ಅಮೆರಿಕದ ತಾಳಕ್ಕೆ ಪಾಕ್ ಕುಣಿಯುತ್ತಿದೆ: US-Iran ಸಂಧಾನಕ್ಕೆ ಪಾಕಿಸ್ತಾನ​ ನಾಲಾಯಕ್ ಎಂದ ಇರಾನ್​!

ಇರಾನ್ ಸಂಸತ್ತಿನ ರಾಷ್ಟ್ರೀಯ ಭದ್ರತೆ ಮತ್ತು ವಿದೇಶಾಂಗ ನೀತಿ ಆಯೋಗದ ವಕ್ತಾರ ಇಬ್ರಾಹಿಂ ರೆಜೈ ಅವರು ಪಾಕಿಸ್ತಾನದ ಮಧ್ಯಸ್ಥಿಕೆಯ ಬಗ್ಗೆ ತೀವ್ರ ಆಕ್ಷೇಪ ಎತ್ತಿದ್ದಾರೆ. "ಪಾಕಿಸ್ತಾನವು ನಮ್ಮ ಉತ್ತಮ ನೆರೆಹೊರೆಯ ರಾಷ್ಟ್ರ ಮತ್ತು ಸ್ನೇಹಿತ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಅಂತರರಾಷ್ಟ್ರೀಯ ಮಟ್ಟದ ಇಂತಹ ಸೂಕ್ಷ್ಮ ಸಂಧಾನಗಳನ್ನು ನಡೆಸಲು ಪಾಕಿಸ್ತಾನಕ್ಕೆ ಅಗತ್ಯವಾದ ವಿಶ್ವಾಸಾರ್ಹತೆ ಇಲ್ಲ," ಎಂದು ಅವರು ಗುಡುಗಿದ್ದಾರೆ. ಪಾಕಿಸ್ತಾನವು ವಾಷಿಂಗ್ಟನ್‌ನ ನಿರ್ಧಾರಗಳನ್ನು ಪ್ರಶ್ನಿಸಲು ಹಿಂಜರಿಯುತ್ತದೆ ಮತ್ತು ಸದಾ ಅಮೆರಿಕದ ಹಿತಾಸಕ್ತಿಗಳನ್ನೇ ಕಾಪಾಡುತ್ತದೆ ಎಂಬುದು ಇರಾನ್‌ನ ಪ್ರಮುಖ ಆರೋಪವಾಗಿದೆ.

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನಿಲುವುಗಳನ್ನು ಪಾಕಿಸ್ತಾನ ಎಂದಿಗೂ ಎದುರಿಸುವುದಿಲ್ಲ. ಅಮೆರಿಕವು ತನ್ನ ವಾಗ್ದಾನಗಳನ್ನು ಮುರಿಯುತ್ತಿದ್ದರೂ ಪಾಕಿಸ್ತಾನ ಮೌನಕ್ಕೆ ಶರಣಾಗಿದೆ ಎಂದು ರೆಜೈ ದೂರಿದ್ದಾರೆ. "ಮಧ್ಯಸ್ಥಿಕೆ ವಹಿಸುವವರು ಉಭಯ ದೇಶಗಳಿಗೂ ಸಮಾನವಾಗಿ ಸ್ಪಂದಿಸಬೇಕು. ಆದರೆ ಪಾಕಿಸ್ತಾನವು ಅಮೆರಿಕದ ತಾಳಕ್ಕೆ ತಕ್ಕಂತೆ ಹೆಜ್ಜೆ ಹಾಕುತ್ತಿದೆ," ಎಂದು ಅವರು ಟೀಕಿಸಿದ್ದಾರೆ. ಹಾರ್ಮುಜ್ ಜಲಸಂಧಿ ದಿಗ್ಬಂಧನ ಮತ್ತು ಪರಮಾಣು ನೀತಿಯ ಕುರಿತಾದ ಭಿನ್ನಾಭಿಪ್ರಾಯಗಳು ಇನ್ನೂ ಬಗೆಹರಿಯದಿರಲು ಪಾಕಿಸ್ತಾನದ ಈ ಪಕ್ಷಪಾತದ ನಿಲುವೇ ಕಾರಣ ಎಂದು ಹೇಳಲಾಗುತ್ತಿದೆ.

ಇದೇ ತಿಂಗಳ ಆರಂಭದಲ್ಲಿ ಪಾಕಿಸ್ತಾನವು ಇಸ್ಲಾಮಾಬಾದ್‌ನಲ್ಲಿ ಇರಾನ್ ಮತ್ತು ಅಮೆರಿಕದ ಉನ್ನತ ಮಟ್ಟದ ನಾಯಕರ ಸಭೆಯನ್ನು ಆಯೋಜಿಸಿತ್ತು. ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ ಮತ್ತು ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಈ ಸಭೆಯಲ್ಲಿ ಪಾಲ್ಗೊಂಡಿದ್ದರು. ಆದರೆ, ಈ ಮಾತುಕತೆಯು ಯಾವುದೇ ಸಕಾರಾತ್ಮಕ ಫಲಿತಾಂಶ ನೀಡದೆ ಅಂತ್ಯಗೊಂಡಿತ್ತು. ಹಾರ್ಮುಜ್ ಜಲಸಂಧಿ ಮತ್ತು ಯುರೇನಿಯಂ ಪುಷ್ಟೀಕರಣದ ಮಿತಿಯ ಕುರಿತು ಉಭಯ ದೇಶಗಳ ನಡುವೆ ಒಮ್ಮತ ಮೂಡಲಿಲ್ಲ. ಈ ವೈಫಲ್ಯವು ಪಾಕಿಸ್ತಾನದ ಮೇಲೆ ಇರಾನ್ ಇಟ್ಟಿದ್ದ ಅಲ್ಪಸ್ವಲ್ಪ ನಂಬಿಕೆಯನ್ನು ಅಳಿಸಿ ಹಾಕಿದೆ.

ಇಸ್ಲಾಮಾಬಾದ್ ಸಭೆಯಲ್ಲಿ ಭಾಗವಹಿಸಿದ್ದ ಇರಾನ್ ಸಂಸದ ಮಹಮೂದ್ ನಬಾವಿಯನ್ ಅವರು, "ಪಾಕಿಸ್ತಾನದಲ್ಲಿ ಅಂತಹ ಸಂವೇದನಾಶೀಲ ಮಾತುಕತೆ ನಡೆಸಲು ಒಪ್ಪಿದ್ದೇ ಒಂದು ದೊಡ್ಡ ತಾಂತ್ರಿಕ ತಪ್ಪು," ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇಸ್ಲಾಮಾಬಾದ್‌ನಂತಹ ಸ್ಥಳದಲ್ಲಿ ಮಾತುಕತೆ ನಡೆಸುವ ಮೂಲಕ ನಾವು ಅಮೆರಿಕಕ್ಕೆ ಹೆಚ್ಚಿನ ಒತ್ತಡ ಹೇರಲು ಅವಕಾಶ ಮಾಡಿಕೊಟ್ಟಂತಾಯಿತು ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ. ಪರಮಾಣು ವಿಷಯಗಳಂತಹ ಅತ್ಯಂತ ಗೌಪ್ಯ ಮತ್ತು ಸೂಕ್ಷ್ಮ ವಿಚಾರಗಳನ್ನು ಪ್ರಾದೇಶಿಕ ಮಧ್ಯಸ್ಥಿಕೆಗಳೊಂದಿಗೆ ಬೆರೆಸುವುದು ಅಪಾಯಕಾರಿ ಎಂದು ಅವರು ಎಚ್ಚರಿಸಿದ್ದಾರೆ.

ಪಾಕಿಸ್ತಾನವು ಮಾತುಕತೆಯನ್ನು ಸರಿಯಾದ ರೀತಿಯಲ್ಲಿ ನಿರ್ವಹಿಸಲು ವಿಫಲವಾಗಿದೆ ಎಂಬುದು ಟೆಹ್ರಾನ್‌ನ ಬಹುತೇಕ ಅಧಿಕಾರಿಗಳ ನಿಲುವಾಗಿದೆ. ಹೀಗಾಗಿ, ಭವಿಷ್ಯದಲ್ಲಿ ಅಮೆರಿಕದೊಂದಿಗೆ ಮಾತುಕತೆ ಮುಂದುವರಿಸಬೇಕಾದರೆ ಹೆಚ್ಚು ತಟಸ್ಥವಾಗಿರುವ ಮತ್ತು ಅಮೆರಿಕದ ಪ್ರಭಾವಕ್ಕೆ ಒಳಗಾಗದ ಬೇರೆ ದೇಶಗಳನ್ನು ಮಧ್ಯಸ್ಥಿಕೆಗಾಗಿ ಹುಡುಕಬೇಕು ಎಂಬ ಒತ್ತಾಯ ಇರಾನ್‌ನಲ್ಲಿ ಕೇಳಿಬರುತ್ತಿದೆ. ಈ ಬೆಳವಣಿಗೆಯಿಂದಾಗಿ ಇರಾನ್ ಮತ್ತು ಪಾಕಿಸ್ತಾನದ ನಡುವಿನ ದ್ವಿಪಕ್ಷೀಯ ಸಂಬಂಧಗಳಲ್ಲೂ ಬಿರುಕು ಮೂಡುವ ಸಾಧ್ಯತೆ ಇದೆ,(ಏಜೆನ್ಸೀಸ್).