1200 ವರ್ಷ ಹಳೆಯ 'ಮೇಜರ್​ ಓಕ್'​ ಹೆಮ್ಮರ ನಿಧನ! ರಾಬಿನ್​ಹುಡ್​ ಗ್ಯಾಂಗ್​ನ ಅಡಗು ತಾಣ ಇನ್ನು ನೆನಪು

ಲಂಡನ್: ಶ್ರೀಮಂತರ ಮನೆಗೆ ನುಗ್ಗುವುದು ಮತ್ತು ಅವರಿಂದ ಲೂಟಿ ಮಾಡಿ ಬಡವರಿಗೆ ಹಂಚುತ್ತಿದ್ದ ಸಾಹಸಿ, ಕಿಲಾಡಿ ಕಳ್ಳ ರಾಬಿನ್ ಹುಡ್ ಮತ್ತು ಆತನ ಗ್ಯಾಂಗ್​ಗೆ ಪೊಲೀಸರಿಂದ ತಪ್ಪಿಸಿಕೊಳ್ಳಲು ಅಡಗು ತಾಣವಾಗಿದ್ದ ಇತಿಹಾಸದ ಪ್ರಸಿದ್ಧ 'ಮೇಜರ್ ಓಕ್' (Major Oak) ಹೆಮ್ಮರ ಇದೀಗ ಧರಗೆ ಉರುಳಿದೆ.

ಯುರೋಪ್‌ನ ಅತ್ಯಂತ ಹಳೆಯ, ಬೃಹತ್ ಹಾಗೂ ಕೋಟ್ಯಂತರ ಪರಿಸರ ಪ್ರೇಮಿಗಳ ಹೆಮ್ಮರವಾಗಿ ಕಂಗೊಳಿಸುತ್ತಿದ್ದ ಈ ಭವ್ಯ ಓಕ್ ಮರವು, ಬರೋಬ್ಬರಿ 1200 ವರ್ಷಗಳ ಕಾಲ ಜೀವಿಸಿದ ವೃಕ್ಷ ಎಂಬ ದಾಖಲೆಯನ್ನು ನಿರ್ಮಿಸಿದೆ. ಇಂತಹ ದೈತ್ಯ ಮರ ಕಡೆಗೂ ಜಗತ್ತಿಗೆ ವಿದಾಯ ಹೇಳಿರುವುದು ಪರಿಸರ ಪ್ರೇಮಿಗಳಲ್ಲಿ ಭಾರಿ ಬೇಸರ ತಂದಿದೆ.

ಈ ವಸಂತ ಕಾಲದಲ್ಲಿ ಮರದಲ್ಲಿ ಒಂದು ಎಲೆಯೂ ಚಿಗುರದಿರುವುದು ಅದರ ಸಾವನ್ನು ಅಧಿಕೃತವಾಗಿ ಖಚಿತಪಡಿಸಿದೆ ಎಂದು ಬ್ರಿಟನ್‌ನ 'ರಾಯಲ್ ಸೊಸೈಟಿ ಫಾರ್ ದಿ ಪ್ರೊಟೆಕ್ಷನ್ ಆಫ್ ಬರ್ಡ್ಸ್' (RSPB) ಪ್ರಕಟಿಸಿದೆ. ಬದಲಾಗುತ್ತಿರುವ ಹವಾಮಾನ ವೈಪರೀತ್ಯ ಮತ್ತು ಮರದ ಮೇಲಿನ ಮನುಷ್ಯರ ಅತಿಯಾದ ಪ್ರೀತಿಯೇ ಈ ಸಾವಿಗೆ ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಇದು ಗೊಂದಲಕ್ಕೂ ಸಾಕ್ಷಿಯಾಗಿದೆ.

ಇಂಗ್ಲೆಂಡ್‌ನ ನಾಟಿಂಗ್‌ಹ್ಯಾಮ್‌ಶೈರ್‌ನಲ್ಲಿರುವ ಶೆರ್‌ವುಡ್ ಕಾಡಿನಲ್ಲಿ ಈ ವೃಕ್ಷವಿತ್ತು. ಇದನ್ನು ನೋಡಲು ಪ್ರತಿವರ್ಷ ಲಕ್ಷಾಂತರ ಪ್ರವಾಸಿಗರು ಆಗಮಿಸುತ್ತಿದ್ದರು. ಜನರ ಸ್ಪರ್ಶ, ನಿರಂತರ ಓಡಾಟದಿಂದಾಗಿ ವೃಕ್ಷದ ಸುತ್ತಲಿನ ಮಣ್ಣು ಸಂಪೂರ್ಣ ಗಟ್ಟಿಯಾಗಿ ಬಿಟ್ಟಿತ್ತು. ಇದರ ಪರಿಣಾಮವಾಗಿ, ಬೇರುಗಳಿಗೆ ಅಗತ್ಯವಿದ್ದಷ್ಟು ಮಳೆನೀರು ಮತ್ತು ಪೋಷಕಾಂಶಗಳು ಸಿಗದೆ ಮರವು ಒಣಗಿದೆ ಎಂದು ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ.

ಈ ಓಕ್ ಮರವು ಕೇವಲ ಸಾಹಿತ್ಯಕ್ಕಷ್ಟೇ ಸೀಮಿತವಾಗಿರದೆ, ಪ್ರಕೃತಿಯ ಒಂದು ಅದ್ಭುತ ವಿಸ್ಮಯವಾಗಿತ್ತು. ಇದರ ಕಾಂಡದ ಸುತ್ತಳತೆ ಬರೋಬ್ಬರಿ 11 ಮೀಟರ್‌ಗಳಷ್ಟಿದ್ದರೆ, ಮರದ ಹಸಿರು ಚಾವಣಿ ಸುಮಾರು 28 ಮೀಟರ್‌ ವಿಸ್ತಾರವಾಗಿ ಹರಡಿಕೊಂಡಿತ್ತು. ಶತಶತಮಾನಗಳಿಂದ ನೂರಾರು ಜಾನಪದ ಕಥೆಗಳಿಗೆ ಸ್ಫೂರ್ತಿಯಾಗಿದ್ದ ಮೇಜರ್​ ಓಕ್​, ನಾಟಿಂಗ್‌ಹ್ಯಾಮ್‌ನ ಪೊಲೀಸ್ ಅಧಿಕಾರಿಗಳ ಕಣ್ಣಿನಿಂದ ತಪ್ಪಿಸಿಕೊಳ್ಳುತ್ತಿದ್ದ ರಾಬಿನ್ ಹುಡ್ ಮತ್ತು ಆತನ ಗ್ಯಾಂಗ್​ಗೆ ತನ್ನ ಪೊಟರೆಯಲ್ಲಿ ಅಡಗಿರಲು ಆಶ್ರಯ ನೀಡಿತ್ತು ಎಂಬ ನಂಬಿಕೆ ಇಂದಿಗೂ ಅಲ್ಲಿನ ಜನರಲ್ಲಿ ಬಲವಾಗಿದೆ.

1790ರಲ್ಲಿ ಇತಿಹಾಸಕಾರ ಮೇಜರ್ ಹೈಮನ್ ರೂಕ್ ಅವರು ಬರೆದ ಪುಸ್ತಕದ ಮೂಲಕ ಈ ಹೆಮ್ಮರವನ್ನು ಮೊದಲ ಬಾರಿಗೆ ಜಗತ್ತಿಗೆ ಪರಿಚಯಿಸಲಾಯಿತು. ಅವರ ಕೊಡುಗೆಯ ನೆನಪಿಗಾಗಿ, ಈ ಮರಕ್ಕೆ 'ಮೇಜರ್ ಓಕ್' ಎಂದು ಹೆಸರಿಡಲಾಯಿತು. ಸಾವಿರ ವರ್ಷಗಳ ಕಾಲ ಇತಿಹಾಸ ಹಾಗೂ ಪ್ರಕೃತಿಯ ಸಂಕೇತವಾಗಿ ಉಳಿದಿದ್ದ ಈ ಮೇಜರ್ ಓಕ್​ ಟ್ರೀ ಇನ್ನು ನೆನಪು ಮಾತ್ರ ಎಂಬುದನ್ನು ಅರಗಿಸಿಕೊಳ್ಳುವುದೇ ಅಸಾಧ್ಯ,(ಏಜೆನ್ಸೀಸ್).