ಮಧ್ಯಪ್ರಾಚ್ಯ ಮಹಾಯುದ್ಧ: ಇರಾನ್‌ನ ಪ್ರಮುಖ 'ಚಾಬಹಾರ್' ಬಂದರಿನ ಮೇಲೆ ಅಮೆರಿಕ ವೈಮಾನಿಕ ದಾಳಿ; ರಕ್ಷಣಾ ಕಾರ್ಯದರ್ಶಿಯಿಂದ ಫೋಟೋ ರಿಲೀಸ್! US Airstrike Chabahar Port

ತೆಹ್ರಾನ್​: ಕಳೆದ ಕೆಲ ದಿನಗಳಿಂದ ಶಾಂತವಾಗಿದ್ದ ಮಧ್ಯಪ್ರಾಚ್ಯದಲ್ಲಿ ಮತ್ತೆ ಸಂಘರ್ಷ ಪ್ರಾರಂಭವಾಗಿದೆ. ಸತತ ಆರು ದಿನಗಳಿಂದ ಇರಾನ್​ ಮೇಲೆ ದಾಳಿ ಮಾಡುತ್ತಿರುವ ಅಮೆರಿಕ ಪಡೆ ಇಂದು (ಶುಕ್ರವಾರ, ಜು.17) ಇರಾನ್​ನ ಪ್ರಮುಖ ಬಂದರಾದ ಚಾಬಹಾರ್ (US Airstrike Chabahar Port) ಬಂದರಿನ ಮೇಲೆ ದಾಳಿ ಮಾಡಿದ್ದು, ಅಲ್ಲಿದ್ದ ಕಣ್ಗಾವಲು ಗೋಪುರ (Surveillance Tower) ಧ್ವಂಸಗೊಂಡಿರುವುದಾಗಿ ವರದಿಯಾಗಿದೆ.

ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ (Pete Hegseth) ಹಂಚಿಕೊಂಡಿರುವ ಈ ಚಿತ್ರದಲ್ಲಿ ಅಮರಿಕದ ವೈಮಾನಿಕ ದಾಳಿಗೆ ತುತ್ತಾಗಿ ಗೋಪುರವೊಂದು ಕುಸಿದು ಬಿದ್ದಿದ್ದು, ಸುತ್ತಲೂ ಹೊಗೆ ಆವರಿಸಿರುವುದನ್ನು ಕಾಣಬಹುದಾಗಿದೆ.

ಚಾಬಹಾರ್ ಬಂದರು ಇರಾನಿನ ಪ್ರಮುಖ ಬಂದರು ಪಟ್ಟಣವಾಗಿದ್ದು, ಈ ದಾಳಿ ಅಮೆರಿಕ ನಡೆಸಿರುವ ಮೂರನೇ ದಾಳಿ ಎಂದು ಖುದ್ದು ಇರಾನಿನ ಮಾಧ್ಯಮಗಳು ವರದಿಮಾಡಿವೆ. ಆದರೆ ಈ ದಾಳಿಯಿಂದ ಅಲ್ಲಿದ್ದ ಕಣ್ಗಾವಲು ಗೋಪುರ ನಾಶವಾಗಿದೆ ಎಂದು ಇರಾನ್​ ಇಲ್ಲಿವರೆಗೆ ದೃಢಪಡಿಸಿಲ್ಲ.

ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿದ್ದ ಸಂಘರ್ಷ ನೂರು ದಿನಗಳನ್ನು ಪೂರೈಸುತ್ತಿದ್ದಂತೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಕದನವಿರಾಮ ಘೋಷಿಸಿದ್ದರು. ನಂತರ ಪಾಕಿಸ್ತಾನದಲ್ಲಿ ಇರಾನ್​ ಹಾಗೂ ಅಮೆರಿಕದ ಅಧಿಕಾರಿಗಳು ಶಾಂತಿ ಮಾತುಕತೆಯನ್ನು ನಡೆಸಿದ್ದರು. ಆದರೆ ಈ ಯಾವುದೇ ಮಾತುಕತೆಗಳು ಸುಖಾಂತ್ಯ ಕಂಡಿರಲಿಲ್ಲ.

ನಂತರ ಇರಾನ್​ನ ಮಾಜಿ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿಯ ಅಂತ್ಯ ಸಂಸ್ಕಾರದ ಸಮಯದಲ್ಲಿ ಅಮೆರಿಕ ಅಧ್ಯಕ್ಷ ಟ್ರಂಪ್​ನನ್ನು ಕೊಲ್ಲಬೇಕು ಎಂಬ ಘೋಷಣೆಗಳು ಕೇಳಿಬಂದವು. ನಂತರ ಟರ್ಕಿಯಲ್ಲಿ ನಡೆಯುತ್ತಿದ್ದ ನ್ಯಾಟೋ ಸಭೆಯಲ್ಲಿದ್ದ ಟ್ರಂಪ್​, ಇರಾನ್​ ಜೊತೆ ನಾವು ಯಾವುದೇ ಒಪ್ಪಂದ ಮಾಡಿಕೊಂಡಿಲ್ಲ, ಇನ್ಮುಂದೆ ಯಾವುದೇ ಕದನ ವಿರಾಮ ಜಾರಿಯಲ್ಲಿರುವುದಿಲ್ಲ ಎಂದು ಘೋಷಿಸುವ ಮೂಲಕ ಶಾಂತವಾಗಿದ್ದ ಮಧ್ಯಪ್ರಾಚ್ಯ ಮತ್ತೆ ಉದ್ವಿಗ್ನ ಸ್ಥಿತಿ ತಲುಪಿದೆ, (ಏಜನ್ಸೀಸ್​).