US-Iran ಮಾತುಕತೆ ನಡೆಸಿದ ಹೋಟೆಲ್ ಬಿಲ್ ಕಟ್ಟಲೂ ದುಡ್ಡಿಲ್ಲ: ಜಗತ್ತಿನ ಮುಂದೆ ಬೆತ್ತಲಾದ ಪಾಕ್​!

ಕಳೆದ ಏಪ್ರಿಲ್ 10 ರಿಂದ 12 ರವರೆಗೆ ಇಸ್ಲಾಮಾಬಾದ್‌ನ ಐಷಾರಾಮಿ 'ಸೆರೆನಾ ಹೋಟೆಲ್‌'ನಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಮಹತ್ವದ ಶಾಂತಿ ಮಾತುಕತೆಗಳು ನಡೆದಿದ್ದವು. ಈ ಮಾತುಕತೆಗೆ ವೇದಿಕೆ ಒದಗಿಸಿದ್ದ ಪಾಕಿಸ್ತಾನ ಸರ್ಕಾರ, ಈಗ ಆ ಹೋಟೆಲ್‌ನ ಬಾಡಿಗೆ ಮತ್ತು ಸೇವಾ ಶುಲ್ಕವನ್ನು ಪಾವತಿಸದೆ ಕೈಚೆಲ್ಲಿ ಕುಳಿತಿದೆ. ಇದರಿಂದಾಗಿ ಪ್ರತಿಷ್ಠಿತ ಸೆರೆನಾ ಹೋಟೆಲ್ ಬಿಲ್ ಪಾವತಿಗಾಗಿ ಸರ್ಕಾರದ ಕಡೆಗೆ ಕೈಚಾಚುವಂತಾಗಿದೆ.

ವರದಿಗಳ ಪ್ರಕಾರ, ಸರ್ಕಾರದಿಂದ ಹಣ ಬಾರದಿದ್ದಾಗ ಹೋಟೆಲ್ ಮಾಲೀಕರು ಅನಿವಾರ್ಯವಾಗಿ ಮಧ್ಯಪ್ರವೇಶಿಸಿದ್ದಾರೆ. ಆಗಾ ಖಾನ್ ಡೆವಲಪ್‌ಮೆಂಟ್ ನೆಟ್‌ವರ್ಕ್‌ಗೆ ಸಂಬಂಧಿಸಿದ ಈ ಹೋಟೆಲ್‌ನ ಮಾಲೀಕರು, ಸರ್ಕಾರದ ಮರ್ಯಾದೆ ಕಾಪಾಡಲು ಸ್ವತಃ ತಾವೇ ವೆಚ್ಚವನ್ನು ಭರಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಗುಪ್ತಚರ ಮೂಲಗಳನ್ನು ಉಲ್ಲೇಖಿಸಿ ವರದಿಗಳಾಗಿವೆ. ಇದು ಪಾಕಿಸ್ತಾನದ ಆರ್ಥಿಕ ಅಸ್ಥಿರತೆ ಮತ್ತು ವಿಶ್ವಾಸಾರ್ಹತೆಯನ್ನು ಜಗತ್ತಿನ ಮುಂದೆ ಸಾಬೀತುಪಡಿಸಿದೆ.

ವಿಪರ್ಯಾಸವೆಂದರೆ, ಇದೇ ವಾರ ಅಮೆರಿಕ ಮತ್ತು ಇರಾನ್ ನಡುವಿನ ಎರಡನೇ ಸುತ್ತಿನ ಮಾತುಕತೆಗಳು ಪಾಕಿಸ್ತಾನದಲ್ಲೇ ನಡೆಯಬೇಕಿದೆ. ಏಪ್ರಿಲ್ 16 ರಂದು ಈ ಮಾತುಕತೆಗಳು ನಡೆಯುವ ಸಾಧ್ಯತೆಯಿದ್ದು, ಅದಕ್ಕೆ ಮುನ್ನವೇ ಮೊದಲ ಸುತ್ತಿನ ಬಿಲ್ ವಿವಾದ ಸದ್ದು ಮಾಡುತ್ತಿರುವುದು ಪಾಕಿಸ್ತಾನಕ್ಕೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ. ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವಿನ ಕದನ ವಿರಾಮ ಏಪ್ರಿಲ್ 21ಕ್ಕೆ ಮುಕ್ತಾಯವಾಗಲಿದ್ದು, ಅಷ್ಟರೊಳಗೆ ಸಂಧಾನ ಮಾಡಿಸುವ ಉಮೇದಿನಲ್ಲಿರುವ ಪಾಕಿಸ್ತಾನಕ್ಕೆ ಈಗ ಹಣದ ಕೊರತೆ ದೊಡ್ಡ ವಿಘ್ನವಾಗಿ ಕಾಡುತ್ತಿದೆ.

ಜಾಗತಿಕ ವೇದಿಕೆಯಲ್ಲಿ ತನ್ನ ಪ್ರಭಾವ ಹೆಚ್ಚಿಸಿಕೊಳ್ಳಲು ಈ ಶಾಂತಿ ಮಾತುಕತೆಯನ್ನು ಪಾಕಿಸ್ತಾನ ಬಳಸಿಕೊಳ್ಳಲು ಬಯಸಿತ್ತು. ಆದರೆ, ಒಂದು ಐಷಾರಾಮಿ ಹೋಟೆಲ್‌ನ ಬಿಲ್ ಪಾವತಿಸಲೂ ಶಕ್ತಿಯಿಲ್ಲದ ದೇಶವು ಹೇಗೆ ಸಂಧಾನ ನಡೆಸಬಲ್ಲದು ಎಂಬ ಪ್ರಶ್ನೆ ಈಗ ಅಂತಾರಾಷ್ಟ್ರೀಯ ವಲಯದಲ್ಲಿ ಕೇಳಿಬರುತ್ತಿದೆ. ಈ ಘಟನೆಯು ಪಾಕಿಸ್ತಾನದ 'ಖಾಲಿ ಖಜಾನೆ'ಯ ವಾಸ್ತವ ಸ್ಥಿತಿಯನ್ನು ಮತ್ತೊಮ್ಮೆ ತೋರಿಸಿಕೊಟ್ಟಿದೆ,(ಏಜೆನ್ಸೀಸ್​).