಡ ಸಲ್ಮಾನ್ ಅಘಾ!; ಮಿರಾಜ್ ಕುತಂತ್ರಕ್ಕೆ ಪಾಕ್ ಬ್ಯಾಟರ್ ಆಕ್ರೋಶ! | Salman Aghas Runout

ಬಾಂಗ್ಲಾ ನಾಯಕ ಮೆಹಿದಿ ಹಸನ್ ಮಿರಾಜ್ ಇಂದಿನ ನಡೆ ಪಾಕಿಸ್ತಾನದ ಬ್ಯಾಟರ್ ಸಲ್ಮಾನ್ ಅಘಾರನ್ನು ಕೆರಳಿಸಿದ್ದು, ಮೈದಾನದಲ್ಲೇ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಯಿತು.

ಪಾಕಿಸ್ತಾನ ಇನಿಂಗ್ಸ್‌ನ 39ನೇ ಓವರ್‌ನಲ್ಲಿ ಈ ಘಟನೆ ನಡೆದಿದ್ದು, ಮೊಹಮ್ಮದ್ ರಿಜ್ವಾನ್ ಬಾರಿಸಿದ ಚೆಂಡನ್ನು ಬೌಲರ್ ಮೆಹಿದಿ ಹಸನ್ ಮಿರಾಜ್ ತಡೆದರು. ಈ ವೇಳೆ ನಾನ್-ಸ್ಟ್ರೈಕರ್ ತುದಿಯಲ್ಲಿದ್ದ ಸಲ್ಮಾನ್ ಅಘಾ ಕ್ರೀಸ್‌ನಿಂದ ಸ್ವಲ್ಪ ಹೊರಗಿದ್ದರು. ಅಘಾ ತಮ್ಮ ಬಳಿ ಬಂದ ಚೆಂಡನ್ನು ಎತ್ತಿ ಬೌಲರ್ ಮಿರಾಜ್‌ಗೆ ನೀಡಲು ಮುಂದಾದರು. ಆದರೆ ಅಷ್ಟೊತ್ತಿಗಾಗಲೇ ಮಿರಾಜ್ ತಾವೇ ಬಾಲ್​ ತೆಗೆದುಕೊಂಡು ಸ್ಟಂಪ್‌ಗೆ ಎಸೆದರು.

ಈ ಘಟನೆಯು 2023ರ ವಿಶ್ವಕಪ್‌ನಲ್ಲಿ ಶ್ರೀಲಂಕಾದ ಏಂಜೆಲೊ ಮ್ಯಾಥ್ಯೂಸ್ ಅವರ ಟೈಮ್ ಔಟ್ ವಿವಾದವನ್ನು ನೆನಪಿಸಿತು. ಅಂದೂ ಕೂಡ ಶಕೀಬ್ ಅಲ್ ಹಸನ್ ನೇತೃತ್ವದ ಬಾಂಗ್ಲಾ ತಂಡ ಇದೇ ರೀತಿಯ ತಾಂತ್ರಿಕ ನಿಯಮ ಬಳಸಿ ಔಟ್ ಮಾಡಿತ್ತು. ಇಂದಿನ ಘಟನೆಯು ಬಾಂಗ್ಲಾದೇಶ ತಂಡವು ಗೆಲುವಿಗಾಗಿ ಕ್ರೀಡಾ ಗೌರವವನ್ನು ಬಲಿ ಕೊಡುತ್ತಿದೆ ಎಂಬ ಟೀಕೆಗೆ ಮತ್ತೊಮ್ಮೆ ಗುರಿಯಾಗಿದೆ.

275 ರನ್‌ಗಳ ಗುರಿ ಬೆನ್ನಟ್ಟಿದ ಬಾಂಗ್ಲಾದೇಶಕ್ಕೆ ಶಾಹೀನ್ ಅಫ್ರಿದಿ ಆರಂಭದಲ್ಲೇ ಆಘಾತ ನೀಡಿದರು. ಕೇವಲ 15 ರನ್‌ಗಳಿಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ಮಳೆ ಸುರಿಯಲಾರಂಭಿಸಿತು. ಪಂದ್ಯ ಸ್ಥಗಿತಗೊಂಡಾಗ ಬಾಂಗ್ಲಾ 6.3 ಓವರ್‌ಗಳಲ್ಲಿ 27/3 ರನ್ ಗಳಿಸಿತ್ತು. ಲಿಟ್ಟನ್ ದಾಸ್ (13*) ಕ್ರೀಸ್‌ನಲ್ಲಿದ್ದಾರೆ(ಏಜೆನ್ಸೀಸ್​).