ಜಪಾನ್​ನಲ್ಲೂ ರಾಜಕೀಯ ಕಂಪನ | Japan

465 ಸದಸ್ಯಬಲ್ಯದ ಪಾರ್ಲಿಮೆಂಟ್​ಗೆ ಫೆಬ್ರವರಿ 8ರಂದು ಮತದಾನ ನಡೆಯಲಿದೆ. ಶಿಂಜೋ ಅಬೆ ಅವರ ನಿಧನದ ನಂತರ ಕೇವಲ ಒಂದು ವರ್ಷ ಪ್ರಧಾನಿಯಾಗಿದ್ದ ಶಿಗೇರು ಇಶಿಬಾ ಅವರ ನೇತೃತ್ವದಲ್ಲಿ ಲಿಬರಲ್ ಡೆಮಾಕ್ರಟಿಕ್ ಪಕ್ಷ ನಿರಂತರ ಸೋಲುಗಳನ್ನು ಅನುಭವಿಸಿತು. ಈ ಕಾರಣದಿಂದ ಬಲಪಂಥೀಯ ವಾದದ ನಾಯಕಿ ಸನೇ ತಕೈಚಿ ಪ್ರಧಾನಿಯಾಗುವ ಮೂಲಕ ಲಿಬರಲ್ ಡೆಮಾಕ್ರಟಿಕ್ ಪಕ್ಷದ ಆಂತರಿಕ ಭಿನ್ನಾಭಿಪ್ರಾಯವನ್ನು ತಕ್ಕಮಟ್ಟಿಗೆ ಸರಿಪಡಿಸಿದರು. ಈ ಜನಪ್ರಿಯತೆಯ ಆಧಾರದ ಮೇಲೆ ಅವರು ಚುನಾವಣೆ ಎದುರಿಸಲು ಸಜ್ಜಾಗಿದ್ದು, ಅವಧಿ ಮುನ್ನವೇ ಪಾರ್ಲಿಮೆಂಟ್ ವಿಸರ್ಜಿಸಿರುವುದು ಕುತೂಹಲ ಮೂಡಿಸಿದೆ.

ಜಪಾನ್ ಪಾರ್ಲಿಮೆಂಟ್​ಗೆ ನ್ಯಾಷನಲ್ ಡಯಟ್ ಅಥವಾ ಕೊಕ್ಕೈ ಎಂದು ಹೆಸರು. ಇದು ಎರಡು ಮನೆಗಳನ್ನು ಹೊಂದಿದೆ: ಕೆಳಮನೆಯು ‘ಹೌಸ್ ಆಫ್ ರಿಪ್ರೆಸೆಂಟೇಟಿವ್ಸ್’ ಆಗಿದ್ದು, ಜಪಾನೀಸ್​ನಲ್ಲಿ ಇದನ್ನು ‘ಶೂಗಿಇನ್’ ಎಂದು ಕರೆಯುತ್ತಾರೆ. ಕೆಳಮನೆಯೇ ಹೆಚ್ಚು ಶಕ್ತಿಶಾಲಿಯಾಗಿದ್ದು, ಪ್ರಧಾನಮಂತ್ರಿಯನ್ನು ಆಯ್ಕೆ ಮಾಡುವುದು, ಬಜೆಟ್ ಅನುಮೋದನೆ ಮುಂತಾದವುಗಳಲ್ಲಿ ಮುಖ್ಯ ಪಾತ್ರ ವಹಿಸುತ್ತದೆ. ಮೇಲ್ಮನೆಯು ‘ಹೌಸ್ ಆಫ್ ಕೌನ್ಸಿಲರ್ಸ್’ ಆಗಿದ್ದು, ಜಪಾನೀಸ್​ನಲ್ಲಿ ಇದನ್ನು ‘ಸಂಗಿಇನ್’ ಎಂದು ಕರೆಯುತ್ತಾರೆ. ಇದು ಸ್ಥಿರತೆ ಮತ್ತು ಪರಿಶೀಲನೆಯ ಪಾತ್ರವನ್ನು ನಿರ್ವಹಿಸುತ್ತದೆ, ಸದಸ್ಯರು 6 ವರ್ಷಗಳ ಅವಧಿಗೆ ಆಯ್ಕೆಯಾಗುತ್ತಾರೆ.