ನೆತನ್ಯಾಹು ಫೋನ್ ಕ್ಯಾಮೆರಾಕ್ಕೆ ಕೆಂಪು ಟೇಪ್..; ವಿಶ್ವದ ಅತ್ಯಂತ ಶಕ್ತಿಶಾಲಿ ಬೇಹುಗಾರಿಕಾ ರಾಷ್ಟ್ರದ ಪ್ರಧಾನಿಗೂ ಹ್ಯಾಕರ್ಸ್ ಭೀತಿಯೇ? Benjamin Netanyahu

ಪ್ರಖ್ಯಾತ ಬಿಸಿನೆಸ್ ಇನ್ಫ್ಲುಯೆನ್ಸರ್ ಮರಿಯೊ ನೌಫಲ್ ಈ ಫೋಟೋವನ್ನು ಹಂಚಿಕೊಂಡು, ಇಸ್ರೇಲ್ ಪ್ರಧಾನಿಯೇ ತಮ್ಮ ಫೋನ್ ಕ್ಯಾಮೆರಾ ಮುಚ್ಚಬೇಕಾದ ಪರಿಸ್ಥಿತಿ ಬಂದಿದೆ ಎಂದರೆ, ಸಾಮಾನ್ಯ ಜನರ ಗತಿಯೇನು? ಅವರು ಯಾರ ಬಗ್ಗೆ ಇಷ್ಟೊಂದು ಹೆದರುತ್ತಿದ್ದಾರೆ? ಎಂದು ಪ್ರಶ್ನಿಸಿದ್ದಾರೆ. ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆಯೇ, ಪ್ರಪಂಚದಾದ್ಯಂತ ಡಿಜಿಟಲ್ ಸುರಕ್ಷತೆಯ ಬಗ್ಗೆ ಚರ್ಚೆ ಆರಂಭವಾಗಿದೆ.

ಈ ಬಗ್ಗೆ ಎಕ್ಸ್​ನ ಎಐ ಚಾಟ್‌ಬಾಟ್ 'ಗ್ರೋಕ್' (Grok) ವಿಶ್ಲೇಷಣೆ ನೀಡಿದ್ದು, ಇದು ಇಸ್ರೇಲ್‌ನ ಉನ್ನತ ಭದ್ರತಾ ಶಿಷ್ಟಾಚಾರದ ಭಾಗ ಎಂದು ಹೇಳಿದೆ. ಅತಿ ಸೂಕ್ಷ್ಮ ಸರ್ಕಾರಿ ಸೌಲಭ್ಯಗಳು ಅಥವಾ ವರ್ಗೀಕೃತ ಪ್ರದೇಶಗಳಿಗೆ ಪ್ರವೇಶಿಸುವಾಗ, ಆಕಸ್ಮಿಕವಾಗಿ ಅಥವಾ ದುರುದ್ದೇಶಪೂರಿತವಾಗಿ ಯಾವುದೇ ಚಿತ್ರೀಕರಣ ನಡೆಯಬಾರದು ಎಂಬ ಕಾರಣಕ್ಕೆ ಇಂತಹ ಟ್ಯಾಂಪರ್-ಎವಿಡೆಂಟ್ ಸ್ಟಿಕ್ಕರ್‌ಗಳನ್ನು ಬಳಸುವುದು ಅಲ್ಲಿನ ಸಾಮಾನ್ಯ ಪದ್ಧತಿಯಾಗಿದೆ.

ವಿಪರ್ಯಾಸವೆಂದರೆ, ಜಗತ್ತಿನಾದ್ಯಂತ ಪತ್ರಕರ್ತರು ಮತ್ತು ರಾಜಕಾರಣಿಗಳ ಮೇಲೆ ನಿಗಾ ಇಡಲು ಬಳಸಲಾಗುವ ಪ್ರಖ್ಯಾತ ಪೆಗಾಸಸ್ ಸ್ಪೈವೇರ್ ಅನ್ನು ಅಭಿವೃದ್ಧಿಪಡಿಸಿದ್ದು ಇಸ್ರೇಲ್ ಮೂಲದ ಎನ್‌ಎಸ್‌ಒ (NSO) ಸಂಸ್ಥೆ. ತಂತ್ರಜ್ಞಾನದ ಮೂಲಕ ಬೇರೆಯವರ ಬೆಡ್‌ರೂಮ್‌ವರೆಗೂ ಇಣುಕಬಲ್ಲ ತಂತ್ರಜ್ಞಾನ ಹೊಂದಿರುವ ದೇಶದ ಪ್ರಧಾನಿಯೇ ತನ್ನ ಕ್ಯಾಮೆರಾಕ್ಕೆ ಟೇಪ್ ಹಚ್ಚಿರುವುದು ಬೇಹುಗಾರಿಕೆಗೆ ಯಾರು ಬೇಕಾದರೂ ಬಲಿಯಾಗಬಹುದು ಎಂಬ ಸತ್ಯವನ್ನು ಎತ್ತಿ ತೋರಿಸುತ್ತಿದೆ.

ಡಿಜಿಟಲ್ ಫೋರೆನ್ಸಿಕ್ ತಜ್ಞರ ಪ್ರಕಾರ, ಹ್ಯಾಕರ್‌ಗಳು ಹಳೆಯ ಆಪರೇಟಿಂಗ್ ಸಿಸ್ಟಮ್‌ಗಳ ಮೂಲಕ ಅಥವಾ ನಾವು ಅನುಮತಿ ನೀಡಿದ ಆ್ಯಪ್‌ಗಳ ಮೂಲಕ ನಮ್ಮ ಕ್ಯಾಮೆರಾವನ್ನು ನಮಗೆ ತಿಳಿಯದಂತೆ ನಿಯಂತ್ರಿಸಬಹುದು. ನಿಮ್ಮ ಸಾಧನವು ಹ್ಯಾಕ್ ಆಗಿದ್ದರೂ ಸಹ, ಭೌತಿಕವಾಗಿ ಕ್ಯಾಮೆರಾವನ್ನು ಮುಚ್ಚುವುದು ರಹಸ್ಯ ಚಿತ್ರೀಕರಣವನ್ನು ತಡೆಯುವ ಏಕೈಕ ಅಂತಿಮ ಮಾರ್ಗವಾಗಿದೆ ಎಂದು ಅವರು ಎಚ್ಚರಿಸಿದ್ದಾರೆ.

ಸಾಮಾನ್ಯ ನಾಗರಿಕರಿಗೆ ಇದು ಒಂದು ದೊಡ್ಡ ಸಂದೇಶ: ನಿಮ್ಮ ಫೋನ್‌ನ ಸೆಕ್ಯೂರಿಟಿ ಎಷ್ಟೇ ಹೆಚ್ಚಿದ್ದರೂ, ಸೈಬರ್ ಲೋಕದಲ್ಲಿ ಯಾವುದೂ ಶೇ.100 ಸುರಕ್ಷಿತವಲ್ಲ ಎಂದು ತಿಳಿದು ಬಂದಿದೆ,(ಏಜೆನ್ಸೀಸ್).