James concert | ಬಾಂಗ್ಲಾದಲ್ಲಿ ಜಿಹಾದಿಗಳ ಅಟ್ಟಹಾಸ: ಖ್ಯಾತ ಗಾಯಕ ಜೇಮ್ಸ್ ಸಂಗೀತ ಕಾರ್ಯಕ್ರಮದ ಮೇಲೆ ಕಲ್ಲು ತೂರಾಟ, 25ಕ್ಕೂ ಹೆಚ್ಚು ಮಂದಿಗೆ ಗಾಯ!

ಈ ಪ್ರದರ್ಶನವು ಫರೀದ್‌ಪುರ ಜಿಲ್ಲಾ ಶಾಲೆಯ 185ನೇ ವಾರ್ಷಿಕೋತ್ಸವದ ಅದ್ಧೂರಿ ಸಮಾರೋಪವಾಗಿತ್ತು. ಅಲ್ಲದೆ, ನಗರ್ ಬೌಲ್ ಬ್ಯಾಂಡ್‌ನ ಮುಂಚೂಣಿಯಲ್ಲಿರುವ ಜೇಮ್ಸ್ ಅವರ ಪ್ರದರ್ಶನವು ರಾತ್ರಿ 9:30 ರ ಸುಮಾರಿಗೆ ಪ್ರಾರಂಭವಾಗಬೇಕಿತ್ತು.

ರಾತ್ರಿ 10 ಗಂಟೆಯ ಹೊತ್ತಿಗೆ, ಫರೀದ್‌ಪುರ ಜಿಲ್ಲಾಡಳಿತವು ಕಾರ್ಯಕ್ರಮವನ್ನು ತಕ್ಷಣವೇ ಸ್ಥಗಿತಗೊಳಿಸುವಂತೆ ಆದೇಶಿಸಿತು. ಅಲ್ಲದೆ, ದಾಳಿಯಲ್ಲಿ ಗಾಯಗೊಂಡಿದ್ದ ಸಂಘಟನಾ ಸಮಿತಿಯ ಸಂಚಾಲಕ ಮುಸ್ತಾಫಿಜುರ್ ರೆಹಮಾನ್ ಶಮೀಮ್, ಭದ್ರತಾ ಪರಿಸ್ಥಿತಿ ಹದಗೆಡುತ್ತಿದೆ ಎಂದು ಉಲ್ಲೇಖಿಸಿ ಕಾರ್ಯಕ್ರಮ ರದ್ದು ಮಾಡುತ್ತಿದ್ದೇವೆ ಎಂದು ಘೋಷಿಸಿದರು.

ಈ ಹಿಂಸಾತ್ಮಕ ಘಟನೆಯಲ್ಲಿ ಗಾಯಗೊಂಡ 15 ರಿಂದ 20 ವಿದ್ಯಾರ್ಥಿಗಳನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ ಎಂದು ಕಾರ್ಯಕ್ರಮದ ಮಾಧ್ಯಮ ಉಪಸಮಿತಿಯ ಮುಖ್ಯಸ್ಥ ರಾಜಿಬುಲ್ ಹಸನ್ ಖಾನ್ ದೃಢಪಡಿಸಿದ್ದಾರೆ. ನಾವು ಯಶಸ್ವಿ ಕಾರ್ಯಕ್ರಮಕ್ಕಾಗಿ ರಾತ್ರಿಯಲ್ಲ ಸಿದ್ಧತೆಗಳನ್ನು ಮಾಡಿಕೊಂಡಿದ್ದೆವು. ಇಂತಹ ಗುರಿಯಿಟ್ಟು ಆಕ್ರಮಣಕಾರಿ ದಾಳಿಯ ಹಿಂದಿನ ಉದ್ದೇಶ ನಮಗೆ ಇನ್ನೂ ಅರ್ಥವಾಗುತ್ತಿಲ್ಲ ಎಂದು ಹಸನ್ ಖಾನ್ ಹೇಳಿದ್ದಾರೆ.

ಈ ಘಟನೆಯು ಬಾಂಗ್ಲಾದೇಶದಲ್ಲಿ ಸಾಂಸ್ಕೃತಿಕ ಅಭಿವ್ಯಕ್ತಿಯ ಸುರಕ್ಷತೆಯ ಬಗ್ಗೆ ಅಂತರಾಷ್ಟ್ರೀಯ ಕಳವಳವನ್ನು ಹುಟ್ಟುಹಾಕಿದೆ. ಛಾಯನೌತ್ ಮತ್ತು ಉಡಿಚಿಯಂತಹ ಪ್ರಮುಖ ಸಾಂಸ್ಕೃತಿಕ ಸಂಸ್ಥೆಗಳ ಮೇಲಿನ ದಾಳಿಯ ಇತ್ತೀಚಿನ ವರದಿಗಳ ನಂತರ ಇದು ಸಂಭವಿಸಿದೆ. ಅಲ್ಲದೆ, ಲೇಖಕಿ ತಸ್ಲಿಮಾ ನಸ್ರೀನ್ ಸೇರಿದಂತೆ ಪ್ರಮುಖ ವ್ಯಕ್ತಿಗಳು ಈ ಹಿಂಸಾಚಾರವನ್ನು ಸಂಗೀತ ಮತ್ತು ಜಾತ್ಯತೀತ ಕಲಾ ಪ್ರಕಾರಗಳ ವಿರುದ್ಧ ಮೂಲಭೂತವಾದಿಗಳಿಂದ ಗುರಿಯಾಗಿಸಿಕೊಂಡು ದಾಳಿ ಮಾಡುತ್ತಿದ್ದಾರೆ ಎಮದು ಖಂಡಿಸಿದ್ದಾರೆ.

ವಾರ್ಷಿಕೋತ್ಸವ ಆಚರಣೆಗಳು ಗುರುವಾರ ಬೆಳಿಗ್ಗೆ ಪ್ರಾರಂಭವಾದವು ಮತ್ತು ಶುಕ್ರವಾರ ರಾತ್ರಿ ರಾಫೆಲ್ ಡ್ರಾ, ಸಾಂಸ್ಕೃತಿಕ ಕಾರ್ಯಕ್ರಮಗಳು ಮತ್ತು ಜೇಮ್ಸ್ ಅವರ ಮುಖ್ಯ ಪ್ರದರ್ಶನದೊಂದಿಗೆ ಮುಕ್ತಾಯಗೊಳ್ಳಬೇಕಿತ್ತು.

ಬ್ರಿಟಿಷ್ ಆಳ್ವಿಕೆಯಲ್ಲಿ 1840 ರಲ್ಲಿ ಸ್ಥಾಪನೆಯಾದ ಫರೀದ್‌ಪುರ ಜಿಲ್ಲಾ ಶಾಲೆಯು ಬಾಂಗ್ಲಾದೇಶದ ಅತ್ಯಂತ ಹಳೆಯ ಸರ್ಕಾರಿ ಶಾಲೆಗಳಲ್ಲಿ ಒಂದಾಗಿದೆ. ಈ ಪ್ರದೇಶದ ಶೈಕ್ಷಣಿಕ, ಸಾಂಸ್ಕೃತಿಕ ಮತ್ತು ಸಾಮಾಜಿಕ ಜೀವನದಲ್ಲಿ ಪ್ರಮುಖ ಪಾತ್ರ ವಹಿಸಿದೆ,(ಏಜೆನ್ಸೀಸ್).