ಅಮೆರಿಕ ಜೊತೆ ಸದ್ಯಕ್ಕೆ ಯಾವುದೇ ಮಾತುಕತೆ ಇಲ್ಲ: ದೋಹಾದಲ್ಲಿ ರಾಜತಾಂತ್ರಿಕ ವದಂತಿಗಳಿಗೆ ಬ್ರೇಕ್ ಹಾಕಿದ ಇರಾನ್! IranVsUS

ಈ ಕುರಿತು ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಇರಾನ್ ವಿದೇಶಾಂಗ ಸಚಿವಾಲಯದ ವಕ್ತಾರ ಎಸ್ಮಾಯಿಲ್ ಬಘೇಯ್, ಮುಂದಿನ ಕೆಲವು ದಿನಗಳವರೆಗೆ ಅಮೆರಿಕದೊಂದಿಗೆ ಯಾವುದೇ ಹಂತದ ಸಭೆಯನ್ನು ನಾವು ನಿಗದಿಪಡಿಸಿಲ್ಲ. ಈ ಬಗ್ಗೆ ಹರಡುತ್ತಿರುವುದೆಲ್ಲಾ ಕೇವಲ ವದಂತಿಗಳು ಎಂದು ಹೇಳಿದ್ದಾರೆ.

ಇರಾನ್ ನಿಯೋಗವು ಕತಾರ್‌ಗೆ ಭೇಟಿ ನೀಡುತ್ತಿರುವುದು ಅಮೆರಿಕದ ಜೊತೆ ಸಂಧಾನ ಮಾಡಿಕೊಳ್ಳುವುದಕ್ಕಲ್ಲ, ಬದಲಿಗೆ ಇತ್ತೀಚೆಗಷ್ಟೇ ಸಹಿ ಹಾಕಲಾದ ತಿಳಿವಳಿಕೆ ಪತ್ರದ (MoU) ನಿಯಮಾವಳಿಗಳನ್ನು ಜಾರಿಗೊಳಿಸುವ ಕುರಿತು ಕತಾರ್ ಅಧಿಕಾರಿಗಳೊಂದಿಗೆ ಚರ್ಚಿಸಲು ಎಂದು ಬಘೇಯ್ ತಿಳಿಸಿದ್ದಾರೆ.

ವಿಶೇಷವಾಗಿ, ಕತಾರ್‌ನಲ್ಲಿ ಸ್ಥಗಿತಗೊಂಡಿರುವ ಇರಾನ್‌ನ 6 ಬಿಲಿಯನ್ ಡಾಲರ್ ಹಣವನ್ನು ಬಿಡುಗಡೆ ಮಾಡುವ ಪ್ರಕ್ರಿಯೆಯ ಕುರಿತು ಕತಾರ್ ಸರ್ಕಾರದೊಂದಿಗೆ ಮಾತುಕತೆ ನಡೆಸಲಾಗುವುದು. ಕತಾರ್ ವಿದೇಶಾಂಗ ಸಚಿವಾಲಯವು ಕೂಡ ಈ ಹಣವನ್ನು ಇನ್ನು ಇರಾನ್‌ಗೆ ವರ್ಗಾಯಿಸಿಲ್ಲ ಎಂದು ಈ ಹಿಂದೆ ತಿಳಿಸಿತ್ತು. ಹೀಗಾಗಿ ಈ ಹಣಕಾಸಿನ ವಿಚಾರವೇ ಸಭೆಯ ಮುಖ್ಯ ಅಜೆಂಡಾ ಆಗಿದೆ ಎಂದು ಇರಾನ್ ವಿವರಿಸಿದೆ.

ಪಶ್ಚಿಮ ಏಷ್ಯಾದ ಇತ್ತೀಚಿನ ಯುದ್ಧವನ್ನು ಕೊನೆಗೊಳಿಸುವ ನಿಟ್ಟಿನಲ್ಲಿ ಮಾಡಿಕೊಳ್ಳಲಾದ ಒಪ್ಪಂದದ ನಿಯಮಗಳನ್ನು ಅಮೆರಿಕ ಉಲ್ಲಂಘಿಸಿದರೆ ಇರಾನ್ ಸುಮ್ಮನೆ ಕೂರುವುದಿಲ್ಲ ಎಂದು ವಕ್ತಾರರು ಎಚ್ಚರಿಸಿದ್ದಾರೆ. ಅಮೆರಿಕದ ಯಾವುದೇ ಉಲ್ಲಂಘನೆ ಅಥವಾ ಕ್ರಮಗಳನ್ನು ನಾವು ಉತ್ತರಿಸದೆ ಬಿಡುವುದಿಲ್ಲ. ಇರಾನ್‌ನ ಸಾರ್ವಭೌಮತ್ವದ ಮೇಲೆ ಮತ್ತೆ ಯಾವುದೇ ರೀತಿಯ ದಾಳಿಗಳು ನಡೆದರೆ ಅದಕ್ಕೆ ತಕ್ಷಣವೇ ಮತ್ತು ನಿರ್ಣಾಯಕವಾಗಿ ತಕ್ಕ ಪ್ರತ್ಯುತ್ತರ ನೀಡಲಾಗುವುದು ಎಂದು ಬಘೇಯ್ ಗುಡುಗಿದ್ದಾರೆ.

ಒಂದು ವೇಳೆ ಅಮೆರಿಕ ಮತ್ತೆ ಮಿಲಿಟರಿ ಕ್ರಮಕ್ಕೆ ಮುಂದಾದರೆ, ಅದು ಒಪ್ಪಂದದ ಮೊದಲ ವಿಧಿಯ ಸ್ಪಷ್ಟ ಉಲ್ಲಂಘನೆಯಾಗುತ್ತದೆ ಮತ್ತು ಇಡೀ ಶಾಂತಿ ಒಪ್ಪಂದವೇ ಅಪಾಯಕ್ಕೆ ಸಿಲುಕುತ್ತದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ. ಈ ಮೂಲಕ ಅಮೆರಿಕದ ದೂತರು ದೋಹಾದಲ್ಲಿದ್ದರೂ ಇರಾನ್ ಮಾತ್ರ ತನ್ನ ಕಠಿಣ ನಿಲುವನ್ನು ಸಡಿಲಗೊಳಿಸಿಲ್ಲ ಎಂಬುದು ಸಾಬೀತಾಗಿದೆ,(ಏಜೆನ್ಸೀಸ್​).