ಪೋಟೋ ವಿವಾದ: ಟ್ರಂಪ್‌ಗೆ ಮೆಲೋನಿ ಟಾಂಗ್: ನಾನಾಗಲಿ, ನನ್ನ ದೇಶವಾಗಲಿ ಯಾರ ಮುಂದೆಯೂ ಭಿಕ್ಷೆ ಬೇಡುವುದಿಲ್ಲ ಎಂದ ಇಟಲಿ ಪ್ರಧಾನಿ! Giorgia Meloni

ಅಮೆರಿಕ ಅಧ್ಯಕ್ಷರ ಈ ಬಾಲಿಶ ಮತ್ತು ಸುಳ್ಳು ಹೇಳಿಕೆಯಿಂದ ತಮಗೆ ತೀವ್ರ ಆಘಾತವಾಗಿದೆ ಎಂದು ಹೇಳಿರುವ ಮೆಲೋನಿ, ಪಾಶ್ಚಿಮಾತ್ಯ ದೇಶಗಳ ಶತ್ರುಗಳ ಜೊತೆ ಮೃದುವಾಗಿ ನಡೆದುಕೊಳ್ಳುವ ಟ್ರಂಪ್, ತಮ್ಮದೇ ಮಿತ್ರ ರಾಷ್ಟ್ರಗಳ ನಾಯಕರನ್ನು ಇಷ್ಟು ಕೀಳಾಗಿ ಕಾಣುತ್ತಿರುವುದು ದುರದೃಷ್ಟಕರ ಎಂದು ಜರೆದಿದ್ದಾರೆ.

ಇಟಲಿಯ ಪ್ರಮುಖ ವಾಹಿನಿ ಲಾ೭ ಬಿತ್ತರಿಸಿದ ಡೊನಾಲ್ಡ್ ಟ್ರಂಪ್ ಅವರ ಸಂದರ್ಶನವೊಂದು ಈ ಇಡೀ ವಿವಾದಕ್ಕೆ ಕಾರಣವಾಗಿದೆ. ಸಂದರ್ಶನದಲ್ಲಿ ಜಿ೭ ಶೃಂಗಸಭೆಯ ದಿನಗಳನ್ನು ನೆನಪಿಸಿಕೊಂಡಿದ್ದ ಟ್ರಂಪ್, ಮೆಲೋನಿ ಅವರಿಗೆ ನನ್ನೊಂದಿಗೆ ಮಾತನಾಡಲು ಭಾರಿ ಆಸೆಯಿತ್ತು. ನಾನೇ ಕರುಣೆ ತೋರಿಸಿ ಅವರ ಹತ್ತಿರ ಮಾತನಾಡಿದೆ ಅಷ್ಟೇ. ಅದರಲ್ಲೂ ನನ್ನ ಜೊತೆ ಒಂದು ಫೋಟೋ ಬೇಕು ಎಂದು ಅವರು ನನ್ನ ಬಳಿ ಬಹಿರಂಗವಾಗಿ ಗೋಗರೆದರು. ನನಗೆ ಅವರ ಮೇಲೆ ಪಾಪ ಎನಿಸಿತು, ಹಾಗಾಗಿ ಫೋಟೋಗೆ ಫೋಸ್ ನೀಡಿದೆ. ಇಲ್ಲದಿದ್ದರೆ ನಾನು ಫೋಟೋ ತೆಗೆಸಿಕೊಳ್ಳುತ್ತಿರಲಿಲ್ಲ ಎಂದು ವ್ಯಂಗ್ಯವಾಗಿ ಹೇಳಿದ್ದರು. ಟ್ರಂಪ್ ಅವರ ಈ ಮಾತುಗಳು ಇಟಲಿ ಜನರಲ್ಲಿ ಮತ್ತು ರಾಜಕೀಯ ವಲಯದಲ್ಲಿ ತೀವ್ರ ಆಕ್ರೋಶ ಉಂಟುಮಾಡಿತ್ತು.

ಟ್ರಂಪ್ ಅವರ ಹೇಳಿಕೆ ಜಾಗತಿಕ ಮಾಧ್ಯಮಗಳಲ್ಲಿ ಸುದ್ದಿಯಾಗುತ್ತಿದ್ದಂತೆ ಇಟಲಿ ಪ್ರಧಾನಿ ಮೆಲೋನಿ ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಸುದೀರ್ಘ ಪೋಸ್ಟ್ ಹಾಕುವ ಮೂಲಕ ಟ್ರಂಪ್ ಅವರ ಮುಖವಾಡ ಕಳಚಿದ್ದಾರೆ. ಡೊನಾಲ್ಡ್ ಟ್ರಂಪ್ ನೀಡಿರುವ ಹೇಳಿಕೆ ಸಂಪೂರ್ಣವಾಗಿ ಸುಳ್ಳು ಮತ್ತು ಕಲ್ಪಿತ. ಇದನ್ನು ಕೇಳಿ ನನಗೆ ಆಶ್ಚರ್ಯವಾಗಿದೆ. ಕೆಲವು ವಿಷಯಗಳಿಗೆ ತಕ್ಷಣವೇ ಪ್ರತಿಕ್ರಿಯೆ ನೀಡಬೇಕಾಗುತ್ತದೆ. ಇಟಲಿ ಮತ್ತು ಮೆಲೋನಿ ಎಂದಿಗೂ ಯಾರ ಮುಂದೆಯೂ ಕೈಚಾಚುವುದಿಲ್ಲ ಎಂದು ಗುಡುಗಿದ್ದಾರೆ.

ಅಷ್ಟಕ್ಕೇ ನಿಲ್ಲಿಸದ ಮೆಲೋನಿ, ಅಮೆರಿಕ ಅಧ್ಯಕ್ಷರು ತಮ್ಮ ಮಿತ್ರರಾಷ್ಟ್ರಗಳ ನಾಯಕರೊಂದಿಗೆ ಯಾಕೆ ಹೀಗೆ ನಡೆದುಕೊಳ್ಳುತ್ತಾರೋ ಗೊತ್ತಿಲ್ಲ, ಇದು ಮೊದಲ ಬಾರಿಯೇನಲ್ಲ. ಆದರೆ ಪ್ರಜಾಪ್ರಭುತ್ವದ ವಿರೋಧಿಗಳು ಮತ್ತು ಪಾಶ್ಚಿಮಾತ್ಯ ದೇಶಗಳ ವೈರಿಗಳ ಜೊತೆ ಟ್ರಂಪ್ ಭಾರಿ ಮೃದುವಾಗಿ, ಗೌರವದಿಂದ ನಡೆದುಕೊಳ್ಳುತ್ತಾರೆ. ಆದರೆ ಪ್ರಾಣಸ್ನೇಹಿತ ರಾಷ್ಟ್ರಗಳ ನಾಯಕರನ್ನು ಮಾತ್ರ ಅವಮಾನಿಸುತ್ತಾರೆ ಎಂದು ಟ್ರಂಪ್ ಅವರ ದ್ವಂದ್ವ ನೀತಿಯನ್ನು ಜಾಗತಿಕ ವೇದಿಕೆಯಲ್ಲೇ ಪ್ರಶ್ನಿಸಿದ್ದಾರೆ.

ಒಂದು ಕಾಲದಲ್ಲಿ ಜಾರ್ಜಿಯಾ ಮೆಲೋನಿ ಅವರು ಯುರೋಪ್ ಖಂಡದಲ್ಲಿ ಡೊನಾಲ್ಡ್ ಟ್ರಂಪ್ ಅವರ ಅತ್ಯಂತ ದೊಡ್ಡ ಬೆಂಬಲಿಗರಾಗಿದ್ದರು. ೨೦೨೫ ರಲ್ಲಿ ಟ್ರಂಪ್ ಅಮೆರಿಕ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದ ಸಮಾರಂಭದಲ್ಲಿ ಭಾಗವಹಿಸಿದ್ದ ಏಕೈಕ ಪ್ರಮುಖ ಯುರೋಪಿಯನ್ ನಾಯಕಿ ಇವರಾಗಿದ್ದರು. ಆದರೆ, ಇತ್ತೀಚೆಗೆ ನಡೆದ ಇರಾನ್ ಸಂಘರ್ಷ ಅಥವಾ ಯುದ್ಧದ ವಿಚಾರದಲ್ಲಿ ಟ್ರಂಪ್ ಅವರು ಕ್ರೈಸ್ತರ ಧರ್ಮಗುರು ಪೋಪ್ ಲಿಯೋ ಅವರನ್ನು ಕಟುವಾಗಿ ಟೀಕಿಸಿದ್ದರು. ಇದನ್ನು ಮೆಲೋನಿ ಬಹಿರಂಗವಾಗಿ ವಿರೋಧಿಸಿ, ವ್ಯಾಟಿಕನ್ ಸಿಟಿಯ ಪರ ನಿಂತಿದ್ದರು.

ಇದರಿಂದ ಕೋಪಗೊಂಡಿದ್ದ ಟ್ರಂಪ್, ಮೆಲೋನಿಗೆ ಧೈರ್ಯವಿಲ್ಲ ಎಂದು ಜರೆದಿದ್ದರು. ಅಂದಿನಿಂದ ಇಬ್ಬರ ನಡುವೆ ಶೀತಲ ಸಮರ ನಡೆದಿತ್ತು. ಇತ್ತೀಚಿನ ಜಿ೭ ಶೃಂಗಸಭೆಯಲ್ಲಿ ಇಬ್ಬರೂ ಗಂಟೆಗಟ್ಟಲೆ ಚರ್ಚಿಸಿ ಮುನಿಸು ಮರೆತಿದ್ದಾರೆ ಎನ್ನಲಾಗಿತ್ತು. ಆದರೆ ಶೃಂಗಸಭೆ ಮುಗಿದ ಬೆನ್ನಲ್ಲೇ ಟ್ರಂಪ್ ಫೋಟೋ ವಿವಾದದ ಬಾಂಬ್ ಸಿಡಿಸಿದ್ದು, ಉಭಯ ದೇಶಗಳ ನಡುವಿನ ರಾಜತಾಂತ್ರಿಕ ಬಾಂಧವ್ಯ ಮತ್ತಷ್ಟು ಹಳಸುವಂತೆ ಮಾಡಿದೆ,(ಏಜೆನ್ಸೀಸ್​​).