ಮುಂದುವರೆದ ಅಮೆರಿಕ-ಇರಾನ್ ನಡುವಿನ ಸಂಘರ್ಷ: ಮತ್ತೆ ಹೊರ್ಮುಜ್ ಜಲಸಂಧಿ ಬಂದ್ ಮಾಡಿದ ಇರಾನ್​ | Strait of Hormuz

ಟೆಹ್ರಾನ್: ಮಧ್ಯ ಏಷ್ಯಾದಲ್ಲಿ ಅಮೆರಿಕ-ಇರಾನ್ ನಡುವಿನ ಸಂಘರ್ಷ ಮುಂದುವರೆದಿದ್ದು, ಹಾರ್ಮುಜ್ ಜಲಸಂಧಿಯನ್ನು(Strait of Hormuz) ಮುಚ್ಚಲಾಗಿದೆ ಎಂದು ಭಾನುವಾರ(ಜು. 12) ಇರಾನ್ ಉನ್ನತ ಸೇನೆ ಐಆರ್‌ಜಿಸಿ ಘೋಷಿಸಿದೆ. ಆದಾಗ್ಯೂ ಅದು ವಾಣಿಜ್ಯ ಹಡಗು ಸಾಗಾಣೆಗೆ ಮುಕ್ತವಾಗಿದೆ ಎಂದು ಅಮೆರಿಕ ಹೇಳಿದೆ.

ಜಾಗತಿಕ ತೈಲ ಮತ್ತು ಅನಿಲ ಸರಬರಾಜಿಗೆ ಅತ್ಯಗತ್ಯವಾದ ಹೊರ್ಮುಜ್ ಜಲಸಂಧಿಯು ಯುಎಸ್-ಇರಾನ್ ನಡುವಿನ ವಿವಾದದ ಕೇಂದ್ರ ಬಿಂದುವಾಗಿ ಮಾರ್ಪಟ್ಟಿದೆ. ಕಳೆದ ತಿಂಗಳು ಉಭಯ ದೇಶಗಳ ಸಂಘರ್ಷವನ್ನು ಕೊನೆಗೊಳಿಸುವ ಒಪ್ಪಂದದ ನಡೆದ ಹೊರತಾಗಿಯೂ ಅದು ಮುರಿದು ಬಿದ್ದಿದ್ದು, ಎರಡೂ ದೇಶಗಳು ಮತ್ತೆ ದಾಳಿ, ಪ್ರತಿದಾಳಿಯಲ್ಲಿ ತೊಡಗಿವೆ.

ಇತ್ತೀಚಿನ ಮಾತುಕತೆ ನಡುವೆ ಜಲಮಾರ್ಗದಲ್ಲಿ ವಾಣಿಜ್ಯ ಹಡಗಿನ ಮೇಲೆ ಇರಾನ್ ದಾಳಿ ಮಾಡಿತು. ಇದು ಎರಡು ದೇಶಗಳ ನಡುವೆ ಮತ್ತೆ ಸಂಘರ್ಷವನ್ನು ಹೆಚ್ಚಿಸಿದೆ. ಈ ಕುರಿತು ಹೇಳಿಕೆ ಬಿಡುಗಡೆ ಮಾಡಿರುವ ಇರಾನ್‌ನ ಕ್ರಾಂತಿಕಾರಿ ಗಾರ್ಡ್‌ಗಳು, "ಈ ಘಟನೆಯ ನಂತರ... ಮುಂದಿನ ಸೂಚನೆ ಬರುವವರೆಗೂ ಮತ್ತು ಈ ಪ್ರದೇಶದಲ್ಲಿ ಅಮೆರಿಕದ ಹಸ್ತಕ್ಷೇಪಗಳು ಕೊನೆಗೊಳ್ಳುವವರೆಗೆ ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಲಾಗುತ್ತದೆ ಎಂದು ಹೇಳಿದೆ.

ಆದರೆ ಇದಕ್ಕೆ ತಿರುಗೇಟು ನೀಡಿರುವ ಅಮೆರಿಕ ಸೇನೆ ಸೆಂಟ್ರಲ್ ಕಮಾಂಡ್, ಅಂತರರಾಷ್ಟ್ರೀಯ ಜಲಮಾರ್ಗವನ್ನು ಕಾನೂನುಬದ್ಧವಾಗಿ ಸಾಗಿಸಲು ಬಯಸುವ ಎಲ್ಲಾ ಹಡಗುಗಳಿಗೆ ಜಲಸಂಧಿ ಮುಕ್ತವಾಗಿದೆ. ಅಮೆರಿಕದ ಪಡೆಗಳು ಸಂಚರಣೆಯ ಸ್ವಾತಂತ್ರ್ಯವನ್ನು ಖಚಿತಪಡಿಸಿಕೊಳ್ಳಲು ಸ್ಥಳದಲ್ಲಿ ಸಿದ್ದವಾಗಿವೆ. ಇರಾನ್ ಜಲಸಂಧಿಯನ್ನು ನಿಯಂತ್ರಿಸಲು ಸಾಧ್ಯವಿಲ್ಲ ಎಂದು ತಿಳಿಸಿದೆ.

ಇನ್ನೂ ಜಲಸಂಧಿ ಬಳಿ ಎರಡು ಹಡಗುಗಳ ಮೇಲಿನ ದಾಳಿಯನ್ನು ಖಚಿತಪಡಿಸಿರುವ ಇರಾನ್, ಅನುಮೋದಿತ ಸಾರಿಗೆ ಕಾರಿಡಾರ್ ಅನ್ನು ಬಳಸುವ ಸೂಚನೆಗಳನ್ನು ನಿರ್ಲಕ್ಷಿಸಲಾಗಿದ್ದು, ನಿಯಮಗಳನ್ನು ಉಲ್ಲಂಘಿಸಿದ ಕಾರಣ ದಾಳಿ ಮಾಡಲಾಗಿದೆ ಎಂದಿದೆ. ಅದಕ್ಕೆ ಪ್ರತಿಯಾಗಿ ಅಮೆರಿಕ ಇರಾನ್​ನ 140ಕ್ಕೂ ಹೆಚ್ಚು ಪ್ರದೇಶಗಳನ್ನು ಗುರಿಯಾಗಿಸಿ ಪ್ರತಿದಾಖಿ ನಡೆಸಿದೆ ಎಂದು ಹೇಳಿದೆ (ಏಜೆನ್ಸೀಸ್).