KYC ಬೇಕಾದ್ರೆ ಕಣ್ಣು ಹಿಗ್ಗಿಸ್ಲೇಬೇಕು! ಕ್ಯಾಮೆರಾಗೆ ಮೈಂಡ್ ಬ್ಲಾಕ್.. ಸಚಿವ ತೆಮ್ಜೆನ್ ಹಂಚಿಕೊಂಡ ವೀಡಿಯೊ ಫುಲ್ ವೈರಲ್! KYC Troubles

ಸಚಿವರು "ಸ್ಟ್ರಗಲ್ ಈಸ್ ರಿಯಲ್" (Struggle is real) ಎಂಬ ಶೀರ್ಷಿಕೆಯೊಂದಿಗೆ ಹಂಚಿಕೊಂಡಿರುವ ಈ ವಿಡಿಯೊದಲ್ಲಿ, ಈಶಾನ್ಯ ಭಾರತದ ವ್ಯಕ್ತಿಯೊಬ್ಬರು ತಮ್ಮ ಕೆವೈಸಿ (KYC) ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಪರದಾಡುವುದನ್ನು ಕಾಣಬಹುದು.

ಆ ವ್ಯಕ್ತಿಯ ಕಣ್ಣಿನ ಮೇಲ್ಭಾಗದ ನೈಸರ್ಗಿಕ ರಚನೆಯಿಂದಾಗಿ (ಮೋನೋಲಿಡ್ ಕಣ್ಣುಗಳು) ಮುಖ ಗುರುತಿಸುವ (Facial Recognition) ಕ್ಯಾಮೆರಾ ಆತನ ಮುಖವನ್ನು ಸ್ಪಷ್ಟವಾಗಿ ಪತ್ತೆಹಚ್ಚಲು ವಿಫಲವಾಗುತ್ತಿದೆ. ಈ ಸಂದರ್ಭದಲ್ಲಿ ಅವರ ಜೊತೆಗಿರುವ ಗ್ರಾಮಸ್ಥರು ಆತನ ಕಣ್ಣಿನ ರೆಪ್ಪೆಗಳನ್ನು ಬೆರಳುಗಳಿಂದ ಹಿಗ್ಗಿಸಿ ಫೋಟೋ ತೆಗೆಯಲು ಸಹಾಯ ಮಾಡುತ್ತಿರುವುದನ್ನು ತೋರಿಸಲಾಗಿದೆ. ಮತ್ತೊಂದೆಡೆ ಪ್ರಸ್ತುತ ತಂತ್ರಜ್ಞಾನದಲ್ಲಿರುವ ಗಂಭೀರ ಕೊರತೆಯನ್ನು ಬಯಲು ಮಾಡಿದೆ.

ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದ್ದಂತೆಯೇ ಅನೇಕ ರೀತಿಯಲ್ಲಿ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಭಾರತೀಯ ಸಾಫ್ಟ್‌ವೇರ್‌ಗಳು ದೇಶದ ಎಲ್ಲಾ ಭಾಗಗಳ ಜನರ ಜೈವಿಕ ವೈವಿಧ್ಯತೆಯನ್ನು ಪರಿಗಣಿಸಿ ವಿನ್ಯಾಸಗೊಂಡಿಲ್ಲ ಎಂದು ಹಲವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಕಣ್ಣಿನ ಇಂತಹ ವಿಶೇಷ ರಚನೆ ಹೊಂದಿರುವ ಜನರಿಗಾಗಿ ಸೂಕ್ತವಾದ ಐರಿಸ್ ಸ್ಕ್ಯಾನರ್‌ಗಳನ್ನು ಬಳಸಬೇಕು ಅಥವಾ ಪರ್ಯಾಯವಾಗಿ ಬೆರಳಚ್ಚು ಪರಿಶೀಲನೆಗೆ (Fingerprint Verification) ಅವಕಾಶ ನೀಡಬೇಕು ಎಂಬ ಆಗ್ರಹ ಕೇಳಿಬಂದಿದೆ. ಅಷ್ಟೇ ಅಲ್ಲದೆ, ಚೀನಾ ಮತ್ತು ಜಪಾನ್‌ನಂತಹ ರಾಷ್ಟ್ರಗಳು ಇಂತಹ ಸಮಸ್ಯೆಗೆ ಕಂಡುಕೊಂಡಿರುವ ತಾಂತ್ರಿಕ ಪರಿಹಾರಗಳನ್ನು ಭಾರತವೂ ಅಳವಡಿಸಿಕೊಳ್ಳಬೇಕು ಎಂಬ ಸಲಹೆಗಳ ಬಗ್ಗೆಯೂ ಚರ್ಚೆಯಾಗುತ್ತಿದೆ.

ಸದಾ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯರಾಗಿರುವ ತೆಮ್ಜೆನ್ ಇಮ್ನಾ ಅಲಾಂಗ್ ಅವರು, ಈ ಹಿಂದೆಯೂ ಇಂದೋರ್‌ನ ಟ್ರಾಫಿಕ್ ಪೊಲೀಸ್‌ ಅಧಿಕಾರಿಯ ವಿಡಿಯೋ ಹಂಚಿಕೊಂಡು ಗಮನ ಸೆಳೆದಿದ್ದರು. ಪ್ರಸ್ತುತ ಈ ಹೊಸ ವಿಡಿಯೋ ಕೇವಲ ನಗಿಸುವುದು ಮಾತ್ರವಲ್ಲದೆ, ಭಾರತದ ತಂತ್ರಜ್ಞಾನ ವ್ಯವಸ್ಥೆಯು ಪ್ರತಿಯೊಬ್ಬ ನಾಗರಿಕನಿಗೂ ತಲುಪುವಂತೆ ಹಾಗೂ ಎಲ್ಲರನ್ನೂ ಒಳಗೊಳ್ಳುವಂತೆ (Inclusive) ಬದಲಾಗಬೇಕಾದ ಅಗತ್ಯವನ್ನು ಎತ್ತಿಹಿಡಿದಿದೆ (ಏಜೆನ್ಸೀಸ್​).