ವಿಮಾನ ಬಿಟ್ಟು ರೈಲು ಹತ್ತಿದ ಇರಾನ್ ನಿಯೋಗ! ಅಮೆರಿಕ ಜೊತೆಗಿನ ಮಾತುಕತೆ ವಿಫಲ ಬೆನ್ನಲ್ಲೇ ಹತ್ಯೆಯ ಭೀತಿ? Iran Delegation

ಇರಾನ್ ನಿಯೋಗದ ಭಾಗವಾಗಿದ್ದ ಹಿರಿಯ ಅಧಿಕಾರಿ ಮೊಹಮ್ಮದ್ ಮರಾಂಡಿ ಪ್ರಕಾರ, ಇಸ್ಲಾಮಾಬಾದ್‌ನಿಂದ ವಾಪಸ್ ಆಗುವಾಗ ಇರಾನ್ ನಾಯಕರಿದ್ದ ವಿಮಾನವನ್ನು ಆಕಾಶದಲ್ಲೇ ಹೊಡೆದುರುಳಿಸುವ ಸಂಚು ನಡೆದಿದೆ ಎಂಬ ಗಂಭೀರ ಎಚ್ಚರಿಕೆ ಲಭಿಸಿತ್ತು. ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಗ್ಚಿ ಮತ್ತು ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಗರ್ ಘಾಲಿಬಾಫ್ ಅವರಿದ್ದ ನಿಯೋಗಕ್ಕೆ ಈ ಭದ್ರತಾ ಬೆದರಿಕೆ ಬಂದ ಹಿನ್ನೆಲೆಯಲ್ಲಿ ಇಡೀ ಪ್ರವಾಸದ ಮಾರ್ಗವನ್ನೇ ಬದಲಾಯಿಸಲಾಯಿತು.

ನಮ್ಮ ವಿಮಾನವನ್ನು ಗುರಿಯಾಗಿಸಬಹುದು ಎಂಬ ಗಂಭೀರ ಎಚ್ಚರಿಕೆಗಳು ಬಂದಿದ್ದವು. ಇದು ಕೇವಲ ವದಂತಿಯಾಗಿರಲಿಲ್ಲ, ಬದಲಿಗೆ ತಕ್ಷಣದ ನಿರ್ಧಾರ ಕೈಗೊಳ್ಳಬೇಕಾದಷ್ಟು ಅಪಾಯಕಾರಿಯಾಗಿತ್ತು ಎಂದು ಮರಾಂಡಿ ತಿಳಿಸಿದ್ದಾರೆ.

ಸುರಕ್ಷತೆಯ ದೃಷ್ಟಿಯಿಂದ ಇರಾನ್ ನಿಯೋಗವು ಅತ್ಯಂತ ನಾಟಕೀಯವಾಗಿ ತನ್ನ ಪ್ರಯಾಣದ ಹಾದಿಯನ್ನು ಬದಲಿಸಿತು.

ದಿಕ್ಕನ್ನು ಬದಲಿಸಿದ ವಿಮಾನ: ಮೊದಲಿಗೆ ಇಸ್ಲಾಮಾಬಾದ್‌ನಿಂದ ಹೊರಟ ವಿಮಾನವು ನೇರವಾಗಿ ರಾಜಧಾನಿ ಟೆಹ್ರಾನ್‌ಗೆ ಹೋಗುವ ಬದಲು ಇರಾನ್‌ನ ಮಶಾದ್ ಎಂಬಲ್ಲಿ ಇಳಿಯಿತು.

ಭೂಮಾರ್ಗದ ಪ್ರಯಾಣ: ಆಕಾಶ ಮಾರ್ಗ ಅಪಾಯಕಾರಿ ಎಂದು ಮನಗಂಡ ನಾಯಕರು ಮಶಾದ್‌ನಿಂದ ರೈಲು, ಕಾರು ಮತ್ತು ಇತರ ರಸ್ತೆ ಮಾರ್ಗಗಳ ಮೂಲಕ ಹಂತ ಹಂತವಾಗಿ ಟೆಹ್ರಾನ್ ತಲುಪಿದರು.

ರಹಸ್ಯ ಕಾರ್ಯಾಚರಣೆ: ಈ ಬದಲಾವಣೆಯನ್ನು ಹೊರಜಗತ್ತಿಗೆ ತಿಳಿಸದೆ ಅತ್ಯಂತ ಗೌಪ್ಯವಾಗಿ ಇರಿಸಲಾಗಿತ್ತು. ಅಮೆರಿಕದ ಗುಪ್ತಚರ ಕಣ್ಣು ತಪ್ಪಿಸಲು ಈ ಡೈವರ್ಷನ್ ತಂತ್ರ ಬಳಸಲಾಗಿತ್ತು ಎನ್ನಲಾಗಿದೆ.

ದಶಕದ ನಂತರ ಅಮೆರಿಕ ಮತ್ತು ಇರಾನ್ ನಡುವೆ ನಡೆದ ಈ ಅಪರೂಪದ ಮುಖಾಮುಖಿ ಮಾತುಕತೆ ಯಾವುದೇ ಸಕಾರಾತ್ಮಕ ಫಲಿತಾಂಶ ನೀಡದೆ ಕೊನೆಗೊಂಡಿದೆ. ಅಮೆರಿಕದ ಪ್ರಸ್ತಾಪಗಳನ್ನು ಇರಾನ್ ತಿರಸ್ಕರಿಸಿದ್ದು, ಎರಡು ದೇಶಗಳ ನಡುವಿನ ಕಂದಕ ಮತ್ತಷ್ಟು ದೊಡ್ಡದಾಗಿದೆ.

ಒಂದೆಡೆ ಶಾಂತಿ ಮಾತುಕತೆಯಲ್ಲಿ ಪಾಲ್ಗೊಳ್ಳುತ್ತಲೇ, ಮತ್ತೊಂದೆಡೆ ಇರಾನ್ ಸಂಭವನೀಯ ಯುದ್ಧಕ್ಕೂ ಸಿದ್ಧತೆ ನಡೆಸುತ್ತಿದೆ. ನಾವು ಸಂಧಾನಕ್ಕೆ ಸಿದ್ಧರಿದ್ದೇವೆ, ಆದರೆ ದಾಳಿಗೆ ತಕ್ಕ ಪ್ರತ್ಯುತ್ತರ ನೀಡಲು ಸದಾ ಸಜ್ಜಾಗಿದ್ದೇವೆ ಎಂದು ಮರಾಂಡಿ ಹೇಳಿರುವುದು ಅಮೆರಿಕದ ಮೇಲಿನ ತೀವ್ರ ಅಪನಂಬಿಕೆಯನ್ನು ಎತ್ತಿ ತೋರಿಸುತ್ತದೆ.

ಈ ಹದಗೆಟ್ಟ ವಾತಾವರಣದ ನಡುವೆಯೂ ರಾಜತಾಂತ್ರಿಕ ಬಾಗಿಲುಗಳು ಸಂಪೂರ್ಣವಾಗಿ ಮುಚ್ಚಿಲ್ಲ. ಪಾಕಿಸ್ತಾನ ಮತ್ತು ಇರಾನ್ ಅಧಿಕಾರಿಗಳ ಪ್ರಕಾರ, ಮುಂದಿನ ಕೆಲವೇ ದಿನಗಳಲ್ಲಿ ಮತ್ತೆ ಇಸ್ಲಾಮಾಬಾದ್‌ನಲ್ಲಿ ಎರಡನೇ ಸುತ್ತಿನ ಮಾತುಕತೆ ನಡೆಯುವ ಸಾಧ್ಯತೆ ಇದೆ. ಆದರೆ, ಈಗಿನ ಭದ್ರತಾ ಬೆದರಿಕೆಗಳು ಮತ್ತು ವಿಮಾನ ಪ್ರಯಾಣದ ಮೇಲಿನ ಅನುಮಾನಗಳು ಮುಂದಿನ ಮಾತುಕತೆಯ ಮೇಲೆ ಕರಿನೆರಳು ಬೀರಿವೆ,(ಏಜೆನ್ಸೀಸ್).