ಅಮೆರಿಕದ ಅತಿರೇಕದ ಬೇಡಿಕೆಯಿಂದ ಮಾತುಕತೆ ವಿಫಲ! ಪುಟಿನ್ ಮೊರೆಹೋದ ಇರಾನ್ ವಿದೇಶಾಂಗ ಸಚಿವ! ದೊಡ್ಡಣ್ಣನ ದಿಗ್ಬಂಧನಕ್ಕೆ ಅಂತ್ಯ ಹಾಡುತ್ತಾ ರಷ್ಯಾ? Abbas Araghchi

ಪಾಕಿಸ್ತಾನದಲ್ಲಿ ನಡೆದ ಸಂಧಾನ ಪ್ರಯತ್ನಗಳ ಕುರಿತು ಮಾತನಾಡಿದ ಅರಾಘ್ಚಿ, ಮಾತುಕತೆಗಳಲ್ಲಿ ಸಾಕಷ್ಟು ಪ್ರಗತಿಯಾಗಿದ್ದರೂ ಸಹ, ಅಮೆರಿಕವು ಅತಿರೇಕದ ಬೇಡಿಕೆಗಳನ್ನು ಮುಂದಿಟ್ಟಿದ್ದರಿಂದ ಗುರಿ ತಲುಪಲು ಸಾಧ್ಯವಾಗಲಿಲ್ಲ ಎಂದು ಇರಾನ್ ಸರ್ಕಾರಿ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಇನ್ನೊಂದೆಡೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ ನಿಲುವಿನ ಬಗ್ಗೆ ತೃಪ್ತಿ ಇಲ್ಲದ ಕಾರಣ ತಮ್ಮ ಪ್ರತಿನಿಧಿಗಳಾದ ಸ್ಟೀವ್ ವಿಟ್ಕಾಫ್ ಮತ್ತು ಜೇರೆಡ್ ಕುಶ್ನರ್ ಅವರ ಪಾಕಿಸ್ತಾನ ಪ್ರವಾಸವನ್ನು ರದ್ದುಗೊಳಿಸಿದ್ದಾರೆ. ಇದರಿಂದಾಗಿ ಇಡೀ ಶಾಂತಿ ಪ್ರಕ್ರಿಯೆ ಈಗ ಅನಿಶ್ಚಿತತೆಯಲ್ಲಿದೆ.

ವಿಶ್ವದ ಅತ್ಯಂತ ಆಯಕಟ್ಟಿನ ಜಲಮಾರ್ಗವಾದ 'ಸ್ಟ್ರೈಟ್ ಆಫ್ ಹೊರ್ಮುಜ್ ಮೂಲಕ ಹಡಗುಗಳ ಸುರಕ್ಷಿತ ಸಂಚಾರ ಈಗ ಜಾಗತಿಕ ಸಮಸ್ಯೆಯಾಗಿದೆ.

ಇರಾನ್ ಮತ್ತು ಅಮೆರಿಕ ಎರಡೂ ದೇಶಗಳು ಈ ಜಲಮಾರ್ಗದಲ್ಲಿ ತಮ್ಮ ದಿಗ್ಬಂಧನವನ್ನು ಬಿಗಿಗೊಳಿಸುತ್ತಿವೆ.

ನಾವು ಮತ್ತು ಒಮಾನ್ ಈ ಜಲಮಾರ್ಗವನ್ನು ನಿಯಂತ್ರಿಸುವ ಕರಾವಳಿ ರಾಷ್ಟ್ರಗಳು. ಹಡಗುಗಳ ಸುರಕ್ಷಿತ ಸಂಚಾರವನ್ನು ಖಚಿತಪಡಿಸಿಕೊಳ್ಳಲು ನಮಗೆ ನಿಕಟ ಸಮನ್ವಯದ ಅಗತ್ಯವಿದೆ ಎಂದು ಅರಾಘ್ಚಿ ಹೇಳಿದ್ದಾರೆ.

ಅಮೆರಿಕದ ಜೊತೆ ಯಾವುದೇ ಮಾತುಕತೆ ನಡೆಸುವ ಯೋಜನೆ ಇಲ್ಲ ಎಂದು ಸ್ಪಷ್ಟಪಡಿಸಿರುವ ಇರಾನ್, ಈಗ ರಷ್ಯಾದ ಬೆಂಬಲ ಕೋರಿದೆ.

ಪ್ರಾದೇಶಿಕ ಭದ್ರತೆ: ರಷ್ಯಾ ಮತ್ತು ಇರಾನ್ ಪ್ರಾದೇಶಿಕ ಮತ್ತು ದ್ವಿಪಕ್ಷೀಯ ವಿಷಯಗಳ ಬಗ್ಗೆ ಸದಾ ಸಮಾಲೋಚನೆ ನಡೆಸುತ್ತಿವೆ ಎಂದು ಅರಾಘ್ಚಿ ತಮ್ಮ ಟೆಲಿಗ್ರಾಮ್ ಚಾನಲ್‌ನಲ್ಲಿ ತಿಳಿಸಿದ್ದಾರೆ.

ಯುದ್ಧದ ತಂತ್ರ: ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಯುದ್ಧ ಮತ್ತು ಇಸ್ರೇಲ್-ಅಮೆರಿಕದ ಹಸ್ತಕ್ಷೇಪದ ಬಗ್ಗೆ ಪುಟಿನ್ ಅವರೊಂದಿಗೆ ಅರಾಘ್ಚಿ ಗಹನವಾದ ಚರ್ಚೆ ನಡೆಸಲಿದ್ದಾರೆ.

ಇರಾನ್ ನಿಯೋಗವು ಈಗಾಗಲೇ ಪಾಕಿಸ್ತಾನದ ಹಿರಿಯ ಅಧಿಕಾರಿಗಳೊಂದಿಗೆ ಸಮಾಲೋಚನೆ ನಡೆಸಿದೆ. ಪಾಕಿಸ್ತಾನ ಮತ್ತು ಒಮಾನ್ ದೇಶಗಳು ಈ ಬಿಕ್ಕಟ್ಟಿನಲ್ಲಿ ಸಂಧಾನಕಾರರಾಗಿ ಕಾರ್ಯನಿರ್ವಹಿಸುತ್ತಿವೆ. ಒಮಾನ್ ದೇಶವು ಯುದ್ಧದ ವಿಷಯದಲ್ಲಿ ಇರಾನ್‌ಗೆ ಪೂರಕವಾದ ನಿಲುವನ್ನು ತಳೆದಿರುವುದು ಇರಾನ್‌ನ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ,(ಏಜೆನ್ಸೀಸ್).