ಮತ್ತೆ ಬೆತ್ತಲಾದ ಪಾಕಿಸ್ತಾನ: ಪುಲ್ವಾಮಾ ದಾಳಿ ಸಂಚುಕೋರನ ಬಲಿ; ಶವಯಾತ್ರೆಯಲ್ಲಿ ಭಾಗಿಯಾದ ಭಯೋತ್ಪಾದಕರ ಫೋಟೊ ವೈರಲ್​! Pakistan Terror Hub

ಪಾಕಿಸ್ತಾನ: ಗುರುವಾರ (ಮೇ.21) ರಂದು ಪುಲ್ವಾಮಾ ದಾಳಿಯ ಸಂಚುಕೋರ ಹಮ್ಜಾ ಬುರ್ಹಾನ್​ ಪಾಕಿಸ್ತಾನದ ನಡು ಬಿದಿಯಲ್ಲಿ ಅಪರಿಚಿತ ಬಂದೂಕುದಾರಿಗಳ ಗುಂಡಿಗೆ ಬಲಿಯಾಗಿದ್ದನು. ಇತನ ಅಂತ್ಯ ಸಂಸ್ಕಾರಕ್ಕೆ ಘೋಷಿತ ಭಯೋತ್ಪಾದಕರು ಹಾಜರಾಗಿರುವ ಫೋಟೊಗಳು ಈಗ ಜಾಗತಿಕ ಮಟ್ಟದಲ್ಲಿ ಪಾಕಿಸ್ತಾನವನ್ನು ಉಗ್ರರ ತಂಗುದಾಣ (Pakistan Terror Hub) ಎನ್ನುವುದನ್ನು ಮತ್ತೆ ಸಾಬಿತು ಪಡಿಸಿದಂತಾಗಿದೆ.

ಅಪರಿಚಿತರ ಗುಂಡಿಗೆ ಬಲಿಯಾದ ಹಮ್ಜಾ ಬುರ್ಹಾನ್​ ಅಲಿಯಾಸ್​ ಅರ್ಜುಮಂದ್ ಗುಲ್ಜಾರ್ ದಾರ್ ಅಲಿಯಾಸ್​ ಡಾಕ್ಟರ್​​ನನ್ನು ಇಸ್ಲಾಮಾಬಾದ್​ನಲ್ಲಿ ಇಸ್ಲಾಂನ ವಿಧಿವಿದಾನದ ಮೂಲಕ ಅಂತ್ಯಸಂಸ್ಕಾರವನ್ನು ಮಾಡಲಾಯಿತು. ಈ ಅಂತ್ಯಕ್ರಿಯೆಯಲ್ಲಿ, ಕುಖ್ಯಾತ ಭಯೋತ್ಪಾದಕ ಸಂಘಟನೆ ಹಿಜ್ಬುಲ್ ಮುಜಾಹಿದ್ದೀನ್ ಮುಖ್ಯಸ್ಥ ಸೈಯದ್ ಸಲಾವುದ್ದೀನ್, ಅಲ್-ಬದ್ರ್ ಹಿರಿಯ ನಾಯಕ ಬಖ್ತ್ ಜಮೀನ್ ಖಾನ್ ಕೈಯಲ್ಲಿ ಎಕೆ-47 ಬಂದೂಕು ಹಾಗೂ ಪಿಸ್ತೂಲ್​ಗಳನ್ನು ಹಿಡಿದು ನಡೆದು ಹೋಗುತ್ತಿರುವ ಚಿತ್ರಗಳು ವೈರಲ್​ ಆಗಿವೆ.

ಪುಲ್ವಾಮಾದ ಖರ್ಬತ್ಪೋರಾದಲ್ಲಿ ಜನಿಸಿದ್ದ ಹಮ್ಜಾ ಬುರ್ಹಾನ್​2017 ರಲ್ಲಿ, ಉನ್ನತ ವ್ಯಾಸಂಗಕ್ಕಾಗಿ ಪಾಕಿಸ್ತಾನಕ್ಕೆ ಹೋಗುವುದಾಗಿ ಮನೆಯವರಿಗೆ ತಿಳಿಸಿ, ಅಲ್​-ಬದರ್​ ಎಂಬ ಭಯೋತ್ಪಾದಕ ಸಂಘಟನೆಯನ್ನು ಸೇರಿಕೊಂಡಿದ್ದ.

ನಂತರ 2019 ರಲ್ಲಿ ಪುಲ್ವಾಮಾದಲ್ಲಿ ಸಿಆರ್​ಪಿಎಫ್​ ಸಿಬ್ಬಂದಿಗಳ ಮೇಲೆ ನಡೆದಿದ್ದ ಬಾಂಬ್​ ದಾಳಿಯ ಹಿಂದಿರುವ ಮಾಸ್ಟರ್​ ಮೈಂಡ್​ ಈ ಹಮ್ಜಾ ಬುರ್ಹಾನ್​ ಎಂದು ಭಾರತೀಯ ಗುಪ್ತಚರ ಇಲಾಖೆ ಮಾಹಿತಿಯನ್ನು ಕಲೆಹಾಕಿದ್ದವು. ಇವನು ಕುರಿತು ತನಿಖೆ ನಡೆಸಿದ ಗುಪ್ತಚರ ಇಲಾಖೆಯ ವರದಿಯನ್ನು ಆಧರಿಸಿ ಕೇಂದ್ರ ಗೃಹ ಸಚಿವಾಲಯ ಹಮ್ಜಾ ಬುರ್ಹಾನ್​ನನ್ನು 2022 ರಲ್ಲಿ ಅಧಿಕೃತವಾಗಿ ಭಯೋತ್ಪಾದಕ ಎಂದು ಘೋಷಿಸಿತು.

ಪುಲ್ವಾಮಾ ದಾಳಿ (Pulwama Attack) ಭಾರತದ ಇತಿಹಾಸದಲ್ಲಿ ನಡೆದಿರುವ ದುರಂತಗಳಲ್ಲಿ ಒಂದಾಗಿದೆ. 2019ರ ಫೆಬ್ರವರಿ 14ರಂದು ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾ ಜಿಲ್ಲೆಯ ಲೆಥ್‌ಪೋರಾ ಎಂಬಲ್ಲಿ ಭಾರತದ ಹೆದ್ದಾರಿ 44ರಲ್ಲಿ ಈ ಭೀಕರ ಭಯೋತ್ಪಾದಕ ದಾಳಿ ನಡೆಯಿತು.

ಈ ಭೀಕರ ಆತ್ಮಹತ್ಯಾ ಬಾಂಬ್ ದಾಳಿಯ ತೀವ್ರತೆಗೆ ಭಾರತದ 40 ವೀರ ಸಿಆರ್‌ಪಿಎಫ್ ಜವಾನರು ವೀರಮರಣ ಹೊಂದಿದರು ಮತ್ತು ಅನೇಕರು ತೀವ್ರವಾಗಿ ಗಾಯಗೊಂಡರು. ಈ ಕೃತ್ಯದ ಜವಾಬ್ದಾರಿಯನ್ನು ಪಾಕಿಸ್ತಾನ ಮೂಲದ ಜೈಶ್-ಎ-ಮೊಹಮ್ಮದ್ (JeM) ಎಂಬ ಉಗ್ರಗಾಮಿ ಸಂಘಟನೆ ವಹಿಸಿಕೊಂಡಿತು.

ಈ ಘಟನೆಯು ದೇಶಾದ್ಯಂತ ತೀವ್ರ ಆಕ್ರೋಶಕ್ಕೆ ಕಾರಣವಾದ ಹಿನ್ನಲೆ ಭಾರತ ಮತ್ತು ಪಾಕಿಸ್ತಾನದ ನಡುವಿನ ರಾಜತಾಂತ್ರಿಕ ಸಂಬಂಧ ಹಾಳಾಯಿತು. ಈ ಕೃತ್ಯವನ್ನು ಜಗತ್ತು ತೀವ್ರವಾಗಿ ಖಂಡಿಸಿತು. ಭಾರತ ಸರ್ಕಾರವು ಈ ದಾಳಿಗೆ ತಕ್ಕ ಪ್ರತ್ಯುತ್ತರ ನೀಡಲು ನಿರ್ಧರಿಸಿ, ಕೇವಲ 12 ದಿನಗಳ ನಂತರ ಅಂದರೆ ಫೆಬ್ರವರಿ 26ರಂದು ಮುಂಜಾನೆ ಪಾಕಿಸ್ತಾನದ ಬಾಲಾಕೋಟ್‌ನಲ್ಲಿದ್ದ ಜೈಶ್-ಎ-ಮೊಹಮ್ಮದ್ ಸಂಘಟನೆಯ ಪ್ರಮುಖ ಉಗ್ರಗಾಮಿ ತರಬೇತಿ ಶಿಬಿರಗಳ ಮೇಲೆ ವೈಮಾನಿಕ ದಾಳಿ (Airstrike) ನಡೆಸುವ ಮೂಲಕ ಉಗ್ರರನ್ನು ಸದೆಬಡಿಯಲಾಯಿತು, (ಏಜನ್ಸೀಸ್​).