ಜಗತ್ತಿಗೆ ನಡುಕ ಹುಟ್ಟಿಸಿದ ಕಿಮ್: ಜಪಾನ್ ಸಮುದ್ರದತ್ತ ಉತ್ತರ ಕೊರಿಯಾದಿಂದ ಬ್ಯಾಲಿಸ್ಟಿಕ್ ಕ್ಷಿಪಣಿ ಉಡಾವಣೆ | North Korea

ಜಪಾನ್ ಕೋಸ್ಟ್ ಗಾರ್ಡ್ ಮಾಹಿತಿ ನೀಡಿರುವಂತೆ, ಪತ್ತೆಯಾದ ಎರಡೂ ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ಈಗಾಗಲೇ ಸಮುದ್ರದಲ್ಲಿ ಪತನಗೊಂಡಿವೆ. ಜಪಾನಿನ ಸುದ್ದಿ ಸಂಸ್ಥೆ ಜಿಜಿ ಪ್ರೆಸ್ ಪ್ರಕಾರ, ಈ ಕ್ಷಿಪಣಿಗಳು ಜಪಾನ್‌ನ ವಿಶೇಷ ಆರ್ಥಿಕ ವಲಯದ (EEZ) ಹೊರಭಾಗದಲ್ಲಿ ಬಿದ್ದಿರುವುದರಿಂದ ಸದ್ಯಕ್ಕೆ ಯಾವುದೇ ದೊಡ್ಡ ಹಾನಿಯ ವರದಿಯಾಗಿಲ್ಲ. ಆದರೂ, ಕಿಮ್ ಜಾಂಗ್-ಉನ್ ನೇತೃತ್ವದ ಸರ್ಕಾರದ ಈ ಹಠಾತ್ ನಡೆ ಜಪಾನ್ ಮತ್ತು ದಕ್ಷಿಣ ಕೊರಿಯಾವನ್ನು ಕೆರಳಿಸಿದೆ.

ವಿಶೇಷವೆಂದರೆ, ಪೆಂಟಗನ್‌ನ ಉನ್ನತ ಅಧಿಕಾರಿ ಎಲ್ಬ್ರಿಡ್ಜ್ ಕಾಲ್ಬಿ ಅವರು ಸೋಲ್‌ಗೆ ಭೇಟಿ ನೀಡಿ, ದಕ್ಷಿಣ ಕೊರಿಯಾವನ್ನು ಮಾದರಿ ಮಿತ್ರರಾಷ್ಟ್ರ ಎಂದು ಶ್ಲಾಘಿಸಿದ ಮರುದಿನವೇ ಈ ದಾಳಿ ನಡೆದಿದೆ. ಅಲ್ಲದೆ, ದಕ್ಷಿಣ ಕೊರಿಯಾದ ನಾಯಕರು ಚೀನಾ ಶೃಂಗಸಭೆಗೆ ತೆರಳುವ ಮುನ್ನವೇ ಈ ಕ್ಷಿಪಣಿ ಪರೀಕ್ಷೆ ನಡೆಸಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.

ವಿಶ್ಲೇಷಕರ ಪ್ರಕಾರ, ಉತ್ತರ ಕೊರಿಯಾ ತನ್ನ ಕ್ಷಿಪಣಿಗಳ ನಿಖರತೆಯನ್ನು ಹೆಚ್ಚಿಸಲು ಮತ್ತು ಅಮೆರಿಕದ ಮೇಲೆ ಒತ್ತಡ ಹೇರಲು ಈ ಸಾಹಸ ಮಾಡುತ್ತಿದೆ.

ರಷ್ಯಾಕ್ಕೆ ರಫ್ತು: ಈ ಶಸ್ತ್ರಾಸ್ತ್ರಗಳನ್ನು ರಷ್ಯಾಕ್ಕೆ ರಫ್ತು ಮಾಡುವ ಉದ್ದೇಶವೂ ಇರಬಹುದು ಎಂದು ಶಂಕಿಸಲಾಗಿದೆ. ಅಲ್ಲದೆ, ಮುಂದಿನ ವಾರಗಳಲ್ಲಿ ಉತ್ತರ ಕೊರಿಯಾದಲ್ಲಿ ಆಡಳಿತಾರೂಢ ಪಕ್ಷದ ಐತಿಹಾಸಿಕ ಸಮ್ಮೇಳನ ನಡೆಯಲಿದ್ದು, ಅದಕ್ಕೂ ಮುನ್ನ ಕಿಮ್ ಜಾಂಗ್-ಉನ್ ತನ್ನ ಶಕ್ತಿಯನ್ನು ಪ್ರದರ್ಶಿಸುತ್ತಿದ್ದಾರೆ.

ಆಧುನೀಕರಣ: ಇತ್ತೀಚೆಗಷ್ಟೇ ಕಿಮ್ ಅವರು ದೇಶದ ಕ್ಷಿಪಣಿ ಉತ್ಪಾದನೆಯನ್ನು ವಿಸ್ತರಣೆ ಮತ್ತು ಆಧುನೀಕರಣಗೊಳಿಸಲು ಆದೇಶಿಸಿದ್ದರು.

ಜಪಾನ್ ಈ ಉಡಾವಣೆಯನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ್ದು, ಇದನ್ನು ಅಸಹನೀಯ ಕೃತ್ಯ ಎಂದು ಕರೆದಿದೆ. ಅಲ್ಲದೆ, ಜಪಾನ್ ಪ್ರಧಾನ ಮಂತ್ರಿ ಕಾರ್ಯಾಲಯವು ಕೂಡಲೇ ಮೂರು ಪ್ರಮುಖ ಸೂಚನೆಗಳನ್ನು ನೀಡಿದೆ.

ಈ ಬಗ್ಗೆ ಮಾಹಿತಿ ಸಂಗ್ರಹಣೆ ಮತ್ತು ವಿಶ್ಲೇಷಣೆಗೆ ಗರಿಷ್ಠ ಪ್ರಯತ್ನ ಮಾಡುವುದು. ವಿಮಾನಗಳು ಮತ್ತು ಹಡಗುಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳುವುದು. ಯಾವುದೇ ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಸನ್ನದ್ಧವಾಗಿರುವುದು.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಜಪಾನ್ ರಕ್ಷಣಾ ಸಚಿವ ಶಿಂಜಿರೊ ಕೊಯಿಜುಮಿ, ಉತ್ತರ ಕೊರಿಯಾದ ಈ ಕ್ರಮಗಳು ಜಪಾನ್ ಮತ್ತು ಅಂತಾರಾಷ್ಟ್ರೀಯ ಸಮುದಾಯದ ಶಾಂತಿ ಹಾಗೂ ಭದ್ರತೆಗೆ ದೊಡ್ಡ ಬೆದರಿಕೆಯಾಗಿದೆ. ಇದು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ನಿರ್ಣಯಗಳ ನೇರ ಉಲ್ಲಂಘನೆ ಎಂದು ಖಂಡಿಸಿದ್ದಾರೆ.

ಬೀಜಿಂಗ್‌ನಲ್ಲಿರುವ ರಾಯಭಾರ ಕಚೇರಿಯ ಮೂಲಕ ಜಪಾನ್ ಉತ್ತರ ಕೊರಿಯಾಕ್ಕೆ ಅಧಿಕೃತವಾಗಿ ತನ್ನ ಬಲವಾದ ಪ್ರತಿಭಟನೆಯನ್ನು ದಾಖಲಿಸಿದೆ.

ಅಮೆರಿಕವು ತನ್ನ ಮಿತ್ರರಾಷ್ಟ್ರಗಳ ಭದ್ರತೆಗೆ ಬದ್ಧವಾಗಿರುವುದನ್ನು ಪುನರುಚ್ಚರಿಸಿದೆ.

ಅಮೆರಿಕದ ಇಂಡೋ-ಪೆಸಿಫಿಕ್ ಕಮಾಂಡ್ ಈ ಬಗ್ಗೆ ಪ್ರಕಟಣೆ ಹೊರಡಿಸಿದ್ದು, ಈ ಕ್ಷಿಪಣಿ ಉಡಾವಣೆಯು ಅಮೆರಿಕದ ಸಿಬ್ಬಂದಿಗಾಗಲಿ ಅಥವಾ ಅದರ ಭೂಪ್ರದೇಶಕ್ಕಾಗಲಿ ತಕ್ಷಣದ ಬೆದರಿಕೆಯನ್ನು ಒಡ್ಡುವುದಿಲ್ಲ. ಆದರೂ ಉತ್ತರ ಕೊರಿಯಾದ ಶಸ್ತ್ರಾಸ್ತ್ರ ಕಾರ್ಯಕ್ರಮವು ಎಷ್ಟು ಅಸ್ಥಿರತೆಯನ್ನು ಉಂಟುಮಾಡುತ್ತದೆ ಎಂಬುದನ್ನು ಇದು ಎತ್ತಿ ತೋರಿಸುತ್ತದೆ ಎಂದು ಹೇಳಿದೆ.

ಅಮೆರಿಕ, ಜಪಾನ್ ಮತ್ತು ದಕ್ಷಿಣ ಕೊರಿಯಾದ ಉನ್ನತ ಅಧಿಕಾರಿಗಳು ದೂರವಾಣಿ ಮೂಲಕ ತುರ್ತು ಸಭೆ ನಡೆಸಿ, ಉತ್ತರ ಕೊರಿಯಾದ ಮೇಲಿನ ನಿಗಾವನ್ನು ಹೆಚ್ಚಿಸಲು ಮತ್ತು ಗುಪ್ತಚರ ಮಾಹಿತಿಯನ್ನು ಹಂಚಿಕೊಳ್ಳಲು ನಿರ್ಧರಿಸಿದ್ದಾರೆ,(ಏಜೆನ್ಸೀಸ್).