ಗೆಲ್ಲೋದು ಇಸ್ರೇಲ್‌ಗೆ ಮಾತ್ರ ಗೊತ್ತು! ರಣರಂಗದ ಮಧ್ಯೆ ಗುಡುಗಿದ ಟ್ರಂಪ್; ದ್ರೋಹ ಮಾಡಿದ ಆ ಮಿತ್ರ ರಾಷ್ಟ್ರಗಳು ಯಾವುವು..? Donald Trump

ಈ ಬಗ್ಗೆ ತಮ್ಮ ಟ್ರೂತ್ ಸೋಶಿಯಲ್ ಖಾತೆಯಲ್ಲಿ ಪೋಸ್ಟ್ ಮಾಡಿರುವ ಅಧ್ಯಕ್ಷ ಟ್ರಂಪ್, ಇಸ್ರೇಲ್‌ನ ಯುದ್ಧೋತ್ಸಾಹವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಇಸ್ರೇಲ್ ಅನ್ನು ಜನ ಇಷ್ಟಪಡಲಿ ಅಥವಾ ಬಿಡಲಿ, ಈ ಸಂಘರ್ಷದ ಸಮಯದಲ್ಲಿ ಅವರು ಅಮೆರಿಕದ ಅತ್ಯಂತ ಶಕ್ತಿಶಾಲಿ ಮಿತ್ರ ರಾಷ್ಟ್ರ ಎಂದು ಸಾಬೀತುಪಡಿಸಿದ್ದಾರೆ. ಅವರು ಧೈರ್ಯಶಾಲಿಗಳು, ನಿಷ್ಠಾವಂತರು ಮತ್ತು ಅತ್ಯಂತ ಚತುರರು ಎಂದು ಬಣ್ಣಿಸಿದ್ದಾರೆ.

ಇದೇ ವೇಳೆ ಇತರ ಮಿತ್ರ ರಾಷ್ಟ್ರಗಳ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ ಟ್ರಂಪ್, ಸಂಕಷ್ಟದ ಸಮಯದಲ್ಲಿ ಕೆಲವು ರಾಷ್ಟ್ರಗಳು ತಮ್ಮ ಅಸಲಿ ಬಣ್ಣವನ್ನು ತೋರಿಸಿವೆ. ಆದರೆ ಇಸ್ರೇಲ್ ಮಾತ್ರ ದಿಟ್ಟತನದಿಂದ ಹೋರಾಡುತ್ತಿದೆ ಮತ್ತು ಅವರಿಗೆ ಗೆಲ್ಲುವುದು ಹೇಗೆಂದು ಚೆನ್ನಾಗಿ ಗೊತ್ತು ಎಂದು ಟ್ರಂಪ್​ ಕಿಡಿಕಾರಿದ್ದಾರೆ.

ಅಮೆರಿಕವು ಇರಾನ್‌ನ ಬಂದರುಗಳ ಮೇಲೆ ಹೇರಿರುವ ನೌಕಾ ದಿಗ್ಬಂಧನವನ್ನು ತೆರವುಗೊಳಿಸದ ಹಿನ್ನೆಲೆಯಲ್ಲಿ, ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ನೌಕಾಪಡೆಯು ಇತಿಹಾಸದಲ್ಲೇ ಅತ್ಯಂತ ಕಠಿಣ ನಿರ್ಧಾರವನ್ನು ಪ್ರಕಟಿಸಿದೆ. ಅಮೆರಿಕವು ಕದನ ವಿರಾಮದ ನಿಯಮಗಳನ್ನು ಉಲ್ಲಂಘಿಸಿದೆ ಎಂದು ಆರೋಪಿಸಿರುವ ಟೆಹ್ರಾನ್, ಹೊರ್ಮುಜ್ ಜಲಸಂಧಿಯನ್ನು ಅನಿರ್ದಿಷ್ಟಾವಧಿಯವರೆಗೆ ಮುಚ್ಚಿದೆ.

ಕದನ ವಿರಾಮ ಉಲ್ಲಂಘನೆ: ಅಮೆರಿಕ ತನ್ನ ದಿಗ್ಬಂಧನವನ್ನು ಹಿಂತೆಗೆದುಕೊಳ್ಳದ ಕಾರಣ, ಕದನ ವಿರಾಮವು ಈಗ ಅಸಿಂಧುವಾಗಿದೆ ಎಂದು ಇರಾನ್ ಘೋಷಿಸಿದೆ.

ಸಂಚಾರ ನಿರ್ಬಂಧ: ಪರ್ಷಿಯನ್ ಕೊಲ್ಲಿ ಅಥವಾ ಓಮನ್ ಸಮುದ್ರದಿಂದ ಯಾವುದೇ ಹಡಗುಗಳು ಹೊರಬರುವ ಪ್ರಯತ್ನ ಮಾಡಬಾರದು.

ದಾಳಿಯ ಎಚ್ಚರಿಕೆ: ಒಂದು ವೇಳೆ ಯಾವುದೇ ಹಡಗು ಈ ಆದೇಶವನ್ನು ಉಲ್ಲಂಘಿಸಿದರೆ, ಅದನ್ನು ಶತ್ರು ರಾಷ್ಟ್ರದ ಸಹಚರ ಎಂದು ಪರಿಗಣಿಸಿ ಅದರ ಮೇಲೆ ನೇರ ದಾಳಿ ನಡೆಸಲಾಗುವುದು ಎಂದು ಇರಾನ್ ಕಮಾಂಡರ್‌ಗಳು ಎಚ್ಚರಿಸಿದ್ದಾರೆ.

ಇರಾನ್‌ನ ಸರ್ಕಾರಿ ಮಾಧ್ಯಮವಾದ 'ಪ್ರೆಸ್ ಟಿವಿ' ವರದಿ ಮಾಡಿರುವಂತೆ, ಇರಾನ್ ಮಿಲಿಟರಿಯು ಟ್ರಂಪ್ ಅವರ ಹೇಳಿಕೆಗಳನ್ನು ಲೇವಡಿ ಮಾಡಿದೆ. "ಭಯೋತ್ಪಾದಕ ಅಮೆರಿಕ ಅಧ್ಯಕ್ಷರು ನೀಡುತ್ತಿರುವ ಹೇಳಿಕೆಗಳಿಗೆ ಯಾವುದೇ ಬೆಲೆ ಇಲ್ಲ. ಹೊರ್ಮುಜ್ ಜಲಸಂಧಿ ಮತ್ತು ಪರ್ಷಿಯನ್ ಕೊಲ್ಲಿಯ ಮೇಲೆ ಇರಾನ್‌ನ ಸಾರ್ವಭೌಮತ್ವ ಅಚಲವಾಗಿದೆ" ಎಂದು ಇರಾನ್ ಸ್ಪಷ್ಟಪಡಿಸಿದೆ.

ಯುದ್ಧವು ಪರಮಾಣು ಹಂತಕ್ಕೆ ತಲುಪುವ ಭೀತಿ ಇರುವ ನಡುವೆಯೇ, ಶಾಂತಿಯ ಕೊನೆಯ ಆಶಾವಾದವಾಗಿ ಮುಂದಿನ ವಾರ ಪಾಕಿಸ್ತಾನದ ಇಸ್ಲಾಮಾಬಾದ್‌ನಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಎರಡನೇ ಸುತ್ತಿನ ಮಾತುಕತೆ ನಡೆಯಲಿದೆ. ವಿಶೇಷವೆಂದರೆ, ಈ ಶೃಂಗಸಭೆಯಲ್ಲಿ ಸ್ವತಃ ಡೊನಾಲ್ಡ್ ಟ್ರಂಪ್ ಪಾಲ್ಗೊಳ್ಳುವ ಮುನ್ಸೂಚನೆ ನೀಡಿದ್ದಾರೆ.

ಆದರೆ, ಒಂದೆಡೆ ಇಸ್ರೇಲ್‌ನ ಗುಣಗಾನ ಮತ್ತು ಮತ್ತೊಂದೆಡೆ ಇರಾನ್‌ನಿಂದ ಜಲಮಾರ್ಗ ಬಂದ್ ಆಗಿರುವುದು ಈ ಮಾತುಕತೆ ಎಷ್ಟು ಸಫಲವಾಗಲಿದೆ ಎಂಬ ಪ್ರಶ್ನೆಯನ್ನು ಮೂಡಿಸಿದೆ. ಒಂದು ವೇಳೆ ಸಂಧಾನ ವಿಫಲವಾದರೆ, ಜಾಗತಿಕ ತೈಲ ಬೆಲೆಯಲ್ಲಿ ಭಾರಿ ಏರಿಕೆಯಾಗುವ ಮತ್ತು ಜಗತ್ತು ಮತ್ತೊಂದು ಆರ್ಥಿಕ ಹಿಂಜರಿತಕ್ಕೆ ಜಾರುವ ಸಾಧ್ಯತೆ ಇದೆ.

ಇರಾನ್ ಯುದ್ಧದ ಈ ಹಂತವು ಕೇವಲ ಎರಡು ದೇಶಗಳ ನಡುವಿನ ಸಂಘರ್ಷವಾಗಿ ಉಳಿಯದೆ, ವಿಶ್ವದ ಶಕ್ತಿ ಕೇಂದ್ರಗಳ ನಡುವಿನ ಚದುರಂಗದಾಟವಾಗಿ ಬದಲಾಗಿದೆ. ಟ್ರಂಪ್ ಅವರ ಅಬ್ಬರ ಮತ್ತು ಇರಾನ್‌ನ ನೌಕಾ ಸವಾಲು ಇಡೀ ವಿಶ್ವವನ್ನೇ ಯುದ್ಧದ ಅಂಚಿಗೆ ತಳ್ಳಿದೆ,(ಏಜೆನ್ಸೀಸ್).