ಚಂದಿರನ ಅಂಗಳದಲ್ಲಿ 'ಮಿಸ್ಟರಿ ಕ್ರ್ಯಾಶ್'! ಸ್ಪೇಸ್‌ ಎಕ್ಸ್ ರಾಕೆಟ್​ ಡಿಕ್ಕಿ ಕುಳಿ ಸೃಷ್ಟಿಸಿದ್ರೂ ಹೊರಬೀಳದ ಸ್ಯಾಟಿಲೈಟ್​ ಫೋಟೋ

ನ್ಯೂಯಾರ್ಕ್: ಮಾನವನ ಬಾಹ್ಯಾಕಾಶ ಸಾಹಸಗಳು ಮತ್ತು ಚಂದ್ರನ ಅನ್ವೇಷಣೆಯ ಹಾದಿಯಲ್ಲಿ ಮತ್ತೊಂದು ಅಪರೂಪ ಹಾಗೂ ರೋಚಕ ಘಟನೆ ಸಂಭವಿಸಿದೆ. ಕಳೆದ ವರ್ಷ ವಿಶ್ವದ ಅತ್ಯಂತ ಶ್ರೀಮಂತ ಉದ್ಯಮಿ ಎಲಾನ್ ಮಸ್ಕ್​ ಒಡೆತನದ 'ಸ್ಪೇಸ್‌ ಎಕ್ಸ್' (SpaceX) ಸಂಸ್ಥೆ ಉಡಾವಣೆ ಮಾಡಿದ್ದ 'ಫಾಲ್ಕನ್-9' ರಾಕೆಟ್‌ನ ಬೃಹತ್ ತುಂಡೊಂದು ಕಡೆಗೂ ಚಂದ್ರನಿಗೆ ಭೀಕರವಾಗಿ ಅಪ್ಪಳಿಸಿದೆ.

ಚಂದಿರನ ಮೇಲೆ ಸುಮಾರು 18ರಿಂದ 20 ಮೀಟರ್ ಅಗಲದ ಹೊಸ ಬೃಹತ್ ಕುಳಿ (Crater) ಸೃಷ್ಟಿಯಾಗಿದ್ದು, ಅಪಾರ ಪ್ರಮಾಣದ ಚಂದ್ರನ ಧೂಳು ಗಾಳಿಯಲ್ಲಿ ತೇಲಿರಬಹುದು ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ಇಷ್ಟೊಂದು ದೊಡ್ಡ ಘಟನೆ ಸಂಭವಿಸಿದ್ದೇ ಆದರೂ ನಾಸಾ ಕಣ್ಣಿಗೆ ಏಕೆ ಒಂದೇ ಒಂದು ಫೋಟೋ ಅಥವಾ ದೃಶ್ಯಗಳು ಹೊರಬಿದ್ದಿಲ್ಲ? ಎಂಬ ಪ್ರಶ್ನೆ ಜನರಲ್ಲಿ ಮಾತ್ರವಲ್ಲ, ವಿಜ್ಞಾನಿಗಳನ್ನು ಬೆಂಬಿಡದೆ ಕಾಡಲಾರಂಭಿಸಿದೆ. ಇದು, ಜಗತ್ತಿನಾದ್ಯಂತ ತೀವ್ರ ಕುತೂಹಲ ಕೆರಳಿಸಿದೆ.

ಈ ಅಪ್ಪಳಿಸುವಿಕೆಯು ಚಂದ್ರನ ಸೂರ್ಯನ ಬೆಳಕು ಬೀಳುವ ಭಾಗ ಮತ್ತು ಕತ್ತಲೆಯ ಭಾಗದ ಗಡಿರೇಖೆಯಾದ 'ಟರ್ಮಿನೇಟರ್ ಲೈನ್' ಬಳಿ ಸಂಭವಿಸಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ರಾಕೆಟ್ ಅಪ್ಪಳಿಸಿದ ಕೂಡಲೇ ಎದ್ದ ಧೂಳಿನ ಕಣಗಳು ಕ್ಷಣಾರ್ಧದಲ್ಲಿ ಸೂರ್ಯನ ಬೆಳಕಿಗೆ ಸಿಲುಕಿ ಹೊಳೆದಿವೆ. ಇದು ಭೂಮಿಯಿಂದ ಬರಿಗಣ್ಣಿಗಾಗಲಿ ಅಥವಾ ಸಣ್ಣ ಟೆಲಿಸ್ಕೋಪ್‌ಗಳಿಗಾಗಲಿ ಸ್ಪಷ್ಟವಾಗಿ ಕಾಣಿಸಿಲ್ಲ. ಚಂದ್ರನ ಕಕ್ಷೆಯಲ್ಲಿ ಅನೇಕ ಕೃತಕ ಉಪಗ್ರಹಗಳು ಸುತ್ತುತ್ತಿದ್ದರೂ, ಈ ಘಟನೆ ನಡೆದ ನಿರ್ದಿಷ್ಟ ಕ್ಷಣದಲ್ಲಿ ಯಾವುದೇ ಉಪಗ್ರಹ ಸೂಕ್ತ ಕೋನದಲ್ಲಿ ಅಥವಾ ಸಂಭವಿಸಿದ ಸ್ಥಳದಲ್ಲಿ ಇರಲಿಲ್ಲ ಎಂದು ವಿವರಿಸಲಾಗಿದೆ.

ವಿಜ್ಞಾನಿಗಳು ಈ ಕುರಿತಾಗಿ ಇನ್ನೂ ಭರವಸೆ ಕಳೆದುಕೊಂಡಿಲ್ಲ. ನಾಸಾದ (NASA) 'ಲೂನಾರ್ ರಿಕಾನಸನ್ಸ್ ಆರ್ಬಿಟರ್' (LRO) ಮತ್ತು ದಕ್ಷಿಣ ಕೊರಿಯಾದ 'ಪಾಥ್‌ಫೈಂಡರ್ ಲೂನಾರ್ ಆರ್ಬಿಟರ್' ಉಪಗ್ರಹಗಳು ಈ ಕ್ರಾಶ್ ಸೈಟ್ ಅಥವಾ ರಾಕೆಟ್ ಬಿದ್ದ ಜಾಗದ ಫೋಟೋಗಳನ್ನು ಸೆರೆಹಿಡಿಯಲು ಪಣತೊಟ್ಟಿವೆ. ರಾಕೆಟ್‌ನ ಅವಶೇಷಗಳು ಮತ್ತು ನೂತನ ಕುಳಿಯ ಸ್ಪಷ್ಟ ಚಿತ್ರಗಳು ಲಭ್ಯವಾಗಲು ಇನ್ನೂ ಕೆಲವೇ ದಿನಗಳು ಸಾಕು ಎನ್ನಲಾಗಿದೆ.

ಹೊಸ ಅಧ್ಯಯನದ ಪ್ರಕಾರ, ಮಂಗಳ ಗ್ರಹದ ಬಳಿಯಿರುವ ಟೆಲಿಸ್ಕೋಪ್ ಒಂದಕ್ಕೆ ಈ ಅಪ್ಪಳಿಸುವಿಕೆಯ ಸಾಕ್ಷಿ ಸಿಕ್ಕಿದೆ. ಯುರೋಪಿಯನ್ ಸದರ್ನ್ ಅಬ್ಸರ್ವೇಟರಿಯ (ESO) 'ವೆರಿ ಲಾರ್ಜ್ ಟೆಲಿಸ್ಕೋಪ್' ಚಂದ್ರನ ಮೇಲಿಂದ ಎದ್ದ ಧೂಳಿನಲ್ಲಿ ಸೋಡಿಯಂ ಮತ್ತು ಲಿಥಿಯಂ ಅನಿಲಗಳ 'ಸ್ಪೆಕ್ಟ್ರಲ್ ಲೈನ್ಸ್' (ರಾಸಾಯನಿಕ ಬೆರಳಚ್ಚು) ಅನ್ನು ಪತ್ತೆಹಚ್ಚಿದ್ದಾಗಿ ವರದಿ ಉಲ್ಲೇಖಿಸಿದೆ.

ಚಂದಿರನಿಗೆ ಡಿಕ್ಕಿ ಹೊಡೆದ ಸ್ಪೇಸ್ ಎಕ್ಸ್ ರಾಕೆಟ್ ಭಾಗದಿಂದ ಸೋಡಿಯಂ ಗ್ಯಾಸ್​ ರಿಲೀಸ್​ ಆಗಿದೆ ಎಂದು ವಿಜ್ಞಾನಿಗಳು ಖಚಿತಪಡಿಸಿದ್ದಾರೆ. ಈ ರಾಸಾಯನಿಕ ಕುರುಹುಗಳು ಸುಮಾರು 5ರಿಂದ 10 ನಿಮಿಷಗಳ ಕಾಲ ಗೋಚರಿಸಿದ್ದವು ಎಂದು ವಿವರಿಸಿದ್ದಾರೆ. ಮತ್ತೊಂದೆಡೆ, ನಾಸಾ ಶೀಘ್ರದಲ್ಲೇ ಚಂದ್ರನ ಮೇಲೆ ಮಾನವನ ಶಾಶ್ವತ ವಸತಿಯನ್ನು (Permanent Human Presence) ನಿರ್ಮಿಸುವ ದೊಡ್ಡ ಯೋಜನೆಯಲ್ಲಿದೆ. ಹೀಗಿರುವಾಗ, ಚಂದ್ರನಿಗೆ ಕೃತಕ ಬಾಹ್ಯಾಕಾಶ ತ್ಯಾಜ್ಯಗಳು ಅಪ್ಪಳಿಸಿದಾಗ ಉಂಟಾಗುವ ಅಪಾಯಗಳು ಮತ್ತು ಕಂಪನಗಳ ಕುರಿತು ಅಧ್ಯಯನ ನಡೆಸಲು ಈ ಘಟನೆ ವಿಜ್ಞಾನಿಗಳಿಗೆ ಬಹಳ ಮುಖ್ಯ ಮಾಹಿತಿಯನ್ನು ಒದಗಿಸಲಿದೆ ಎನ್ನಲಾಗಿದೆ,(ಏಜೆನ್ಸೀಸ್).