ಕ್ಷಮೆ ಕೇಳಿದ್ರೂ ಬಿಡದ ಕಿಮ್: ದಕ್ಷಿಣ ಕೊರಿಯಾ ಅಧ್ಯಕ್ಷರ ನಡೆಗೆ ಶ್ಲಾಘನೆ ನೀಡಿ ಮರುಕ್ಷಣವೇ ಕ್ಷಿಪಣಿ ಹಾರಿಸಿದ್ದು ಏಕೆ..? Kim Jong Un

ದಕ್ಷಿಣ ಕೊರಿಯಾದ ಜಂಟಿ ಮುಖ್ಯಸ್ಥರ (JCS) ವರದಿಯ ಪ್ರಕಾರ, ಉತ್ತರ ಕೊರಿಯಾದ ಪೂರ್ವ ಕರಾವಳಿ ನಗರವಾದ ವೊನ್ಸಾನ್‌ನಿಂದ ಬುಧವಾರ ಹಲವು ಅಲ್ಪ ವ್ಯಾಪ್ತಿಯ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಉಡಾಯಿಸಲಾಗಿದೆ. ಈ ಕ್ಷಿಪಣಿಗಳು ಸುಮಾರು 240 ಕಿಲೋಮೀಟರ್ ದೂರ ಹಾರಿ ಸಮುದ್ರದಲ್ಲಿ ಬಿದ್ದಿವೆ. ಕೇವಲ 24 ಗಂಟೆಗಳ ಅಂತರದಲ್ಲಿ ಕಿಮ್ ಸತತ ಎರಡು ಬಾರಿ ಕ್ಷಿಪಣಿ ಪರೀಕ್ಷೆ ನಡೆಸಿರುವುದು ದಕ್ಷಿಣ ಕೊರಿಯಾ ಮತ್ತು ಜಪಾನ್ ರಾಷ್ಟ್ರಗಳಲ್ಲಿ ಭೀತಿ ಮೂಡಿಸಿದೆ.

ವಿಶೇಷವೆಂದರೆ, ಮಂಗಳವಾರವೂ ಪಯೋಂಗ್ಯಾಂಗ್ ಬಳಿಯಿಂದ ಒಂದು ಕ್ಷಿಪಣಿಯನ್ನು ಉಡಾಯಿಸಲಾಗಿತ್ತು. ಆದರೆ ಅದು ಹಾರಾಟದ ಆರಂಭಿಕ ಹಂತದಲ್ಲೇ ಅಸಹಜವಾಗಿ ವರ್ತಿಸಿ ರೇಡಾರ್‌ನಿಂದ ಕಣ್ಮರೆಯಾಗಿತ್ತು. ಅದು ವಿಫಲ ಉಡಾವಣೆ ಎಂದು ಶಂಕಿಸಲಾಗಿದ್ದರೂ, ಬುಧವಾರದ ಸರಣಿ ಉಡಾವಣೆಗಳು ಉತ್ತರ ಕೊರಿಯಾದ ಹಠಮಾರಿ ಧೋರಣೆಯನ್ನು ಎತ್ತಿ ತೋರಿಸಿದೆ.

ಅಮೆರಿಕವು ಇರಾನ್ ಜೊತೆಗಿನ ಉದ್ವಿಗ್ನತೆಯನ್ನು ಕಡಿಮೆಗೊಳಿಸಲು ಕದನ ವಿರಾಮಕ್ಕೆ ಒಪ್ಪಿಕೊಂಡಿರುವ ಬೆನ್ನಲ್ಲೇ ಕಿಮ್ ಈ ಸಾಹಸಕ್ಕೆ ಕೈಹಾಕಿರುವುದು ರಾಜತಾಂತ್ರಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ. "ನಾವು ಯಾರನ್ನೂ ನಂಬುವುದಿಲ್ಲ ಮತ್ತು ನಮ್ಮ ಶಸ್ತ್ರಾಸ್ತ್ರ ಕಾರ್ಯಕ್ರಮ ನಿಲ್ಲುವುದಿಲ್ಲ" ಎಂಬ ಸಂದೇಶವನ್ನು ಅಮೆರಿಕಕ್ಕೆ ನೀಡಲು ಕಿಮ್ ಈ ಸಮಯವನ್ನು ಆರಿಸಿಕೊಂಡಿದ್ದಾರೆ ಎಂದು ವಿಶ್ಲೇಷಕರು ಭಾವಿಸಿದ್ದಾರೆ.

ದಕ್ಷಿಣ ಕೊರಿಯಾ ಸರ್ಕಾರವು ರಾಜತಾಂತ್ರಿಕ ಮಾತುಕತೆಯ ಮೂಲಕ ಶಾಂತಿ ಸ್ಥಾಪಿಸಲು ಹರಸಾಹಸ ಪಡುತ್ತಿದ್ದರೆ, ಉತ್ತರ ಕೊರಿಯಾದ ಹಿರಿಯ ಅಧಿಕಾರಿ ಜಾಂಗ್ ಕುಮ್ ಚೋಲ್ ಅದನ್ನು ತೀವ್ರವಾಗಿ ತಿರಸ್ಕರಿಸಿದ್ದಾರೆ. ದಕ್ಷಿಣ ಕೊರಿಯಾ ಎಂಬುದು ನಮ್ಮ ಪಾಲಿಗೆ ಅತ್ಯಂತ ಹಗೆತನದ ಶತ್ರು ರಾಷ್ಟ್ರ. ಸಿಯೋಲ್‌ನವರು ನಮ್ಮೊಂದಿಗೆ ಸಂಬಂಧ ಸುಧಾರಿಸುತ್ತದೆ ಎಂದು ಹಗಲುಗನಸು ಕಾಣುತ್ತಿದ್ದಾರೆ ಎಂದು ವ್ಯಂಗ್ಯವಾಡಿದ್ದಾರೆ.

ಅಚ್ಚರಿಯ ವಿಷಯವೆಂದರೆ, ದಕ್ಷಿಣ ಕೊರಿಯಾದ ಅಧ್ಯಕ್ಷ ಲೀ ಜೇ ಮ್ಯುಂಗ್ ಅವರು ಈ ಹಿಂದೆ ನಡೆದ ಡ್ರೋನ್ ನುಸುಳುವಿಕೆ ಘಟನೆಗೆ ಕ್ಷಮೆ ಯಾಚಿಸಿದ್ದನ್ನು ಕಿಮ್ ಜಾಂಗ್ ಉನ್ ಶ್ಲಾಘಿಸಿದ್ದರು. ಇದನ್ನು ಧೈರ್ಯ ಮತ್ತು ಪ್ರಾಮಾಣಿಕತೆಯ ನಡೆ ಎಂದು ಕಿಮ್ ಬಣ್ಣಿಸಿದ್ದರೂ, ಅದರ ಬೆನ್ನಲ್ಲೇ ಕ್ಷಿಪಣಿ ಉಡಾವಣೆ ಮಾಡಿರುವುದು ಅವರ ದ್ವಂದ್ವ ನೀತಿಯನ್ನು ತೋರಿಸುತ್ತದೆ.

2019 ರಲ್ಲಿ ಆಗಿನ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಕಿಮ್ ಜಾಂಗ್ ಉನ್ ನಡುವಿನ ಮಾತುಕತೆ ವಿಫಲವಾದಾಗಿನಿಂದ, ಉತ್ತರ ಕೊರಿಯಾ ತನ್ನ ಪರಮಾಣು ಶಸ್ತ್ರಾಸ್ತ್ರಗಳ ಬಲವನ್ನು ದುಪ್ಪಟ್ಟುಗೊಳಿಸಿದೆ. ಅಮೆರಿಕವು ಪರಮಾಣು ನಿಶ್ಶಸ್ತ್ರೀಕರಣ ಷರತ್ತನ್ನು ಕೈಬಿಟ್ಟರೆ ಮಾತ್ರ ನಾವು ಮಾತುಕತೆಗೆ ಬರುತ್ತೇವೆ ಎಂದು ಕಿಮ್ ಹಠ ಹಿಡಿದಿದ್ದಾರೆ.

ಒಂದೆಡೆ ಮಧ್ಯಪ್ರಾಚ್ಯದಲ್ಲಿ ತೈಲ ಪೂರೈಕೆಯ ಆತಂಕ ಸ್ವಲ್ಪ ಕಡಿಮೆಯಾಗುತ್ತಿದೆ ಎನ್ನುವಷ್ಟರಲ್ಲಿ, ಪೂರ್ವ ಏಷ್ಯಾದಲ್ಲಿ ಕ್ಷಿಪಣಿಗಳ ಆರ್ಭಟ ಶುರುವಾಗಿರುವುದು ಜಾಗತಿಕ ಷೇರು ಮಾರುಕಟ್ಟೆಯ ಮೇಲೂ ಪ್ರಭಾವ ಬೀರಬಹುದು. ದಕ್ಷಿಣ ಕೊರಿಯಾ ಮತ್ತು ಅಮೆರಿಕದ ಗುಪ್ತಚರ ಸಂಸ್ಥೆಗಳು ಈಗ ಈ ಕ್ಷಿಪಣಿಗಳ ತಾಂತ್ರಿಕ ದತ್ತಾಂಶಗಳನ್ನು ವಿಶ್ಲೇಷಿಸುತ್ತಿದ್ದು, ಯಾವುದೇ ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಸಜ್ಜಾಗಿವೆ.

ಇರಾನ್-ಅಮೆರಿಕ ಕದನ ವಿರಾಮವು ಜಗತ್ತಿಗೆ ಒಂದು ಸಣ್ಣ ಸಮಾಧಾನ ತಂದಿದ್ದರೆ, ಕಿಮ್ ಜಾಂಗ್ ಉನ್ ಅವರ ಕ್ಷಿಪಣಿ ದಾಹವು ಜಗತ್ತನ್ನು ಮತ್ತೆ ಯುದ್ಧದ ಅಂಚಿಗೆ ತಳ್ಳುತ್ತಿದೆ. ಶಾಂತಿ ಮತ್ತು ಸಂಘರ್ಷದ ನಡುವಿನ ಈ ಹಗ್ಗಜಗ್ಗಾಟದಲ್ಲಿ ಮುಂದಿನ ದಿನಗಳು ಅತ್ಯಂತ ನಿರ್ಣಾಯಕವಾಗಿವೆ,(ಏಜೆನ್ಸೀಸ್).