ರಣರಂಗಕ್ಕೆ ಬರಲಿದೆ ಆ ರಹಸ್ಯ ಅಸ್ತ್ರ! ನಾವು ಅಫ್ಘಾನಿಸ್ತಾನವಲ್ಲ, ನೆನಪಿರಲಿ! ಅಮೆರಿಕಕ್ಕೆ ನಡುಕ ಹುಟ್ಟಿಸಿದ ಇರಾನ್ ಸ್ಪೀಕರ್​ನ ಆ ಒಂದು ಮಾತು! Mohammad Bagher Ghalibaf

ಇರಾನ್ ಸಂಸತ್ತಿನ ಸ್ಪೀಕರ್ ಮತ್ತು ಪ್ರಮುಖ ಸಂಧಾನಕಾರರಾಗಿರುವ ಘಾಲಿಬಾಫ್, ತಮ್ಮ Xನಲ್ಲಿ ಟ್ರಂಪ್ ವಿರುದ್ಧ ನೇರ ವಾಗ್ದಾಳಿ ನಡೆಸಿದ್ದಾರೆ. ಟ್ರಂಪ್ ದಿಗ್ಬಂಧನ ಹೇರುವ ಮೂಲಕ ಮತ್ತು ಕದನ ವಿರಾಮ ಉಲ್ಲಂಘಿಸುವ ಮೂಲಕ ಶಾಂತಿ ಮಾತುಕತೆಯ ಮೇಜನ್ನು ಶರಣಾಗತಿಯ ಮೇಜು ಆಗಿ ಬದಲಿಸಲು ಯತ್ನಿಸುತ್ತಿದ್ದಾರೆ. ಬೆದರಿಕೆಯ ನೆರಳಿನಲ್ಲಿ ನಾವು ಮಾತುಕತೆ ನಡೆಸುವುದಿಲ್ಲ. ಕಳೆದ ಎರಡು ವಾರಗಳಲ್ಲಿ ನಾವು ರಣರಂಗದಲ್ಲಿ ಪ್ರದರ್ಶಿಸಲು ಹೊಸ ಕಾರ್ಡ್‌ಗಳನ್ನು ಸಿದ್ಧಪಡಿಸಿಕೊಂಡಿದ್ದೇವೆ ಎಂದು ಎಚ್ಚರಿಸಿದ್ದಾರೆ.

ಒಂದೆಡೆ ಯುದ್ಧದ ಬೆದರಿಕೆ ಇದ್ದರೂ, ಮತ್ತೊಂದೆಡೆ ರಾಜತಾಂತ್ರಿಕ ಪ್ರಯತ್ನಗಳು ತೆರೆಮರೆಯಲ್ಲಿ ನಡೆಯುತ್ತಿವೆ. ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಮಂಗಳವಾರ ಬೆಳಿಗ್ಗೆ ಇಸ್ಲಾಮಾಬಾದ್‌ಗೆ ಪ್ರಯಾಣ ಬೆಳೆಸಲಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಏಪ್ರಿಲ್ 22ರ ಗಡುವು ಮುಗಿಯುವ ಮೊದಲು ಇರಾನ್‌ನೊಂದಿಗೆ ಒಂದು ನಿರ್ಣಾಯಕ ಒಪ್ಪಂದಕ್ಕೆ ಬರಲು ಶ್ವೇತಭವನ ಶತಪ್ರಯತ್ನ ನಡೆಸುತ್ತಿದೆ.

ಇರಾನ್‌ನ ವಿದೇಶಾಂಗ ಇಲಾಖೆಯು ಮೊದಲು ಮಾತುಕತೆಯನ್ನು ನಿರಾಕರಿಸಿದ್ದರೂ, ಇರಾನ್‌ನ ಸುಪ್ರೀಂ ಲೀಡರ್ ಮೊಜ್ತಾಬಾ ಖಮೇನಿ ಅವರು ಸೋಮವಾರ ತಡರಾತ್ರಿ ಸಂಧಾನ ತಂಡಕ್ಕೆ ಇಸ್ಲಾಮಾಬಾದ್‌ಗೆ ತೆರಳಲು ಹಸಿರು ನಿಶಾನೆ ತೋರಿಸಿದ್ದಾರೆ ಎಂದು ಆಕ್ಸಿಯೋಸ್ ವರದಿ ಮಾಡಿದೆ. ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಒತ್ತಡದ ನಡುವೆಯೂ, ಯುದ್ಧವನ್ನು ತಪ್ಪಿಸಲು ಈ ಮಹತ್ವದ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಇರಾನ್ ಉಲ್ಲೇಖಿಸಿರುವ ಹೊಸ ಕಾರ್ಡ್‌ಗಳು ಕೇವಲ ಕ್ಷಿಪಣಿಗಳಾಗಿರದೆ, ಅಮೆರಿಕದ ಮಿಲಿಟರಿ ನೆಲೆಗಳ ಮೇಲೆ ನಡೆಸುವ ಗುಪ್ತ ದಾಳಿಗಳು ಅಥವಾ ಅಂತಾರಾಷ್ಟ್ರೀಯ ತೈಲ ಮಾರ್ಗಗಳನ್ನು ಬಂದ್ ಮಾಡುವ ತಂತ್ರಗಳಾಗಿರಬಹುದು. ಒಂದು ವೇಳೆ ಬುಧವಾರದೊಳಗೆ ಶಾಂತಿ ಮಾತುಕತೆ ಫಲಪ್ರದವಾಗದಿದ್ದರೆ:

ತೈಲ ಬೆಲೆ: ಕಚ್ಚಾ ತೈಲ ಬೆಲೆ ಬ್ಯಾರೆಲ್‌ಗೆ 150 ಡಾಲರ್ ದಾಟುವ ಆತಂಕ ಇದೆ.

ಜಾಗತಿಕ ಷೇರು ಮಾರುಕಟ್ಟೆ: ಭಾರತ ಸೇರಿದಂತೆ ಜಗತ್ತಿನ ಪ್ರಮುಖ ಷೇರು ಮಾರುಕಟ್ಟೆಗಳು ಕುಸಿಯುವ ಭೀತಿ ಎದುರಾಗಿದೆ.

ಸೈಬರ್ ವಾರ್: ಅಮೆರಿಕದ ಪ್ರಮುಖ ಬ್ಯಾಂಕಿಂಗ್ ಮತ್ತು ರಕ್ಷಣಾ ವ್ಯವಸ್ಥೆಗಳ ಮೇಲೆ ಇರಾನ್ ಸೈಬರ್ ದಾಳಿ ನಡೆಸುವ ಸಾಧ್ಯತೆ.

ಡೊನಾಲ್ಡ್ ಟ್ರಂಪ್ ಅವರು ತಮ್ಮ ಹಳೆ ಶೈಲಿಯಲ್ಲೇ ಗರಿಷ್ಠ ಒತ್ತಡ ತಂತ್ರವನ್ನು ಅನುಸರಿಸುತ್ತಿದ್ದಾರೆ. ಮಾತುಕತೆಯ ಗಡುವು ಮೀರಿದರೆ ಬಾಂಬ್ ದಾಳಿ ಖಚಿತ ಎಂಬ ಟ್ರಂಪ್​ ಹೇಳಿಕೆಯು ಇರಾನ್ ಅನ್ನು ಅನಿವಾರ್ಯವಾಗಿ ಸಂಧಾನದ ಮೇಜಿಗೆ ತರುವ ಉದ್ದೇಶ ಹೊಂದಿದೆ. ಆದರೆ, ಇರಾನ್‌ನ ಇತ್ತೀಚಿನ ಪ್ರತಿಕ್ರಿಯೆ ನೋಡಿದರೆ ಅವರು ಸುಲಭವಾಗಿ ಮಣಿಯುವಂತೆ ಕಾಣುತ್ತಿಲ್ಲ,(ಏಜೆನ್ಸೀಸ್).