3ನೇ ಪತ್ನಿ, ತಿಂಗಳಿಗೆ 11 ಲಕ್ಷ ರೂ. ಕೊಡ್ತೀನಿ ಬಾ! ದೊಡ್ಡ ಮನುಷ್ಯನ ಆಫರ್​ಗೆ ಮಲೇಷಿಯನ್​ ಬ್ಯೂಟಿ ಕೊಟ್ಟ ಉತ್ತರ ವೈರಲ್​​

ಮಲೇಷಿಯಾ: ಗಣ್ಯ ವ್ಯಕ್ತಿಗಳ ಸಾಲಿನಲ್ಲಿರುವ ಒಬ್ಬ ವಿವಿಐಪಿ, ತನಗೆ ಮೂರನೇ ಪತ್ನಿಯಾಗಿರುವಂತೆ ನೀಡಿದ ಭರ್ಜರಿ ಆಫರ್​ ಕುರಿತು ಇದೀಗ ಮಲೇಷಿಯನ್​ ನಟಿಯೊಬ್ಬರು ಬಹಿರಂಗವಾಗಿ ಮಾತನಾಡಿದ್ದಾರೆ. ಹೆಂಡತಿ ಸ್ಥಾನದಲ್ಲಿರಲು ತಿಂಗಳಿಗೆ 11 ಲಕ್ಷ ರೂ. ಕೊಡುವುದಾಗಿ ಆತ ಹೇಳಿದ್ದನ್ನು ಯಾವುದೇ ಮುಲಾಜಿಲ್ಲದೇ ಸಂದರ್ಶನದಲ್ಲಿ ಬಿಚ್ಚಿಟ್ಟಿದ್ದಾರೆ.

ಸಫ್ವಾನ್ ನಜ್ರಿ ಅವರ ಪಾಡ್‌ಕ್ಯಾಸ್ಟ್‌ನಲ್ಲಿ ಈ ಕುರಿತಾಗಿ ಮಾತನಾಡಿರುವ ನಟಿ ಆಮಿ ನೂರ್ ಟಿನಿ, "ವಿವಿಐಪಿ ವ್ಯಕ್ತಿಯೊಬ್ಬರು ನನಗೆ ಈ ಆಫರ್​ ಕಳುಹಿಸಿಕೊಟ್ಟರು. ನೀನು ನನ್ನ ಮೂರನೇ ಹೆಂಡತಿಯಾಗಿರು. ಇದಕ್ಕೆ ಒಪ್ಪಿಕೊಂಡರೆ, ಒಂದು ಐಷಾರಾಮಿ ಬಂಗಲೆ, ದುಬಾರಿ ಮೌಲ್ಯದ ಕಾರು, 10 ಎಕರೆ ಭೂಮಿ ಮತ್ತು ತಿಂಗಳಿಗೆ 11 ಲಕ್ಷ ರೂ. ನೀಡುವುದಾಗಿ ಹೇಳಿದ" ಎಂದಿದ್ದಾರೆ.

"ಈ ಆಫರ್​ ಅನ್ನು ತಕ್ಷಣವೇ ನಾನು ಮುಖಕ್ಕೆ ಹೊಡೆದಂತೆ ತಿರಸ್ಕರಿಸಿದೆ. ಮೊದಲಿಗೆ, ಆ ವ್ಯಕ್ತಿಗೆ ನನ್ನ ತಂದೆಯಷ್ಟು ವಯಸ್ಸಾಗಿದೆ. ಇಂತಹ ಆಫರ್​ಗಳನ್ನು ನಾನು ಈ ಹಿಂದೆಯೂ ನೋಡಿದ್ದೇನೆ. ಕಾರ್ಪೊರೇಟ್ ಕಾರ್ಯಕ್ರಮಗಳಿಗೆ ಹೋದಾಗೆಲ್ಲ, ಪ್ರಭಾವಿ ವ್ಯಕ್ತಿಗಳನ್ನು ಆಗಾಗ್ಗೆ ಭೇಟಿಯಾಗುತ್ತೀನಿ. ಅವರಲ್ಲಿ ಹಲವರು ನನ್ನ ಫೋನ್​ ನಂಬರ್​ ಕೇಳುತ್ತಾರೆ. ಕೆಲವರು, ನನ್ನೊಂದಿಗೆ ದೂರವಾಣಿ ಸಂಪರ್ಕದಲ್ಲಿರಲು ಕೇಳಿದರೆ, ಇನ್ನೂ ಕೆಲವರು ಹೊರಗೆ ಸಿಗೋಣ ಎನ್ನುತ್ತಾರೆ" ಎಂದು ಆಮಿ ಹೇಳಿದ್ದಾರೆ.