ಹಾರ್ಮುಜ್ ಜಲಸಂಧಿಯಲ್ಲಿ ಭಾರತೀಯ ಹಡಗುಗಳ ಸುರಕ್ಷಿತ ಸಾಗಣೆಗೆ ಇರಾನ್​ ಎರಡು ಕಂಡೀಷನ್​!

ನವದೆಹಲಿ: ಇರಾನ್​-ಇಸ್ರೇಲ್​ ನಡುವಿನ ಭೀಕರ ಯುದ್ಧ ದಾಳಿಯಿಂದ ಸದ್ಯ ಭಾರತದಲ್ಲಿ ಕಳೆದ ಒಂದು ವಾರದಿಂದ ಅನಿಲ ಬಿಕ್ಕಟ್ಟು ತೀವ್ರವಾಗಿದೆ. ದೇಶದ ಹಲವು ರಾಜ್ಯಗಳಲ್ಲಿ ಗೃಹಬಳಕೆ ಹಾಗೂ ವಾಣಿಜ್ಯ ಬಳಕೆಯ ಎಲ್​ಪಿಜಿ ಗ್ಯಾಸ್​ ಸಿಲಿಂಡರ್​ಗಳ ಸರಬರಾಜು ಸ್ಥಗಿತಗೊಂಡಿವೆ. ಇದರಿಂದ ಹೋಟೆಲ್ ಉದ್ಯಮವನ್ನೇ ನಂಬಿಕೊಂಡು ಬದುಕುತ್ತಿರುವ ಜನರು, ಹೋಟೆಲ್​ಗಳನ್ನು ಬಂದ್​ ಮಾಡುವ ಮೂಲಕ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಜನರ ತೀವ್ರ ಗೋಳಾಟಕ್ಕೆ ಶೀಘ್ರವೇ ಬ್ರೇಕ್ ಬೀಳಲಿದೆ ಎನ್ನುವ ಮಧ್ಯೆ ಇರಾನ್​ ಶಾಕ್​ ಮೇಲೆ ಶಾಕ್​ ನೀಡುತ್ತಿದೆ.

ಪ್ರಸ್ತುತ, ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಯಾವುದೇ ಹಡಗುಗಳು ಹಾರ್ಮುಜ್ ಜಲಸಂಧಿಯ ಮೂಲಕ ಹಾದುಹೋಗಲು ಬಿಡಕೂಡದು ಎಂದು ರೇಡಿಯೋ ಎಚ್ಚರಿಕೆಗಳನ್ನು ನೀಡಿದೆ. ಇದರ ಪರಿಣಾಮವಾಗಿ ಪ್ರಮುಖ ಜಲಮಾರ್ಗವು ಸಂಪೂರ್ಣವಾಗಿ ಬಂದ್​ ಆಗಿದೆ. ಭಾರತ ಸೇರಿದಂತೆ ತೈಲದ ಮೇಲೆ ಶೇ.50ರಿಂದ 60ರಷ್ಟು ಅವಲಂಬಿಸಿದ್ದ ಹಲವು ರಾಷ್ಟ್ರಗಳಿಗೆ ಈಗ ದಿಕ್ಕು ತೋಚದಂತಾಗಿದೆ. ಇರಾನ್ ತೆಗೆದುಕೊಂಡಿರುವ ಈ ಕಟು ನಿರ್ಧಾರವು ಭಾರತದಲ್ಲಿ ಗ್ಯಾಸ್​ ಸಿಲಿಂಡರ್​ಗಳ ಬೆಲೆಯನ್ನು ಏರಿಸಿದೆ ಮತ್ತು ಡಿಮಾಂಡ್​ ಕೂಡ ಹೆಚ್ಚಿಸಿದೆ.

ಇತ್ತೀಚಿನ ವರದಿ ಪ್ರಕಾರ, ಹಾರ್ಮುಜ್ ಜಲಸಂಧಿಯ ಮೂಲಕ ಭಾರತೀಯ ಹಡಗುಗಳ ಸುರಕ್ಷಿತ ಸಾಗಣೆಯನ್ನು ಖಚಿತಪಡಿಸಿಕೊಳ್ಳುವ ಉದ್ದೇಶದಿಂದ ಇರಾನ್​ ಮತ್ತು ಭಾರತದ ಮಧ್ಯೆ ನಿರಂತರ ಮಾತುಕತೆಗಳು ನಡೆಯುತ್ತಿವೆ. ಸದ್ಯ ಎರಡು ಷರತ್ತುಗಳನ್ನು ಭಾರತದ ಮುಂದಿಟ್ಟಿರುವ ಇರಾನ್​, ಫೆಬ್ರವರಿಯಲ್ಲಿ ವಶಪಡಿಸಿಕೊಂಡಿದ್ದ ಮೂರು ಇರಾನ್-ಸಂಬಂಧಿತ ಟ್ಯಾಂಕರ್‌ಗಳನ್ನು ಬಿಡುಗಡೆ ಮಾಡುವಂತೆ ತಿಳಿಸಿದೆ ಎಂದು ರಾಯಿಟರ್ಸ್ ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.

ಈ ಟ್ಯಾಂಕರ್‌ಗಳು ತಮ್ಮ ಗುರುತುಗಳನ್ನು ಮರೆಮಾಚಿವೆ, ಬದಲಾಯಿಸಿವೆ ಮತ್ತು ಸಮುದ್ರದಲ್ಲಿ ಅಕ್ರಮ ಹಡಗಿನಿಂದ ಹಡಗಿನ ವರ್ಗಾವಣೆಯನ್ನು ಕೈಗೊಂಡಿವೆ ಎಂದು ಭಾರತ ಆರೋಪಿಸಿ, ವಶಕ್ಕೆ ಪಡೆದಿತ್ತು. ಈಗ ಇದರ ಬಿಡುಗಡೆಯನ್ನು ಮೊದಲನೇ ಬೇಡಿಕೆಯಾಗಿ ಮುಂದಿಟ್ಟಿರುವ ಇರಾನ್​, ಔಷಧಿಗಳು ಮತ್ತು ವೈದ್ಯಕೀಯ ಉಪಕರಣಗಳ ಪೂರೈಕೆಯನ್ನು ಎರಡನೇ ಕಂಡೀಷನ್​ ಆಗಿ ಕೋರಿದೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).