ದಿವಾಳಿಯತ್ತ ಪಾಕಿಸ್ತಾನ; ದೇಶವನ್ನೇ ತೊರೆಯುತ್ತಿದ್ದಾರೆ ಲಕ್ಷಾಂತರ ಜನರು..! Mass Migration in pak

ಪಾಕಿಸ್ತಾನದ ವಿತ್ತ ಸಚಿವಾಲಯ ಬಿಡುಗಡೆ ಮಾಡಿರುವ ಮಾಸಿಕ ಮುನ್ನೋಟ ವರದಿಯ ಪ್ರಕಾರ, 2025ರಲ್ಲಿ ದೇಶ ತೊರೆದವರ ಸಂಖ್ಯೆ ಕಳೆದ ವರ್ಷಕ್ಕಿಂತ ಶೇಕಡಾ 5 ರಷ್ಟು ಹೆಚ್ಚಾಗಿದೆ. ಅಂದರೆ ಸುಮಾರು 37,000 ಹೆಚ್ಚಿನ ಜನರು ಕಳೆದ ವರ್ಷಕ್ಕಿಂತ ಈ ಬಾರಿ ವಿದೇಶಕ್ಕೆ ಹಾರಿದ್ದಾರೆ. ಕೇವಲ ಡಿಸೆಂಬರ್ 2025 ಒಂದೇ ತಿಂಗಳಿನಲ್ಲಿ 76,207 ಕಾರ್ಮಿಕರು ಮತ್ತು ವೃತ್ತಿಪರರು ವಿದೇಶಕ್ಕೆ ತೆರಳಿದ್ದು, ಇದು ವಾರ್ಷಿಕ ಆಧಾರದ ಮೇಲೆ ಶೇಕಡಾ 18.7 ರಷ್ಟು ಏರಿಕೆಯನ್ನು ತೋರಿಸುತ್ತಿದೆ.

ಪಾಕಿಸ್ತಾನದಲ್ಲಿ ವಿದೇಶಿ ನೇರ ಹೂಡಿಕೆ (FDI) ಮತ್ತು ರಫ್ತು ಪ್ರಮಾಣವು ಪಾತಾಳಕ್ಕೆ ಕುಸಿದಿದೆ. ಇಂತಹ ಕಠಿಣ ಸಮಯದಲ್ಲಿ, ವಿದೇಶಕ್ಕೆ ತೆರಳಿದ ಈ ಲಕ್ಷಾಂತರ ಜನರು ಅಲ್ಲಿಂದ ಕಳುಹಿಸುವ ಹಣವೇ ಈಗ ಪಾಕಿಸ್ತಾನದ ಆರ್ಥಿಕತೆಯನ್ನು ಜೀವಂತವಾಗಿಟ್ಟಿದೆ. ದೇಶದ ಒಳಗಿನ ಉದ್ಯಮಗಳು ಮುಚ್ಚಿಹೋಗುತ್ತಿವೆ, ನಿರುದ್ಯೋಗ ತಾಂಡವವಾಡುತ್ತಿದೆ. ಹೀಗಾಗಿ ಜನರಿಗೆ ದೇಶ ಬಿಡುವುದನ್ನು ಬಿಟ್ಟರೆ ಬೇರೆ ದಾರಿಯಿಲ್ಲದಂತಾಗಿದೆ ಎಂದು ಆರ್ಥಿಕ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.

ದೇಶದ ಬ್ಯೂರೋ ಆಫ್ ಎಮಿಗ್ರೇಷನ್ ಅಂಡ್ ಓವರ್‌ಸೀಸ್ ಎಂಪ್ಲಾಯ್ಮೆಂಟ್ ನೀಡಿದ ಈ ಅಂಕಿಅಂಶಗಳು ಪಾಕಿಸ್ತಾನದ ಆಂತರಿಕ ಸ್ಥಿತಿಯನ್ನು ಬಿಂಬಿಸುತ್ತಿವೆ. ತಾಂತ್ರಿಕ ನುರಿತ ಕೆಲಸಗಾರರು, ವೈದ್ಯರು, ಇಂಜಿನಿಯರ್‌ಗಳು ಮತ್ತು ಕಾರ್ಮಿಕರು ಸೌದಿ ಅರೇಬಿಯಾ, ಯುಎಇ ಮತ್ತು ಯುರೋಪ್ ರಾಷ್ಟ್ರಗಳತ್ತ ಮುಖ ಮಾಡುತ್ತಿದ್ದಾರೆ. ಸ್ವದೇಶದಲ್ಲಿ ಸುಸ್ಥಿರ ಆರ್ಥಿಕ ನೀತಿಗಳ ಕೊರತೆ ಮತ್ತು ರಾಜಕೀಯ ಅಸ್ಥಿರತೆಯೇ ಈ ಸಾಮೂಹಿಕ ವಲಸೆಗೆ ಮುಖ್ಯ ಕಾರಣ ಎನ್ನಲಾಗಿದೆ.

ಒಟ್ಟಾರೆಯಾಗಿ, ಪಾಕಿಸ್ತಾನವು ತನ್ನ ಅತ್ಯಮೂಲ್ಯ ಮಾನವ ಸಂಪನ್ಮೂಲವನ್ನು ಕಳೆದುಕೊಳ್ಳುತ್ತಿದೆ. ಇದು ಭವಿಷ್ಯದಲ್ಲಿ ದೇಶದ ಆರ್ಥಿಕತೆಯನ್ನು ಮತ್ತಷ್ಟು ಸಂಕಷ್ಟಕ್ಕೆ ತಳ್ಳುವ ಸಾಧ್ಯತೆಯಿದೆ,(ಏಜೆನ್ಸೀಸ್).