Israel Election: ಇಸ್ರೇಲ್‌ನ ಇತ್ತೀಚಿನ ಸಾರ್ವತ್ರಿಕ ಚುನಾವಣೆಯು ಅತಂತ್ರ ಸ್ಥಿತಿಗೆ ಕಾರಣವಾಗಿದ್ದು, ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಬಲಪಂಥೀಯ ಒಕ್ಕೂಟವಾಗಲಿ ಅಥವಾ ಗಾದಿ ಐಸೆನ್‌ಕೋಟ್ ನೇತೃತ್ವದ ವಿರೋಧ ಪಕ್ಷದ ಒಕ್ಕೂಟವಾಗಲಿ, ಸರ್ಕಾರ ರಚನೆಗೆ ಅಗತ್ಯವಿರುವ ಸ್ಪಷ್ಟ ಬಹುಮತ (61 ಸ್ಥಾನಗಳು) ಪಡೆಯುವಲ್ಲಿ ವಿಫಲವಾಗಿವೆ. ಈ ಅನಿಶ್ಚಿತತೆಯು ಇಸ್ರೇಲ್‌ನಲ್ಲಿ ಮತ್ತೊಮ್ಮೆ ಚುನಾವಣೆಗೆ ದಾರಿ ಮಾಡಿಕೊಡುತ್ತದೆಯೇ ಎಂಬ ಪ್ರಶ್ನೆ ಉದ್ಭವವಾಗುವಂತೆ ಮಾಡಿದೆ.
ಚುನಾವಣಾ ಫಲಿತಾಂಶದ ಸಮೀಕರಣ ಹೇಗಿದೆ..?
120 ಸದಸ್ಯ ಬಲದ ನೆಸೆಟ್ (Knesset - ಇಸ್ರೇಲ್ ಸಂಸತ್ತು) ನಲ್ಲಿ ಅಧಿಕಾರಕ್ಕೇರಲು ಕನಿಷ್ಠ 61 ಸ್ಥಾನಗಳ ಅಗತ್ಯವಿದೆ.
ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಲಿಕುಡ್ (Likud) ನೇತೃತ್ವದ ಬ್ಲಾಕ್ ಒಟ್ಟು 53 ಸ್ಥಾನಗಳನ್ನು ಗಳಿಸಿದೆ. (ಇದರಲ್ಲಿ ಲಿಹುದು ಪಕ್ಷವು 27 ಸ್ಥಾನಗಳನ್ನು ಪಡೆದು ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ).
ಮಾಜಿ ಸೇನಾ ಮುಖ್ಯಸ್ಥ ಗಾದಿ ಐಸೆನ್‌ಕೋಟ್ ನೇತೃತ್ವದ ವಿರೋಧ ಪಕ್ಷದ ಒಕ್ಕೂಟವು 48 ಸ್ಥಾನಗಳನ್ನು ಪಡೆದುಕೊಂಡಿದೆ. (ಯಾಷರ್ ಪಕ್ಷವು 21 ಸ್ಥಾನಗಳನ್ನು ಪಡೆದಿದೆ).
ಅರಬ್ ನೇತೃತ್ವದ ಪಕ್ಷಗಳು (ಜಾಯಿಂಟ್ ಲಿಸ್ಟ್ ಮತ್ತು ರಾಯಮ್) ಐತಿಹಾಸಿಕವಾಗಿ 19 ಸ್ಥಾನಗಳನ್ನು ಗೆದ್ದು ಕಿಂಗ್‌ಮೇಕರ್ ಸ್ಥಾನದಲ್ಲಿವೆ.
ಈ ಚುನಾವಣೆಯಲ್ಲಿ ದಾಖಲೆಯ ಪ್ರಮಾಣದಲ್ಲಿ ಅಂದರೆ ಶೇ.77.9ರಷ್ಟು ಮತದಾನವಾಗಿದ್ದು, ಗಾಜಾ, ಲೆಬನಾನ್ ಮತ್ತು ಸಿರಿಯಾ ಗಡಿಗಳಲ್ಲಿ ಹಾಗೂ ನೆಲೆಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದ ಸೈನಿಕರು ಕೂಡ ಅತ್ಯುತ್ಸಾಹದಿಂದ ಈ ಪ್ರಕ್ರಿಯೆಯಲ್ಲಿ ಭಾಗವಹಿಸಿದ್ದರು. ಕೇಂದ್ರ ಚುನಾವಣಾ ಆಯೋಗವು ಅಂತಿಮ ಫಲಿತಾಂಶಗಳನ್ನು ದೇಶದ ಅಧ್ಯಕ್ಷರಿಗೆ ಅಧಿಕೃತವಾಗಿ ಸಲ್ಲಿಸಿದ್ದು, ಹೊಸದಾಗಿ ಚುನಾಯಿತವಾಗಿರುವ 26ನೇ ನೆಸೆಟ್ ಪ್ರಮಾಣ ವಚನ ಸ್ವೀಕರಿಸಲು ಸಿದ್ಧತೆ ನಡೆದಿದೆ.
ಸರ್ಕಾರ ರಚನೆಗೆ ಇರುವ ಸಂಭಾವ್ಯ ದಾರಿಗಳು ಮತ್ತು ಸವಾಲುಗಳು!
ಅರಬ್ ಪಕ್ಷಗಳ ಬೆಂಬಲದೊಂದಿಗೆ ವಿರೋಧ ಪಕ್ಷದ ಸರ್ಕಾರ
ಲೆಕ್ಕಾಚಾರದ ಪ್ರಕಾರ, ಐಸೆನ್‌ಕೋಟ್ ಬ್ಲಾಕ್ (48) ಮತ್ತು ಅರಬ್ ಪಕ್ಷಗಳ (19) ಬಲ ಒಟ್ಟು ಸೇರಿ 67 ಸ್ಥಾನಗಳ ಬಹುಮತವಾಗುತ್ತದೆ. ಇದು ಸರ್ಕಾರ ರಚನೆಗೆ ಸುಲಭ ಮಾರ್ಗವೆನಿಸಿದರೂ, ವಿರೋಧ ಪಕ್ಷದ ಕೆಲವು ಬಲಪಂಥೀಯ ನಾಯಕರಾದ ನಫ್ತಾಲಿ ಬೆನೆಟ್ ಮತ್ತು ಅವಿಗ್ಡೋರ್ ಲೈಬರ್‌ಮನ್ ಅವರು ಅರಬ್ ಪಕ್ಷಗಳ ಬೆಂಬಲ ಪಡೆದು ಸರ್ಕಾರ ರಚಿಸುವುದನ್ನು ತೀವ್ರವಾಗಿ ವಿರೋಧಿಸಿದ್ದಾರೆ. ಇಸ್ರೇಲ್-ಹಮಾಸ್ ಸಂಘರ್ಷದ ನಂತರ ಇವರ ನಿಲುವುಗಳು ಮತ್ತಷ್ಟು ಕಠಿಣಗೊಂಡಿದ್ದು, ಅರಬ್ ಪಕ್ಷಗಳನ್ನು ಹೊರಗಿನಿಂದ ಬೆಂಬಲಿಸಲು ಬಿಡುವುದು ಅಥವಾ ಸಮ್ಮಿಶ್ರಗೊಳಿಸುವುದು ಸೈದ್ಧಾಂತಿಕವಾಗಿ ಅವರಿಗೆ ಕಷ್ಟಕರವಾಗಿದೆ.
ರಾಷ್ಟ್ರೀಯ ಒಮ್ಮತದ ಸರ್ಕಾರ
ಮತ್ತೊಂದು ಸಾಧ್ಯತೆಯೆಂದರೆ ನೆತನ್ಯಾಹು ಅವರ ಬ್ಲಾಕ್ ಹಾಗೂ ಮಧ್ಯಮಾರ್ಗಿ ಅಥವಾ ವಿರೋಧ ಪಕ್ಷದ ಕೆಲವು ಭಾಗಗಳು ಸೇರಿ ಮೈತ್ರಿಕೂಟ ರಚಿಸುವುದು. ಆದರೆ, ನೆತನ್ಯಾಹುರನ್ನು ಅಧಿಕಾರದಿಂದ ಕೆಳಗಿಳಿಸುವುದಾಗಿ ಶಪಥ ಮಾಡಿರುವ ವಿರೋಧ ಪಕ್ಷದ ನಾಯಕರು ಅವರೊಂದಿಗೆ ಕೈಜೋಡಿಸಲು ಹಿಂದೇಟು ಹಾಕುತ್ತಿದ್ದಾರೆ. ಜೊತೆಗೆ ನೆತನ್ಯಾಹು ಕೂಡ ತಮ್ಮ ಉಗ್ರ-ಬಲಪಂಥೀಯ ಮತ್ತು ಅತಿ-ಸಂಪ್ರದಾಯವಾದಿ ಮಿತ್ರಪಕ್ಷಗಳ ಮೇಲಿನ ಅವಲಂಬನೆಯನ್ನು ಬಿಟ್ಟುಕೊಡಬೇಕಾಗುತ್ತದೆ.
ವಿರೋಧ ಪಕ್ಷದ ಶಾಸಕರನ್ನು ಸೆಳೆಯುವುದು
ನೆತನ್ಯಾಹು ಅವರು ಬಹುಮತಕ್ಕೆ ಬೇಕಿರುವ ಕೊರತೆಯ 6 ಸ್ಥಾನಗಳನ್ನು ತುಂಬಲು ವಿರೋಧ ಪಕ್ಷದ ಶಾಸಕರನ್ನು ಅಥವಾ ಸಣ್ಣ ಪಕ್ಷಗಳನ್ನು ಸೆಳೆಯಲು ಪ್ರಯತ್ನಿಸಬಹುದು. ಆದರೆ ಐಸೆನ್‌ಕೋಟ್, ಬೆನೆಟ್, ಲೈಬರ್‌ಮನ್ ಮತ್ತು ಯೈರ್ ಗೂಲಾನ್ ಮುಂತಾದ ಪ್ರಮುಖ ನಾಯಕರು ನೆತನ್ಯಾಹು ನೇತೃತ್ವದ ಸರ್ಕಾರಕ್ಕೆ ಸೇರುವುದಿಲ್ಲ ಎಂದು ಸ್ಪಷ್ಟಪಡಿಸಿರುವುದರಿಂದ ಇದು ಅತ್ಯಂತ ಕಷ್ಟದ ಹಾದಿಯಾಗಿದೆ.
ಮತ್ತೊಂದು ಚುನಾವಣೆ ಅನಿವಾರ್ಯನಾ..?
ಯಾವ ನಾಯಕರಿಗೂ ಸ್ಪಷ್ಟ ಬಹುಮತ ಸಿಗದಿದ್ದಲ್ಲಿ ಮತ್ತು ಒಪ್ಪಂದಗಳು ವಿಫಲಗೊಂಡರೆ, ಇಸ್ರೇಲ್ ಮತ್ತೊಮ್ಮೆ ಚುನಾವಣೆಯ ಕಡೆಗೆ ಮುಖ ಮಾಡಬೇಕಾಗುತ್ತದೆ. 2019 ಮತ್ತು 2022ರ ನಡುವೆ ಇಸ್ರೇಲ್ ಕೇವಲ ಮೂರನೇ ಅಥವಾ ನಾಲ್ಕನೇ ಅಲ್ಲ, ಸತತ ಐದು ಚುನಾವಣೆಗಳನ್ನು ಕಂಡಿರುವುದನ್ನು ಇಲ್ಲಿ ಸ್ಮರಿಸಬಹುದು. ಸದ್ಯ ಅಧ್ಯಕ್ಷ ಐಸಾಕ್ ಹರ್ಜೋಗ್ ಅವರು ರಾಜಕೀಯ ಪಕ್ಷಗಳೊಂದಿಗೆ ಸಮಾಲೋಚನೆ ನಡೆಸುತ್ತಿದ್ದು, ನೆತನ್ಯಾಹು ಅವರು ತಾತ್ಕಾಲಿಕ ಪ್ರಧಾನಿಯಾಗಿ ಮುಂದುವರಿಯುತ್ತಿದ್ದಾರೆ.
ಭಾರತದ ಮೇಲೆ ಇದರ ಪ್ರಭಾವವೇನು..?
ಇಸ್ರೇಲ್‌ನ ಈ ಆಂತರಿಕ ರಾಜಕೀಯ ಬಿಕ್ಕಟ್ಟು ಭಾರತಕ್ಕೂ ಮಹತ್ವದ್ದಾಗಿದೆ. ನವದೆಹಲಿ ಮತ್ತು ಟೆಲ್ ಅವಿವ್ ನಡುವೆ ರಕ್ಷಣಾ ಉಪಕರಣಗಳು, ಅತ್ಯಾಧುನಿಕ ಮಿಲಿಟರಿ ತಂತ್ರಜ್ಞಾನ, ಗುಪ್ತಚರ ಸಹಕಾರ, ಕೃಷಿ ಮತ್ತು ನೀರಿನ ನಿರ್ವಹಣೆಯಲ್ಲಿ ಅತ್ಯಂತ ನಿಕಟ ಕಾರ್ಯತಂತ್ರದ ಪಾಲುದಾರಿಕೆ ಇದೆ. ಇಸ್ರೇಲ್‌ನಲ್ಲಿ ಮುಂಬರುವ ನಾಯಕತ್ವ ಬದಲಾವಣೆ ಅಥವಾ ಹೊಸ ಒಕ್ಕೂಟದ ನೀತಿಗಳು ಪಶ್ಚಿಮ ಏಷ್ಯಾ ನೀತಿ, ಇರಾನ್ ಹಾಗೂ ಗಾಜಾ ಬಿಕ್ಕಟ್ಟಿನ ಕುರಿತ ನಿಲುವುಗಳ ಮೇಲೆ ಪರಿಣಾಮ ಬೀರಬಹುದು. ಭಾರತವು ಅರಬ್ ಜಗತ್ತಿನೊಂದಿಗೆ ಹೊಂದಿರುವ ಬಾಂಧವ್ಯ ಹಾಗೂ ಇಸ್ರೇಲ್ ಜತೆಗಿನ ದ್ವಿಪಕ್ಷೀಯ ಬಾಂಧವ್ಯದ ನಡುವೆ ಎಚ್ಚರಿಕೆಯ ಸಮತೋಲನ ಕಾಯ್ದುಕೊಳ್ಳಬೇಕಿದೆ(ಏಜೆನ್ಸೀಸ್).
