ಯುದ್ಧದ ಮಧ್ಯೆಯೂ ಹಳೆಯ ಸೇಡು! ಯುವ ಕುಸ್ತಿಪಟು ಸೇರಿ ಮೂವರನ್ನು ಗಲ್ಲಿಗೇರಿಸಿದ ಇರಾನ್​ ಸರ್ಕಾರ | Public hanging

ಟೆಹ್ರಾನ್​: ಸದ್ಯ ಮಧ್ಯಪ್ರಾಚ್ಯದಲ್ಲಿ ಯಾವುದು ಸರಿಯಿಲ್ಲ. ಅತ್ತ ಇಸ್ರೇಲ್​ ಜೊತೆ ಕೈಜೋಡಿಸಿರುವ ಅಮೆರಿಕ, ಜಂಟಿಯಾಗಿ ಇರಾನ್​ ಮೇಲೆ ಕ್ಷಿಪಣಿ ದಾಳಿ ನಡೆಸುವ ಮೂಲಕ ಹಲವು ಪ್ರಮುಖ ನಾಯಕರನ್ನು ಬಲಿ ಪಡೆಯುತ್ತಿದ್ದರೆ, ಇತ್ತ ಇರಾನ್, ತಮ್ಮ​ ಸರ್ಕಾರದ ವಿರುದ್ಧ ಜನವರಿಯಲ್ಲಿ ಕೋಲಾಹಲ ಎಬ್ಬಿಸಿದ ಪ್ರತಿಭಟನಾಕಾರರಿಗೆ ಮರಣದಂಡನೆ ಶಿಕ್ಷೆ ವಿಧಿಸಿದೆ (Public hanging).

ಯುವ ಕುಸ್ತಿಪಟು ಸೇರಿದಂತೆ ಒಟ್ಟು ಮೂವರಿಗೆ ಗಲ್ಲು ಶಿಕ್ಷೆ ವಿಧಿಸಿರುವ ಇರಾನ್ ಸರ್ಕಾರ, ಮತ್ತೊಂದು ಸಂಚಲನಕ್ಕೆ ಕಾರಣವಾಗಿದೆ. ಈ ವರ್ಷದ ಆರಂಭದಲ್ಲಿ ತಮ್ಮ ಆಡಳಿತದ ವಿರುದ್ಧ ತೀವ್ರ ಪ್ರತಿಭಟನೆಗಳನ್ನು ಹಮ್ಮಿಕೊಂಡವರನ್ನು ಗಂಭೀರವಾಗಿ ಪರಿಗಣಿಸಿರುವ ಇರಾನ್​, ಕೋಮ್ ನಗರದಲ್ಲಿ ಸಾರ್ವಜನಿಕವಾಗಿ ಮೂವರನ್ನು ಗಲ್ಲಿಗೇರಿಸಿದೆ. ಮರಣದಂಡನೆ ಶಿಕ್ಷೆಗೆ ಗುರಿಯಾದವರಲ್ಲಿ ಯುವ ಕುಸ್ತಿಪಟು ಕೂಡ ಸೇರಿದ್ದಾರೆ.

ಕಳೆದ ವರ್ಷ ಡಿಸೆಂಬರ್​ನಲ್ಲಿ ಇರಾನ್‌ನಲ್ಲಿ ಬೃಹತ್​ ಪ್ರತಿಭಟನೆಗಳು ನಡೆದವು. ಸರ್ಕಾರದ ವಿರುದ್ಧ ಯುವಜನತೆ ತೀವ್ರ ಹೋರಾಟಕ್ಕೆ ಮುಗಿಬಿದ್ದರು. ಪ್ರತಿಭಟನೆಗಳು ಹಿಂಸಾತ್ಮಕವಾಗಿ ತಿರುಗಿದ ಸಮಯದಲ್ಲಿ, ಈ ವರ್ಷದ ಜ.09ರಂದು ಇಬ್ಬರು ಪೊಲೀಸ್ ಅಧಿಕಾರಿಗಳು ಪ್ರತಿಭಟನಾಕಾರರ ದಾಳಿಗೆ ಮೃತಪಟ್ಟರು. ಈ ಘಟನೆಯಲ್ಲಿ ಸಲೇಹ್ ಮೊಹಮ್ಮದಿ, ಸಯೀದ್ ದಾವೋದಿ ಮತ್ತು ಮೆಹದಿ ಘಾಸೆಮಿ ಭಾಗಿಯಾಗಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿತ್ತು. ಇದನ್ನು ಅಂದೇ ಬರೆದಿಟ್ಟಿದ್ದ ಇರಾನ್​, ಕಡೆಗೂ ಈ ಮೂವರ ಉಸಿರನ್ನು ನಿಲ್ಲಿಸಿದೆ,(ಏಜೆನ್ಸೀಸ್).