ಅಮೆರಿಕ-ಇರಾನ್ ಒಪ್ಪಂದಕ್ಕೆ ಇಸ್ರೇಲ್‌ನಲ್ಲಿ ತೀವ್ರ ಆಕ್ರೋಶ: ನೆತನ್ಯಾಹು ವಿರುದ್ಧ ಮುಗಿಬಿದ್ದ ವಿಪಕ್ಷಗಳು; ಬಿಬಿ ಹೇಳಿದ್ದೇನು? Israel Rages Over US Iran Peace Deal

ಇಸ್ರೇಲ್‌ನ ಅತ್ಯಂತ ಪ್ರಸಿದ್ಧ ಹೀಬ್ರೂ ದಿನಪತ್ರಿಕೆ ಯೆಡಿಯೋತ್ ಅಹ್ರೋನೋತ್ ಭಾನುವಾರ ತನ್ನ ಮುಖಪುಟದಲ್ಲಿ ಕೇವಲ ಎರಡು ಪದಗಳಲ್ಲಿ ಬ್ಯಾಡ್ ಡೀಲ್ ಎಂದು ದೊಡ್ಡದಾಗಿ ಹೆಡ್‌ಲೈನ್ ಪ್ರಕಟಿಸಿದೆ. ಇದು ಇಡೀ ಇಸ್ರೇಲ್ ದೇಶದಲ್ಲಿ ಉದ್ಭವಿಸಿರುವ ತೀವ್ರ ಅಸಮಾಧಾನಕ್ಕೆ ಕನ್ನಡಿ ಹಿಡಿದಿದೆ.

ಕಳೆದ ಒಂದು ವರ್ಷದಲ್ಲಿ ಇರಾನ್ ವಿರುದ್ಧ ಎರಡು ಭೀಕರ ಯುದ್ಧಗಳನ್ನು ಮಾಡಿರುವ ಇಸ್ರೇಲ್, ಈಗ ಅಮೆರಿಕ ತನ್ನನ್ನು ದೂರವಿಟ್ಟು ಇರಾನ್ ಜೊತೆ ಒಪ್ಪಂದ ಮಾಡಿಕೊಂಡಿರುವುದಕ್ಕೆ ಕೆಂಡಾಮಂಡಲವಾಗಿದೆ.

ಲೈಬರ್ಮನ್ ಆಕ್ರೋಶ: ಇಸ್ರೇಲ್‌ನ ಮಾಜಿ ರಕ್ಷಣಾ ಸಚಿವ ಹಾಗೂ ಬಲಪಂಥೀಯ ನಾಯಕ ಅವಿಗ್ದೋರ್ ಲೈಬರ್ಮನ್ ಈ ಒಪ್ಪಂದವನ್ನು ಇಸ್ರೇಲ್ ಪಾಲಿನ ಮಹಾ ವಿನಾಶ ಎಂದು ಕರೆದಿದ್ದಾರೆ.

ಯಾಶಿರ್ ಲಾಪಿಡ್ ವೀಕ್ಷಣೆ: ವಿಪಕ್ಷದ ನಾಯಕ ಹಾಗೂ ಮಾಜಿ ಸಚಿವ ಯಾಯಿರ್ ಲಾಪಿಡ್ ಮಾತನಾಡಿ, ಈ ಒಪ್ಪಂದದ ವರದಿಗಳು ನಿಜವಾಗಿದ್ದರೆ, ಇದು ಇಸ್ರೇಲ್ ಇತಿಹಾಸದಲ್ಲೇ ವಿದೇಶಾಂಗ ಮತ್ತು ಭದ್ರತಾ ನೀತಿಯಲ್ಲಿ ಕಂಡ ಅತ್ಯಂತ ದೊಡ್ಡ ವೈಫಲ್ಯ ಎಂದು ನೆತನ್ಯಾಹು ಅವರ ರಾಜತಾಂತ್ರಿಕತೆಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಜಾಕೋಬ್ ನಾಗೆಲ್ ಸೇರಿದಂತೆ ಹಲವು ರಕ್ಷಣಾ ತಜ್ಞರು, ಇರಾನ್‌ನ ಅಪಾಯಕಾರಿ ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ಹಾಗೂ ಹಿಜ್ಬುಲ್ಲಾ, ಹಮಾಸ್ ಮತ್ತು ಹೌತಿಗಳಂತಹ ಉಗ್ರಗಾಮಿ ಸಂಘಟನೆಗಳಿಗೆ ಇರಾನ್ ನೀಡುತ್ತಿರುವ ಹಣಕಾಸು ನೆರವನ್ನು ತಡೆಯುವ ಯಾವುದೇ ನಿಯಮಗಳು ಈ ಒಪ್ಪಂದದಲ್ಲಿಲ್ಲ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಹೆಸರು ಹೇಳಲಿಚ್ಛಿಸದ ಇಸ್ರೇಲ್‌ನ ಉನ್ನತ ಅಧಿಕಾರಿಯೊಬ್ಬರ ಪ್ರಕಾರ, ಈ ಒಪ್ಪಂದದಿಂದ ಇಸ್ರೇಲ್‌ಗೆ ಮೂರು ಪ್ರಮುಖ ಆಪತ್ತುಗಳು ಎದುರಾಗಲಿವೆ.

ಪರಮಾಣು ನಿಯಂತ್ರಣದ ಕೊರತೆ: ಇರಾನ್ ಬಳಿ ಸದ್ಯ ಇರುವ ಪುಷ್ಟೀಕರಿಸಿದ ಯುರೇನಿಯಂ ದಾಸ್ತಾನನ್ನು ಏನು ಮಾಡಬೇಕು ಮತ್ತು ಅದರ ಪರಮಾಣು ಯೋಜನೆಯನ್ನು ಹೇಗೆ ನಿಯಂತ್ರಿಸಬೇಕು ಎಂಬ ಬಗ್ಗೆ ಸ್ಪಷ್ಟತೆಯೇ ಇಲ್ಲ.

ಇರಾನ್‌ಗೆ ಆರ್ಥಿಕ ಬಲ: ಅಮೆರಿಕ ನಿರ್ಬಂಧಗಳನ್ನು ತೆರವುಗೊಳಿಸುವುದರಿಂದ ಇರಾನ್‌ಗೆ ಕೋಟ್ಯಂತರ ಹಣ ಹರಿದುಬರಲಿದ್ದು, ಅದು ಆರ್ಥಿಕವಾಗಿ ಮತ್ತಷ್ಟು ಬಲಿಷ್ಠವಾಗಲಿದೆ.

ಉಗ್ರಗಾಮಿಗಳಿಗೆ ರಾಜಾಶ್ರಯ: ಹಿಜ್ಬುಲ್ಲಾ ಮತ್ತು ಹಮಾಸ್ ಸಂಘಟನೆಗಳಿಗೆ ಇರಾನ್ ಮಾಡುತ್ತಿರುವ ಶಸ್ತ್ರಾಸ್ತ್ರ ಸರಬರಾಜನ್ನು ತಡೆಯಲು ಯಾವುದೇ ಕಟ್ಟುನಿಟ್ಟಿನ ನಿಯಮಗಳಿಲ್ಲ. ಅಲ್ಲದೆ, ಲೆಬನಾನ್‌ನಲ್ಲಿ ಹಿಜ್ಬುಲ್ಲಾ ವಿರುದ್ಧ ಇಸ್ರೇಲ್ ನಡೆಸುತ್ತಿದ್ದ ಮಿಲಿಟರಿ ಕಾರ್ಯಾಚರಣೆಯನ್ನು ನಿಲ್ಲಿಸುವಂತೆ ಇರಾನ್ ಈ ಒಪ್ಪಂದದ ಮೂಲಕ ಅಮೆರಿಕದಿಂದ ಒತ್ತಡ ಹೇರಿದೆ.

ಇಷ್ಟೆಲ್ಲಾ ಆಕ್ರೋಶಗಳು ಭುಗಿಲೆದ್ದಿದ್ದರೂ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಸಚಿವ ಸಂಪುಟದ ಬಹುತೇಕ ನಾಯಕರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಕೋಪಕ್ಕೆ ಗುರಿಯಾಗಬಾರದು ಎಂಬ ಕಾರಣಕ್ಕೆ ಮೌನಕ್ಕೆ ಶರಣಾಗಿದ್ದಾರೆ.

ತಮ್ಮ ಮೇಲಿನ ಒತ್ತಡಕ್ಕೆ ತಣ್ಣಗಿನ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ ನೆತನ್ಯಾಹು, ನಾನು ಪ್ರಧಾನಮಂತ್ರಿಯಾಗಿ ಅಧಿಕಾರದಲ್ಲಿ ಇರುವವರೆಗೂ ಇರಾನ್ ಯಾವುದೇ ಕಾರಣಕ್ಕೂ ಪರಮಾಣು ಅಸ್ತ್ರಗಳನ್ನು ಹೊಂದಲು ನಾನು ಬಿಡುವುದಿಲ್ಲ. ಈ ವಿಷಯದಲ್ಲಿ ನಾನು ಮತ್ತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಂಪೂರ್ಣ ಒಂದೇ ನಿಲುವನ್ನು ಹೊಂದಿದ್ದೇವೆ ಎಂದು ಕೇವಲ ಪರಮಾಣು ವಿಷಯ ಪ್ರಸ್ತಾಪಿಸಿ ಜಾರಿಕೊಂಡಿದ್ದಾರೆ. ಆದರೆ ವಿಪಕ್ಷಗಳು ಕೇಳುತ್ತಿರುವ ಕ್ಷಿಪಣಿ ದಾಳಿ ಹಾಗೂ ಹಿಜ್ಬುಲ್ಲಾ ನಿಗ್ರಹದ ಕುರಿತು ನೆತನ್ಯಾಹು ಯಾವುದೇ ಮಾತನಾಡದಿರುವುದು ಸಾರ್ವಜನಿಕರಲ್ಲಿ ಅನುಮಾನ ಮೂಡಿಸಿದೆ.

ಬರುವ ಅಕ್ಟೋಬರ್ ತಿಂಗಳಲ್ಲಿ ಇಸ್ರೇಲ್‌ನಲ್ಲಿ ಸಾರ್ವತ್ರಿಕ ಚುನಾವಣೆಗಳು ನಡೆಯಲಿದ್ದು, ಟ್ರಂಪ್ ಆಡಳಿತದ ಷರತ್ತುಗಳಿಗೆ ತಲೆಬಾಗಬಾರದು ಎಂದು ನೆತನ್ಯಾಹು ಅವರ ಮೇಲೆ ಒಕ್ಕೂಟ ಸರ್ಕಾರ ಹಾಗೂ ದೇಶದ ಜನತೆಯಿಂದ ಭಾರಿ ಒತ್ತಡ ಹೆಚ್ಚುತ್ತಿದೆ,(ಏಜೆನ್ಸೀಸ್​).