ಮೌನ ಮುರಿಯುವ ಸಮಯ ಬಂದಿದೆ! ಪಾಕ್​ ಸಂಧಾನ ಸೋತರೆ ಭಾರತ ಮಾಡುವುದೇನು? ಶಶಿ ತರೂರ್ ನೀಡಿದ ಮಾಸ್ಟರ್ ಪ್ಲಾನ್ ಇಲ್ಲಿದೆ! Shashi Tharoor

ಪಾಕಿಸ್ತಾನವು ಸದ್ಯ ಮಧ್ಯಸ್ಥಿಕೆ ವಹಿಸುತ್ತಿರುವುದು ಭಾರತಕ್ಕೆ ಹಿನ್ನಡೆಯೇನಲ್ಲ, ಆದರೆ ಆ ಪ್ರಯತ್ನ ವಿಫಲವಾದರೆ ಭಾರತವು ತಕ್ಷಣವೇ ತನ್ನ ಪ್ರಭಾವ ಬಳಸಿ ಶಾಂತಿ ಸ್ಥಾಪನೆಗೆ ಮುಂದಾಗಬೇಕು ಎಂದು ಕಾಂಗ್ರೆಸ್​ ಸಂಸದ ಒತ್ತಿ ಹೇಳಿದ್ದಾರೆ.

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಜನರಲ್ ಅಸಿಮ್ ಮುನೀರ್ ನಡುವಿನ ವೈಯಕ್ತಿಕ ಸ್ನೇಹವು ಪಾಕಿಸ್ತಾನಕ್ಕೆ ಈ ಸಂಧಾನಕಾರನ ಪಾತ್ರ ಸಿಗಲು ಕಾರಣವಾಗಿರಬಹುದು ಎಂದು ತರೂರ್ ವಿಶ್ಲೇಷಿಸಿದ್ದಾರೆ. ಪಾಕಿಸ್ತಾನ ಮಧ್ಯಸ್ಥಿಕೆ ವಹಿಸುತ್ತಿರುವುದನ್ನು ಕಂಡು ಭಾರತ ಗಾಬರಿಪಡುವ ಅಥವಾ ಇದನ್ನು ಹಿನ್ನಡೆ ಎಂದು ಭಾವಿಸುವ ಅಗತ್ಯವಿಲ್ಲ. ಇದರಲ್ಲಿ ನಮಗೆ ಯಾವುದೇ ತೊಂದರೆ ಇಲ್ಲ ಎಂದು ತರೂರ್​ ಸ್ಪಷ್ಟಪಡಿಸಿದ್ದಾರೆ.

ಭಾರತವು ಸದ್ಯ ಅನುಸರಿಸುತ್ತಿರುವ ಮೌನದ ನೀತಿಯನ್ನು ತರೂರ್ ಟೀಕಿಸಿಲ್ಲವಾದರೂ, ಬದಲಾಗುತ್ತಿರುವ ಜಾಗತಿಕ ರಾಜಕೀಯ ಪರಿಸ್ಥಿತಿಯಲ್ಲಿ ನಿಷ್ಕ್ರಿಯವಾಗಿರುವುದು ಅಪಾಯಕಾರಿ ಎಂದು ಹೇಳಿದ್ದಾರೆ.

ತಟಸ್ಥತೆಯೆಂದರೆ ಶರಣಾಗತಿಯಲ್ಲ: ಭಾರತದ ಕಾರ್ಯತಂತ್ರದ ಮೌನವು ನೈತಿಕ ಶರಣಾಗತಿಯಲ್ಲ. ಆದರೆ, ಅಂತಾರಾಷ್ಟ್ರೀಯ ಬಿಕ್ಕಟ್ಟು ತಾರಕಕ್ಕೇರಿದಾಗ ನಾವು ಕೇವಲ ಪ್ರೇಕ್ಷಕರಾಗಿ ಉಳಿಯಲು ಸಾಧ್ಯವಿಲ್ಲ ಎಂದು ತರೂರ್ ಅಭಿಪ್ರಾಯಪಟ್ಟಿದ್ದಾರೆ.

ಒಂದು ವೇಳೆ ಪಾಕ್ ಸೋತರೆ: ಪಾಕಿಸ್ತಾನದ ಶಾಂತಿ ಮಾತುಕತೆಗಳು ಹಾದಿ ತಪ್ಪಿದರೆ ಅಥವಾ ವಿಫಲವಾದರೆ, ಭಾರತವು ತನ್ನದೇ ಆದ ಮಾರ್ಗಗಳ ಮೂಲಕ ಏನು ಮಾಡಬಹುದು ಎಂದು ಆಲೋಚಿಸಬೇಕು. ನೇರವಾಗಿ ಮಾತುಕತೆಯ ಮೇಜಿನ ಮೇಲೆ ಕುಳಿತುಕೊಳ್ಳದಿದ್ದರೂ, ರಾಜತಾಂತ್ರಿಕವಾಗಿ ಪ್ರಭಾವ ಬೀರಲು ಭಾರತ ಸಿದ್ಧವಾಗಿರಬೇಕು ಎಂಬುದು ಶಶಿ ತರೂರ್​ ವಾದವಾಗಿದೆ.

ಈ ಯುದ್ಧವು ಮುಂದುವರಿದರೆ ಅದು ಭಾರತದ ಇಂಧನ ಭದ್ರತೆ ಮತ್ತು ಆರ್ಥಿಕತೆಯ ಮೇಲೆ ಗಂಭೀರ ಪರಿಣಾಮ ಬೀರಲಿದೆ ಎಂದು ತರೂರ್ ಕಳವಳ ವ್ಯಕ್ತಪಡಿಸಿದ್ದಾರೆ.

ತೈಲ ಬೆಲೆ ಏರಿಕೆ: ಯುದ್ಧದಿಂದಾಗಿ ಭಾರತ ಮತ್ತು ಗ್ಲೋಬಲ್ ಸೌತ್ ರಾಷ್ಟ್ರಗಳು ಭಾರಿ ಬೆಲೆ ತೆರುತ್ತಿವೆ. ಇಂಧನ ಬೆಲೆ ಏರಿಕೆಯು ಸಾಮಾನ್ಯ ಜನರ ಬದುಕನ್ನು ಹಸಗೆಡಿಸಲಿದೆ.

ವಲಸಿಗರ ಸುರಕ್ಷತೆ: ಮಧ್ಯಪ್ರಾಚ್ಯದಲ್ಲಿರುವ ಲಕ್ಷಾಂತರ ಭಾರತೀಯರ ಸುರಕ್ಷತೆ ಮತ್ತು ಅವರ ಹಿತಾಸಕ್ತಿಗಳು ಈಗ ಅಪಾಯದಲ್ಲಿವೆ.

ಭಾರತ-ಅಮೆರಿಕ ಸಂಬಂಧ: ಈ ಸಂಘರ್ಷದ ನಡುವೆಯೂ ಅಮೆರಿಕದೊಂದಿಗೆ ಭಾರತ ಹೊಂದಿರುವ ಗಾಢವಾದ ಸಂಬಂಧಕ್ಕೆ ಯಾವುದೇ ಧಕ್ಕೆ ಬರದಂತೆ ನೋಡಿಕೊಳ್ಳುವುದು ನವದೆಹಲಿಯ ಆದ್ಯತೆಯಾಗಬೇಕು ಎಂದು ತರೂರ್​ ತಿಳಿಸಿದ್ದಾರೆ.

ವಿದೇಶಾಂಗ ನೀತಿಯಲ್ಲಿ ಭಾರತ ಹಿಂದೆ ಮಾಡಿದ ನಿರ್ಧಾರಗಳನ್ನು ಪುನರ್ ಪರಿಶೀಲಿಸಬೇಕು ಎಂದು ತರೂರ್ ಸಲಹೆ ನೀಡಿದ್ದಾರೆ. ನಾವು ಯಾವುದನ್ನಾದರೂ ವಿಭಿನ್ನವಾಗಿ ಮಾಡಬಹುದಿತ್ತೇ ಅಥವಾ ಸಂಘರ್ಷವನ್ನು ತಡೆಯುವಲ್ಲಿ ನಮಗೆ ಹೆಚ್ಚಿನ ಪಾತ್ರವಿತ್ತೇ ಎಂಬ ಬಗ್ಗೆ ಆಂತರಿಕ ಚರ್ಚೆ ನಡೆಯಬೇಕು ತರೂರ್ ಹೇಳಿದ್ದಾರೆ.

ಒಟ್ಟಾರೆಯಾಗಿ, ಜಾಗತಿಕವಾಗಿ ಭಾರತವು ತನ್ನ ಪ್ರಭಾವವನ್ನು ಬಳಸಿಕೊಳ್ಳಲು ಇದು ಸಕಾಲವಾಗಿದ್ದು, ಹಾರ್ಮುಜ್ ಜಲಸಂಧಿ ಅಥವಾ ಲೆಬನಾನ್ ಸಂಘರ್ಷದಂತಹ ವಿಚಾರಗಳಲ್ಲಿ ಭಾರತದ ಧ್ವನಿ ಪ್ರಬಲವಾಗಿ ಕೇಳಿಬರಬೇಕು ಎಂಬುದು ಶಶಿ ತರೂರ್ ಅವರ ಆಶಯವಾಗಿದೆ,(ಏಜೆನ್ಸೀಸ್).