ಮೆಕ್ಸಿಕೋದಲ್ಲಿ ರಿಯಲ್​ ಬ್ಯಾಟ್​ಮ್ಯಾನ್​ ಅಬ್ಬರ; ಬೈಕ್​ ಕಳ್ಳರ ಹುಡುಕಿ ಕಂಬಕ್ಕೆ ಕಟ್ಟಿ ಹಾಕಿ ನಾಪತ್ತೆ, ಪೊಲೀಸರಿಂದ ತೀವ್ರ ಹುಡುಕಾಟ..Mexico

ಮೆಕ್ಸಿಕನ್ ಬ್ಯಾಟ್‌ಮ್ಯಾನ್ ಅಥವಾ ಬ್ಯಾಟ್‌ಮ್ಯಾನ್ ಆಫ್ ಲಾಗೋಸ್ ಡಿ ಮೊರೆನೊ ಎಂದು ಆನ್​​ಲೈನ್​ನಲ್ಲಿ ಹೆಸರುವಾಸಿಯಾದ ಮುಖವಾಡ ಧರಿಸಿದ ರಿಯಲ್ ಬ್ಯಾಟ್​ಮ್ಯಾನ್​ ಎಂದು ಕರೆಸಿಕೊಳ್ಳುವ ವ್ಯಕ್ತಿಯೊಬ್ಬ, ಮೋಟಾರ್‌ ಬೈಕ್​ ಕದಿಯುವ ಕಳ್ಳರನ್ನು ಬೇಟೆಯಾಡಿ, ಬೀದಿ ದೀಪಗಳಿಗೆ ದೊಡ್ಡ ಟೇಪ್​​ಗಳ ಮುಖೇಣ ಕಟ್ಟಿಹಾಕುವ ಕೆಲಸ ಮಾಡುತ್ತಿದ್ದಾನೆ. ಸದ್ಯ ಪೊಲೀಸರು ಈ ವ್ಯಕ್ತಿಯ ಹುಡುಕಾಟಕ್ಕೆ ಮುಂದಾಗಿರುವುದರಿಂದ ಘಟನೆಯು ವಿಶ್ವದಾದ್ಯಂತ ಬೆಳಕಿಗೆ ಬಂದಿದೆ. 

ಜೂನ್ 13 ರಂದು ಲಾಗೋಸ್ ಡಿ ಮೊರೆನೊ ಪುರಸಭೆ ವ್ಯಾಪ್ತಿ ಈ ಘಟನೆ ನಡೆದಿದ್ದು,  ಆಗುಂತಕನನ್ನು 10 ದಿನಗಳೊಳಗೆ ಪತ್ತೆ  ಹಚ್ಚಲು ವಿಶೇಷ ತನಿಖಾ ತಂಡವನ್ನು ನೇಮಕ ಮಾಡಲಾಗಿದೆ.  ಪ್ರತಿ ಬಾರಿಯು ಆ ಮುಖವಾಡದ ವ್ಯಕ್ತಿ  ಕಳ್ಳರನ್ನು ಹೆವಿ-ಡ್ಯೂಟಿ ಡಕ್ಟ್ ಟೇಪ್‌ನಿಂದ ಬೀದಿ ದೀಪಗಳಿಗೆ ಕಟ್ಟಿ ಅವರ ಮುಂದೆ ಅವರು ಕದಿಯಲು ಯತ್ನಿಸಿದ ಗಾಡಿಗಳನ್ನು ನಿಲ್ಲಿಸುತ್ತಿದ್ದಾನೆ ಎನ್ನಲಾಗಿದೆ.

ಎಕ್ಸ್​​ನಲ್ಲಿ ಹಂಚಿಕೊಳ್ಳಲಾದ ಫೋಟೋಗಳಲ್ಲಿ ಕೆಲವು ಪುರುಷರ ಮುಖದಲ್ಲಿ ಮೀಸೆ ಮತ್ತು ಬೆಕ್ಕಿನ ಮೀಸೆಗಳನ್ನು ಚಿತ್ರಿಸಿರುವುದು.  ಹಣೆ ಮೇಲೆ ಸ್ಪ್ಯಾನಿಷ್‌ನಲ್ಲಿ ಕಳ್ಳ ಎಂಬ ಪದವನ್ನು ಬರೆಯಲಾಗಿದೆ. ಒಂದು ಘಟನೆಯಲ್ಲಿ, ಇಬ್ಬರು ಪುರುಷರನ್ನು ಪ್ರಕಾಶಮಾನವಾದ ಗುಲಾಬಿ ಎಚ್ಚರಿಕೆ ಚಿಹ್ನೆಯ ಕೆಳಗೆ ದೀಪಸ್ತಂಭಕ್ಕೆ ಒಂದರ ನಂತರ ಒಂದರಂತೆ ಟೇಪ್ ಮಾಡಲಾಗಿದೆ.

ಕಂಬಕ್ಕೆ ಕಟ್ಟಿ ಹಾಕಲಾದ ಆರೋಪಿಗಳಿಗೆ ಪೊಲೀಸರು ಸದ್ಯ ಸೂಕ್ತ ಚಿಕಿತ್ಸೆ ಕೊಡಿಸುತ್ತಿದ್ದಾರೆ ಎನ್ನಲಾಗಿದೆ.  ಕಂಬಕ್ಕೆ ಕಟ್ಟಿ ಹಾಕಿದವರು ನಿಜಕ್ಕೂ ಕಳ್ಳತನ ಮಾಡಿದ್ದಾರೆಯೇ? ಅಥವಾ ಸುಳ್ಳು ಆರೋಪ ಹೊರಿಸಲಾಗುತ್ತಿದೆಯೇ ಎನ್ನುವುದನ್ನು ಇನ್ನಷ್ಟೇ ತನಿಖೆ ನಡೆಸಿ, ಖಚಿತಪಡಿಸಿಕೊಳ್ಳಬೇಕಾಗಿದೆ ಎನ್ನಲಾಗಿದೆ. 

ಲಾಗೋಸ್ ಡಿ ಮೊರೆನೊದಲ್ಲಿ ಹೆಚ್ಚಾದ ಬೈಕ್​ ಕಳ್ಳತನದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿ, ಸ್ಥಳೀಯರು ಸೋಶಿಯಲ್​ ಮೀಡಿಯಾದಲ್ಲಿ ಬೇಸರ ವ್ಯಕ್ತಪಡಿಸಿದ್ದರು. ಆದರೆ ಮುಖವಾಡದ ವ್ಯಕ್ತಿ ನಡೆಸಿರುವ ಈ ಕಾರ್ಯಾಚರಣೆಯನ್ನು ಜನರು ಪ್ರಶಂಸಿಸಿ ಎಕ್ಸ್​​, ಇನ್​ಸ್ಟಾಗ್ರಾಮ್​ ಸೇರಿದಂತೆ ನಾನಾ ವೇದಿಕೆಯಲ್ಲಿ ಪೋಸ್ಟ್​ ಹಂಚಿಕೊಂಡಿದ್ದಾರೆ, (ಏಜೆನ್ಸೀಸ್).