Israel-Iran War: ಅಲಿ ಖಮೇನಿ ಮೃತದೇಹ ಇನ್ನೂ ಹೂಳಿಲ್ಲ! ಸುಪ್ರೀಂ ಲೀಡರ್ ಅಂತ್ಯಸಂಸ್ಕಾರಕ್ಕೆ ವಿಳಂಬ ಯಾಕೆ?

ಫೆಬ್ರವರಿ 28ರಂದು ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಯಲ್ಲಿ ಖಮೇನಿ ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದ್ದರೂ, ಇರಾನ್ ಸರ್ಕಾರ ಮಾತ್ರ ಈವರೆಗೆ ಅಧಿಕೃತ ಅಂತ್ಯಸಂಸ್ಕಾರದ ದಿನಾಂಕವನ್ನು ಘೋಷಿಸಿಲ್ಲ. ಇದು ಇರಾನ್ ಆಡಳಿತದ ಒಳಗಿರುವ ಭಯ ಮತ್ತು ದೌರ್ಬಲ್ಯವನ್ನು ಸೂಚಿಸುತ್ತಿದೆಯೇ? ಎಂಬ ಪ್ರಶ್ನೆಯನ್ನು ತಜ್ಞರು ಎತ್ತುತ್ತಿದ್ದಾರೆ.

ಸಾಮಾನ್ಯವಾಗಿ ಇಸ್ಲಾಮಿಕ್ ಸಂಪ್ರದಾಯದಂತೆ ಮರಣದ ನಂತರ ಅತಿ ಶೀಘ್ರವಾಗಿ ಅಂತ್ಯಸಂಸ್ಕಾರ ನೆರವೇರಿಸಬೇಕು. ಆದರೆ ಖಮೇನಿ ವಿಚಾರದಲ್ಲಿ ಇದು ನಡೆಯುತ್ತಿಲ್ಲ. ಇದಕ್ಕೆ ಪ್ರಮುಖ ಕಾರಣಗಳು ಇಲ್ಲಿವೆ.

ಇಸ್ರೇಲ್ ದಾಳಿಯ ಭೀತಿ: ಖಮೇನಿ ಅವರ ಅಂತ್ಯಸಂಸ್ಕಾರಕ್ಕೆ ಲಕ್ಷಾಂತರ ಜನರು ಸೇರುವ ಸಾಧ್ಯತೆಯಿದೆ. ಇಂತಹ ಬೃಹತ್ ಸಭೆಯ ಮೇಲೆ ಇಸ್ರೇಲ್ ಅಥವಾ ಅಮೆರಿಕ ಮತ್ತೆ ದಾಳಿ ನಡೆಸಬಹುದು ಎಂಬ ಆತಂಕ ಇರಾನ್ ಸೇನೆಗಿದೆ.

ಆಂತರಿಕ ಬಂಡಾಯದ ಭಯ: ಇರಾನ್‌ನಲ್ಲಿ ಸದ್ಯ ಸರ್ಕಾರದ ವಿರುದ್ಧ ಸಾರ್ವಜನಿಕ ಆಕ್ರೋಶ ಹೆಚ್ಚಿದೆ. ಅಂತ್ಯಸಂಸ್ಕಾರದ ಸಂದರ್ಭದಲ್ಲಿ ಜನಸಮೂಹವು ಸರ್ಕಾರಿ ವಿರೋಧಿ ಪ್ರತಿಭಟನೆಯಾಗಿ ಬದಲಾಗಬಹುದು ಎಂಬ ಆತಂಕ ಆಡಳಿತಾರೂಢರಿಗೆ ಇದೆ.

ಉತ್ತರಾಧಿಕಾರದ ಬಿಕ್ಕಟ್ಟು: ಖಮೇನಿ ನಂತರ ಇರಾನ್ ಅನ್ನು ಮುನ್ನಡೆಸುವವರು ಯಾರು? ಅವರ ಮಗ ಮೊಜ್ತಬಾ ಖಮೇನಿ ಅಧಿಕಾರ ವಹಿಸಿಕೊಳ್ಳುತ್ತಾರೆಯೇ ಎಂಬ ಗೊಂದಲ ಇನ್ನೂ ಬಗೆಹರಿದಿಲ್ಲ. ಉತ್ತರಾಧಿಕಾರಿ ಯಾರು ಎಂಬುದು ಅಧಿಕೃತವಾಗುವವರೆಗೆ ಅಂತ್ಯಸಂಸ್ಕಾರ ವಿಳಂಬವಾಗುತ್ತಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

1989ರಲ್ಲಿ ಇರಾನ್‌ನ ಮೊದಲ ಸರ್ವೋಚ್ಚ ನಾಯಕ ಅಯತೊಲ್ಲಾ ಖೊಮೇನಿ ನಿಧನರಾದಾಗ, ಟೆಹ್ರಾನ್‌ನ ಬೀದಿಗಳಲ್ಲಿ ಕೋಟ್ಯಂತರ ಜನರು ಜಮಾಯಿಸಿದ್ದರು. ಅದು ಇತಿಹಾಸದ ಅತಿ ದೊಡ್ಡ ಅಂತ್ಯಸಂಸ್ಕಾರಗಳಲ್ಲಿ ಒಂದಾಗಿತ್ತು. ಆದರೆ ಇಂದು ಅಲಿ ಖಮೇನಿ ವಿಚಾರದಲ್ಲಿ ಅಂತಹ ಸಾರ್ವಜನಿಕ ಬೆಂಬಲ ವ್ಯಕ್ತವಾಗದಿರುವುದು ಮತ್ತು ಸರ್ಕಾರವೇ ಜನರನ್ನು ಸೇರಿಸಲು ಹೆದರುತ್ತಿರುವುದು ಇರಾನ್ ಆಡಳಿತದ ಇಂದಿನ ಸ್ಥಿತಿಗೆ ಕನ್ನಡಿ ಹಿಡಿದಿದೆ.

"ಸರಳವಾಗಿ ಹೇಳುವುದಾದರೆ, ಇರಾನ್ ಸರ್ಕಾರ ಈಗ ಅತ್ಯಂತ ದುರ್ಬಲವಾಗಿದೆ. ದೊಡ್ಡ ಮಟ್ಟದ ಸಾರ್ವಜನಿಕ ಕಾರ್ಯಕ್ರಮ ನಡೆಸಿ ಸವಾಲು ಎದುರಿಸುವ ಧೈರ್ಯ ಅದಕ್ಕಿಲ್ಲ" ಎಂದು ರಕ್ಷಣಾ ತಜ್ಞ ಬೆಹನಮ್ ತಾಲೆಬ್ಲು ಅಭಿಪ್ರಾಯಪಟ್ಟಿದ್ದಾರೆ.

ಕೆಲವು ವರದಿಗಳ ಪ್ರಕಾರ, ಇರಾನ್ ಸರ್ಕಾರವು ಖಮೇನಿ ಅವರ ಹುಟ್ಟೂರಾದ 'ಮಶ್ಹಾದ್'ನಲ್ಲಿ ಅತ್ಯಂತ ರಹಸ್ಯವಾಗಿ ಅಥವಾ ಕಟ್ಟುನಿಟ್ಟಿನ ಭದ್ರತೆಯ ನಡುವೆ ಅಂತ್ಯಸಂಸ್ಕಾರ ಮಾಡಲು ಯೋಜಿಸುತ್ತಿದೆ. ಅಲ್ಲಿನ ಇಮಾಮ್ ರೆಜಾ ದರ್ಗಾದ ಸಮೀಪ ಬಿಗಿ ಭದ್ರತೆ ಇರುವುದರಿಂದ ಈ ಸ್ಥಳವನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ ಎನ್ನಲಾಗಿದೆ.

ಇರಾನ್ ಮತ್ತು ಇಸ್ರೇಲ್ ನಡುವಿನ ಯುದ್ಧದ ಸನ್ನಿವೇಶದ ನಡುವೆ, ಈ ಘಟನೆಯು ಮಧ್ಯಪ್ರಾಚ್ಯದ ರಾಜಕೀಯ ಸಮೀಕರಣಗಳನ್ನು ಬದಲಾಯಿಸಬಹುದು. ಇರಾನ್ ತನ್ನ ನಾಯಕನನ್ನೇ ಸರಿಯಾಗಿ ಹೂಳಲು ಸಾಧ್ಯವಾಗದ ಸ್ಥಿತಿಯಲ್ಲಿದೆ ಎಂಬ ಸಂದೇಶವು ಅದರ ಮಿತ್ರ ರಾಷ್ಟ್ರಗಳಿಗೂ ನಡುಕ ಹುಟ್ಟಿಸಿದೆ,(ಏಜೆನ್ಸೀಸ್​).