ಟ್ರಂಪ್‌ಗೆ ಮ್ಯಾಕ್ರನ್ ತಿರುಗೇಟು; ಇದು ಶಾಂತಿ ಮತ್ತು ಸ್ಥಿರತೆಯ ಸಮಯ: ಅಮೆರಿಕದ ಸುಂಕದ ಬೆದರಿಕೆಗೆ ಫ್ರಾನ್ಸ್ ಅಧ್ಯಕ್ಷ ವ್ಯಂಗ್ಯ | Emmanuel Macron

ಈ ಬಗ್ಗೆ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಮ್ಯಾಕ್ರನ್, ಇದು ನಿಜಕ್ಕೂ ಶಾಂತಿ, ಸ್ಥಿರತೆ ಮತ್ತು ಊಹಿಸಬಹುದಾದ ಸಮಯ ಎಂದು ಹಾಸ್ಯಮಯವಾಗಿ ಹೇಳಿದ್ದಾರೆ. ಅಲ್ಲದೆ, ನಾವು ಎದುರಿಸುತ್ತಿರುವ ಜಾಗತಿಕ ಸವಾಲುಗಳ ಬಗ್ಗೆ ನಾನು ಮಾತನಾಡಬೇಕಿದೆ. ವಿಶೇಷವಾಗಿ ಅಟ್ಲಾಂಟಿಕ್‌ನ ಆಚೆಯಿಂದ (ಅಮೆರಿಕದಿಂದ) ಬರುತ್ತಿರುವ ಕೆಲವು ಆಘಾತಕಾರಿ ಹೇಳಿಕೆಗಳ ಬಗ್ಗೆ ಫ್ರಾನ್ಸ್‌ನ ನಿಲುವು ಸ್ಪಷ್ಟವಾಗಿದೆ ಎಂದಿದ್ದಾರೆ.

ನಾವು ಇಂದು ಎಂತಹ ಅದ್ಭುತ ಕಾಲಘಟ್ಟದಲ್ಲಿದ್ದೇವೆ ಎಂದರೆ, ಪ್ರತಿದಿನವೂ ನಮಗೆ ಹೊಸ ಬೆದರಿಕೆಗಳು ಅಥವಾ ಭೂಪಟದ ಬದಲಾವಣೆಗಳ ಸುದ್ದಿ ಕೇಳಿಬರುತ್ತಿದೆ. ಅಲ್ಲದೆ, ನಿಜಕ್ಕೂ ಹೇಳಬೇಕೆಂದರೆ, ಇದು ಜಾಗತಿಕವಾಗಿ ಅತ್ಯಂತ ಶಾಂತಿ, ಸ್ಥಿರತೆ ಮತ್ತು ಎಲ್ಲವನ್ನೂ ಮುನ್ಸೂಚಿಸಬಹುದಾದ ಸಮಯವಾಗಿದೆ. ಅನಿರೀಕ್ಷಿತ ಟ್ವೀಟ್‌ಗಳು ಮತ್ತು ಆರ್ಥಿಕ ಬೆದರಿಕೆಗಳ ನಡುವೆ ಜಗತ್ತು ಎಷ್ಟು ನಿರಾಳವಾಗಿದೆ ಅಲ್ಲವೇ ಎನ್ನುವ ಮೂಲಕ ಟ್ರಂಪ್ ಅವರ ಅಸ್ಥಿರ ನೀತಿಗಳ ವಿರುದ್ಧ ಮ್ಯಾಕ್ರನ್ ವ್ಯಂಗ್ಯವಾಡಿದ್ದಾರೆ.

ಮುಂದುವರೆದು ಮಾತನಾಡಿರುವ ಮ್ಯಾಕ್ರನ್​, ಭೂಪಟದಲ್ಲಿ ಬಣ್ಣಗಳನ್ನು ಬದಲಿಸುವುದರಿಂದ ಅಥವಾ ಸುಂಕದ ಬೆದರಿಕೆ ಹಾಕುವುದರಿಂದ ಸಾರ್ವಭೌಮ ರಾಷ್ಟ್ರಗಳ ಗಡಿಗಳು ಬದಲಾಗುವುದಿಲ್ಲ. ಗ್ರೀನ್‌ಲ್ಯಾಂಡ್ ಅಥವಾ ಯುರೋಪಿನ ಯಾವುದೇ ಭಾಗವು ಮಾರಾಟಕ್ಕಿರುವ ಸರಕುಗಳಲ್ಲ. ನಾವು ನಮ್ಮ ಮಿತ್ರ ರಾಷ್ಟ್ರಗಳ ಪ್ರಾದೇಶಿಕ ಸಮಗ್ರತೆಯನ್ನು ಗೌರವಿಸುತ್ತೇವೆ ಮತ್ತು ಉಳಿದವರಿಂದಲೂ ಅದೇ ಗೌರವವನ್ನು ನಿರೀಕ್ಷಿಸುತ್ತೇವೆ ಎಂದು ಪರೋಕ್ಷವಾಗಿ ಟ್ರಂಪ್​ ವಿರುದ್ಧ ಗುಡುಗಿದ್ದಾರೆ.

ಫ್ರಾನ್ಸ್‌ನ ಉತ್ಪನ್ನಗಳ ಮೇಲೆ, ನಮ್ಮ ವೈನ್ ಅಥವಾ ತಂತ್ರಜ್ಞಾನದ ಮೇಲೆ ಸುಂಕ ಹೇರುತ್ತೇವೆ ಎಂದು ಅಮೆರಿಕ ಬೆದರಿಕೆ ಹಾಕುತ್ತಿದೆ. ಆದರೆ ನೆನಪಿರಲಿ, ವ್ಯಾಪಾರ ಎಂಬುದು ದ್ವಿಮುಖ ರಸ್ತೆಯಾಗಿದೆ. ಒಂದು ಕಡೆಯಿಂದ ಏಕಪಕ್ಷೀಯವಾಗಿ ಸುಂಕ ಹೇರಿದರೆ, ಯುರೋಪ್ ಸುಮ್ಮನೆ ಕುಳಿತುಕೊಳ್ಳುವುದಿಲ್ಲ. ನಮ್ಮ ಆರ್ಥಿಕ ಹಿತಾಸಕ್ತಿಗಳನ್ನು ರಕ್ಷಿಸಲು ನಾವು ಒಗ್ಗಟ್ಟಿನಿಂದ ತಕ್ಕ ಪ್ರತಿಕ್ರಿಯೆ ನೀಡಲಿದ್ದೇವೆ ಎಂದು ಟ್ರಂಪ್​ ವಿರುದ್ಧ ಕಿಡಿಕಾರಿದ್ದಾರೆ.

ಯುರೋಪ್ ಇಂದು ಯಾರದ್ದೋ ಅಧೀನದಲ್ಲಿರುವ ಶಕ್ತಿಯಲ್ಲ. ನಾವು ಸ್ವತಂತ್ರರು. ನಮ್ಮ ವಿದೇಶಾಂಗ ನೀತಿಯನ್ನು ಬೇರೆ ದೇಶಗಳ ಸುಂಕದ ಬೆದರಿಕೆಗಳು ನಿರ್ಧರಿಸಲು ನಾವು ಬಿಡುವುದಿಲ್ಲ. ನಾವು ಮಾತುಕತೆಗೆ ಸದಾ ಸಿದ್ಧವಾಗಿದ್ದೇವೆ. ಆದರೆ ಅದು ಸಮಾನತೆಯ ಆಧಾರದ ಮೇಲೆ ಇರಬೇಕೇ ಹೊರತು ಬೆದರಿಕೆಯ ನೆರಳಿನಲ್ಲಲ್ಲ ಎಂದು ಮ್ಯಾಕ್ರನ್​ ತಿಳಿಸಿದ್ದಾರೆ.

ಡೊನಾಲ್ಡ್ ಟ್ರಂಪ್ ಅವರು ಗ್ರೀನ್‌ಲ್ಯಾಂಡ್ ಅನ್ನು ಅಮೆರಿಕದ ಭಾಗವಾಗಿ ತೋರಿಸುವ ಭೂಪಟವನ್ನು ಹಂಚಿಕೊಂಡ ನಂತರ ಯುರೋಪಿಯನ್ ರಾಷ್ಟ್ರಗಳು ಕೆರಳಿದ್ದವು. ಅಲ್ಲದೆ, ಗ್ರೀನ್‌ಲ್ಯಾಂಡ್ ವಿಚಾರದಲ್ಲಿ ಅಮೆರಿಕದ ನಿಲುವನ್ನು ವಿರೋಧಿಸುತ್ತಿರುವ ಫ್ರಾನ್ಸ್ ಉತ್ಪನ್ನಗಳ ಮೇಲೆ ಭಾರಿ ಆಮದು ಸುಂಕ ಹೇರುವುದಾಗಿ ಟ್ರಂಪ್ ಎಚ್ಚರಿಕೆ ನೀಡಿದ್ದರು.

ಯುರೋಪಿನ ಸಾರ್ವಭೌಮತ್ವದ ಮೇಲೆ ಅಮೆರಿಕ ಹಸ್ತಕ್ಷೇಪ ಮಾಡುತ್ತಿದೆ ಎಂಬುದು ಫ್ರಾನ್ಸ್ ವಾದವಾಗಿದೆ. ಮ್ಯಾಕ್ರನ್ ಅವರು ಯುರೋಪಿಯನ್ ಒಕ್ಕೂಟದ ಪರವಾಗಿ ಟ್ರಂಪ್ ನೀತಿಗಳ ವಿರುದ್ಧ ಧ್ವನಿ ಎತ್ತುತ್ತಿದ್ದಾರೆ.

ಮ್ಯಾಕ್ರನ್ ಅವರ ಈ ಹಾಸ್ಯಮಯ ಹೇಳಿಕೆಯು ಕೇವಲ ತಮಾಷೆಯಲ್ಲ, ಬದಲಿಗೆ ಅಮೆರಿಕದ ದಬ್ಬಾಳಿಕೆಗೆ ನಾವು ಬಗ್ಗುವುದಿಲ್ಲ ಎಂಬ ಸಂದೇಶವನ್ನು ರವಾನಿಸಿದೆ. ಟ್ರಂಪ್ ಅವರ ಸುಂಕದ ಬೆದರಿಕೆಯು ಕೇವಲ ಆರ್ಥಿಕವಲ್ಲ, ಬದಲಿಗೆ ರಾಜಕೀಯ ಸೇಡು ಎಂಬುದು ಮ್ಯಾಕ್ರನ್ ಅವರ ಅಭಿಪ್ರಾಯವಾಗಿದೆ.

ಅಮೆರಿಕ ಮತ್ತು ಫ್ರಾನ್ಸ್ ನಡುವಿನ ಈ ಬಿರುಕು ನ್ಯಾಟೋ (NATO) ಮೈತ್ರಿಕೂಟದ ಮೇಲೂ ಪ್ರಭಾವ ಬೀರಬಹುದು. ಒಂದು ಕಡೆ ಟ್ರಂಪ್ ಅಮೆರಿಕಾ ಫಸ್ಟ್ ಎನ್ನುತ್ತಿದ್ದರೆ, ಮ್ಯಾಕ್ರನ್ ಸ್ವತಂತ್ರ ಯುರೋಪ್ ಪರ ಬ್ಯಾಟಿಂಗ್ ಮಾಡುತ್ತಿದ್ದಾರೆ. ಈ ಇಬ್ಬರು ಪ್ರಭಾವಿ ನಾಯಕರ ನಡುವಿನ ಶೀತಲ ಸಮರವು ಜಾಗತಿಕ ಮಾರುಕಟ್ಟೆ ಮತ್ತು ರಾಜತಾಂತ್ರಿಕ ಸಂಬಂಧಗಳಲ್ಲಿ ತಲ್ಲಣ ಸೃಷ್ಟಿಸಿದೆ,(ಏಜೆನ್ಸೀಸ್).