ಜಾಗತಿಕ ವೇದಿಕೆಯಲ್ಲಿ ಜೋಕರ್​ ಆದ ಪಾಕಿಸ್ತಾನ: ವಿಶ್ವಶಾಂತಿ ಸ್ಥಾಪಿಸಲು ಹೋದವರು ಎಡವಿದ್ದೆಲ್ಲಿ? ಇಲ್ಲಿದೆ ಕಂಪ್ಲೀಟ್​ ಡೀಟೆಲ್ಸ್​..Pakistan Became Joker

ಇಸ್ಲಾಮಾಬಾದ್​: ಮಧ್ಯಪ್ರಾಚ್ಯದಲ್ಲಿ ಸಂಘರ್ಷ ಆರಂಭವಾಗಿ ಹೆಚ್ಚು ಕಡಿಮೆ 40 ದಿನ ಕಳೆದ ನಂತರ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ 14 ದಿನಗಳ ಕದನ ವಿರಾಮ ಘೋಷಿಸಿದ್ದಾರೆ. ಅದರಂತೆ, ಈ ಸಂಘರ್ಷವನ್ನು ಮಾತುಕತೆ ಮೂಲಕ ಮುಗಿಸುವ ಪ್ರಯತ್ನವನ್ನು ಮಾಡಿ ವಿಫಲವಾಗಿದ್ದಾರೆ.

ಅಮೆರಿಕ ಮತ್ತು ಇರಾನ್​ ನಡುವೆ ಶಾಂತಿ ಸ್ಥಾಪನೆ ಮಾಡಲು ಕೇವಲ ತಮ್ಮಿಂದ ಮಾತ್ರ ಸಾಧ್ಯವೆಂದು ಜಗತ್ತಿನ ಮುಂದೆ ಫೋಸ್​ ಕೊಟ್ಟ ಪಾಕಿಸ್ತಾನ ಈಗ ಜಾಗತಿಕ ರಾಜಕಾರಣದಲ್ಲಿ ಜೋಕರ್ (Pakistan Became Joker)​ ರೀತಿ ಕಾಣಿಸಿಕೊಳ್ಳುತ್ತಿದೆ.

ಶನಿವಾರ (ಏ.11) ಪಾಕಿಸ್ತಾನದ ರಾಜಧಾನಿ ಇಸ್ಲಾಮಾಬಾದ್​ನಲ್ಲಿ ನಡೆದ 21 ಗಂಟೆಗಳ ಶಾಂತಿ ಮಾತುಕತೆಗಳ ಬಳಿಕವೂ ಅಮೆರಿಕ ಮತ್ತು ಇರಾನ್​ ನಡುವೆ ಒಪ್ಪಂದ ಏರ್ಪಡದ ಹಿನ್ನಲೆ ಈ ಮಾತುಕತೆ ಮುರಿದು ಬಿದ್ದಿದೆ.

ಈ ಶಾಂತಿ ಒಪ್ಪಂದ ಮುರಿದು ಬಿದ್ದ ನಂತರ ಪಾಕಿಸ್ತಾನದ ಮಾಧ್ಯಮಗಳಲ್ಲಿ ಇದು ಕೇವಲ ಮೊದಲ ಹಂತದ ಮಾತುಕತೆ, ನಾವು ಶಾಂತಿಯನ್ನು ಖಂಡಿತವಾಗಿ ಸ್ಥಾಪಿಸುತ್ತೆವೆ, ನಮ್ಮ ನಾಯಕರಾದ ಶಹಬಾಜ್​ ಶರೀಫ್​ ಹಾಗೂ ಆಸೀಮ್​ ಮುನೀರ್​ ಕಾರ್ಯಪ್ರವರ್ತರಾಗಿದ್ದಾರೆ ಎಂದು ವರದಿ ಮಾಡುತ್ತಿವೆ. ಆದರೆ ಇದು ಜಟ್ಟಿ ಸೋತರು ಮೀಸೆ ಮಣ್ಣಾಗಲಿಲ್ಲ ಎನ್ನುವ ರೀತಿಯ ವಾದವಾಗಿದೆ ಎನ್ನುವುದು ಜಾಗತಿಕ ರಾಜಕೀಯ ತಜ್ಞರ ಅಭಿಪ್ರಾಯವಾಗಿದೆ.

ಅಮೆರಿಕ ಮತ್ತು ಇರಾನ್​ ನಡುವೆ ದಿಢೀರನೆ ಒಪ್ಪಂದವಾಗಲಿದೆ ಎಂದಾಗಲೇ ಇದು ಸಫಲವಾಗಲ್ಲ ಎನ್ನುವ ಮಾತುಗಳು ಕೇಳಿ ಬರುತ್ತಿದ್ದವು. ಏಕೆಂದರೆ ಈ ಮಾತುಕತೆಗೆ ಅಮೆರಿಕ ಮಾತ್ರ ಹಾಜರಾಗಿತ್ತು, ಆದರೆ ಲೆಬನಾನ್​ ಮೇಲೆ ದಾಳಿ ಮಾಡುತ್ತಿರುವ ಇಸ್ರೇಲ್​ ಈ ಮಾತುಕತೆಯಿಂದ ದೂರವೇ ಉಳಿದಿತ್ತು. ಹೀಗಾಗಿ ಇರಾನಿನ ಷರತ್ತುಗಳಲ್ಲಿ ಒಂದಾದ ಲೆಬನಾನ್​ ಮೇಲಿನ ದಾಳಿ ನಿಲ್ಲಿಸಿ ಎನ್ನುವ ಅಂಶ ಅಂಗೀಕಾರವಾಗಲೇ ಇಲ್ಲ.

ಒಂದು ಕಡೆ ಶಾಂತಿ ಮಂತ್ರ ಬೋಧಿಸುತ್ತಿರುವ ಅಮೆರಿಕಾ ಇನ್ನೊಂದು ಕಡೆ ತನ್ನ ನೈಕಾಪಡೆಯನ್ನು ಹೊರ್ಮುಜ್ ಜಲಸಂಧಿಯತ್ತ ರವಾನಿಸುತ್ತಿದೆ ಎಂದು ತಿಳಿದು ಬಂದಿದೆ. ಶಾಂತಿ ಒಪ್ಪಂದದ ಕುರಿತು ಮಾತನಾಡಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್, ಈ ಮಾತುಕತೆ ಮುರಿದು ಬಿದ್ದರೆ ನಮ್ಮ ಸೈನ್ಯ ಸಶಕ್ತವಾಗಿದೆ, ಇರಾನ್​ನನ್ನು ಹೇಗೆ ಮಣಿಸಬೇಕೆಂದು ನಮಗೆ ತಿಳಿದಿದೆ ಎಂದು ಬೆದರಿಕೆ ಹಾಕಿದ್ದಾರೆ.

ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧವನ್ನು ನಿಲ್ಲಿಸಲು ಶನಿವಾರ (ಏ.11) ಪಾಕಿಸ್ತಾನದ ಇಸ್ಲಾಮಾಬಾದ್​ಗೆ ಅಮೆರಿಕ ಮತ್ತು ಇರಾನಿನ ಶಾಂತಿ ನಿಯೋಗ ಆಗಮಿಸಿತ್ತು. ಉಭಯ ದೇಶಗಳ ನಡುವೆ ಸುಮಾರು 21 ಗಂಟೆಗಳವರೆಗೆ ಮಾತುಕತೆ ನಡೆದಿದೆ. ಆದರೆ ಇರಾನಿನ ಯಾವುದೇ ಷರತ್ತುಗಳನ್ನು ಒಪ್ಪಿಕೊಳ್ಳಲು ಅಮೆರಿಕ ಸಿದ್ಧವಿರದ ಕಾರಣ ಈ ಮಾತುಕತೆ ವಿಫಲವಾಗಿದೆ ಎಂದು ಇರಾನಿನ ಮಾಧ್ಯಮಗಳು ವರದಿ ಮಾಡಿವೆ, (ಏಜನ್ಸೀಸ್​).