ಆಪರೇಷನ್ ಲಯನ್ಸ್ ರೋರ್‌ಗೆ ಬೆಚ್ಚಿಬಿದ್ದ ಇರಾನ್​; ಖಮೇನಿ ಆಂತ್ಯದ ಬೆನ್ನಲ್ಲೇ ಸೇನಾ ಮುಖ್ಯಸ್ಥ ಕೂಡ ಖತಂ! Abdolrahim Mousavi

ಜನರಲ್ ಮೌಸವಿ ಅವರನ್ನು ಇರಾನ್‌ನಲ್ಲಿ ಕಷ್ಟಕರ ಕಾರ್ಯಾಚರಣೆಗಳ ನಾಯಕ ಎಂದು ಕರೆಯಲಾಗುತ್ತಿತ್ತು. 2025ರಲ್ಲಿ ಅಂದಿನ ಮಿಲಿಟರಿ ಮುಖ್ಯಸ್ಥ ಮೊಹಮ್ಮದ್ ಬಘೇರಿಯ ಹತ್ಯೆಯ ನಂತರ ಖಮೇನಿ ಇವರನ್ನು ಈ ಉನ್ನತ ಹುದ್ದೆಗೆ ನೇಮಿಸಿದ್ದರು. ದಶಕಗಳ ಕಾಲ ಸೇನೆಯಲ್ಲಿ ಸೇವೆ ಸಲ್ಲಿಸಿದ್ದ ಇವರು, ಇಮಾಮ್ ಅಲಿ ಮಿಲಿಟರಿ ವಿಶ್ವವಿದ್ಯಾಲಯದ ಮುಖ್ಯಸ್ಥರಾಗಿ ಮತ್ತು 2017ರಲ್ಲಿ ಸೇನಾ ಕಮಾಂಡರ್-ಇನ್-ಚೀಫ್ ಆಗಿ ಕಾರ್ಯನಿರ್ವಹಿಸಿದ್ದರು. ಇರಾನ್‌ನ ಕ್ರಾಂತಿಕಾರಿ ಪಡೆಗಳನ್ನು ಬಲಪಡಿಸುವಲ್ಲಿ ಇವರು ಪ್ರಮುಖ ಪಾತ್ರ ವಹಿಸಿದ್ದರು.

ವರದಿಗಳ ಪ್ರಕಾರ, ಶನಿವಾರ ನಡೆದ ಆಪರೇಷನ್ ಎಪಿಕ್ ಫ್ಯೂರಿ ಎಂಬ ಹೆಸರಿನ ಬೃಹತ್ ಕಾರ್ಯಾಚರಣೆಯಲ್ಲಿ ಸರ್ವೋಚ್ಚ ನಾಯಕ ಖಮೇನಿ ಅವರ ಕಚೇರಿಯ ಮೇಲೆ ದಾಳಿ ನಡೆದಿತ್ತು. ಈ ದಾಳಿಯಲ್ಲಿ ಖಮೇನಿ ಹತ್ಯೆಯಾದ ಬೆನ್ನಲ್ಲೇ ಈಗ ಸೇನಾ ಮುಖ್ಯಸ್ಥ ಮೌಸವಿ ಕೂಡ ಬಲಿಯಾಗಿದ್ದಾರೆ.

ಈ ದಾಳಿಯು ಕೇವಲ ವ್ಯಕ್ತಿಗಳ ಮೇಲಲ್ಲ, ಬದಲಿಗೆ ಇರಾನ್‌ನ ಪರಮಾಣು ಮತ್ತು ಕ್ಷಿಪಣಿ ಕೇಂದ್ರಗಳನ್ನು ಗುರಿಯಾಗಿಸಿಕೊಂಡು ನಡೆದಿದೆ.

ಇರಾನ್‌ನ 24 ಪ್ರಾಂತ್ಯಗಳಲ್ಲಿ ಸುಮಾರು 200ಕ್ಕೂ ಹೆಚ್ಚು ಉನ್ನತ ಅಧಿಕಾರಿಗಳು ಮತ್ತು ಸೈನಿಕರು ಈ ದಾಳಿಗೆ ಬಲಿಯಾಗಿದ್ದಾರೆ ಎಂದು ಅಂದಾಜಿಸಲಾಗಿದೆ.

ಇರಾನ್‌ನ ಈ ಅರಾಜಕತೆಯು ಜಾಗತಿಕ ಮಾರುಕಟ್ಟೆಯ ಮೇಲೆ ತೀವ್ರ ಪರಿಣಾಮ ಬೀರಿದೆ. ಕಚ್ಚಾ ತೈಲ ಬೆಲೆಯು ಬ್ಯಾರೆಲ್‌ಗೆ 70 ಡಾಲರ್ ಗಡಿ ದಾಟಿದ್ದು, ಅಂತಾರಾಷ್ಟ್ರೀಯ ವಿಮಾನಯಾನ ಸಂಸ್ಥೆಗಳು ಈ ಭಾಗದ ವಾಯುಮಾರ್ಗವನ್ನು ಮುಚ್ಚಿವೆ. ರಷ್ಯಾ ಮತ್ತು ಚೀನಾ ಈ ದಾಳಿಯನ್ನು ಖಂಡಿಸಿದ್ದರೆ, ಅಮೇರಿಕಾ ಮತ್ತು ಇಸ್ರೇಲ್ ತನ್ನ ರಕ್ಷಣಾತ್ಮಕ ಕ್ರಮವನ್ನು ಸಮರ್ಥಿಸಿಕೊಂಡಿವೆ.

ಇರಾನ್ ಸರ್ಕಾರವು ದೇಶಾದ್ಯಂತ 40 ದಿನಗಳ ಕಾಲ ಶೋಕಾಚರಣೆ ಘೋಷಿಸಿದೆ. ಟೆಹ್ರಾನ್, ಇಸ್ಫಹಾನ್ ಮತ್ತು ಮಶಾದ್ ನಗರಗಳಲ್ಲಿ ಲಕ್ಷಾಂತರ ಜನರು ರಸ್ತೆಗಿಳಿದು ಅಮೇರಿಕಾ ಮತ್ತು ಇಸ್ರೇಲ್ ವಿರುದ್ಧ ಘೋಷಣೆಗಳನ್ನು ಕೂಗುತ್ತಿದ್ದಾರೆ. ಇರಾನ್‌ನ ರೆವಲ್ಯೂಷನರಿ ಗಾರ್ಡ್ಸ್ (IRGC) ಈ ಹತ್ಯೆಗಳಿಗೆ ಭೀಕರವಾಗಿ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಎಚ್ಚರಿಕೆ ನೀಡಿದೆ, ಇದು ಇಡೀ ಮಧ್ಯಪ್ರಾಚ್ಯವನ್ನು ಮತ್ತೊಂದು ದೊಡ್ಡ ಯುದ್ಧದತ್ತ ದೂಡುವ ಭೀತಿ ಮೂಡಿಸಿದೆ.

ಸರ್ವೋಚ್ಚ ನಾಯಕ ಮತ್ತು ಸೇನಾ ಮುಖ್ಯಸ್ಥರಿಬ್ಬರನ್ನೂ ಕಳೆದುಕೊಂಡಿರುವ ಇರಾನ್ ಈಗ ನಾಯಕತ್ವದ ಶೂನ್ಯತೆಯನ್ನು ಅನುಭವಿಸುತ್ತಿದೆ. ಅಧಿಕಾರಕ್ಕಾಗಿ ಒಳಗೊಳಗೆ ತಿಕ್ಕಾಟಗಳು ಆರಂಭವಾಗುವ ಸಾಧ್ಯತೆಯೂ ದಟ್ಟವಾಗಿದೆ.

ಪ್ರಸ್ತುತ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಮತ್ತು ಇತರ ಪ್ರಮುಖ ನಾಯಕರ ಸುರಕ್ಷತೆಯ ಬಗ್ಗೆಯೂ ಗಂಭೀರ ಆತಂಕಗಳು ಎದುರಾಗಿವೆ,(ಏಜೆನ್ಸೀಸ್).