ಶತ್ರು ರಾಷ್ಟ್ರದ ತಂತ್ರಕ್ಕೆ ಇಸ್ರೇಲ್ ಪ್ಲ್ಯಾನ್ ಉಲ್ಟಾ! ಅತ್ಯಾಧುನಿಕ ಕ್ಷಿಪಣಿಗಳನ್ನು ಬಚ್ಚಿಡುತ್ತಿರುವುದೇಕೆ ನೆತನ್ಯಾಹು ಪಡೆ? Interceptors

ವಾಲ್ ಸ್ಟ್ರೀಟ್ ಜರ್ನಲ್ ವರದಿಯ ಪ್ರಕಾರ, ಇಸ್ರೇಲ್ ತನ್ನ ಬಳಿ ಇರುವ ಅತ್ಯಂತ ದುಬಾರಿ ಮತ್ತು ಶಕ್ತಿಯುತ ಆರೋ ಸರಣಿಯ ಕ್ಷಿಪಣಿ ನಿರೋಧಕಗಳನ್ನು ಕೇವಲ ಅತ್ಯಂತ ಅಪಾಯಕಾರಿ ಗುರಿಗಳಿಗಾಗಿ ಮಾತ್ರ ಕಾಯ್ದಿರಿಸುತ್ತಿದೆ. ಇರಾನ್ ಉಡಾಯಿಸುತ್ತಿರುವ ದೀರ್ಘ ವ್ಯಾಪ್ತಿಯ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಆಕಾಶದಲ್ಲಿಯೇ ಹೊಡೆದುರುಳಿಸುವ ಸಾಮರ್ಥ್ಯವಿರುವ ಈ ಕ್ಷಿಪಣಿಗಳ ದಾಸ್ತಾನು ಕಡಿಮೆಯಾಗುತ್ತಿರುವುದು ಇಸ್ರೇಲ್ ರಕ್ಷಣಾ ಇಲಾಖೆಯ ಆತಂಕಕ್ಕೆ ಕಾರಣವಾಗಿದೆ.

ಉನ್ನತ ಮಟ್ಟದ ಶಸ್ತ್ರಾಸ್ತ್ರಗಳನ್ನು ಉಳಿಸಿಕೊಳ್ಳಲು ಇಸ್ರೇಲ್ ಈಗ ತನ್ನ ಕೆಳಹಂತದ ರಕ್ಷಣಾ ವ್ಯವಸ್ಥೆಗಳಾದ ಡೇವಿಡ್ಸ್ ಸ್ಲಿಂಗ್ ಮತ್ತು 'ಐರನ್ ಡೋಮ್' ಅನ್ನು ಮೇಲ್ದರ್ಜೆಗೇರಿಸಿ ಬಳಸುತ್ತಿದೆ.

ಐರನ್ ಡೋಮ್: ಸಾಮಾನ್ಯವಾಗಿ ಅಲ್ಪ ವ್ಯಾಪ್ತಿಯ ರಾಕೆಟ್‌ಗಳನ್ನು ತಡೆಯಲು ಬಳಸಲಾಗುತ್ತದೆ.

ಡೇವಿಡ್ಸ್ ಸ್ಲಿಂಗ್: ಮಧ್ಯಮ ವ್ಯಾಪ್ತಿಯ ಕ್ಷಿಪಣಿಗಳಿಗೆ ಸೀಮಿತವಾಗಿತ್ತು. ಆದರೆ ಈಗ ಇವುಗಳನ್ನೇ ದೀರ್ಘ ವ್ಯಾಪ್ತಿಯ ಮತ್ತು ಸಂಕೀರ್ಣ ಕ್ಷಿಪಣಿಗಳನ್ನು ಎದುರಿಸಲು ಬಳಸಲಾಗುತ್ತಿದೆ. ತಂತ್ರಾಂಶ ಬದಲಾವಣೆಗಳ ಮೂಲಕ ಇವುಗಳ ವ್ಯಾಪ್ತಿ ಹೆಚ್ಚಿಸಲಾಗಿದ್ದರೂ, ಅತ್ಯಾಧುನಿಕ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ತಡೆಯುವಲ್ಲಿ ಇವುಗಳ ಯಶಸ್ಸಿನ ಪ್ರಮಾಣ ಮಿಶ್ರವಾಗಿದೆ.

ಇತ್ತೀಚಿನ ದಿನಗಳಲ್ಲಿ ಇಸ್ರೇಲ್‌ನ ದಕ್ಷಿಣ ಭಾಗದ ನಗರಗಳಾದ ಡಿಮೋನಾ ಮತ್ತು ಅರಾದ್ ಮೇಲೆ ಇರಾನ್‌ನ ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ಪತನಗೊಂಡಿವೆ. ಇದು ಇಸ್ರೇಲ್‌ನ ಬಹುಪದರದ ರಕ್ಷಣಾ ವ್ಯವಸ್ಥೆಯಲ್ಲೂ ಸಣ್ಣ ಬಿರುಕುಗಳು ಮೂಡುತ್ತಿವೆ ಎಂಬುದಕ್ಕೆ ಸಾಕ್ಷಿಯಾಗಿದೆ.

ಮಿಸೈಲ್ ಡಿಫೆನ್ಸ್ ಅಡ್ವೊಕಸಿ ಅಲಯನ್ಸ್‌ನ ಹಿರಿಯ ವಿಶ್ಲೇಷಕ ಟಾಲ್ ಇನ್ಬಾರ್ ಅವರ ಪ್ರಕಾರ, ಯಾವುದೇ ರಕ್ಷಣಾ ವ್ಯವಸ್ಥೆಯ ಬಳಿ ಇರುವ ನಿರೋಧಕ ಕ್ಷಿಪಣಿಗಳ ಸಂಖ್ಯೆ ಸೀಮಿತವಾಗಿರುತ್ತದೆ. ಯುದ್ಧ ದೀರ್ಘಕಾಲ ನಡೆದಂತೆ ದಾಸ್ತಾನು ಖಾಲಿಯಾಗುತ್ತಾ ಹೋಗುತ್ತದೆ. ಆಗ ಪ್ರತಿ ದಾಳಿಯನ್ನೂ ಎದುರಿಸಬೇಕೇ ಅಥವಾ ಜನವಸತಿ ಇಲ್ಲದ ಕಡೆ ಬೀಳುವ ಕ್ಷಿಪಣಿಗಳನ್ನು ಹಾಗೆಯೇ ಬಿಡಬೇಕೇ ಎಂಬ ಕಠಿಣ ನಿರ್ಧಾರ ತೆಗೆದುಕೊಳ್ಳಬೇಕಾಗುತ್ತದೆ.

ವರದಿಗಳ ಪ್ರಕಾರ, ಇರಾನ್ ಇದುವರೆಗೆ 400ಕ್ಕೂ ಹೆಚ್ಚು ಕ್ಷಿಪಣಿಗಳು ಮತ್ತು ನೂರಾರು ಡ್ರೋನ್‌ಗಳನ್ನು ಉಡಾಯಿಸಿದೆ. ಇದರ ಜೊತೆಗೆ ಲೆಬನಾನ್‌ನ ಹಿಜ್ಬುಲ್ಲಾ ಸಂಘಟನೆಯೂ ಪ್ರತಿದಿನ ನೂರಾರು ರಾಕೆಟ್‌ಗಳನ್ನು ಉಡಾಯಿಸುತ್ತಿರುವುದು ಇಸ್ರೇಲ್ ಮೇಲೆ ಒತ್ತಡ ಹೆಚ್ಚಿಸಿದೆ.

ಇದು ಕೇವಲ ಇಸ್ರೇಲ್ ಸಮಸ್ಯೆಯಲ್ಲ, ಬದಲಿಗೆ ಇಡೀ ವಿಶ್ವವೇ ಕ್ಷಿಪಣಿ ನಿರೋಧಕಗಳ ಕೊರತೆಯನ್ನು ಎದುರಿಸುತ್ತಿದೆ. ಯುಎಸ್ಎ ತನ್ನ ಥಾಡ್​ನಂತಹ ವ್ಯವಸ್ಥೆಗಳನ್ನು ನಿಯೋಜಿಸಿದ್ದರೂ, ಇವುಗಳ ಉತ್ಪಾದನಾ ವೇಗವು ಬಳಕೆಯ ವೇಗಕ್ಕೆ ಹೋಲಿಸಿದರೆ ತೀರಾ ಕಡಿಮೆ ಇದೆ. ಸಿಎಸ್ಐಎಸ್ ರಕ್ಷಣಾ ವಿಭಾಗದ ನಿರ್ದೇಶಕ ಟಾಮ್ ಕರಾಕೊ ಹೇಳುವಂತೆ, ಹಲವು ವರ್ಷಗಳ ಪರಿಶ್ರಮದ ಉತ್ಪಾದನೆಯನ್ನು ನಾವು ಕೇವಲ ಕೆಲವೇ ವಾರಗಳಲ್ಲಿ ಖಾಲಿ ಮಾಡುತ್ತಿದ್ದೇವೆ. ಇದನ್ನು ಭರ್ತಿ ಮಾಡಲು ಮತ್ತೆ ಹಲವು ವರ್ಷಗಳೇ ಬೇಕಾಗಬಹುದು.

ಲಕ್ಷಾಂತರ ರೂಪಾಯಿ ಮೌಲ್ಯದ ಸಾಮಾನ್ಯ ಡ್ರೋನ್ ಅಥವಾ ಕ್ಷಿಪಣಿಯನ್ನು ಹೊಡೆದುರುಳಿಸಲು ಕೋಟ್ಯಂತರ ರೂಪಾಯಿ ಬೆಲೆಯ ಇಂಟರ್ಸೆಪ್ಟರ್ ಬಳಸುವ ಈಗಿನ ಏರ್ ಡಿಫೆನ್ಸ್ ಮಾದರಿಯು ದೀರ್ಘಕಾಲದ ಯುದ್ಧದಲ್ಲಿ ಆರ್ಥಿಕವಾಗಿ ಮತ್ತು ತಾಂತ್ರಿಕವಾಗಿ ಅಸಾಧ್ಯ ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.

ಪ್ರಸ್ತುತ ಇಸ್ರೇಲ್ ಜನತೆ ಸೈರನ್ ಸದ್ದು ಕೇಳಿದ ಕೂಡಲೇ ಬಂಕರ್‌ಗಳತ್ತ ಧಾವಿಸುತ್ತಿದ್ದಾರೆ. ರಕ್ಷಣಾ ವ್ಯವಸ್ಥೆಯು ಶೇ. 100 ರಷ್ಟು ಸುರಕ್ಷತೆ ನೀಡಲು ಸಾಧ್ಯವಾಗದ ಈ ಸಂದರ್ಭದಲ್ಲಿ, ಇಸ್ರೇಲ್ ತನ್ನ ದಾಳಿಯ ತೀವ್ರತೆಯನ್ನು ಹೆಚ್ಚಿಸುವ ಮೂಲಕ ಇರಾನ್‌ನ ಉಡಾವಣಾ ಕೇಂದ್ರಗಳನ್ನೇ ನಾಶಪಡಿಸಲು ಮುಂದಾಗುವ ಸಾಧ್ಯತೆಯಿದೆ,(ಏಜೆನ್ಸೀಸ್).