ಟ್ರಂಪ್​ಗೆ ಮಧ್ಯಂತರ ಪರೀಕ್ಷೆ

ಅಮೆರಿಕದ ರಾಜಕೀಯ ವ್ಯವಸ್ಥೆಯಲ್ಲಿ ಮಧ್ಯಂತರ ಚುನಾವಣೆ ಅತ್ಯಂತ ನಿರ್ಣಾಯಕ ಘಟ್ಟ. ಅಮೆರಿಕ ಅಧ್ಯಕ್ಷರ ಅಧಿಕಾರಾವಧಿ 4 ವರ್ಷಗಳಾಗಿದ್ದು, ಅಲ್ಲಿನ ಸಂಸತ್ತಿನ ಕೆಳಮನೆಯಾದ ಹೌಸ್​ ಆಫ್​ ರಿಪ್ರೆಸೆಂಟೇಟಿವ್ಸ್​ನ ಸದಸ್ಯರ ಅವಧಿ 2 ವರ್ಷ ಮಾತ್ರ. ಅಧ್ಯಕ್ಷರ ನಾಲ್ಕು ವರ್ಷಗಳ ಅಧಿಕಾರಾವಧಿಯ ಮಧ್ಯಭಾಗದಲ್ಲಿ, ಅಂದರೆ ಸರಿಯಾಗಿ 2 ವರ್ಷಗಳು ಪೂರ್ಣಗೊಂಡಾಗ, ಈ ಚುನಾವಣೆ ನಡೆಯುವುದರಿಂದ ಇದನ್ನು ಮಧ್ಯಂತರ ಚುನಾವಣೆ ಎನ್ನಲಾಗುತ್ತದೆ. ಸಾಮಾನ್ಯವಾಗಿ ಅಮೆರಿಕನ್ನರು ತಮ್ಮ ಸಂಸತ್ತಿನ ಉಭಯ ಸದನಗಳಿಗೆ ಪ್ರತಿನಿಧಿಗಳನ್ನು ಆಯ್ಕೆ ಮಾಡಲು ನವೆಂಬರ್​ ತಿಂಗಳ ಮೊದಲ ಮಂಗಳವಾರದಂದು ಮತದಾನ ಮಾಡುತ್ತಾರೆ. ಈ ಚುನಾವಣೆಯ ಸ್ವರೂಪ ಹೀಗಿರುತ್ತದೆ.

ಹೌಸ್​ ಆಫ್​ ರಿಪ್ರೆಸೆಂಟೇಟಿವ್ಸ್​ (ಕೆಳಮನೆ): ಇಲ್ಲಿರುವ ಒಟ್ಟು 435 ಸ್ಥಾನಗಳಿಗೂ ಸಂಪೂರ್ಣವಾಗಿ ಮರುಚುನಾವಣೆ ನಡೆಯುತ್ತದೆ. ಪ್ರಸ್ತುತ ಬಹುಮತ ಹೊಂದಿರುವ ಪಕ್ಷಕ್ಕೆ ಅಧಿಕಾರ ಕಾಯ್ದುಕೊಳ್ಳುವುದು ದೊಡ್ಡ ಸವಾಲು.

ಸೆನೆಟ್​ (ಮೇಲ್ಮನೆ): ಸೆನೆಟ್​ನಲ್ಲಿ ಒಟ್ಟು 100 ಸ್ಥಾನಗಳಿದ್ದು, ಸದಸ್ಯರ ಅವಧಿ 6 ವರ್ಷ. ಪ್ರತಿ 2 ವರ್ಷಕ್ಕೊಮ್ಮೆ ಸುಮಾರು ಶೇ. 33ರಷ್ಟು, ಅಂದರೆ 33ರಿಂದ 34 ಸ್ಥಾನಗಳಿಗೆ ಹಂತ ಹಂತವಾಗಿ ಚುನಾವಣೆ ನಡೆಸಲಾಗುತ್ತದೆ.

ರಾಜ್ಯಪಾಲರು, ಸ್ಥಳೀಯ ಜನಪ್ರತಿನಿಧಿಗಳು: ಅಮೆರಿಕ ಒಕ್ಕೂಟದ ಒಟ್ಟು 50 ರಾಜ್ಯಗಳ ಪೈಕಿ ಮೂರನೇ ಎರಡರಷ್ಟು ರಾಜ್ಯಗಳ ಗವರ್ನರ್​ಗಳು (ರಾಜ್ಯಪಾಲರು) ಮತ್ತು ರಾಜ್ಯ ಶಾಸನಸಭೆಗಳ ಸದಸ್ಯರ ಆಯ್ಕೆಯೂ ಇದೇ ಸಮಯದಲ್ಲಿ ನಡೆಯುತ್ತದೆ.

ಅಮೆರಿಕದ ರಾಜಕೀಯ ಇತಿಹಾಸವನ್ನು ಗಮನಿಸಿದರೆ, ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ಎರಡು ವರ್ಷಗಳ ನಂತರ ನಡೆಯುವ ಮಧ್ಯಂತರ ಚುನಾವಣೆಯಲ್ಲಿ ಆಡಳಿತಾರೂಢ ಪಕ್ಷ ಹಿನ್ನಡೆ ಅನುಭವಿಸುವುದು ಸಾಮಾನ್ಯ ಪ್ರವೃತ್ತಿ. ಜನಪ್ರಿಯತೆಯ ಅಲೆಯಲ್ಲಿ ಗೆದ್ದುಬಂದ ಅಧ್ಯಕ್ಷರ ಆರಂಭಿಕ ನಿರ್ಧಾರಗಳು ಮತದಾರರ ದೈನಂದಿನ ಜೀವನದ ಮೇಲೆ ಬೀರಿದ ಧನಾತ್ಮಕ ಹಾಗೂ ಋಣಾತ್ಮಕ ಪರಿಣಾಮಗಳನ್ನು ಅಳೆದುತೂಗಿ ಮತದಾರರು ತೀರ್ಪು ನೀಡುತ್ತಾರೆ. ಹಾಲಿ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ವಿಷಯದಲ್ಲಂತೂ ಈ ಪರೀಕ್ಷೆ ಮತ್ತಷ್ಟು ಕಠಿಣವಾಗಿದೆ. ವೈಟ್​ ಹೌಸ್​ ಪ್ರವೇಶಿಸಿದ ದಿನದಿಂದಲೂ ಅವರು ಕೈಗೊಂಡ ಸಾಲು ಸಾಲು ಆಕ್ರಮಣಕಾರಿ ನಿರ್ಧಾರಗಳು, ಆರ್ಥಿಕ ಸುಧಾರಣೆಗಳು ಮತ್ತು ಎಕ್ಸಿಕ್ಯೂಟಿವ್​ ಆರ್ಡರ್​ಗಳು ಈ ಚುನಾವಣೆಯ ಪ್ರಮುಖ ಚರ್ಚಾ ವಸ್ತುಗಳಾಗಿವೆ.

ಜನಮತಗಣನೆಯ ಪ್ರತಿಫಲನ: ಈ ಚುನಾವಣೆ ಸಂಸದರ ಆಯ್ಕೆಗಾಗಿಯಷ್ಟೇ ಅಲ್ಲ; ಟ್ರಂಪ್​ ಆಡಳಿತ ವೈಖರಿ, ಅವರ "ಮೇಕ್​ ಅಮೆರಿಕ ಗ್ರೇಟ್​ ಅಗೇನ್​' (ಮ್ಯಾಗಾ) ಕಾರ್ಯಸೂಚಿ ಹಾಗೂ ಅವರ ಜನಪ್ರಿಯತೆಯನ್ನು ಈ ಮತದಾನ ನೇರವಾಗಿ ಒರೆಗೆ ಹಚ್ಚಲಿದೆ.

ಸಂಸತ್ತಿನ ಮೇಲಿನ ಹಿಡಿತ: ಪ್ರಸ್ತುತ ಸಂಸತ್​ನ ಉಭಯ ಸದನಗಳಲ್ಲಿ ರಿಪಬ್ಲಿಕನ್​ ಪಕ್ಷದ ಸಂಖ್ಯಾಬಲದ ಮೇಲೆಯೇ ಟ್ರಂಪ್​ ಅವರ ಪ್ರಾಬಲ್ಯ ಅವಲಂಬಿತವಾಗಿದೆ. ಒಂದು ವೇಳೆ, ವಿರೋಧ ಪಕ್ಷವಾದ ಡೆಮಾಕ್ರಟಿಕ್​ ಪಕ್ಷ ಈ ಚುನಾವಣೆಯಲ್ಲಿ ಕೆಳಮನೆಯಲ್ಲಾಗಲಿ ಮೇಲ್ಮನೆಯಲ್ಲಾಗಲಿ ಬಹುಮತ ಸಾಧಿಸಿದರೆ, ಟ್ರಂಪ್​ ಆಡಳಿತಕ್ಕೆ ದೊಡ್ಡ ಹಿನ್ನಡೆಯಾಗಲಿದೆ.

ಮಧ್ಯಂತರ ಚುನಾವಣೆಯ ಪ್ರಚಾರ ಕಣದಲ್ಲಿ ಅಮೆರಿಕನ್​ ಮತದಾರರನ್ನು ಹಲವು ವಿಷಯಗಳು ತೀವ್ರವಾಗಿ ಪ್ರಭಾವಿಸುತ್ತಿವೆ.

ಹಣದುಬ್ಬರ, ಜೀವನ ವೆಚ್ಚ: ಅಮೆರಿಕನ್ನರಿಗೆ ಜಾಗತಿಕ ರಾಜಕೀಯಕ್ಕಿಂತಲೂ ತಮ್ಮ ಜೇಬಿನ ಸ್ಥಿತಿಯೇ ಮುಖ್ಯ. ಮುಕ್ತ ಮಾರುಕಟ್ಟೆಯಲ್ಲಿ ದಿನಸಿ ಪದಾರ್ಥಗಳ ಬೆಲೆ ಏರಿಕೆ, ಮನೆ ಬಾಡಿಗೆ ಹಾಗೂ ಬ್ಯಾಂಕ್​ ಬಡ್ಡಿದರ ಹೆಚ್ಚಳದಿಂದಾಗಿ ಸಾಮಾನ್ಯ ಕುಟುಂಬಗಳ ಬಜೆಟ್​ ಮೇಲೆ ಬಿದ್ದಿರುವ ಒತ್ತಡ ಈ ಚುನಾವಣೆಯ ದೊಡ್ಡ ಚರ್ಚಾ ವಿಷಯವಾಗಿದೆ. ಟ್ರಂಪ್​ರ ಆರ್ಥಿಕ ನೀತಿಗಳು ಹಣದುಬ್ಬರವನ್ನು ಹೆಚ್ಚಿಸಿರುವ ಬಗ್ಗೆ ಚರ್ಚೆ ಜೋರಾಗಿದೆ.

ಆಕ್ರಮಣಕಾರಿ ತೆರಿಗೆ ನೀತಿ: ವಿದೇಶಿ ಸರಕುಗಳ ಮೇಲೆ, ವಿಶೇಷವಾಗಿ ಚೀನಾ, ಐರೋಪ್ಯ ಒಕ್ಕೂಟ, ಭಾರತ ಮತ್ತು ಇತರ ಪ್ರಮುಖ ಪಾಲುದಾರ ದೇಶಗಳ ಆಮದಿನ ಮೇಲೆ ಟ್ರಂಪ್​ ವಿಧಿಸಿದ ಭಾರಿ ಸುಂಕಗಳು ಅಮೆರಿಕದ ಉತ್ಪಾದಕರಿಗೆ ಅನುಕೂಲ ಮಾಡಿಕೊಡಲಿಲ್ಲ. ಅಮೆರಿಕನ್​ ಗ್ರಾಹಕರ ಮೇಲೆಯೇ ಬೆಲೆ ಹೊರೆ ಬಿತ್ತು.

ವಿದೇಶಾಂಗ ನೀತಿ, ಯುದ್ಧಗಳ ವೆಚ್ಚ: ಯೂಕ್ರೇನ್​&ರಷ್ಯಾ ಸಂಘರ್ಷ, ಮಧ್ಯಪ್ರಾಚ್ಯ ಬಿಕ್ಕಟ್ಟು ಮುಂತಾದವುಗಳಿಗೆ ಅಮೆರಿಕದ ತೆರಿಗೆದಾರರ ನೂರಾರು ಕೋಟಿ ಡಾಲರ್​ ವ್ಯಯಿಸುತ್ತಿರುವುದಕ್ಕೆ ಜನ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. ವಿದೇಶಗಳಿಗೆ ಯುದ್ಧ ಸಾಮಗ್ರಿ ಕಳಿಸುವ ಬದಲು ಅದೇ ಹಣವನ್ನು ಸ್ಥಳೀಯ ಮೂಲಸೌಕರ್ಯಕ್ಕೆ ಬಳಸಿ ಎಂಬ ಧ್ವನಿ ಪ್ರಬಲವಾಗಿದೆ.

ವಲಸೆ ನೀತಿ, ಗಡಿ ಭದ್ರತೆ: ದೇಶದೊಳಕ್ಕೆ ಅಕ್ರಮ ವಲಸೆ ತಡೆಯಲು ಟ್ರಂಪ್​ ತಂದಿರುವ ಕಠಿಣ ನಿಯಮಗಳು, ಗಡಿ ಕಾರ್ಯಾಚರಣೆ ಮತ್ತು ವೀಸಾ ನಿಯಂತ್ರಣ ರಿಪಬ್ಲಿಕನ್​ ಬೆಂಬಲಿತ ಮತದಾರರನ್ನು ಒಗ್ಗೂಡಿಸುತ್ತಿದ್ದರೆ, ಡೆಮಾಕ್ರಟಿಕ್​ ಬೆಂಬಲಿಗರ ತೀವ್ರ ವಿರೋಧ ಎದುರಾಗುತ್ತಿದೆ.

ಅಮೆರಿಕ ವಿಶ್ವದ ಬೃಹತ್​ ಆರ್ಥಿಕತೆಯಾಗಿರುವುದರಿಂದ, ಅಲ್ಲಿನ ಶಾಸನಸಭೆಯ ರಾಜಕೀಯ ಸಮತೋಲನ ಜಾಗತಿಕ ಮಾರುಕಟ್ಟೆಗಳ ಮೇಲೆ ನೇರ ಪರಿಣಾಮ ಬೀರುತ್ತದೆ. ಸಂಸತ್​ನಲ್ಲಿ ಡೆಮಾಕ್ರಟಿಕ್​ ಪಕ್ಷದ ಬಲ ಹೆಚ್ಚಾದರೆ, ಟ್ರಂಪ್​ರ ಏಕಪಕ್ಷೀಯ ಆಮದು ಸುಂಕ ಹೆಚ್ಚಳದ ನಿರ್ಧಾರಗಳಿಗೆ ತಡೆ ಖಚಿತ. ಇದು ಜಾಗತಿಕ ಪೂರೈಕೆ ಸರಪಳಿಗೆ ಸ್ಥಿರತೆ ತರಬಹುದು. ಅಮೆರಿಕದಲ್ಲಿ ರಾಜಕೀಯ ಅಸ್ಥಿರತೆ ತಲೆದೋರಿದರೆ ಅಥವಾ ಸರಕಾರದ ಬಜೆಟ್​ ಅಂಗೀಕಾರವಾಗದೆ ಗವರ್ನಮೆಂಟ್​ ಶಟ್​ಡೌನ್​ ಭೀತಿ ಎದುರಾದರೆ, ಡಾಲರ್​ ಮೌಲ್ಯ ಮತ್ತು ಜಾಗತಿಕ ಷೇರು ಮಾರುಕಟ್ಟೆಗಳು ತೀವ್ರ ಏರಿಳಿತಕ್ಕೆ ಒಳಗಾಗುತ್ತವೆ.

ಮಧ್ಯಂತರ ಚುನಾವಣೆಯ ಫಲಿತಾಂಶ ಮುಂದಿನ 2 ವರ್ಷ ಅಮೆರಿಕದ ಸರಕಾರದ ವರ್ತನೆಯನ್ನು ಮತ್ತು ಟ್ರಂಪ್​ ಅವರ ಆಡಳಿತ ಶಕ್ತಿಯನ್ನು ಸಂಪೂರ್ಣವಾಗಿ ಬದಲಾಯಿಸುವ ಸಾಮರ್ಥ್ಯ ಹೊಂದಿದೆ. ರಿಪಬ್ಲಿಕನ್ನರು ಅಧಿಕಾರ ಉಳಿಸಿಕೊಂಡರೆ, ಟ್ರಂಪ್​ಗೆ ಮುಂದಿನ 2 ವರ್ಷಗಳ ಅವಧಿ ಸುಲಭವಾಗಲಿದೆ. ಉದ್ದೇಶಿತ ತೆರಿಗೆ ಕ್ರಮಗಳು, ಗಡಿ ನಿರ್ಬಂಧಗಳು, ನ್ಯಾಯಾಂಗಕ್ಕೆ ತಮಗೆ ಬೇಕಾದ ಕನ್ಸರ್ವೇಟಿವ್​ ನ್ಯಾಯಾಧೀಶರ ನೇಮಕ ಮತ್ತು ಆರ್ಥಿಕ ಮಸೂದೆಗಳಿಗೆ ಸುಲಭ ಅಂಗೀಕಾರ ಸಾಧ್ಯವಾಗಲಿದೆ. ಒಂದು ವೇಳೆ, ಡೆಮಾಕ್ರಟಿಕ್​ ಪಕ್ಷ ಬಹುಮತ ಸಾಧಿಸಿದರೆ, ಆಡಳಿತಾತ್ಮಕ ಸ್ತಂಭನ ಸ್ಥಿತಿ (ಗ್ರಿಡ್​ಲಾಕ್​) ನಿರ್ಮಾಣವಾಗುತ್ತದೆ. ಪ್ರತಿಯೊಂದು ನೀತಿ&ನಿರ್ಧಾರಗಳಿಗೂ ತಡೆ ಬೀಳತೊಡಗುತ್ತದೆ. ಟ್ರಂಪ್​ ನಿರ್ಧಾರಗಳ ವಿರುದ್ಧ ಸಂಸದೀಯ ತನಿಖೆ ಆರಂಭಿಸುವ ಪೂರ್ಣ ಅಧಿಕಾರ ಕೆಳಮನೆಯ ಡೆಮಾಕ್ರಟಿಕ್​ ನಾಯಕರಿಗೆ ಸಿಗುತ್ತದೆ.

ದ್ವಿಪಕ್ಷೀಯ ವ್ಯಾಪಾರ: ಭಾರತದಿಂದ ಅಮೆರಿಕಕ್ಕೆ ರಫ್ತಾಗುವ ಉಕ್ಕು, ಜವಳಿ, ಔಷಧೀಯ ಉತ್ಪನ್ನಗಳು ಮತ್ತು ಕೃಷಿ ಸರಕುಗಳ ಮೇಲಿನ ಸುಂಕದ ವಿಚಾರದಲ್ಲಿ ಟ್ರಂಪ್​ ಆಡಳಿತದ ನಿಲುವು ಕಠಿಣವಾಗಿದೆ. ಅಮೆರಿಕದ ಸಂಸತ್​ನಲ್ಲಿ ರಾಜಕೀಯ ಸಮತೋಲನ ಬದಲಾದರೆ, ದ್ವಿಪಕ್ಷೀಯ ವ್ಯಾಪಾರ ಚರ್ಚೆಗಳಿಗೆ ಹೊಸ ದಿಕ್ಕು ಸಿಗಬಹುದು.

ರಕ್ಷಣಾ ತಂತ್ರಜ್ಞಾನ: ಚೀನಾವನ್ನು ಎದುರಿಸಲು ಇಂಡೋ&ಪೆಸಿಫಿಕ್​ ವಲಯದಲ್ಲಿ "ಕ್ವಾಡ್​' ಒಕ್ಕೂಟವನ್ನು ಬಲಪಡಿಸುವ ಮತ್ತು ಭಾರತದೊಂದಿಗೆ ರಕ್ಷಣಾ ಪಾಲುದಾರಿಕೆಯನ್ನು ವೃದ್ಧಿಸುವ ವಿಚಾರದಲ್ಲಿ ಅಮೆರಿಕದ ಎರಡೂ ಪ್ರಮುಖ ಪಕ್ಷಗಳ ನಡುವೆ (ರಿಪಬ್ಲಿಕನ್​ ಮತ್ತು ಡೆಮಾಕ್ರಾಟ್​) ಒಮ್ಮತವಿದೆ. ಆದ್ದರಿಂದ ಭದ್ರತಾ ವಿಚಾರದಲ್ಲಿ ಹೆಚ್ಚಿನ ಬದಲಾವಣೆ ಸಂಭವಿಸುವ ಸಾಧ್ಯತೆ ಕಡಿಮೆ.

ಷೇರುಪೇಟೆ, ವಿದೇಶಿ ಬಂಡವಾಳ: ಅಮೆರಿಕದ ರಾಜಕೀಯ ಬೆಳವಣಿಗೆಗಳನ್ನು ಆಧರಿಸಿಯೇ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಭಾರತದಂತಹ ದೇಶಗಳ ಷೇರುಪೇಟೆಗಳಿಂದ ಹಣ ಹಿಂಪಡೆಯುವ ಅಥವಾ ಹೂಡಿಕೆ ಮಾಡುವ ತೀರ್ಮಾನ ತಳೆಯುತ್ತಾರೆ. ಮಿಡ್​ಟರ್ಮ್​ ಫಲಿತಾಂಶದ ನಂತರ ಅಮೆರಿಕನ್​ ಆರ್ಥಿಕತೆಯ ಚಿತ್ರಣ ಸ್ಪಷ್ಟವಾದಂತೆ, ಭಾರತೀಯ ಷೇರು ಮಾರುಕಟ್ಟೆಗೂ ಸ್ಪಷ್ಟ ದಿಕ್ಸೂಚಿ ಸಿಗಲಿದೆ.