ಡಿಸೆಂಬರ್ 13, 2025 ರಂದು ಸಿರಿಯಾದ ಪಾಲ್ಮಿರಾದಲ್ಲಿ ಐಸಿಸ್ ಉಗ್ರರು ನಡೆಸಿದ ಹೊಂಚು ದಾಳಿಯಲ್ಲಿ ಅಯೋವಾ ನ್ಯಾಷನಲ್ ಗಾರ್ಡ್‌ನ ಇಬ್ಬರು ಅಮೆರಿಕನ್ ಸೈನಿಕರು (ಸಾರ್ಜೆಂಟ್ ಎಡ್ಗರ್ ಬ್ರಿಯಾನ್ ಟೊರೆಸ್-ತೋವರ್ ಮತ್ತು ಸಾರ್ಜೆಂಟ್ ವಿಲಿಯಂ ನಥಾನಿಯಲ್ ಹೋವರ್ಡ್) ಹಾಗೂ ಒಬ್ಬ ನಾಗರಿಕ ಭಾಷಾಂತರಕಾರ ಮೃತಪಟ್ಟಿದ್ದರು. ಈ ಭೀಕರ ದಾಳಿಗೆ ಪ್ರತೀಕಾರ ತೀರಿಸಿಕೊಳ್ಳಲು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನೇರ ನಿರ್ದೇಶನದ ಮೇರೆಗೆ ಅಮೆರಿಕ ಈ ಬೃಹತ್ ಮಿಲಿಟರಿ ಕಾರ್ಯಾಚರಣೆಯನ್ನು ಕೈಗೊಂಡಿದೆ ಎಂದು ವರದಿಯಾಗಿದೆ.

ಸಿರಿಯಾದಾದ್ಯಂತ ಇರುವ ಐಸಿಸ್‌ನ ಸುಮಾರು 70ಕ್ಕೂ ಹೆಚ್ಚು ನೆಲೆಗಳನ್ನು ಧ್ವಂಸಗೊಳಿಸಲಾಗಿದೆ. ಇದರಲ್ಲಿ ಉಗ್ರರ ಕಮಾಂಡ್ ಸೆಂಟರ್‌ಗಳು, ಶಸ್ತ್ರಾಸ್ತ್ರ ಸಂಗ್ರಹಣಾ ತಾಣಗಳು, ತರಬೇತಿ ಶಿಬಿರಗಳು ಮತ್ತು ಲಾಜಿಸ್ಟಿಕ್ ಹಬ್‌ಗಳು ಸೇರಿವೆ. ದಾಳಿಗಾಗಿ ಅಮೆರಿಕಾವು ಎಫ್-15 ಈಗಲ್ ಜೆಟ್‌ಗಳು, ಎ-10 ಥಂಡರ್‌ಬೋಲ್ಟ್ ವಿಮಾನಗಳು, ಅಪಾಚೆ ಹೆಲಿಕಾಪ್ಟರ್‌ಗಳು ಮತ್ತು ಹೈಮಾರ್ಸ್ (HIMARS) ರಾಕೆಟ್ ಫಿರಂಗಿಗಳನ್ನು ಬಳಸಿದೆ. ಈ ಕಾರ್ಯಾಚರಣೆಯಲ್ಲಿ ಜೋರ್ಡಾನ್ ದೇಶದ ವಾಯುಪಡೆಯೂ ಅಮೆರಿಕಾದೊಂದಿಗೆ ಕೈಜೋಡಿಸಿದೆ ಎಂದು ವರದಿಯಾಗಿದೆ.

ಅಮೆರಿಕಾದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಈ ದಾಳಿಯ ಕುರಿತು ಪ್ರತಿಕ್ರಿಯಿಸುತ್ತಾ, "ಇದು ಹೊಸ ಯುದ್ಧದ ಆರಂಭವಲ್ಲ, ಬದಲಾಗಿ ಅಮೆರಿಕನ್ನರ ರಕ್ತ ಹರಿಸಿದವರ ವಿರುದ್ಧದ ಸೇಡಿನ ಘೋಷಣೆ" ಎಂದು ಗುಡುಗಿದ್ದಾರೆ. ಅಮೆರಿಕನ್ನರ ಮೇಲೆ ದಾಳಿ ಮಾಡುವವರು ಜಗತ್ತಿನ ಯಾವುದೇ ಮೂಲೆಯಲ್ಲಿದ್ದರೂ ಅವರನ್ನು ಹುಡುಕಿ ಕೊಲ್ಲಲಾಗುವುದು ಎಂದು ಅವರು ಎಚ್ಚರಿಸಿದ್ದಾರೆ,(ಏಜೆನ್ಸೀಸ್​).