ಪಾಕಿಸ್ತಾನದ ಬಹಿಷ್ಕಾರದ ನಾಟಕ ಬಯಲು..! ಶ್ರೀಲಂಕಾಕ್ಕೆ ಹಾರಲು ರೆಡಿಯಾದ ಪಾಕ್ ಪಡೆ; ಮೊಹ್ಸಿನ್ ನಖ್ವಿ ಸುಳ್ಳು ಬಹಿರಂಗ | Pakistan Cricket

ವಿಶ್ವಕಪ್ ಬಹಿಷ್ಕರಿಸುವ ಯಾವುದೇ ಉದ್ದೇಶ ಪಾಕಿಸ್ತಾನಕ್ಕಿಲ್ಲ ಎಂಬುದು ಅವರ ಪ್ರಯಾಣದ ವೇಳಾಪಟ್ಟಿಯಿಂದ ಸ್ಪಷ್ಟವಾಗಿದೆ. ಮೂಲಗಳ ಪ್ರಕಾರ, ಪಾಕಿಸ್ತಾನ ತಂಡವು ಫೆಬ್ರವರಿ 2 ರಂದು ಲಾಹೋರ್‌ನಿಂದ ಶ್ರೀಲಂಕಾದ ಕೊಲಂಬೊಗೆ ತೆರಳಲಿದೆ. ಅಷ್ಟೇ ಅಲ್ಲದೆ, ಫೆಬ್ರವರಿ 15 ರಂದು ನಿಗದಿಯಾಗಿರುವ ಭಾರತ ಮತ್ತು ಪಾಕಿಸ್ತಾನ ನಡುವಿನ ಹೈವೋಲ್ಟೇಜ್ ಪಂದ್ಯದಲ್ಲಿ ಪಾಕ್ ತಂಡ ಕಣಕ್ಕಿಳಿಯುವುದು ಈಗ ಖಚಿತವಾಗಿದೆ.

ಬಾಂಗ್ಲಾದೇಶದ ಭದ್ರತಾ ಕಾಳಜಿಯ ನೆಪವೊಡ್ಡಿ ಭಾರತವನ್ನು ವಿರೋಧಿಸುತ್ತಿದ್ದ ಪಾಕಿಸ್ತಾನಕ್ಕೆ ಐಸಿಸಿ ಜೊತೆಗಿನ ಸಂಬಂಧ ಹಾಳುಮಾಡಿಕೊಳ್ಳುವ ಧೈರ್ಯವಿಲ್ಲ ಎಂಬುದು ವರದಿಯಿಂದ ತಿಳಿದುಬಂದಿದೆ. ಪ್ರಯಾಣದ ಎಲ್ಲಾ ವ್ಯವಸ್ಥೆಗಳು ಈಗಾಗಲೇ ಮುಗಿದಿವೆ. ಐಸಿಸಿ ಜೊತೆಗಿನ 2027ರವರೆಗಿನ ಒಪ್ಪಂದದ ಪ್ರಕಾರ, ಭಾರತ-ಪಾಕ್ ಪಂದ್ಯಗಳು ತಟಸ್ಥ ಸ್ಥಳಗಳಲ್ಲಿ ನಡೆಯಲಿವೆ. ಹೀಗಿರುವಾಗ ಬಹಿಷ್ಕಾರದ ಮಾತಿಗೇ ಅರ್ಥವಿಲ್ಲ ಎಂದು ಮೂಲಗಳು ತಿಳಿಸಿವೆ.

ಪಿಸಿಬಿ ಈಗಾಗಲೇ ಆಟಗಾರರ ವೀಸಾ ಮತ್ತು ವಿಮಾನ ಟಿಕೆಟ್‌ಗಳನ್ನು ಕಾಯ್ದಿರಿಸಿದೆ.

ಪಾಕಿಸ್ತಾನದ ಎಲ್ಲಾ ಪಂದ್ಯಗಳು ಶ್ರೀಲಂಕಾದಲ್ಲಿ ನಡೆಯಲಿವೆ. ಫೈನಲ್ ಪ್ರವೇಶಿಸಿದರೂ ಅದು ಲಂಕಾದಲ್ಲೇ ನಡೆಯಲಿದೆ. ಹೀಗಿದ್ದಾಗ ಭಾರತಕ್ಕೆ ಹೋಗುವ ಪ್ರಶ್ನೆಯೇ ಇಲ್ಲದಿದ್ದರೂ ಬಹಿಷ್ಕಾರದ ಜಪ ಮಾಡಿದ್ದು ಅಭಿಮಾನಿಗಳನ್ನು ಹಾದಿ ತಪ್ಪಿಸಲು ಎಂಬ ಟೀಕೆ ವ್ಯಕ್ತವಾಗಿದೆ.

ಭಾರತದ ಭದ್ರತೆಯ ಬಗ್ಗೆ ಬಾಂಗ್ಲಾದೇಶಕ್ಕೆ ಬೆಂಬಲ ನೀಡಿದಂತೆ ನಟಿಸಿದ ಪಿಸಿಬಿ, ಅಂತಿಮವಾಗಿ ತನ್ನ ಆರ್ಥಿಕ ಲಾಭಕ್ಕಾಗಿ ಐಸಿಸಿ ನಿಯಮಗಳಿಗೆ ತಲೆಬಾಗಿದೆ.

ಕ್ರಿಕೆಟ್ ಅಭಿಮಾನಿಗಳ ಭಾವನೆಗಳೊಂದಿಗೆ ಆಟವಾಡುತ್ತಿರುವ ಮೊಹ್ಸಿನ್ ನಖ್ವಿ ನೇತೃತ್ವದ ಪಿಸಿಬಿ, ರಾಜಕೀಯ ಲಾಭಕ್ಕಾಗಿ ಬಹಿಷ್ಕಾರದ ನಾಟಕವಾಡಿ ಈಗ ಗುಟ್ಟಾಗಿ ಶ್ರೀಲಂಕಾಕ್ಕೆ ಹಾರಲು ಸಜ್ಜಾಗಿದೆ. ಫೆಬ್ರವರಿ 15ರ ಭಾರತ-ಪಾಕ್ ಕದನಕ್ಕೆ ಈಗ ವೇದಿಕೆ ಸಿದ್ಧವಾಗಿದೆ,(ಏಜೆನ್ಸೀಸ್).