ಇರಾನಿನ ಹೊಸ ಸುಪ್ರೀಂ ಲೀಡರ್ ಸಲಿಂಗಕಾಮಿ ಅನ್ನೋ ಮಾಹಿತಿ ಕೇಳ್ತಿದ್ದಂತೆ ಟ್ರಂಪ್​ ಕೊಟ್ಟ ರಿಯಾಕ್ಷನ್ ವೈರಲ್​! Donald Trump ​

ವಾಷಿಂಗ್ಟನ್: ಇರಾನಿನ ನೂತನ ಸುಪ್ರೀಂ ಲೀಡರ್ ಮೊಜ್ತಬಾ ಖಮೇನಿ ಓರ್ವ ಸಲಿಂಗಕಾಮಿ ಆಗಿರಬಹುದು ಎಂದು ಅಮೆರಿಕದ ಗುಪ್ತಚರ ಸಂಸ್ಥೆಗಳು ಇತ್ತೀಚೆಗೆ ವಿವರಣೆ ನೀಡುವ ಸಂದರ್ಭದಲ್ಲಿ ಯುಎಸ್​ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್ ( Donald Trump )​ ಅಚ್ಚರಿಗೊಳ್ಳುವುದರ ಜೊತೆಗೆ ಹೊಟ್ಟೆ ಹುಣ್ಣಾಗುವಷ್ಟು ನಗಾಡಿದ ಪ್ರಸಂಗ ಜರುಗಿದೆ ಎಂದು ನ್ಯೂಯಾರ್ಕ್​ ಪೋಸ್ಟ್​ ವರದಿ ಮಾಡಿದೆ.

ಅಂದಹಾಗೆ, ಕಳೆದ ವಾರ ಅಮೆರಿಕದ ಅಧಿಕಾರಿಗಳು ಒಂದು ಗುಪ್ತ ಸಭೆ ನಡೆಸಿದ್ದಾರೆ. ಈ ಸಭೆಯಲ್ಲಿ ಅಮೆರಿಕದ ಗುಪ್ತಚರ ಅಧಿಕಾರಿಗಳು, ಮೊಜ್ತಬಾ ಓರ್ವ ಸಲಿಂಗಕಾಮಿ ಅನ್ನೋ ಮಾಹಿತಿ ನೀಡಿದೆ. ಇದೇ ಮಾಹಿತಿಯನ್ನು ಆಧರಿಸಿ, ಅಧಿಕಾರಿಗಳು ಅದನ್ನು ಪರಿಶೀಲಿಸಿದ್ದಾರೆ ಎಂದು ನ್ಯೂಯಾರ್ಕ್​ ಪೋಸ್ಟ್​ ತಿಳಿಸಿದೆ.

ಗುಪ್ತಚರ ಸಂಸ್ಥೆಗಳು ಈ ಗುಪ್ತ ಮಾಹಿತಿಯನ್ನು ವಿವರಿಸುವಾಗ ಅಮೆರಿಕ ಅಧ್ಯಕ್ಷ ಟ್ರಂಪ್‌ರವರು ಬಹಳ ಆಶ್ಚರ್ಯಪಟ್ಟರು. ಆ ಮಾಹಿತಿಯನ್ನು ಕೇಳಿದ ಕೂಡಲೇ ನಗು ತಡೆಯಲಾರದೆ ಗಟ್ಟಿಯಾಗಿ ನಗಲು ಪ್ರಾರಂಭಿಸಿದರು ಎಂದು ಮೂಲಗಳು ಹೇಳಿವೆ. ಸಭೆಯಲ್ಲಿದ್ದ ಇತರರು ಸಹ ಇದನ್ನು ತುಂಬಾ ತಮಾಷೆಯೆಂದು ಭಾವಿಸಿ ನಕ್ಕರು. ಅದರಲ್ಲೂ ಓರ್ವ ಹಿರಿಯ ಗುಪ್ತಚರ ಅಧಿಕಾರಿ ಅದನ್ನು ನೆನೆಸಿಕೊಂಡು ಇಂದಿಗೂ ನಗುತ್ತಲೇ ಇದಾರೆ ಎಂದು ಕೆಲವು ಮೂಲಗಳು ತಿಳಿಸಿರುವುದಾಗಿ ನ್ಯೂಯಾರ್ಕ್​ ಪೋಸ್ಟ್​ ವರದಿ ಮಾಡಿದೆ.

ಅಂದಹಾಗೆ, ಈ ಮಾಹಿತಿಯನ್ನು ವೈಟ್​ಹೌಸ್​ಗೆ ತುಂಬಾ ಹತ್ತಿರವಿರುವ ಮತ್ತು ಇಬ್ಬರು ಗುಪ್ತಚರ ಇಲಾಖೆ ಅಧಿಕಾರಿಗಳು ಬಹಿರಂಗಪಡಿಸಿರುವುದಾಗಿ ನ್ಯೂಯಾರ್ಕ್​ ಪೋಸ್ಟ್​ ಹೇಳಿದೆ. ಇನ್ನು ಅಮೆರಿಕದ ಬೇಹುಗಾರಿಕೆ ಸಂಸ್ಥೆಗಳು ಈ ರಹಸ್ಯ ಮಾಹಿತಿಯನ್ನು ತಪ್ಪು ಮಾಹಿತಿಗಿಂತ ವಿಶ್ವಾಸಾರ್ಹ ಮಾಹಿತಿ ಎಂದು ಪರಿಗಣಿಸುತ್ತಿರುವುದಾಗಿ ತಿಳಿದುಬಂದಿದೆ.

ಈ ಮಾಹಿತಿ ಅಮೆರಿಕ ಸರ್ಕಾರದ ಬಳಿ ಇರುವ ಅತ್ಯಂತ ಸುರಕ್ಷಿತ ಮೂಲಗಳಲ್ಲಿ ಒಂದರಿಂದ ಬಂದಿದೆ. ಇದನ್ನು ಟ್ರಂಪ್‌ರವರಿಗೆ ನೀಡಿದ ರಹಸ್ಯ ವಿವರಣೆಯಲ್ಲಿ ಚರ್ಚೆಯಾಗಿದ್ದು, ಟ್ರಂಪ್​ ಮತ್ತು ಇತರರು ನಗುವಿಗೆ ಕಾರಣವಾಗಿದೆ ಎಂದು ವರದಿಯಾಗಿದೆ.

ಮತ್ತೊಂದು ಅಚ್ಚರಿಯ ಸಂಗತಿ ಏನೆಂದರೆ, ಮೊಜ್ತಬಾ ಅವರು ತನ್ನ ಬಾಲ್ಯದ ಅವಧಿಯಲ್ಲಿ ತನ್ನ ಬೋಧಕರಾಗಿ ಸೇವೆ ಸಲ್ಲಿಸಿದ ವ್ಯಕ್ತಿಯ ಜೊತೆ ದೀರ್ಘಕಾಲದ ಸಂಬಂಧ ಹೊಂದಿದ್ದರು ಎಂದು ಅಮೆರಿಕ ಗುಪ್ತಚರ ಇಲಾಖೆ ತಿಳಿಸಿರುವುದಾಗಿ ನ್ಯೂಯಾರ್ಕ್​ ಪೋಸ್ಟ್​ ವರದಿ ಮಾಡಿದೆ. ಅಲ್ಲದೆ, ವರದಿಯಲ್ಲಿ ಉಲ್ಲೇಖಿಸಲಾದ ಎರಡು ಮೂಲಗಳ ಪ್ರಕಾರ, ಈ ಸಂಬಂಧವು ವರ್ಷಗಳ ಕಾಲ ನಡೆಯಿತು ಎಂದು ಹೇಳಿದರೆ, ಇನ್ನೊಂದು ಮೂಲ, ಖಮೇನಿ ಕುಟುಂಬಕ್ಕಾಗಿ ಈ ಹಿಂದೆ ಕೆಲಸ ಮಾಡುತ್ತಿದ್ದ ವ್ಯಕ್ತಿಯೇ ಮೊಜ್ತಬಾರ ಪಾರ್ಟ್ನರ್​ ಎಂದು ಹೇಳಿದೆ.

ಇನ್ನು ಫೆಬ್ರವರಿ 28 ರಂದು ಅಮೆರಿಕ-ಇಸ್ರೇಲ್​ ಜಂಟಿಯಾಗಿ ನಡೆಸಿದ ವೈಮಾನಿಕ ದಾಳಿಯಲ್ಲಿ ಮೊಜ್ತಬಾ ಅವರ ತಂದೆ ಅಯತೊಲ್ಲಾ ಅಲಿ ಖಮೇನಿ ಮೃತಪಟ್ಟರು. ಆ ದಾಳಿಯಲ್ಲಿ ಉಂಟಾದ ಗಾಯಗಳಿಂದ ಚೇತರಿಸಿಕೊಳ್ಳುತ್ತಿರುವಾಗ ಮೊಜ್ತಬಾ ಅವರು ತಮ್ಮ ಪುರುಷ ಆರೈಕೆದಾರರ ಕಡೆಗೆ "ಆಕ್ರಮಣಕಾರಿ" ವರ್ತನೆಗಳನ್ನು ತೋರಿಸಿರಬಹುದು ಎಂದು ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ. ಆದರೆ, ಅಮೆರಿಕದ ಗುಪ್ತಚರ ಸಂಸ್ಥೆಗಳು ನೀಡಿರುವ ಈ ಹೇಳಿಕೆಯನ್ನು ಬೆಂಬಲಿಸುವ ಯಾವುದೇ ಫೋಟೋ ಪುರಾವೆಗಳು ಇಲ್ಲ. ಆದರೆ, ಅಧಿಕಾರಿಗಳು ಈ ಮಾಹಿತಿಯನ್ನು ವಿಶ್ವಾಸಾರ್ಹವೆಂದು ಪರಿಗಣಿಸಿದ್ದಾರೆ.

2024ರ ಹೆಲಿಕಾಪ್ಟರ್ ಅಪಘಾತದಲ್ಲಿ ಇರಾನ್‌ನ ಮಾಜಿ ಅಧ್ಯಕ್ಷ ಇಬ್ರಾಹಿಂ ರೈಸಿ ಮೃತಪಟ್ಟ ಬಳಿಕ, ಮೊಜ್ತಬಾ ಅವರ ಲೈಂಗಿಕ ಆಯ್ಕೆಯ ಬಗ್ಗೆ ಇರಾನಿನ ರಾಜಕೀಯ ವಲಯಗಳಲ್ಲಿ ವದಂತಿಗಳು ಹರಡಿದ್ದವು ಎಂದು ಮೂಲಗಳು ತಿಳಿಸಿವೆ. ಅಂದಹಾಗೆ, ಇರಾನ್‌ನಲ್ಲಿ ಸಲಿಂಗಕಾಮ ಕಾನೂನುಬಾಹಿರವಾಗಿದೆ. ಆ ದೇಶದ ಕಾನೂನುಗಳ ಅಡಿಯಲ್ಲಿ ಇಂತಹ ಸಂಬಂಧಗಳು ಕಠಿಣ ಕ್ರಿಮಿನಲ್ ಶಿಕ್ಷೆಗೆ ಗುರಿಯಾಗಬಹುದು. ಧಾರ್ಮಿಕ ಮತ್ತು ರಾಜಕೀಯ ನಾಯಕತ್ವವು ನಿಕಟವಾಗಿ ಹೆಣೆದುಕೊಂಡಿರುವ ಇರಾನ್‌ನ ರಾಜಕೀಯ ವ್ಯವಸ್ಥೆಯಲ್ಲಿ ಈ ಆರೋಪ ಒಂದು ಬಿರುಗಾಳಿ ಎಬ್ಬಿಸಿದರು ಅಚ್ಚರಿ ಇಲ್ಲ, (ಏಜೆನ್ಸೀಸ್​).