ಗ್ರೀನ್‌ಲ್ಯಾಂಡ್‌ನಲ್ಲಿ ಸೇನಾ ಜಮಾವಣೆ: ಟ್ರಂಪ್ ಎಚ್ಚರಿಕೆ ನಡುವೆಯೇ ಯುರೋಪ್ ರಾಷ್ಟ್ರಗಳಿಂದ ಮಹತ್ವದ ಹೆಜ್ಜೆ | European countries

ಇದು ಕೇವಲ ಸಾಂಕೇತಿಕ ನಿಯೋಜನೆಯಾಗಿದ್ದರೂ, ಯುರೋಪಿಯನ್ ಯೂನಿಯನ್ (EU) ಮತ್ತು ನ್ಯಾಟೋ (NATO) ಮಿತ್ರರಾಷ್ಟ್ರಗಳು ಗ್ರೀನ್‌ಲ್ಯಾಂಡ್‌ನ ಸಾರ್ವಭೌಮತ್ವವನ್ನು ರಕ್ಷಿಸಲು ಬದ್ಧವಾಗಿವೆ ಎಂಬುದನ್ನು ಜಗತ್ತಿಗೆ ಸಾರಿದೆ.

ಈ ಸೇನಾ ನಿಯೋಜನೆಯಿಂದ ಕೆರಳಿದ ಅಧ್ಯಕ್ಷ ಟ್ರಂಪ್, ತಮ್ಮ ಟ್ರೂತ್ ಸೋಶಿಯಲ್​ನಲ್ಲಿ ಯುರೋಪ್ ರಾಷ್ಟ್ರಗಳ ವಿರುದ್ಧ ಗುಡುಗಿದ್ದಾರೆ. ಗ್ರೀನ್‌ಲ್ಯಾಂಡ್‌ಗೆ ಸೈನಿಕರನ್ನು ಕಳುಹಿಸಿರುವುದು ಜಾಗತಿಕ ಸುರಕ್ಷತೆಗೆ ಅಪಾಯಕಾರಿ ಎಂದು ಕರೆದಿದ್ದಾರೆ.

ಡೆನ್ಮಾರ್ಕ್, ನಾರ್ವೆ, ಸ್ವೀಡನ್, ಫ್ರಾನ್ಸ್, ಜರ್ಮನಿ, ಬ್ರಿಟನ್, ನೆದರ್ಲ್ಯಾಂಡ್ಸ್ ಮತ್ತು ಫಿನ್ಲ್ಯಾಂಡ್ ರಾಷ್ಟ್ರಗಳು ಅಪರಿಚಿತ ಉದ್ದೇಶಗಳಿಗಾಗಿ ಗ್ರೀನ್‌ಲ್ಯಾಂಡ್‌ಗೆ ಪ್ರಯಾಣ ಬೆಳೆಸಿವೆ. ಫೆಬ್ರವರಿ 1 ರಿಂದ ಈ ಎಲ್ಲಾ ದೇಶಗಳ ಉತ್ಪನ್ನಗಳ ಮೇಲೆ ಶೇ. 10 ರಷ್ಟು ಸುಂಕ ವಿಧಿಸಲಾಗುವುದು ಎಂದು ಟ್ರಂಪ್ ಘೋಷಿಸಿದ್ದಾರೆ.

ಅಷ್ಟೇ ಅಲ್ಲದೆ, ಜೂನ್ 1 ರ ವೇಳೆಗೆ ಗ್ರೀನ್‌ಲ್ಯಾಂಡ್ ಮಾರಾಟದ ಒಪ್ಪಂದವಾಗದಿದ್ದರೆ ಈ ಸುಂಕವನ್ನು ಶೇ. 25 ಕ್ಕೆ ಏರಿಸುವುದಾಗಿ ಟ್ರಂಪ್​ ಎಚ್ಚರಿಸಿದ್ದಾರೆ.

ಯುರೋಪ್ ರಾಷ್ಟ್ರಗಳು ಈ ಪ್ರದೇಶದಲ್ಲಿ ಆಪರೇಷನ್ ಆರ್ಕ್ಟಿಕ್ ಎಂಡ್ಯೂರೆನ್ಸ್ (Operation Arctic Endurance) ಎಂಬ ಹೆಸರಿನಲ್ಲಿ ರಕ್ಷಣಾ ತಾಲೀಮು ನಡೆಸುತ್ತಿವೆ.

ಫ್ರಾನ್ಸ್: 15 ಪರ್ವತಾರೋಹಿ ತಜ್ಞ ಸೈನಿಕರನ್ನು ಕಳುಹಿಸಿದ್ದು, ಶೀಘ್ರದಲ್ಲೇ ವಾಯು ಮತ್ತು ನೌಕಾಪಡೆಗಳನ್ನು ಸೇರಿಸುವುದಾಗಿ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಹೇಳಿದ್ದಾರೆ. ಅಲ್ಲದೆ, ಸ್ವೀಡನ್: 3 ಸೇನಾ ಅಧಿಕಾರಿಗಳನ್ನು ನಿಯೋಜಿಸಿದೆ.

ಬ್ರಿಟನ್ ಕೂಡ ಡೆನ್ಮಾರ್ಕ್‌ನ ಕೋರಿಕೆಯ ಮೇರೆಗೆ 1 ಹಿರಿಯ ಸೇನಾ ಅಧಿಕಾರಿಯನ್ನು ಕಳುಹಿಸಿದೆ. ಅಲ್ಲದೆ, ಜರ್ಮನಿಯು 13 ಸದಸ್ಯರ ತನಿಖಾ ತಂಡವನ್ನು ರವಾನಿಸಿದೆ.

ಟ್ರಂಪ್ ಅವರ ಈ ಆರ್ಥಿಕ ಬ್ಲ್ಯಾಕ್‌ಮೇಲ್ ತಂತ್ರಕ್ಕೆ ಯುರೋಪ್ ನಾಯಕರು ತಲೆಬಾಗಲು ಸಿದ್ಧರಿಲ್ಲ. ಯಾವುದೇ ಬೆದರಿಕೆಗಳಿಗೆ ನಾವು ಮಣಿಯುವುದಿಲ್ಲ ಎಂದು ಫ್ರಾನ್ಸ್ ಅಧ್ಯಕ್ಷ ಮ್ಯಾಕ್ರನ್ ಮತ್ತು ಬ್ರಿಟನ್ ಪ್ರಧಾನಿ ಕೀರ್ ಸ್ಟಾರ್ಮರ್ ಸ್ಪಷ್ಟಪಡಿಸಿದ್ದಾರೆ. ಗ್ರೀನ್‌ಲ್ಯಾಂಡ್ ಮಾರಾಟಕ್ಕಿಲ್ಲ ಎಂಬ ಡೆನ್ಮಾರ್ಕ್‌ನ ನಿಲುವಿಗೆ ಇಡೀ ಯುರೋಪ್ ಒಕ್ಕೂಟ ಬೆಂಬಲ ಘೋಷಿಸಿದೆ,(ಏಜೆನ್ಸೀಸ್).